ސީރިޔާގެ ވެރިރަށް ދިމިޝްޤުގެ އިރުމަތީ އަވަށެއްގެ މާރުކޭޓަކަށް ދެވުނު ރޮކެޓު ހަމަލާއެއްގައި 35 މީހުން މަރުވެެއްޖެކަމަށް އެޤައުމުުގެ ރަސްމީ ޚަބަރު ފަތުރާ ވަސީލަތްތަކުން ބުނެފިއެވެ.
ދިމިޝްޤް ހޮސްޕިޓަލުގެ ޑިރެކްޓަރު ޑޮކްޓްރ ހައިޘަމް އަލްޙުސައިނީއާ ޙަވާލާދީ ސާނާ ނިއުސްް އެޖެންސީން ބުނާ ގޮތުގައި އެ ހޮސްޕިޓަލަށް މަރުވެފައިވާ 35 މީހެއްގެ ހަށިގަނޑު ގެނެވުނެވެ. އަދި އެއެންމެންނަކީ ވެސް 'އާއްމުން'ނެވެ.
ފުލުހުންގެ އިސްވެރިޔަކާ ހަވާލާދީ ސީރިޔާގެ ރަސްމީ ޓީވީން ޚަބަރުދިން ގޮތުގައި 'ޓެރަރިސްޓު ޖަމާއަތްތަކުން' ދިން ރޮކެޓު ހަމަލާ އަމާޒުވެފައި ވަނީ ދިމިޝްޤުގެ އިރުއުތުރު ރަށްބޭރުގެ ޖަރްމާނާ ސަރަަހައްދުގައިވާ ކަޝްކޫލް އަވަށުގެ ތޮއްޖެހިފައިވާ މާރުކޭޓަަކަށެވެ. ފުލުުހުން ބުނެފައިވާ ގޮތުގައި މަރުވި މިހުންގެ އިތުރަށް 23 މީހުން ޒަޚަމްވެފައި ވެއެވެ.
2011 ވަނަ އަހަރު ސީރިޔާގެ ދާޚިލީ ހަނގުރާމަ ފެށުނު ފަހުން، މިއީ ދިމިޝްޤާއި އެރަށުގެ ރަށްބޭރުގައިވާ އަވަށްތަކުގައި އެންމެ ގިނަ މީހުން މަރުވި ހަމަލާއެވެ.
"ގޮވުމުގެ ގަދަ އަޑުފަށްގަނޑާއެކު އަހަރުމެންނަށް ލިބުނީ ބޮޑު ބިރުވެރިކަމެއް. އެ ރޮކެޓް ވެއްޓުނީ އާއްމު މާރުކޭޭޓެއްގެ މެދުތެރޭގައިވާ ޗެކް ޕޮއިންޓެއްގެ ކައިރިއަށް." އޭއެފްޕީއާ ވާހަކަދައްކަމުން ކަޝްކޫލު އަވަށުގެ ނަރުހަކު ބުންޏެވެ. 18 ފެެބްރުއަރީން ފެށިގެން އިރުމަތީ ޣޫޠާގައިގައި ސަރުކާރު ސިފައިންގެ ޙަމަލާތައް ފެށުނު ފަހުން ދިމިޝްޤާއި އެރަށުގެ ވަށައިގެންވާ އަވަށްތަކަށް ދެވޭ ހަމަލާތައް ވަނީ އިތުރުވެފައެވެ.
އަނެއްކޮޅުން ސީރިޔަން އޮބްޒަވޭޓަރީ ފޯ ހިއުމަން ރައިޓްސް އިން ޚަބަރުދޭ ގޮތުގައި އިއްޔެ އިސްލާމިކް ސްޓޭޓްގެ ހަނގުރާމަވެރިން ދިމިޝްޤުގެ ދެކުނުގައިވާ އަލްޤަަދަމް އަވަށަށް ދިން ހަމަލާއެއެްގައި ސީރިޔާ ސަރުކާރުގެ ސިފައިންނާއި، ސަރުކާރަށް ތާއީދުކުރާ ހަނގުރާމަވެރިންގެ ތެެރެއިން 36 މީހުން މަރާލާފައި ވެއެވެ. އަދި ހަމަލާތައް ބަދަލުުކުރުމަށްފަން އިސްލާމިކް ސްޓޭޓްގެ ހަނގުރާމަވެރިން ވަނީ އެއަވަށް ހިފާފައެެވެ.
