ރ. އިންނަމާދޫގައި ޓެކްނިކަލް ވޮކޭޝަން އެޑިޔުކޭޝަން އެންޑް ޓްރެއިނިންގ(ޓިވެޓް) ސެންޓަރެއް ބިނާކުރުމާއި، ރ.ހުޅުދުއްފާރުގައި އެކޮމޮޑޭޝަން ފެސިލިޓީއެއް ޤާއިމުކުމުގެ މަސައްކަތްތައްކުރުމަށް މަތީ ތަޢުލާމާއި ތަރައްޤީއާއި މަސައްކަތްތަކާއި ހުނަރުތައް ތަރައްޤީކުރުމާއި ބެހޭ ވުޒާރާ އަދި ކޮންޓްރެކްޓަރުންނާއިއެކު އެއްބަސްވުމުގައި ސޮއިކުރެވިފައެވެ.
ރ. އިންނަމާދޫ ޓިވެޓް ސެންޓަރު:
މި ސެންޓަރު ޚާއްޞަކުރެވިފައިވަނީ ރާއްޖޭގެ ސަގާފީ އަދި އިޤްތިޞާދީ ގޮތުން މުހިންމު ދާއިރާއެއް ކަމަށްވާ ބޯޓް-ބިލްޑިންގ ނުވަތަ ދޯނިފަހަރު ބަނުމުގެ ދާއިރާއިން މީހުން ތަމްރީނު ކުރުމަށެވެ. މަސައްކަތުގެ ދުވެލި އަވަސްކުރުމުގެ ގޮތުން މި އިމާރާތް ތައްޔާރުކުރާނީ ޕްރީ-ފެބް އުސޫލުންނެވެ. މި އިންސްޓިޓިއުޓްގައި ކިޔަވައިދިނުމަށް ބޭނުންވާނެ އެންމެހާ ޒަމާނީ ވަޞީލަތްތައް ޤާއިމުކުރެވޭނެއެވެ. މި މަޝްރޫއުގެ މަސައްކަތް ކުރިއަށް ގެންދިއުމަށް ހަވާލު ކުރެވިފައިވަނީ ސެންޓްރަލް ލައިން ޕވޓ. ލޓޑ.
ރ. ހުޅުދުއްފާރު އެކަމަޑޭޝަން ފެސިލިޓީ:
މިއީ ދަރިވަރުންނަށް ބޭނުންވާ ބޯހިޔާވަހިކަން ފޯރުކޮށްދިނުމަށް ތަރައްޤީކުރާ ތަނެކެވެ. މި ފެސިލިޓީގައި ތަފާތު މޮޑެލްތަކުގެ އެކަމަޑޭޝަން ހިމެނެއެވެ. އެގޮތުން ދަރިވަރުންގެ އާއިލާތަކަށް އެކުގައި ތިބެވޭނެ ފަދަ 2 ކޮޓަރީގެ އަދި 3 ކޮޓަރީގެ އެޕާޓްމަންޓްތަކުގެ އިތުރުން، ވަކިން ދިރިއުޅެވޭނެ ސްޓޫޑިއޯ އެޕާޓްމަންޓްތައް ހުންނާނެއެވެ. ކޮންމެ އެޕާޓްމަންޓެއްގައިވެސް ކެއްކުމާއި ލޯންޑްރީ ފަދަ އަސާސީ ހުރިހާ ޚިދުމަތްތަކެއް ލިބެން ހުންނާނެއެވެ. މި މަޝްރޫއުގެ މަސައްކަތް ކުރިއަށް ގެންދިއުމަށް ހަވާލު ކުރެވުނީ އެމް.ޓީ.ސީ.ސީ އާއެވެ.
މިނިސްޓްރީން ހާމަކުރި ގޮތުގައި، އިރާދަކުރެއްވިއްޔާ މި ދެ ރަށުގައި ބިނާކުރެވޭ ވަޞީލަތްތަކުގެ އިތުރުން ރ. އަލިފުއްޓާއި ދުވާފަރުގައި ކުރިއަށްދާ މަޝްރޫއުތަކާއެކު، ރ. އަތޮޅު ވެގެންދާނީ މަތީ ތަޢުލީމު ދިނުމުގައި ފާހަގަކޮށްލެވޭ އަތޮޅަކަށެވެ. މިއީ މި ސަރަޙައްދުގެ ޒުވާނުންގެ މުސްތަޤުބަލަށްޓަކައި އެޅޭ ވަރުގަދަ ބިންގަލެކެވެ.
މި ރަސްމިއްޔާތުގައި މިނިސްޓަރ ޑރ.އަލީ ޙައިދަރު އަޙްމަދު ގެ ވާހަކަފުޅުގައި ވިދާޅުވީ، މި މަޝްރޫއުތަކުގެ މައިގަނޑު ބޭނުމަކީ ރަށުގައި ތިބެގެން ފެންވަރު ރަނގަޅު ތަޢުލީމު ހޯދުމުގެ ފުރުޞަތު ރައްޔިތުންނާ ވީހާވެސް ގާތުން ފޯރުކޮށްދިނުން ކަމުގައެވެ. އަދި މި މަޝްރޫއުތަކުގެ ސަބަބުން މަސައްކަތްތެރިކަމުގެ ބާޒާރަށް ބޭނުންވާ ފަންނީ އަދި ހުނަރުވެރި ދިވެހި ޒުވާނުން އުފެއްދުމަށް ބޮޑު ބާރަކަށް ވެގެންދާނެ ކަމުގައެވެ. ސަރުކާރުގެ އަމާޒަކީ ދިވެހި ކޮންމެ ކުއްޖަކަށްވެސް، އެކުއްޖަކު ހުރި ރަށަކުން ނުވަތަ ކައިރި ރަށަކުން މަތީ ތަޢުލީމުގެ ފުރުޞަތު ހޯދައިދިނުމެވެ.މިނިސްޓަރ ވަނީ މަސައްކަތް ހަވާލުކުރެވުނު ކޮންޓްރެކްޓަރުންނަށް، ވީ އެންމެ އަވަހަކަށް ޑިޒައިންގެ މަސައްކަތްތައް ނިންމައިދެއްވާ އަމަލީ މަސައްކަތް ފެށުމަށް އިލްތިމާސްކުރައްވާފައެވެ.
