(30 ޖުލައި 2025 ގައި ޝާއިޢުކުރި ބަޔާގުޅޭ )
މުރުތަސިމް ޙާޞިލްކުރުމަށްޓަކައި ، ޙަޔާ ކުރަމުންގެންދާ މަސައްކަތް ހުއްޓައެއް ނުލައެވެ. ފަންޑިތަ ހަދާވަރުން ފަނޑިތަ ހަދައެވެ. ފުރުޞަތެއް ލިބިއްޖިއްޔާ މުރުތަސިމް ގަޔާވާ ކަހަލަ ވާހަކަތައް ދައްކަމުން ، މުރުތަސިމް ބޭނުންވާނެހާ ކަމެއް ކޮށްދެވޭތޯ ބަލަމުން ގެންދެއެވެ. މަރިޔަމް ކޮލެޖަށްލާން މުރުތަސިމް ދާތަން ފެނިއްޖިއްޔާ ، ކާރުގެ ކުރީޝީޓަށް އަރައި މީރަބްގެ ޖާގަ ހޯދުމަށް މަސައްކަތް ކުރެއެވެ.
މުރުތަސިމްގެ މައްޗަށް މީރަބްގެ ހިތް ކިލަނބު ކުރެވޭތޯ އަދި މީރަބަށް ޖެއްސުންކުރެވޭތޯވެސް ، ޙަޔާ ނުކުރާކަ ކަމެއް ނެތެވެ. މީރަބަށް ޙަޔާއާ ދޭތެރޭ ޝައްކު ކުރެވޭނެ ހުރިހާކަމެއް ފުރިހަމަކުރަމުން ގެންދެއެވެ. މީރަބަށްވެސް އެކަމުން އަސަރު ކުރަމުން ގެންދާކަން ، ޙަޔާއަށް އެނގެއެވެ. އަދި ، މީރަބަށް އަންނަމުންދާ ބަދަލުތައް މުރުތަސިމަށްވެސް ފާހަގަ ކުރެވެއެވެ. މުރުތަސިމްގެ ހިތުގައި ޙަޔާގެ މައްޗަށް އެއްވެސް ކަނެއް ދީފައިނުވާކަމަށް ، ކިތަންމެ ވަރަކަށް މުރުތަސިމް ބުންޏަސް ، މުރުތަސިމްގެ ޢަމަލުތައް ހުންނަގޮތުން ، މީރަބްގެ ހިތަށް އުނދަގޫވާ އެތައްކަމެއް މިހާރު ، ދިމާވަމުން އެބަ ދެއެވެ.
އެހުރިހާކަމެއް ، ޚާނަމްއަށްވެސް މިހާރު ފާހަގަ ކުރެވެން ފަށައިފިއެވެ. އެއްދުވަހެއްގެ މެންދުރުގެ ކެއުމުގެ ވަގުތުގައި ، ޚާނަމް އެވާހަކަ ފެއްޓިއެވެ. ޙަޔާގެ ޢަމަލުތައް ހުންނަގޮތުން މީރަބް ކަންބޮޑުވާކަން ޚާނަމަށް އެނގޭކަން އަންގައިލިއެވެ. ޙަޔާގެ ކަންތައް ތަންކޮޅެއް ބޮޑުވަމުންދާކަމުގައި ، މީރަބަށްވެސް ބުނެވުނެވެ. އޭގެ މާނަޔަކީ ، މުރުތަސިމާ ދޭތެރޭ މީރަބްގެ ވިސްނުން ބަދަލުވަމުން ދިއުންކަން ، ޚާނަމަށް ވިސްނުނެވެ. މުރުތަސިމް ހިތްހަމަ ޖެހޭގޮތަށް އުޅެ ، މުރުތަސިމަށް ލޯބިދިނުމަށް މީރަބްގެ ކިބައިން ޚާނަމް އެދުނެވެ. އަދި އަނތްބެއްގެ ވާޖިބާމެދު ވިސްނައި ، މަޑުމަޑުން ބަދަލުވަމުންގޮސް މުރުތަސިމަކީ ، މީރަބްގެ ޙައްޤެއްކަން ޙަޔާއަށް އަންގައިދިނުމަށް ނަޞޭޙަތްތެރި ވިއެވެ. އަދި ، މީރަބް އެކަމާ ކަންބޮޑުނުވުމަށާއި ޙަޔާގެ ކަންތައް ، ހަމަޔަކަށް އަޅުވާނެކަމަށް ޚާނަމް ބުންޏެވެ.
ޙަޔާ އެހުންނަނީ މުރުތަސިމާހުރެ ، މަރުވާވަރު ވެފައެވެ. އެވަރުން މުރުތަސިމައިގެން ޙަޔާ އުޅެއުޅެ ހުއްޓާ ، މުރުތަސިމްގެ ކައިވެނި ޙަޔާއާ ކޮށްނުދީ ، އޭނާ މުރުތަސިމާ ދެވީ ކީއްވެތޯ ، ޖެހިލުންވެފައި އިނދެ މީރަބް ، ޚާނަމް ކުރެން އެހިއެވެ.
" ޙަޔާއަކީ ، މުރުތަސިމްގެ ދެބެންގެ ދެދަރި ކުއްޖެކެވެ. ޙަޔާއަކީ މުރުތަސިމާ އިނދެގެން އުޅެވޭކަހަލަ ކުއްޖެއްނޫނެވެ. މުރުތަސިމާ އިނދެގެން މުރުތަސިމާ އެކީ އުޅެވޭނީ ތިކަހަލަ ކުއްޖަކަށެވެ. އެންމެ ފުރަތަމަ ދުވަހުއްސުރެ ފެށިގެން އަހަރެންގެ މުރުތަސިމާ ދެވަން ، އަހަރެން އިޚްތިޔާރު ކޮށްގެން މިހުރީ މީރަބެވެ. " މީރަބްގެ އަތުގައި ހިފަހައްޓާލައިގެން އިނދެ ޚާނަމް ބުންޏެވެ.
މުރުތަސިމަކީ ޚާނަމްގެހުރި ހަމައެކަނި ފިރިހެން ދަރިއެވެ. މުރުތަސިމްދެކެ ، އިންތިހާއަށް އޭނާ ލޯބިވެއެވެ. މީރަބަކީ ، ޚާނަމްގެ ދުޝްމަނެއްނޫނެވެ. މީރަބާދިމާލަށް ޚާނަމަށް ބުނެވޭ އެއްޗަކާ ، މީރަބަށް ކުރެވޭކަމެއް ވިއްޔާ އެ ކުރެވެނީ ، މުރުތަސިމްގެ ޙައްޤުގައެވެ. މީރަބަށް ދިރިއުޅެން ދަސްކޮށްދޭން ވެގެންނެވެ. މުރުތަސިމަށް މީރަބް ދަސްކޮށްދޭންވެގެންވެސް މެއެވެ.
މަރިޔަމް ކޮލެޖަށްލާން މުރުތަސިމް ދިޔަ ދުވަހެއްގައި ، ޒުބޭރު އައިސް މުރުތަސިމާ ބައްދަލު ކުރިއެވެ. އޭނާއަކީ އަދިވެސް މުރުތަސިމްގެ ދުޝްމަނެއްކަމުގައި ޒުބޭރު ބުންޏެވެ. ޒުބޭރުގެ ބައްޕަ މާލިކުގެ އެދުމަށް އޭނާއަށް މުރުތަސިމް މަޢާފް ކުރިޔަސް ، އެ މަޢާފަކީ ޒުބޭރު ބޭނުންވާ އެއްޗެއް ނޫނެވެ. މުރުތަސިމްގެ ކިބައިން އޭނާ ބަދަލު ހިފާނެކަމަށްބުނެ މުރުތަސިމަށް ޒުބޭރު އިންޒާރު ދިނެވެ. އޭނާއަށް ޖެއްސުން ކުރުމަށްޓަކައި ، އެ ސަރަޙައްދުން މުރުތަސިމަށް ޒުބޭރު އިތުރަށް ފެނިއްޖެނަމަ ގެޔަށް ގެންދަންޖެހޭނީ ޒުބޭރުގެ ޤަބުރުކަމުގައި ބުނެ މުރުތަސިމްވެސް ، ޒުބޭރަށް އިންޒާރު ދިނެވެ.
ޒުބޭރާއި މުރުތަސިމާ ދެމީހުން ޒުވާބު ކުރަމުން ގެންދިޔައިރު ، ކާރުގައި ޙަޔާ އިނެވެ. މުރުތަސިމް އައިސް ކާރަށް އެރުމާއެކީ އެއީ ކާކުތޯ ޙަޔާ އެހިއެވެ. އެއީ ، ޒުބޭރުކަމަށް މުރުތަސިމް ބުނުމާއެކީ ، ޚާނަމްގާތު ކުޓުވާލަން އިތުރު ކަމެއް ޙަޔާއަށް ލިބުނީތީ ، ޙަޔާއިނީ އުފަލުންނެވެ. މައްސަލައިގެ ނާޒުކުކަމާއި ނުރައްކަލަށްވުރެ ، ޙަޔާގެ ހިތަށްވަނީ ، މީރަބާ ދެކޮޅަށް ކޮށްލާނެ ޖެއްސުމެއްގެ ވިސްނުމެވެ.
ޓްރެފިކް ލައިޓަށް މުރުތަސިމްގެ ކާރު މަޑުކުރުމާއެކީ ، މަގުމަތީ މާވިއްކަން އުޅުނު ފަޤީރު ކުއްޖަކު އައިސް ، މުރުތަސިމްގެ އަންހެނުންނަށް އެއިން މާބޮނޑިއެއް ގަތުމަށް އެކުއްޖާ އެދުނެވެ. އެތަނުން ދެ މާބޮނޑި ގަތުމާއެކީ ، އެކުއްޖާ އެބެލީ ޙަޔާއަކީ ، މުރުތަސިމްގެ އަންހެނުންކަމަށް ބުނެ ، މާބޮނޑީގައި ހިފުމަށް ޙަޔާ އަތްދިއްކޮށްލިއެވެ. ޙަޔާއަކީ ، މުރުތަސިމްގެ އަންހެނުން ނޫންކަމަށާއި ، ޙަޔާއާ މުރުތަސިމްގެ ކައިވެންޏަކީ ، ނުވާނެކަމެއްކަމަށް މުރުތަސިމް ބުންޏެވެ. އަދި މީރަބަށް އުނދަގޫކުރުން ހުއްޓާލައި ، ޙަޔާ ދެކެމުންއެދާ ހުވަފެނުން ހޭލުމަށް މުރުތަސިމް ނަޞޭޙަތް ދިނެވެ.
ގެޔަށް އައިސް މުރުތަސިމް ފޭބީ ، ކާރުގައި މާބޮނޑި ބާއްވާފައެވެ. ވަގުތު ބަލާފައި މާބޮނޑި ނަގާ ، ދޮޕައްޓާ ތެރެޔަށްލައި ފޮރުވައިގެން ޙަޔާ ގޭތެރެޔަށް ވަދެގެން ދަނިކޮށް މީރަބާ ދިމާވިއެވެ. އެ މާބޮނޑިޔަކީ އޭނާއަށް މުރުތަސިމް ގަނެދިން އެއްޗެއްކަމަށް ބުނެ . މީރަބަށް މާބޮނޑި ދައްކައިލިއެވެ. އަދި ، މާވިއްކި ކުއްޖާ ބެލީ ، ޙަޔާއަކީ މުރުތަސިމްގެ އަންހެނުންކަމަށް ކަމުގައިވެސް ، ހެވިދިލިފައި ހުރެ ، ޙަޔާ ބުނެލިއެވެ. ޙަޔާގެ އެއުފާވެރިކަމަށް މީރަބް މަރުޙަބާ ކިޔެވެ. އެކަމާ ، އޭނާ އެއްގޮތަކަށްވެސް ކަންބޮޑުނުވާކަމަށް މީރަބް ބުންޏެވެ.
" ޙަޔާ ކިތަންމެ ވަރަކަށް ހެދިގެން އުޅުނަސް އަހަރެންނަށް މައްސަލައެއް ނޫނެވެ. އަހަރެންނެއް ، އަހަރެންގެ މައްޗަށް މުރުތަސިމް ލަންބާކަށް އެއްވެސް ކަމެއް ނުކުރާނަމެވެ. އެކަމަކު ، ކޮންމެ މީހަކަށްވިޔަސް ، އެމީހަކަށް ޖެހޭނީ އަހަރެންގާތަށް އަންނާށެވެ ! މުރުތަސިމަށްވެސް ވާނީ އެހެންނެވެ. ތިހުރިހާ ސަކަރާތެއް ޙަޔާ ޖަހަޖަހާ ހުއްޓާ ، މުރުތަސިމް އަހަރެން ގާތަށް އަންނާނެއެވެ. ޙަޔާގެ އުއްމީދު ، ޙަޔާ ދޫކޮށް ނުލާށެވެ ! " ހިނިތުންވެލައިގެން ހުރެ މީރަބް ބުނަމުން ގެންދިޔައެވެ.
ކޮޓަރިޔަށްގޮސް މާބޮނޑީގެ ވަސްބަލަމުން ، ޙަޔާގެ އުއްމީދުތައް އޭނާގެ ހިތަށް ކިޔައިދެމުން ގެންދަނިކޮށް ، އެތަނަށް ޚާނަމް އައެވެ.
ޙަޔާ އެކުރާކަމެއް ޚާނަމަށް އެނގެއެވެ. އަނގައިން ނުބުނެ ހުއްޓަކަސް ، މީރަބާއި މުރުތަސިމްގެ ދިރިއުޅުން ހަލާކު ކުރުމަށް ޙަޔާ ކުރަމުންގެންދާ ހުރިހާކަމެއް ޚާނަމަށް އެނގެއެވެ. ހުރިހާ ވާހަކަތަކެއް ކިޔައި ނަޞޭޙަތް ލައިދިނުމަށްފަހު ، އެދެމަފިރިންގެ ދެމެދަށް ނުވަނުމަށް ޙަޔާއަށް ޚާނަމް އިންޒާރު ކުރިއެވެ. އެކަހަލަކަމެއް ޙަޔާގެ ފަރާތުން ކުރިމަތި ވެއްޖިއްޔާ ، ޙަޔާއަށް ވާނެގޮތަކާމެދު ވިސްނާލައިގެން އުޅުމަށްވެސް ޚާނަމް ނަޞޭޙަތް ދިނެވެ.
މުރުތަސިމަށް ކޮޓަރިޔަށް ދެވުނުއިރު ، މީރަބްހުރީ ރުޅިއައިސް ރަތްވެފައެވެ. ޙަޔާ ގޮވައިގެން މުރުތަސިމް ކާރުދުއްވަން ދިޔަކަން އެނގިގެންނެވެ. އެއީ ކިހިނެއްވީކަމެއްކަން ސާފުކޮށްދިނުމަށް މުރުތަސިމް ދެއްކި ހުރިހާ ވާހަކައެއް ވީ ބޭކާރެވެ. ކާރުގެ ތަޅުދަނޑިހިފައިގެން މީރަބް ހިނގައިގަތުމާއެކީ ، މީރަބް އެދަނީ ކާރުގައި ބޭރަށްކަން މުރުތަސިމަށް އެނގުނެވެ. މީރަބް އެކަނި ބޭރަށްގޮސް އުޅުމަކީ ، ނުރައްކާ ކަމެކެވެ. އެހެން އުޅެނިކޮށް ، ޒުބޭރަށް ފެނިއްޖިއްޔާ ކޮންމެފަދަ ކަމެއްވެސް ކޮށްފާނެއެވެ. އެކަހަލަ ކަންކަން ވިސްނައިގަނެވޭ ވަރަށްވުރެ ، މީރަބްގެ ހިތްތިރިކަން ، މުރުތަސިމަށް އެނގެއެވެ. މީރަބް ދާން ބޭނުންވާ ތަނަކަށް ގެންގޮސްދޭނީ އޭނާކަމަށްބުނެ ، މީރަބް ގޮވައިގެން މުރުތަސިމް ނުކުތެވެ. މުރުތަސިމް ދުއްވަމުން ގެންދިޔައީ މީރަބް ބުނާ މިސްރާބަކަށެވެ. އަވަށުގެ މެދެއްހާ ހިސާބުގައި އޮތް އާދައިގެ ބާޒާރަކަށް ކާރު ހުއްޓައިލުމަށް މީރަބް އެދުނެވެ.
އެސަރަޙައްދުގައި އުޅޭ އެންމެންނަށްވެސް މުރުތަސިމް އެނގޭނެކަމަށްބުނެ ، އެއީ އޭނާގެ އަބުރަށްލިބޭ ހުތުރަކަށް ވެދާނެކަމަށް މުރުތަސިމް ބުންޏެވެ. މީރަބް ދިޔަގޮތަށްގޮސް ހުއްޓުނީ ، އެތާހުރި ޕާނިޕޫރީހަދާ ގާޑިޔަލެއްގެ ކައިރިޔަށެވެ. އެތާނގައި ޕާނިޕޫރީ ހަދަންހުރިމީހާއަށް މުރުތަސިމް ދައްކާފައި ، އެއީ އޭނާ ދަންނަ މީހެއްތޯ މީރަބް ސުއާލު ކުރިއެވެ. އޭނާއަކަށް މުރުތަސިމަކީ ކާކުކަމެއް ނޭނގުނެވެ.
މުރުތަސިމްގެ އަތުގައި ހިފައިގެން ގާޑިޔާ ކައިރިޔަށް ގެނެސް ، ޕާނިޕޫރީ ޕެކެޓެއް ދިނުމަށް އެދުނެވެ. އެއީ ދުވަހަކުވެސް މުރުތަސިމް ކޭ އެއްޗެއްނޫނެވެ. އަދި އަމްދުން ، މަގުމަތީގެ ކާނާއަކީ އޭނާ ކާ އެއްޗެއްނޫނެވެ. މީރަބްގެ ބަނޑު ސަކަރާތްވެދާނެތީ ، ޕާނިޕޫރީ ކެއުން މުރުތަސިމް މަނާ ކުރިއެވެ. މުރުތަސިމްގެ ބަހެއް މީރަބް ނާހައެވެ. ޕާނިޕޫރީ ކަމުންގޮސް ކުޅިވެގެން ޗޯބާލާ ހިސާބަށް ދިޔައިރުވެސް ހުއްޓައެއް ނުލައެވެ. އެންމެފަހުން ، މީރަބް ހުއްޓާލީ ، މުރުތަސިމަށްވެސް ގަދަކަމުން ، ޕާނިޕޫރީ ކާންދީފައެވެ.
އެތައް ދުވަހަކަށްފަހު ، ޕާނިޕޫރީ ކައިގެން މީރަބަށް ލިބުނު ހިތްހަމަ ޖެހުމުގައި އެ ސަރަޙައްދުގައި މީރަބް އެނބުރިގަތެވެ. މުރުތަސިމްވެސް މީރަބްގެ ފަހަތުން އައެވެ. ވަކި ހިސާބަކަށް ނުކުމެވުނުތަނާ ، މީރަބްގެ ކުރިމަތިން އެ ފެނުނީ ރޮހޭލްއެވެ. މީރަބަށް ލިބުނު ޙައިރާންކަމުގައި އަނގަ ހުޅުވިފައި ހުއްޓާ ، މުރުތަސިމަށްވެސް ، މީރަބަށް ގޮވަމުން އެތަނަށް އާދެވުނެވެ. އެވަގުތު ، އޭނާގެ ކުރިމަތިން ރޮހޭލް ގެއްލުނެވެ. އަނގައިން ނުބުނެ ، މީރަބް ކުރިމައްޗަށް ބަލަހައްޓައިގެން ހުރިތަން ފެނިފައި ، މީރަބް އެހުންނަނީ އެތަނުން ކޮން އެއްޗެއް ފެނިގެންތޯ މުރުތަސިމް ސުއާލު ކުރިއެވެ. އެކަމާބެހޭގޮތުންވެސް ، މީރަބް ވަކި އެއްޗެއް ނުބުނެއެވެ. އޭނާ ބޭނުންވީ ، އަވަހަށް އެތަނުން ދިއުމަށެވެ. މީރަބަށް ލިބިފައިހުރި އުފާވެރިކަން ކުއްލިޔަކަށް ގެއްލި ދިއަތަން ފެނުމާއެކީ ، މުރުތަސިމް އެތައް ސުއާލެއް ކުރިއެވެ. ގެޔަށް އައިސްވެސް ، އެކަމާބެހޭގޮތުން ، މުރުތަސިމް ކުރި އެއްވެސް ސުއާލަކަށް މީރަބަކަށް ޖަވާބެއް ނުދެވުނެވެ. އެހެންނަމަވެސް ، އެތަނުގައި ކޮންމެވެސްކަމެއް ހިނގައިފިކަން ނުވަތަ ކޮންމެވެސް މީހަކާ މީރަބާ ބައްދަލުވިކަން ، މުރުތަސިމަށް ޔަޤީން ކުރެވުނެވެ.
ޒުބޭރުގެ ނުލަފާކަން ހުއްޓައެއް ނުލައެވެ. މުރުތަސިމްމެންގެ ދަނޑުގައި މަސައްކަތްކުރާ ތިންމީހަކު މިއަދުވެސް މަރާލައިފިއެވެ. ބަޚުތިޔާރު އައިސް މުރުތަސިމަށް އެޚަބަރު ދިނުމާއެކީ ، ވަގުތުން އެތަނަށް ދިއުމަށް މުރުތަސިމް ބޭނުންވިއެވެ. މުރުތަސިމް އެކަނިދާން ދޫކޮށްލާކަށް ޚާނަމް ބޭނުމެއް ނުވިއެވެ. މީރަބް އަދިވެސް ނިދާ ހޭލައިގެންނެއް ނާދެއެވެ. އެންމެ ފަހުން މުރުތަސިމާއެކީ އޭނާ ދާން ޚާނަމް ނިންމިއެވެ. ވަގުތު ބަލާފައި ، ޙަޔާ އަނގަ ބޭނިއެވެ. އަދި ، މުރުތަސިމާއެކީ އޭނާ ހިނގައިދާނެކަމަށް ޙަޔާ ބުނުމާއެކީ ، އެކަމަށް ޚާނަމްވެސް ބާރު އަޅައި މުރުތަސިމާއެކީ ފޮނުވިއެވެ.
މީރަބް އަދިވެސް ނިދައި ނުހޭލާތީ ، މީރަބާ ދިމާލަށް ހަޅޭއްލަވަމުން ޚާނަމް އައިސް ކޮޓަރިޔަށް ވަތްތަނުން ، އަޑުގަދަވެގެން މީރަބަށް ހޭލެވުނެވެ. މީރަބްގެ ބޮލުގައި ރިއްސާތީ ނުތެދުވެ އޮވެވުނީކަމަށް މީރަބް ބުންޏެވެ. އެހެނަސް ، އެއީ މީރަބްގެ ކަންނެތްކަމުން ދައްކާ ބަހަނާއެއްކަމަށް ބުނަމުން ، އެއްޗެތިކިޔަމުން ގެންދިޔައެވެ. ކުއްލިޔަކަށް މޭނުބައިކޮށްގެން އޯކަށްދަމަމުން ، އެނދުން ތެދުވެގެން މީރަބް ފާޚާނާއާ ދިމާލަށް ދުއްވައިގަތެވެ. ފާޚާނާއަށް ވަނުމާއެކީ ، މީރަބަށް ހޮޑުލެވުނެވެ.
އެއާއެކީ ، މީރަބާ ދިމާލަށް އެއްޗެތި ކިޔަމުން އައި ޚާނަމްގެ މޫނުމަތިން އުފާވެރިކަން ފާޅުވިއެވެ. ދުވެފައިގޮސް ފާޚާނާއާ ހަމައިން މީރަބް އަތުލަފިކޮށްގެން ގެނެސް އެނދުގައި ބޭންދިއެވެ. މީރަބް ބަލިވެ އިނުމާގުޅިގެން ، ﷲ އަށް ޙަމްދުކޮށް މީރަބްގެ ބޮލުގައި ފިރުމަމުން ގެންދިޔައެވެ. އޭނާއަށް މީރަބްގެ ފަރާތުން އެލިބުނީ ، ދުނިޔޭގައި ލިބޭނެ އެންމެ ބޮޑު އުފަލެވެ. މުރުތަސިމްގެ ދަރިފުޅު ބަލައި ބޮޑުކުރުމަކީ ، އޭނާކުރަމުން އައި އެންމެ ބޮޑު އުއްމީދެވެ. އެކަހަލަ ކަމެއް ނުވާކަމަށް އޭރު ، މީރަބް ބުނަމުން ގެންދިޔައެވެ. މީރަބްގެ ވާހަކައެއް ޚާނަމެއް ނާހައެވެ. ނޯކަރުންނަށް ގޮވައިގެން ގެނެސް ، ޞޮދަޤާތް ދިނުން އިންތިޒާމް ކުރިއެވެ. އެނދުން ނުތެދުވެ ، މީރަބް އޮތުމަށް އެންގިއެވެ. ވީ އުފަލުން ، މީރަބްގެ ގައިގާ ފިރުމަމުން ބޮސްދެމުން ގެންދިޔައެވެ.
އަންވަރަށް ގޮވައިގެން ގެނެސް ، އަންވަރަށްވެސް އެ ޚަބަރު ދީފިއެވެ. ވީއުފަލުންގޮސް އަންވަރުވެސް ރޯން ފެއްޓިއެވެ. ކޮޓަރިޔަށްގޮސް އައިސް ، އެތައް ނޫޓުތަކެއް ނޯކަރުންގެ އަތަށްދީ ، އަވަށްޓެރިންނަށް ބެހުމަށް އެންގިއެވެ. އޭނާއާ ދިމާލަށް ބައްޕާއޭ ކިޔާފަ ، މީރަބް އަދި ގޮވައެއް ނުލައެވެ. އެހެނަސް ، މީރަބްގެ ދަރިފުޅު ، އޭނާއާ ދިމާލަށް ކާފާއޭ ކިޔާފައި ގޮވައިލާނެކަމަށް އަންވަރު ބުންޏެވެ.
މީރަބް ގާތު ނުބުނެ ، މުރުތަސިމަށް އާދެވުނީތީ އިނީ ކަންބޮޑުވެފައެވެ. މީރަބާ ގުޅާފައި މީރަބް ނިދާފަ އޮތީމަ ނުބުނެ އާދެވުނު ވާހަކަ ބުނުމަށް ، ޙަޔާގާތު މުރުތަސިމް އެދުނެވެ. ޙަޔާއަށް މުރުތަސިމާއެކީ ހޭދަކޮށްލަން އެލިބުނު އުފާވެރި ވަގުތުކޮޅު ، ހިތްހަމަ ނުޖެހުމުގައި ދުއްވައިލާކަށް ޙަޔާ ބޭނުމެއް ނުވިއެވެ. މީރަބަކީ ، މުރުތަސިމާމެދު ވިސްނާ މީހެއް ނޫންކަން ސާބިތުކޮށްދިނުމަށްޓަކައި ޙަޔާ ދައްކަމުން ގެންދިޔަ ވާހަކަތަކުން ، މުރުތަސިމަށް އިތުރަށް ލިބުނީ ހިތްނުތަނަވަސްކަމެވެ. އެންމެފަހުން ، މީރަބާ ގުޅަން ޙަޔާ ބޭނުން ނުވަންޏާ ، މަރިޔަމްއާ ގުޅާފައި އެވާހަކަ މީރަބް ގާތު ބުނެދޭން ، މަރިޔަމްގާތު ބުނުމަށް މުރުތަސިމް އެދުނެވެ. މުރުތަސިމް ކުރުނުކޮށްގެން ، މަރިޔަމްގެ ބަދަލުގައި ، ފަންޑިތަހަދަން އޭނާ ގެންގޮސްދިން ނޯކަރަށް ގުޅައި ، މީރަބްގާތު އެވާހަކަ ބުނުމަށް ޙަޔާ އެދުނެވެ. އެއީ މަރިޔަމް ނޫންކަމުގައި އެނޯކަރު ބުނަމުން ގެންދިޔަނަމަވެސް ، ޙަޔާ ދައްކަންހުރި ވާހަކައެއް ދައްކާފައި ، މަރިޔަމްއަށް ބާއްޖަވެރި ދުވަހަކަށް އެދެމުން . ފޯނުކަނޑައިލިއެވެ. އަދި ، މަރިޔަމް ލައްވާ މީރަބްގާތު އެވާހަކަ ބުންޏަސް ، މުރުތަސިމާ މީރަބް ނުގުޅާނެކަމުގައި ޙަޔާ ބުންޏެވެ.
މުރުތަސިމާއެކީ ، ޙަޔާ ހޭދަކުރާނެ ދިރިއުޅުމުގެ އުފާވެރިކަމުގެ ވާހަކައިން ޙަޔާ ވާހަކަ ފެއްޓިއެވެ. މީރަބަށް މުރުތަސިމަށް ނުދެވޭނެ އެތައް އުފަލެއް ، ހަޔާގެ ފަރާތުން މުރުތަސިމަށް ލިބޭނެކަމަށް ދަޢުވާކުރަމުން ގެންދިޔައެވެ. ޙަޔާގެ ވާހަކަތަކުން މުރުތަސިމަށް އުނދަގޫވިޔަސް ، ޙަޔާގެ ވާހަކަ ހުއްޓައިނުލާ ، އަނގަތަޅަމުން ގެންދިޔައެވެ. އެއީ ، ޙަޔާގެ އިތުގެ އުދާސްތައް މުރުތަސިމްގެ ކުރިމަތީ ބަންޑުންކޮށްލުމަށް ލިބޭނެ ހަނިފުރުޞަތުތަކުން އެއް ފުރުޞަތެވެ. އެ ފުރުޞަތުން އެންމެ ސިކުންތެއްވެސް ނަގާލާކަށް ޙަޔާ ބޭނުމެއްނޫނެވެ. ކާރުތެރޭ އިނދެގެން ކިތަންމެ ވާހަކައެއް ދެއްކިޔަސް ، މުރުތަސިމަށް ކުރެވޭނެކަމެއް ނޯންނާނެއެވެ. ގޭތެރޭގައި އޭނާއަކަށް މުރުތަސިމާ އަނގައިންނެއް ނުބުނެވެއެވެ. ޙަޔާގެ ވާހަކަތަކުން މުރުތަސިމަށް އަސަރެއް ނުކުރިޔަސް ، ޙަޔާއަށް ފަރުވާލެއް ނެތެވެ. އޭނާގެ ހިތުގެ އަޑު މުރުތަސިމަށް އިއްވައިލެވެނިކޮށް އެވީއެވެ. (ނުނިމޭ)
Varah reethi shukuran