( 24 އޯގަސްޓް 2025 ގައި ޝާއިޢުކުރި ބަޔާގުޅޭ )
މުރުތަސިމް އެވަގުތުހުރީ ވަރަށް ހުޝިޔާރީ ޙާލަތެއްގައެވެ. އަބުރާއި ޢިއްޒަތް ޤުރްބާންކޮށްފައި ، މީރަބް އެތަނުން ފުންމާލަފާނެކަން ، މުރުތަސިމަށްވެސް އެނގެއެވެ.
ކުއްލިޔަކަށް ، މީރަބްގެގާތަށް ކުރިޔަށް ޖެހިލައި ، މުރުތަސިމްގެ އަތް މީރަބާ ދިމާލަށް ދިއްކޮށްލަމުން ބުންޏެވެ.
" މަޑުކުރާށެވެ ! މީރަބްހަދަނީ ތެދުކަން އަބަދުވެސް އަހަރެން ޤަބޫލުކުރަމެވެ. އެހެންނަމަވެސް ، އަހަރެންނަށް ވަޢުދެއްވާން ޖެހެއެވެ. އެއީ ، ދުވަހަކުވެސް ، ރޮހޭލާ ބައްދަލުނުކުރާނެކަމަށް އަހަރެންނަށް ވަޢުދުވުމެވެ. " މުރުތަސިމް ބުންޏެވެ.
މުރުތަސިމާ ދިމާލަށް ބަލަހައްޓައިގެން އިރުކޮޅަކު ، މީރަބް ހުއްޓެވެ. އަދި މަޑުމަޑުން އޭނާގެ އަތް ގެންގޮސް ، މުރުތަސިމް ދިއްކޮށްގެންހުރި އަތުގެ ތެރެޔަށްލައި ، މުރުތަސިމްގެ އަތުގައި ހިފިއެވެ.
" ތިކަހަލަ ވަޢުދެއްވުމަށްވުރެ ، މަރުވުންވެސް މާފަސޭހައެވެ. އެއީ ، ކީއްވެގެންކަން އެނގޭ ހެއްޔެވެ ؟ ކުރާހާ ވަޢުދަކާ ހުވަޔަކީ ، މަރާއެކު ނެތިދާނެ އެއްޗެކެވެ. އެކަމަކު ، ދިރިހުންނަންޖެހޭނީ ، އެވާ ވަޢުދެއް ފުއްދުމަށްޓަކައެވެ. " މީރަބް ބުންޏެވެ.
މުރުތަސިމް ކޮއްޕައިލުމަށްފަހު ، މުރުތަސިމްގެ އަތުން ދޫވެގެން ގޭތެރެޔަށް ވަދެގެން މީރަބް ދިޔައެވެ. މުރުތަސިމްހުރީ ، މީރަބްގެ ޖަޒްބާތީ އެ ވާހަކައިގެ ތެރެޔަށް ގެއްލިފައެވެ.
ގޭތެރެޔަށް ވަދެގެން ދިޔަގޮތަށްގޮސް ނޯކަރަކަށް ގޮވައި ، މީރަބް ކެއްކި ހުރިހާ އެއްޗެއް އުކައިލުމަށް އެންގިއެވެ. އެގޭގައި ، ބަނޑުހައިވެފައިހުރި އެކަކުވެސް ނެތެވެ.
" މަޑުކުރާށެވެ ! އަހަރެން މިހުރީ ބަނޑުހައިވެފައެވެ. އަހަރެން ކާނަމެވެ. " ގޭތެރެޔަށް ވަދެގެން އަންނަމުން މުރުތަސިމް ބުންޏެވެ.
މުރުތަސިމް އައިއިރު ، ހިތްހަމަ ނުޖެހިފައި ހުއްޓަސް ، އޭނާއަށް މީރަބް ކާންދޭނެކަމަށް މުރުތަސިމް ހީކުރިއެވެ. އެހެންނަމަވެސް ، ބޯ ހޫރައިލުމަށްފަހު ، މީރަބް ދިޔައީ އޭނާގެ ކޮޓަރިއަށެވެ. އެތަނުގައި މަޑުކުރާކަށް ނުހެދިއެވެ. ނޯކަރު އައިސް ، މުރުތަސިމްގެ ތަށްޓަށް ކާ އެއްޗެތި އަޅަން ފެށުމުން ، މުރުތަސިމް ބަލައިލިއިރު މީރަބެއް އެތާކު ނެތެވެ. ކާ އެއްޗެތި އަޅާނީ އޭނާ އަމިއްލަޔަށްކަމަށް ބުނެ ، ނޯކަރު ފޮނުވައިލިއެވެ. މާނޭވާއެއްލައި ، މުރުތަސިމްގެ ހިތުގައިވާ އުދާސްގަނޑު ބޭރުކޮށްލިއެވެ.
މީރަބްގޮސް ކޮޓަރިޔަށް ވަތްތަނުން ، ފޯނެއް އައުމުން ބަލައިލިއިރު އެއީ ސަބާގެ ފޯނެކެވެ. މީރަބް ، ފޯނުނެގުމާއެކީ ރޮހޭލް އާ ބައްދަލުކޮށްލަން އެގެޔަށް އައުމަށް ރޮހޭލް އެދޭވާހަކަ ސަބާ ބުންޏެވެ. މީރަބް މިހާރު އެހުރީ އަޙްމަދުއާބާދުގައެވެ. ކަރާޗީއަކު ނޫނެވެ. އެހެންވީމާ އެއީ ވާނެކަމެއްނޫނެވެ.
ސަބާއަތުން ފޯނުއަތުލައި ، އޭނާއަށް އަންގައިނުލާ މީރަބް ދިއުމުން ރޮހޭލް ޝަކުވާކޮށްގަތެވެ. އަދި ރޮހޭލްގެ ޢާންމު ވާހަކައިން އޭނާގެ ލޯބި މީރަބަށް އިޙްސާސްކޮށްދޭން މަސައްކަތް ކުރިއެވެ. އެހެނަސް ، މީރަބަށް އެވަގުތު ވާހަކަ ދެއްކެން ނެތްކަމަށްބުނެ ، ފަހުންވެސް ރޮހޭލާ ބައްދަލު ކުރެވޭނެކަމެއް ނޭނގޭކަމަށް ބުނަމުން ، ރޮހޭލް ދައްކާ ވާހަކަޔަކަށް ނުބަލައި ، މީރަބް ފޯނުކަނޑައިލިއެވެ. މުރުތަސިމަކީ ރުޅިގަދަ މީހެކެވެ. ރޮހޭލްއާއި މީރަބާ ދެމީހުން އެއްތާކުން ފެނިއްޖިއްޔާ ރޮހޭލް މަރައިލަންވެސް މުރުތަސިމް ފަހަކަށް ނުޖެހޭނެއެވެ. ދެމީހުންނަށްވެސް އޮތް އެންމެ ރަނގަޅު ގޮތަކީ ، އެކަކު އަނެކަކު ހަނދާން ނައްތައިލުމެވެ.
ދެމަފިރިއެއްގެ ގުޅުމުން ، މީރަބާއި މުރުތަސިމާ ދެމެދު ، އެއްވެސްކަމެއް ނުހިނގާކަމަށް ، މީރަބަށް އޮތީ ރޮހޭލްގާތު ބުނެވިފައެވެ. އެކަމާ ގުޅިގެން ، މީރަބްވެސް ރޮހޭލްދެކެ ލޯބިވާކަމަށް ރޮހޭލް ހުންނަނީ ޔަޤީންކޮށްގެންނެވެ. ކޮންމެފަދަ ނުރައްކަލަކާ ކުރިމަތިލާން ޖެހުނަސް ، މުރުތަސިމްގެ ކިބައިން މީރަބް ސަލާމަތްކޮށްގެން ، ރޮހޭލްގެ މީހަކަށް މީރަބް ހެދުމަށް ރޮހޭލް އެހުންނަނީ ހުވާކޮށްގެންނެވެ.
އަނެއްދުވަހުގެ އިރުއޮއްސުނުތަނާ ، މީރަބްގެނެސް ބުރުގާ އަޅުވައިދީ ، ޙަޔާ ބަލައި އަވަށަށް ދިއުމަށް މީރަބަށް ، ޚާނަމް އެންގިއެވެ. މުރުތަސިމްގާތު ނުބުނެ ، ބޭރަށްދާކަށް މީރަބް ބޭނުމެއް ނުވިއެވެ. އިހަކަށްދުވަހު އެ ހިނގައިދިޔަ ޙާދިސާއާ ގުޅިގެން ، މީރަބް ހުންނަނީ ވަރަށް ވިސްނައިގެންނެވެ، މުރުތަސިމް ހިތްހަމަ ނުޖެހިދާނެ ކަމެއް ކުރެވިދާނެތީ ބިރުންނެވެ. މުރުތަސިމްގެ ކަންތައް އޭނާ ހަމަޖައްސާނެކަމަށް ޚާނަމް ބުނެ ، އެއްގޮތަކަށްވެސް ދުލެއް ނުކުރިއެވެ. މީރަބަށް ޙަޔާގެ ފަރާތުން އިހަކަށްދުވަހު އެލިބުނު އަނިޔާއާ ގުޅިގެން ، ޙަޔާއަކީ އޭނާއަށް ކޮންމެފަދަ އަނިޔާއެއްވެސ ދީފާނެ މީހެއްކަން މީރަބަށް އެނގެއެވެ. އަނެއްކާ ، ޚާނަމާއި ޙަޔާއާ ދެމީހުން ބައިވެރިވެގެން ، މީރަބަށް އަނިޔާއެއްދޭން ރާވަނީ ނޫންބާވައެވެ. ހަދާނެ ވަކިގޮތެއް ނޭނގިފައި މީރަބް ހުއްޓާ ، ޚާނަމް ކުރުނުކޮށްގެން އެންމެފަހުން ، ޙަޔާ ބަލައި މީރަބް ނުކުތެވެ. ކާރު ފޮނުވި ވާހަކައާއި ކާރު ދިޔައިމަ ލަސްނުކޮށް ޙަޔާ އެގެޔަށް އައުމަށް ޙަޔާއަށް ޚާނަމް އެންގިއެވެ.
ޙަޔާ ހުރީ ، އޭނާބަލައި އަންނާނީ މުރުތަސިމްކަމަށް ބަލައިގެން އުފަލުންގޮސް ފޮޅިފައެވެ. އެހެން ހުއްޓާ އޭނާ ބަލައި އެއައީ މީރަބެވެ. މީރަބާއެކީ ނުދާން ޙަޔާ ގަދަ ދައްކައިލިއެވެ. އެހެނަސް ، އެނބުރި އެގެޔަށްދާން ލިބުނު ފުރުޞަތު ނަގައިލާކަށް ޙަޔާ ބޭނުމެއް ނުވިއެވެ. މީރަބާ އެކީ އެރޭ ނުގޮއްސިއްޔާ ދެން ދުވަހަކުވެސް އޭނާއަށް އެގެޔަށް ނުދެވިވެސް ދާނެއެވެ. ޚާނަމްއަކީ ފާޑެއްގެ މީހެކެވެ. ހިތް ނޭދުނަސް އެންމެފަހުން ، މީރަބާއެކީ ގެޔަށްދާން ޙަޔާ ނުކުތެވެ.
ގެއިން ފުރަތަމަވެސް ޙަޔާއާ ބައްދަލުކުރީ މަރިޔަމްއެވެ. މަންމަޔާއި ބޭބެއާ ދެމީހުން ޙަޔާގެ އިންތިޒާރުގައި ސިޓިންގރޫމުގައި ތިބި ވާހަކަ ބުނުމާއެކު ، ޙަޔާ ދުއްވައިގަތެވެ. އޭނާގެ ލޮލަށް މުރުތަސިމް ނުފެންނަތާ މިހާރު ދެހަފުތާ ވެއްޖެއެވެ.
ޙަޔާއަށް ސިޓިންރޫމަށް ދެވުނުއިރު ، އޭނާ ނުދަންނަ އެހެން އަންހެނަކާ ޒުވާން ފިރިހެން ކުއްޖަކު ޚާނަމްއާއެކީ ތިއްބެވެ. ޙަޔާ އެތަނަށް ދިއުމާއެކީ ، ޙަޔާއަށް އެއަންހެނާއާއި ފިރިހެންކުއްޖާ ތަޢާރުފް ކޮށްދިނެވެ. ޙަޔާއަށް ތަޢުރީފް ކުރަމުން ، އެ އަންހެނާގެ ގާތުގައި އިށީނުމަށް އޭނާ އެދުނެވެ. އަދި ، އޭނާގެ ޅީދަރިއެއްގެ ގޮތުގައި ޙަޔާ ބަލައިގަންނަން ރުހޭކަމަށް ޚާނަމް ގާތު ބުންޏެވެ. އަދި ، އެކަމަށް އެމީހުން ހުއްދަ ދިނުމަށް އެދުނެވެ. ގޭގެ އެކަހަލަ ކަންކަން ނިންމާނީ މުރުތަސިމްކަމަށްބުނެ ، އެ ޒިންމާ ، ޚާނަމް ޙަވާލުކުރީ މުރުތަސިމާއެވެ. މުރުތަސިމް އެކަމަށް އިޒުނަދީ ، އެކައިވެންޏަށް ރުހި ޤަބޫލުކަމަށް މުރުތަސިމް ބުންޏެވެ.
ޙަޔާއަށް އެތާ އިނދެވެނީކީ ނޫނެވެ. ކުއްލިޔަކަށް ތެދުވެ ، އޭނާގެ ކޮޓަރިޔަށްގޮސް ، މަރިޔަމްގާތު ، ޚާނަމްގެ ޝަކުވާ ކޮށްގަތެވެ. އެއީ އެމީހުންނާ ގާތް ޢާއިލާއެއްގެ ކުއްޖެއްކަމަށް ބުނެ މަރިޔަމްވެސް ، އޭނާއާ ޙަޔާ ކައިވެނިކުރުމަށް ނަޞޭޙަތްދީ ބާރު އެޅިއެވެ. އެހެނަސް ، ޙަޔާ އެކަމަކަށް އެއްބަހެއް ނުވިއެވެ. މުރުތަސިމް ނުލިބިއްޖިއްޔާ އޭނާ ހުންނާނީ މީހަކާ ނުއިނދެއެވެ. ކޮންމެވެސް އެއްދުވަހަކުން އޭނާ ، މުރުތަސިމް ޙާޞިލްކުރާނެކަމަށް ބުނަމުން ، ޚާނަމާ ދިމާލަށް އެއްޗެތި ކިޔަމުން ގެންދިޔައެވެ. ޚާނަމާ ދިމާލަށް އެތިވަރުގޮވަން ޙަޔާ ހުއްޓާ ، ޚާނަމް އެތަނަށް އައިސް ، ޙަޔާ ޤަބޫލަސް އަދި ނުޤަބޫލަސް އެކައިވެނި ކުރެވޭނެކަމަށް ޚާނަމް ބުންޏެވެ.
ޚާނަމް ދިޔައިމަވެސް ، ޚާނަމާ ދިމާލަށް ޙަޔާ އެއްޗެތި ކިޔަމުން ގެންދިޔައެވެ. ޙަޔާ އެންމެ ރުޅިއައީ ، މީރަބަށް ޙަޔާ އަނިޔާދޭ ވާހަކަ ޚާނަމް ބުނުމުންނެވެ. އެކަމަށް މަޢާފަށް އެދުމުންވެސް ، ޙަޔާއަކަށް ޚާނަމް މަޢާފެއް ނުކުރިއެވެ. ޙަޔާގެ އަދަބަކީ އެކައިވެނި ކުރުމެވެ. މީރަބާއި މުރުތަސިމަށް ހަމަނޭވާލައިގެން އުޅެވޭނީ ، މީހަކާ ދެވާފައި ޙަޔާ އެގެއިން ފޮނުވައިލެވުނު ދުވަހަކުންނެވެ.
އެކައިވެނިން ޙަޔާ ސަލާމަތް ކުރެވިދާނެގޮތެއްގެ ލަފާ މަރިޔަމް ދިނެވެ. އެއީ ، މުރުތަސިމްބޭބެ އެކަމަށް އިންކާރު ކުރުމެވެ. އެކަމުން ޙަޔާ ސަލާމަތް ކޮށްދެވޭނީ ހަމައެކަނި ބޭބެއަށްކަމުގައި މަރިޔަމް ބުނުމާއެކީ ، މުރުތަސިމާ ބައްދަލުކުރަން ޙަޔާ ދުއްވައިގަތެވެ. އެކަމަކު ، ދޮރާ ހަމަޔަށްގޮސް މަޑުޖެހުނެވެ. މީރަބަށް އެދެވުނު އަނިޔާއާ ގުޅިގެން ، މުރުތަސިމް އޭނާއަކާ ވާހަކައެއް ނުދައްކައެވެ. އޭނާގެ ވާހަކައެއް މުރުތަސިމެއް ނާހާނެއެވެ. މުރުތަސިމްބޭބެގާތަށް ގޮސް އެވާހަކަ ބުނެލައި ވާގޮތެއް ބަލައިލުމަކީ ނެތްކަމެއް ނޫންކަމަށް މަރިޔަމް ބުނުމާއެކީ ، ދެފައިކުރިޔަށް ބާރުލާފައި އަނެއްކާވެސް ހިނގައިގަތެވެ.
ޙަޔާ ދިޔައިރު ކޮޓަރިޔަކު މުރުތަސިމެއް ނެތެވެ. މުރުތަސިމާބެހޭ ސާފު މަޢުލޫމާތެއް މީރަބްގެ ފަރާތަކުންނެއް ނުލިބުނެވެ. މުރުތަސިމް އަންނާނެ ވަޤުތަކަށް އިންތިޒާރުކޮށްގެން ، ސިޓިންރޫމުގައި ދެކޮޅަށްދެކޮޅަށް ހިނގާލަހިނގާލަ ހުއްޓާ މުރުތަސިމް ގެޔަށް އައިސް ވަނުމާއެކީ ، މުރުތަސިމްގާތަށް ދިޔައެވެ. އަދި ، އެކައިވެނިކުރަން ބޭނުންނުވާ ވާހަކައާއި މަންމަޔާ ވާހަކަ ދައްކައިގެން އެކައިވެނި ހުއްޓުވައި ދިނުމަށް މުރުތަސިމްގެ ޖިބައިން އެދުނެވެ.
" މީރަބަށް އަނިޔާ ދިނުމަށްޓަކައި ނުފޮރުޅާ އެންމެ ގާކޮޅެއްވެސް ބާކީ އެބަ އޮތް ހެއްޔެވެ ؟ މަންމަޔާ އަހަރެން ވާހަކަ ދައްކަންވީ ސަބަބެއް ބުނެބަލާށެވެ ! އެހެންނޫނަސް ، ތި ކައިވެންޏަކީ ޙަޔާގެ ކައިވެންޏެވެ. މަންމަޔާ ވާހަކަ ދައްކަން އެހެންމީހުން ފޮނުވަންވީ ކީއްކުރަން ހެއްޔެވެ ؟ " މުރުތަސިމް ބުންޏެވެ.
އޭނާ ބޭނުންވާކަމެއް ކޮށްލަދޭށޭ ކިޔާފަ ދާނީ ކާކުގާތަށްތޯ ޙަޔާ ސުއާލު ކުރިއެވެ. އެނާގެ ހުރިހާ އުއްމީދެއްވެސް އަބަދުވެސް ގުޅިފައިވަނީ މުރުތަސިމާއެވެ. ޙަޔާއަށް ކުށްކުރެވިފައިވާކަމަށް ޙަޔާވެސް އެއްބަސް ވިއެވެ. އެހެނަސް ، އޭގެ މާނަޔަކީ ، އޭނާ ގެއިންބޭރުކޮށްލުން ނޫންކަމަށް ، ޙަޔާ ބުންޏެވެ.
އެގޭގެ އެއްވެސްމީހަކު ، ޙަޔާ ގެއިންބޭރުކޮށްލަން ނޫޅޭކަމަށް މުރުތަސިމް ބުންޏެވެ. ކައިވެންޏަށްފަހު ، ޙަޔާ ބޭނުންކޮންމެ ގަޑިޔަކު އެގެޔަށް އާދެވޭނެއެވެ. އެކަމަކުވެސް ، އެކައިވެންޏަކީ ، އޭނާ ނުކުރާނެ ކައިވެންޏެއްކަމުގައި ޙަޔާ ބުންޏެވެ.
" އެއީ ، ވަރަށް ރަނގަޅު ކުއްޖެކެވެ. އަހަރެންގެ ރައްޓެއްސެކެވެ. އަދި އެއްފަހަރު ، ރަނގަޅަށް ވިސްނައިލާށެވެ ! އަހަރެންވެސް ބޭނުމީ ، ޙަޔާވެސް މީހަކާ އިނުމަށެވެ. " މުރުތަސިމް ބުންޏެވެ.
އެއީ ، ކީއްވެގެންތޯ އަހައި ، ޙަޔާ ވާހަކަ ދައްކަދައްކާ ހުއްޓާ ، މުރުތަސިމް އެތަނުން ދިޔައެވެ. މީރަބްވެސް އޭރު މަޑުމަޑުން ހިނގަމުން އައިސް އެމީހުންނާ އަރާ ހާމަކުރިއެވެ. ޙަޔާ ހިނގައިގަތްތަނާ މީރަބް ގޮވައިލިއެވެ. ޙަޔާ ބޭނުންކަމަށް ވަންޏާ ، މުރުތަސިމާ އޭނާ އެވާހަކަ ދައްކަންތޯ އަހައިލިއެވެ.
މީރަބް ބުނާކަމެއް ، މުރުތަސިމް ކޮށްދޭނެކަން އެނގިހުރެމެ ، މީރަބްގެ އެހީތެރިކަން ، ޙަޔާ ބޭނުމެއް ނުވިއެވެ. ތުންއޫ ކޮށްފައި ޙަޔާ އެތަނުން ދިއުމާއެކީ ، ސިޓިންގރޫމުގައި މަސައްކަތެއްކުރަން މުރުތަސިމް އިންދާ ، މީރަބް އެތަނަށްގޮސް އިށީނދެލިއެވެ. އެ ކައިވެންޏަށް ޙަޔާ އަދި ތައްޔާރުނޫންކަމަށް މީރަބް ބުންޏެވެ. މީރަބްގެ ވާހަކަ ނުނިމެނިސް ، މީރަބަށް މުރުތަސިމް ޖަވާބު ދިނެވެ. އެއީ ، ޙަޔާ ކުރަންޖެހޭނެ ކައިވެންޏެއްކަމަށް ބުނެއެވެ. ޙަޔާގެ ކައިވެނިވެސް ، ގަދަކަމުން ކުރެވެނީތޯ މީރަބް ސުއާލު ކުރިއެވެ. އޭނާ އެ އަދާކުރަނީ އޭނާގެ ވާޖިބުކަމަށް ބުނެ ، މީރަބަށް މުރުތަސިމް ޖަވާބު ދިނެވެ. މީރަބްވެސް ގޮތްދޫކުރާކަށް ބޭނުމެއް ނުވިއެވެ. އެކަމަކު ، އެ ކައިވެންޏަށް ޙަޔާ ދެކޮޅުހަދާކަމަށް މީރަބް ބުންޏެވެ. މުރުތަސިމްވެސް ، މީރަބާ ސުއާލު ކުރިއެވެ. އެފިރިހެންކުއްޖާގެ ކިބައިން އުނިވަނީ ކޮންކަމެއް ހެއްޔެވެ. ބަލާބެލުމަށް އެއީ ގޯސް ކުއްޖެއް ހެންނެއް މީރަބަކަށް ހިއެއް ނުވެއެވެ.
" އަހަރެންނަށް ހީވަނީ ، ޙަޔާ ކައިވެންޏެއް ކުރަން ވެއްޖެ ހެންނެވެ. އޭރުން ، އަހަރެންނަށް ދެން ކުރިމަތިލާން ޖެހޭނީ ، ގޮތްދޫނުކުރާ އެކަކާއެވެ. ޙަޔާ މިގޭގައި ހުރިއްޔާ އަހަރެންނަށް ދެމީހުންނާ ކުރިމަތިލާން ޖެހޭނެއެވެ. " މުރުތަސިމް ބުންޏެވެ.
އޭނާ ގޮތްދޫނުކުރޭތޯ މީރަބް އެހިއެވެ. ޙަޔާ ބަލައި އަވަށަށް އޭނާ ދިޔައީ ، ގޮތްދޫކޮށްގެންނެވެ. އޭނާއާ ދޭތެރޭ ޙަޔާ އިހާނެތިކޮށް ހިތާނެކަންވެސް އެނގި ހުރެއެވެ. އޭގެކުރިން އޭނާއާ ދޭތެރޭ އެހާ ގޯސްކޮށް ޙަޔާ ކަންތައް ކޮށްފައި އޮއްވައެވެ.
އެކަން ޤަބޫކުރާކަމަށް އެއްބަސްވުމަށް ބޯޖަހައިލަމުން މުރުތަސިމް ތެދުވުމާއެކީ ، މިހާރު އެދަނީކޮންތާކަށްތޯ މީރަބް ސުއާލު ކުރިއެވެ. މުރުތަސިމް އެދަނީ ކޮފީއެއް ހަދަންވެގެންނެވެ. އޭނާ ކޮފީ ހަދައިދީފާނެކަމަށް ބުނެ ، މީރަބްވެސް ތެދުވިއެވެ. ބަދިގެތެރެޔަށް ވަދެގެން ދަނިކޮށް ، ކުރިންވެސް އެގޭތެރެއިން މީރަބަށް ފެނުނު ހިޔަނި ފެނިއްޖެއެވެ. މިފަހަރު މީރަބް ބިރެއް ނުގަތެވެ. އޭނާ ގޮވައިލީމަ އަޑުއިވޭ ހިސާބުގައި މުރުތަސިމް ހުރިކަން އެނގޭތީއެވެ. އެ ހިޔަންޏަކީ ކާކުގެ ކަމެއްތޯ ބެލުމަށް މީރަބް ނިންމިއެވެ. ސިޑިން މައްޗަށް އަރައިގެންގޮސް ، މަތީބުރީގައިހުރި ކޮޓަރިއެއްގެ ދޮރު ހުޅުވައިލިތަނުން މީރަބް ދިޔައީ ސިހިގެންނެވެ. ހަޅޭއްލަވައި ނުގަނެވުނީވެސް ހަމަ ކިރިޔާއެވެ. އޭނާއަށް ފެނުނީ ، މަރިޔަމްއާއެކީ ފިރިހެނަކު އެކޮޓަރިތެރޭގައި ހުއްޓައެވެ. އެވަގުތު ، މުރުތަސިމްވެސް މީރަބްގެ ފަހަތުން އައިސް މީރަބަށް ގޮވަމުން ގެންދިޔައެވެ. ސަލާމަތްކޮށްދޭން އެދި ، މަރިޔަމްގެ ޢިޝާރާތުން މީރަބަށް އަންގަމުން ދިޔައެވެ. މީރަބް އޭނާގެ މޭގައި އަތްއަޅައި ބޯޖަހައިލުމަށްފަހު ، ދޮރުލައްޕައިލިއެވެ. އަދި ، މުރުތަސިމް އައިއްސާނެތީ ، އަވަސް އަވަހަށް ސިޑިންލާފައި ތިރިޔަށް ދިޔައެވެ.
މީރަބް މައްޗަށް އެރީމަ ، މުރުތަސިމް ހުރީ ޙައިރާން ވެފައެވެ. ބަދިގެ އެހުންނަނީ ތިރީގައި ވިއްޔާއެވެ. މީރަބް އެއައީ ، އިމްތިޙާނަށް ފިލާވަޅު ދަސްކުރަން މަރިޔަމް އިނީމަ ކޮފީއެއް ބޭނުންތޯ އަހާފައެވެ. ދެމީހުންވެގެން ކޮފީހަދަން ހިނގާށޭބުނެ ، މުރުތަސިމްގެ އަތުގައި ހިފައިގެން މީރަބް ހިނގައިގަތެވެ. މުރުތަސިމްގެ ހިތަށްލިބުނު ހަމަޖެހުމާއެކީ ، މީރަބާ ދިމާލަށް ބަލައިލުމަށްފަހު ، ހިނިތުންވެލިއެވެ. ބަދަލުގައި ، މީރަބްވެސް ހުރީ މުރުތަސިމާ ދިމާލަށް ، ލޯބިގޮތަކަށް ބަލަހައްޓައިގެންނެވެ. މުރުތަސިމްގެ އުއްމީދުގައި ކުލަޖެހެމުން އަންނަ ކަމުގެ އިޙްސާސް ކުރެވުނެވެ. މީރަބްވެސް މިހާރު އެބަ ބަދަލު ވެއެވެ. ކުރިންކުރާ ގޮތަށް ، ކޮންމެ ކަމަކާ މުރުތަސިމާ ޖަދަލެއް ނުކުރެއެވެ. ވާހަކަ ދައްކަނީވެސް މަޑުމައިތިރިކަމާ އެކުގައެވެ. ( ނުނިމޭ )
