ކ. ހުރާގައި ޒުވާނުންގެ ހުނަރާއި ގާބިލުކަން އިތުރުކުރުމަށް އަމާޒުކޮށްގެން ބޭއްވި "ޔޫތު ލީޑަރޝިޕް ކޭމްޕް" ކާމިޔާބުކަމާއެކު ނިންމާލައިފިއެވެ.
3 ދުވަހުގެ މުއްދަތަށް ހުރާ ކޭމްޕް ސައިޓްގައި ހިންގި މި ހަރަކާތުގައި 31 ޒުވާނުން ވަނީ ބައިވެރިވެފައެވެ.
މި ކޭމްޕް ކުރިއަށް ގެންގޮސްފައިވަނީ އެމް.އެން.ޑީ.އެފް ގެ ކޮލެޖް އޮފް ޑިފެންސް އެންޑް ސެކިއުރިޓީ ސްޑަރޑީޒް އެހީތެރިކަމާއި އެކުގައެވެ.
މި ކޭމްޕުގެ ތެރެއިން ލީޑަރޝިޕްގެ ހުނަރުތަކާއި ލައިފްސްކިލް އެޑިއުކޭޝަނާއި ވެލިއުސް އެންޑް އެތިކްސް އާއި މުޖުތަމައެއްގައި އެކުގައި މަސައްކަތްކުރުމާއި ނަފްސާނީ ދުޅަހެޔޮ ކަމާއި ޓީމް ބިލްޑިންގ ހަރަކާތްތަކުގެ އިތުރުން ޒުވާނުންގެ ވިސްނުން ތަރައްގީކޮށްދޭނެ ގިނަ ހަރަކާތްތައް ވަނީ ކުރިއަށް ގެންގޮސްފައެވެ.
މީގެ އިތުރުން ފަޔަރ ސޭފްޓީ އާއި ސެލްފް ޑިފެންސް އާއި ސައިބަރ ސޭފްޓީ / ސައިބަރ ކްރައިމް ޕްރިވެންޝަން އަދި ފަތަން ދަސްކޮށްދިނުން، ފަދަ ހަރަކާތްތައް ވެސް މި ކޭމްޕުގައި ވަނީ ކުރިއަށް ގެންގޮސްފައެވެ.
މި ކޭމްޕުގެ ލަނޑުދަނޑިތަކުގެ ތެރޭގައި ޒުވާނުންނަކީ ޒިންމާދާރު ބަޔަކަ ހެދުމާއި ޒުވާން ލީޑަރުން ބިނާކުރުމާއި މުޖުތަމަޢުގައި ޒުވާނުންގެ ދައުރު ފުޅާކޮށް އިތުރު ކުރުމުގެ އިތުރުން ޒުވާނުންނަކީ ހުނަރުވެރި ބަޔަކަށް ހެދުމާއި ޒުވާނުންނާއި ގުޅޭ ތަމްރީން ޕްރޮގްރާމްތަކަށް އަހުލުވެރިކުރުވުމާއި ޒުވާނުންގެ މެދުގައި އިޖުތިމާއީ ގުޅުން ބަދަހި ކުރުން އަދި މުޖުތަމައުގައި ހިނގަމުންދާ އެކިއެކި މައްސަލަތަކާއި ގުޅޭގޮތުން ހޭލުންތެރިކުރުވުން ހިމެނެއެވެ.
ޔޫތު ލީޑާރޝިޕް ކޭމްޕް ކޭންޕަކީ ޒުވާނުންގެ މެދުގައި އިޖްތިމާއީ ގުޅުން ބަދަހި މުޖުތަމައެއް ބިނާކޮށް، ޒުވާނުންނަށް ބޭނުންވައި ހުނަރާއި ތަމްރީނުދީ އަދި ޒުވާނުންނާއި ގުޅޭ ދާއިރާތަކާއި މެދު ހޭލުންތެރިކުރުމުގެ މަގްސަދުގައި ހިންގާ ކޭމްޕެކެވެ.
މިއީ އުމުރުން 16 އަހަރާ 25 އަހަރާ ދެމެދުގެ ޒުވާނުންނަށް އަމާޒުކޮށްގެން ކުރިއަށް ގެންދިޔަ ކޭމްޕެކެވެ.