ޣައްޒާގައި ފަލަސްޠީނުގެ ބޮޑުވަޒީރު ރާމީ ޙަމްދަﷲ އަވާހަރަކޮށްލަން ފާއިތުވި ހަފުތާގައި ދެވުނު ޙަމަލާގެ ފަހަތުގައި ވަނީ ފަލަސްޠީނުގެ އިސްލާމިކް ރެސިސްޓެންސް މޫވްމަންޓް (ޙަމާސް) ކަމުގައި ފަލަސްޠީނުގެ ރައީސު މަޙްމޫދު ޢައްބާސް ވިދާޅުވެއްޖެއެވެ. އޭނާގެ މިތުހުމަތު ރައްދުގައި ޙަމާސްގެ ފަރާތުން ގޮވާލީ އާއްމު އިންތިޚާބަކަށެވެ. "އެއްބައިވަންްތަކަން ޤާއިމުކުރުމަށް އެންމެ ޙައްޤުކަން ބޮޑު، ރައްޔިތުންގެ މަސްލަހަތުތައް އެންމެ ރަނގަޅަށް ރައްކާތެރިކޮށްދޭނެ ބަޔަކު ހޮވުމުގު ފުރުޞަތު ރައްޔިތުންނަށް ދިނުމަށްޓަކައި، ރިޔާސީ އިންތިޚާބާއި، ޤަނޫނު ހަދާ މަޖިލީހަށް މެންބަރުން ހޮވުމަށް އާއްމު އިންތިޚާބު ބާއްވަންޖެހޭ" ކަމަށް ޙަމާސްގެ ފަރާތުން ބުނެފައި ވެއެވެ.
ރައީސު މަޙްމޫދު ޢައްބާސުގެ ތުހުމަތުތައް އައީ ރާމަﷲ ގައި ބޭއްވުނު ޕީއެލްއޯ އާއި ފަތަޙަ ޖަމާޢަތުގެ އިސްވެރިންގެ ބައްދަލުވުމެއްގައެވެ. "އެ ސިޔާސަތު (އިސްވެރިންނަށް ޙަމަލާ ދިނުމުގެ ސިޔާސަތު) އުފަންވީ އެބައިމީހުންނާ އެކު. އެ ސިޔާސަތަކީ އެބައިމީހުން އުފެއްދި އެއްޗެއް. އެހެންކަމުން އަހަރުމެން ބުނާނީ މިކަން މިގޮތަށް ކުރިއަށް ދާން ދޫކޮށްނުލާނަމޭ. ދެން، އެބައިމީހުން ތިމަންނާމެން ތަހްްގީގުކުރާނަމޭ، ނުވަތަ ނުކުރާނަމޭ ބުންޏަސް، އަހަރުމެން އެބައިމީހުންގެ ފަރާތުން ތަހުގީގެއްވެސް އަދި މައުލޫމާތެއްވެސް ބޭނުމެއް ނޫން. އެ ހާދިސާގެ ފަހަތުގައި ވަނީ، އަދި ދަށުދަރަޖައިގެ އެ ޖަރީމާ ހިންގީ ހަމަ އެބައިމީހުން (ޙަމާސް ޖަމާއަތް) ކަން އަހަރުމެންނަށް އެނގޭތީ." މަޙްމޫދު ޢައްބާސް ވިދާޅުވިއެވެ.
ބޮޑުވަޒީރު ޙަމްދަﷲ އާއި އިންޓެލިޖެންސް އެޖެންސީގެ ވެރިޔާ ޙައްމާދު ފަރަޖަށް ދެވުނު ޙަމަލާ ކާމިޔާބު ވިނަމަ އޭގެ ނަތީޖާ ވަރަށް ހިތިވާނެ ކަމަށާއި، ފަލަޞްޠީނުގައި ދާޚިލީ ހަނގުރާމައެެއް ފެށުނީސް ކަމަށެވެ.
ޢައްބާސްގެ ތުހުމަތުތަކަށް ރައްދުދެމުން އިންތިޚާބަަށް ގޮވާލުމުގެ އިތުރުން ޙަމާސްއިން ބުނެފައި ވަނީ ޢައްބާސްގެ ވާހަަކަފުޅުތަކަކީ މިޞްރު މެދުވެރިއެއްގެ ގޮތުގައި އޮވެގެން ވެވުނު ސުލްހަވެރިވުމުގެ އެއްބަސްވުމާ ޚިލާފު ވާހަަކަފުޅުތަކެއް ކަމުގައެވެ. އަދި އެއްބަސްވުމުގެ ކަންތައް ކުރިއަށްދާ ގޮތް ބަލަމުންދާ މިޞްރަށްވެސް ކުރެވުނު ބޭއިންސާފެއް ކަމުގައެވެ.
އަދި ޢައްބާސްގެ ތުހުަމަތުތަކު ސަބަބުން ފަލަސްޠީނުގެ ދާޚިލީ މަސްރަޙު ކޮންޓްރޯލް ނުވެ ނުރައްކާތެރި ދަރައަކަށް ދިއުމުގެ ކުރިން ފިޔަވަޅު އެޅުމަށް އަރަބްލީގަށާ، ބައިނަލްއަޤްވާީ އެހެން ޖަމާއަތްތަކަށް ޙަމާސްއިން ވަނީ ގޮވާލާފައެވެ.
2007 ވަނަ އަހަރު ޣައްޒާގެ ކޮންޓްރޯލް އަތުލައި އެސަރަޙައްދުގައި ޙަމާސްގެ ސަރުކާރެއް ޤާާއިމުކުރި ފަހުން ޕީއެލްއޯއާ ޙަމާސްއާ ދެމެދު އަބަދުވެސް ނުތަނަވަސްކަން އޮވެއެވެ.
