( 25 ޖޫން 2025 ގައި ޝާއިޢުކުރި ބަޔާގުޅޭ )
މީރަބަށް ކުރިމަތިވަމުން އެދާ ކަންކަމާމެދު ، މުރުތަސިމަށް ނުވިސްނައެއް ނުހުރެވުނެވެ. އެކަންކަން އޭނާގެ ކުރިމައްޗަށް އައިސް އުނދަގޫ ކުރެއެވެ. އޭނާވެސް ވަނީ ، މީރަބްގެ މޫނުމަތީ އެތިފަހަރެއް ޖަހާފައެވެ. ދެން ، އެޖެހީ މަންމައެވެ. މީރަބަށް ވެގެން އުޅޭގޮތް ، މުރުތަސިމަށް އޮތީ ސާފުކޮށްދީފައެވެ. މީރަބްގެ ޙަޔާތް އެކޮޅުކޮޅުންޖެހި ، އޭނާއާބެހޭގޮތުން ، އެތައް ޒަމާނެއް ވަންދެން ސިއްރުކުރެވިފައިވާ ބޮޑު ޙަޤީޤަތެއް ، މިހާރު އެވަނީ ފަޅާއަރާފައެވެ. މީރަބްގެ މިޒާޖާއި ނަފްސަށް ކުރި އަސަރާއި ތަކްލީފު އޭނާއަށް އެއުޅެނީ ، މައިތިރި ނުކުރެވިގެންނެވެ. އެ ޖަޒްބާތުތަކަށް ކެތް ނުކުރެވިގެންނެވެ. އެންމެ ދެރަވެގެން ، މުރުތަސިމަކީ އޭނާގެ ފިރިމީހާކަމަށް ޤަބޫލުކުރާކަށްވެސް މީރަބް ބޭނުމެއް ނުވެއެވެ.
ވައްޤާސްގެ ދެމަފިރިންވެސް ، މީރަބަށް ކުރިމަތިވަމުންދާ ކަންކަމާމެދު ކަންބޮޑުވެއެވެ. އެއީ ، މީރަބަށް ހޯދައިދިނުމަށް އެދެމަފިރިން ބޭނުންވި މުސްތަޤްބަލެއްނޫނެވެ. މީރަބްގެ ހިތް އެދަނީ އަނިޔާއާއި ތަކްލީފުން ޒަޚަމްވަމުންނެވެ. ޖިސްމާނީގޮތުންވެސް އަދި ނަފްސާނީގޮތުންވެސް ، މީރަބަށް ކުރިމަތިވަމުންދާ އަނިޔާ ހުއްޓުވުމަށް ، އެދެމަފިރިންނަށް ކުރެވޭނެ އެއްވެސްކަމެއް ނެތެވެ. ޚާނަމްއާ ކުރިމަތިލުމަކީ ، އެގެއާއި އެގެޔާ ގުޅިފައިވާ އެއްވެސް އިންސާނަކަށް ކުޅަދާނަކަމެއްނޫނެވެ. ޚާނަމްއަކީ ، އެއްވެސް މީހެއްގެ އަމުރާއި ބާރުހިނގާމީހެއްނޫނެވެ. ޚާނަމްއާ ދެކޮޅަށް ، ބަހެއް ބުނުމުގެ ޙައްޤު ، އެއްވެސް މީހަކަށް ލިބިގެންނެއް ނުވެއެވެ.
މެންދަމު ، މުރުތަސިމަށް ހޭލެވުނުއިރު ، މީރަބް އެނދަކު ނެތެވެ. އެނދުގައި ރުލެއްވެސް ނެތެވެ. އޭގެ މާނަޔަކީ ، އެރޭ ނިދުމަށްޓަކައި މީރަބް އެކޮޓަރިޔަށް ނާންނަނީއެވެ. މުރުތަސިމްގެ ހިތުގައި ބިރުވެރިކަން އުފެދުނެވެ. ގޭގެ އެތަންމިތަން ބެލިއިރުވެސް ، މީރަބެއް ނުފެނުނެވެ. ސްވިމިންގޕޫލް ކައިރިޔަށްގޮސް ، މުރުތަސިމްގެ އަޑަށްބާރުލާފައި މީރަބަށް ގޮވައިލިއެވެ. އެނބުރިލިތަނުން ، ގޭގެ ޓެރަސްމަތީ މީރަބް ހުއްޓާ ފެނުނެވެ. މީރަބް ވިސްނަމުން އެގެންދަނީ ، ސްވިމިންގޕޫލަށް ފުންމާލަންކަން މުރުތަސިމަށް އެނގުނެވެ. ފަޔަށް ބާރުލާފައި ، ސިޑިން އަރައިގެން ޓެރަހަށް ދެވުނުއިރު ، މީރަބް އޮތީ ފާރުބުރިމައްޗަށް ގުދުވެގެން ތިރިޔަށް ބަލާށެވެ.
އަމިއްލަޔަށް މަރުވުމަކީ ، ބޮޑުފާފައެއްކަމަށް މުރުތަސިމް ބުންޏެވެ. ސްވިމިންގޕޫލްކަހަލަ ، މީރަބް އެހާ ހިތްނޭދޭ ތަނަކަށް ފުންމާލައިގެން ، ހިތަށްވެސް ލިބޭނެ ހަމަޖެހުމެއްވެސް ނުއޮންނާނެއެވެ. އެއީ ، ރަނގަޅު ޚިޔާލެއްނޫންކަމަށްވެސް ، މުރުތަސިމް ބުންޏެވެ.
" އަހަރެން ބޭނުންވާ ގޮތަކަށް އަހަރެންގެ ފުރާނަޔަށް ގޮތްގޮތް ހެދިދާނެއެވެ. އަހަރެން މަރުވާނީ މީހެއްގެ ގާތު ބުނެ ، ހުއްދަ ހޯދައިގެންނެއްނޫނެވެ. " މީރަބް ބުންޏެވެ.
މީރަބަށް ކުރެވުނު ކުށް ޤަބޫލު ނުކުރަން އުޅެނީ ކީއްވެގެންތޯ މުރުތަސިމް ސުއާލު ކުރިއެވެ.
އެހެންމީހުން އެމީހުންނަށް ކުރެވުނު ކުށް ޤަބޫލު ނުކުރަންވީ ކީއްވެގެންތޯ ، މީރަބްވެސް ސުއާލު ކުރިއެވެ. އޭނާގެ ހިތް އުފާކޮށްލުމަށްޓަކައި ، އަދި ނަށަމުން ގެންދިޔަ އޭނާއާ އެއްފުރާގެ ކުދިންނާ ބައިވެރިވެލުމަށްޓަކައި ، އެކުދިންނާ އެކީ ނަށައިލުން އެއީ ، މީރަބްގެ ނަޒަރުގައި އޭނާއަށް އެހާބޮޑު އަދަބެއް ލިބެންވީ ކުށެއްނޫނެވެ. އެހާ ނާތަހުޒީބު ވިސްނުމެއް ، މުރުތަސިމްމެން އެގެންގުޅެނީ ކީއްވެގެން ހެއްޔެވެ ؟
މުރުތަސިމަށް ފެންނަ ގޮތުގައި އެއީ ، ނާތަހުޒީބުވުމެއްނޫނެވެ. އެއީ ، ވާރުތަވެގެން އައިސްފައިވާ އާދަކާދައެވެ.
" އެއީ އާދަކާދައެއްނޫނެވެ. އެއީ ބޮޑާކަމާއި ކިބުރުވެރިކަމެވެ. މުރުތަސިމްމެންނަކީ ، މުއްސަނދި މަހުޖަނުންނެވެ. ނަށަމުންގެންދިޔަ ކުދިންނަކީ ، ނިކަމެތި ފަޤީރުންނެވެ. އެކުދިންގެ ޖަޒުބާތާއި އުފަލުގައި ބައިވެރިވެލުމަކީ ، މުރުތަސިމްމެންގެ ކިބުރުވެރިކަމާ ދެކޮޅު ކަމެކެވެ. އެކަމަކު ، އަހަރެންނަކީ ފަޤީރެއްކަމަށްވާތީ ، އަހަރެންގެ ހިތުގައި އޮންނަ ޖަޒްބާތާއި މުރުތަސިމްމެންގެ ހިތުގައި އޮންނަ ޖަޒްބާތު ތަފާތުވާނެއެވެ. މުރުތަސިމަށް އަހަރެންގެ ފަރާތުން ފެންނަމުން ތިދަނީ ، ކުރިޔަށް އޮތްތާނގައިވެސް ފެންނާނެ ، އެތަފާތެވެ. އަހަރެންގެ ޙަޤީޤަތަކީ އެއީއެވެ. އެއީ މުރުތަސިމްމެންނަށް ޤަބޫލުކުރެވޭނެ ޙަޤީޤަތެއްނޫނެވެ. " މީރަބް ބުންޏެވެ.
މީރަބް އެބުނާ ބޮޑާކަމާއި ކިބުރުވެރިކަމުގެ ޙިއްޞާއަކަށް މީރަބް ވެއްޖެކަމަށް މުރުތަސިމް ބުންޏެވެ. އޭނާގެ އަނބިމީހާއަށް މީރަބް ވުމާއެކީ ، މީރަބަކީ ކުރީގެ މީރަބަށް ވެގެންނުވާނެއެވެ. މީރަބްގެ އުޅުމަށާއި ވިސްނުމަށް ގެންނަންޖެހޭ ބަދަލުތަކެއް އަދި ، ބަދަލުކުރަންޖެހޭ އާދަތަކެއްވެސް ހުންނާނެއެވެ.
މީރަބްގެ ވިސްނުމަށްވެސް އަދި އުޅުމަށްވެސް އެހާ އަވަހަށް ބަދަލުތަކެއް އަންނާނެކަމަށް ، މުރުތަސިމް އުއްމީދު ނުކުރުމަށް މީރަބް އެދުނެވެ. މުރުތަސިމްގެ އަނތްބަކަށް ވުމާއެކީ ، އޭނާއަށް ލިބެމުން އެދަނީ އަނިޔާއާއި ތަކްލީފެވެ.
މުރުތަސިމަށް އެތާ ހުރެވުނުނަމަ ، އެކަން އެގޮތަށް ވިޔަކަ ނުދޭނެއެވެ. އެހެނަސް ، އެއީ މީރަބަށް ޤަބޫލުކުރެވޭ ކަމެއްނޫނެވެ. އެވީކަމެއްވެދިޔައީ ، ވަލީމާއަށް ޚާޟިރުވެއޮތް އެންމެންގެ ކުރިމަތީގައެވެ. ޢާއިލާގެ ޤަދަރާއި ޢިއްޒަތަކީ ، ޢާއިލާގެ ޅީދަރިފުޅަށްވުރެ މަތީ އެއްޗަކަށް އެއޮތީ ވެފައެވެ. ނަށަމުންގެންދިޔަ ކުދިންގެ ތެރެޔަށް މީރަބް ނުކުމެ އެކުދިންނާ ބައިވެރިވުމުން ، އެޢާއިލާގެ ޤަދަރާއި ޢިއްޒަތް އުފުލި ، އެކަމާ ހިތްހަމަޖެހުނު އެތައްބަޔަކު އެތާތިބޭނެކަން ޔަޤީނެވެ. އެހެނެއްކަމަކު ، އެއީ މުރުތަސިމްމެން ބަލަން ބޭނުންކަމަކަށް ނުވިއެވެ. ޅީދަރިފުޅަށް ހަދާލިގޮތުން ، ޢާއިލާގެ އަބުރާއި ޢިއްޒަތް ގެއްލިގެންދާ ފަދަ ވިސްނުމާއި ފިކުރުގެ މީހުންވެސް އެތަނަށް ޙާޟިރުވެ ތިއްބެވެ.
މީރަބް ވިސްނާ ވިސްނުމުން ވިސްނާ އެއްވެސް އިންސާނަކު އެގެޔަކު ނެތެވެ. މީރަބްގެ ކަންކަށިމަތީ އެޖެހިޖެހުމުން މީރަބަށް އެނގުނު އެއްޗަކީ ، އޭނާއަށް އެއުޅެވެނީ ގޭބަންދުގެ ޙާލަތެއްގައި ކަމުގައެވެ. އޭނާގެ ބަހެއް އެއްވެސްކަމަކަށް ނުވިކެއެވެ. އޭނާގެ އަބުރެއް ޢިއްޒަތެއް ނެތެވެ. އޭނާ ބޭނުންވާ އެއްވެސް ކަމެއް ، އެ ޤައިދުޚާނާގައި ފުރިހަމައެއް ނުވާނެއެވެ.
" ތިއީ މީރަބް އަމިއްލަޔަށް ވިސްނާ ގޮތެވެ. އަހަރެންގެ އަނތްބަކަށްވުމަކީ ، މިގޭގެ ހަތަރުފާރުގެ ތެރޭގައި މީރަބް ބަންދުވުމެއް ނޫނެވެ. މިއަދުވެސް ތިއީ ހަމަ ކުރީގެ މީރަބެވެ. ތެދު ޤަބޫލުކުރާ އިންސާފަށް ލޯބިކުރާ ، އެ މީރަބެވެ. ހިތްވަރުގަދަ އަދި ޖެހިލުމެއްނުވާ ، ވިސްނުނތެރި ، އެ މީރަބެވެ. " މުރުތަސިމް ބުންޏެވެ.
މީރަބަކީ ، އެގޭގެ ޙިއްޞާއެއްގެ ގޮތުގައި ޤަބޫލު ކުރުމަށް މުރުތަސިމް އެދުނެވެ. މުރުތަސިމަށް އިތުބާރުކުރުމަށްވެސް އެދުނެވެ. އެއީ އެހާ އުނދަގޫކަމަކަށް ނުވާނެއެވެ. އަދި މީރަބަށް ލިބުނު ޙައްޤު އޭގެ އެންމެ ފުރިހަމަގޮތުގައި ބަލައިގަތުމަކީ ، މުރުތަސިމްގެ އެދުމެކެވެ.
މަންމަޔަކީ ، ޚުދުމުޚުތާރު މީހެއްކަން މުރުތަސިމަށްވެސް އެނގެއެވެ. އެކަމަކު ، ހިތްތިރި އަދި ހިތްހެޔޮ އިންސާނެއްކަމަށް މުރުތަސިމް ބުންޏެވެ. ހަމައެއާއެކީ ، މަންމަގެ އަތަކީ ބާރުގަދަ އަތެއްކަމަށް ، މީރަބްވެސް ބުންޏެވެ.
މުރުތަސިމްގެ ހިތްހަމަ ނުޖެހުމަކީ ، މަންމައާ އަދަބެއް އިޙްތިރާމެއްނެތި ، މީރަބް ޖަދަލު ކުރުމެވެ. އެހެނަސް ، މީރަބް ، ޖަދަލެއް ނުކުރެއެވެ. ޚާނަމް ބުނި އެއްޗަކަށް އޭނާ ޖަވާބު ދިނީއެވެ.
" މީރަބް އެވެ ! މަންމަޔަކީ ، މިގޭގެ އެންމެ އިސްމީހާއެވެ. އެއްވެސް މީހަކު ، މަންމަގެ ކުރިމަތީ ބަހުސެއް ނުކުރާނެއެވެ. އަހަރެންވެސް އެކަމެއް ނުކުރަމެވެ. އެކުވެރިޔާއެވެ ! ޢިއްޒަތް ލިބޭނީ ޢިއްޒަތްދީގެންނެވެ. އިޙްތިރާމް ލިބޭނީ އިޙްތިރާމް ކޮށްގެންނެވެ. އެ ހުންނަނީ އަގަކާ ނުލައި ލިބޭ އެއްޗިއްސެވެ. ބައެއްފަހަރަށް ވިސްނުން ބަދަލުކޮށްލަނިކޮށް ، އެކަންކަން ލިބޭނެއެވެ. " މުރުތަސިމް ބުންޏެވެ.
ނިދަން ދާން ބުނެބުނެ ، މީރަބް ގުޑައެއް ނުލިއެވެ. އެހެންކަމަށް ވަންޏާ ވިސްނައިގެން އެތާ ހުރުމަށް މުރުތަސިމް ބުންޏެވެ. އަދި އެގޭގެ ޙާލަތާބެހޭގޮތުން ، މީރަބް ބިރުގަންނުވައިލިއެވެ. އެގެޔަކީ ، ވަރަށް ގިނަދުވަހު ހުހަށްހުރި ގެޔެކެވެ. ބޮޑުތަނެއްވީމަ ޖިންނި އަވަލާފައި ހުރި ޢިމާރާތެކެވެ. ރޫޙުވެސް ބައެއްފަހަރަށް ފެނެއެވެ. އެއީ ، މުރުތަސިމްގާތު ބައެއމީހުން ބުނެފައިވާ ވާހަކަ ކަމަށް ބުނެ ، މީރަބް ބިރުގަންނުވައިލިއެވެ. އަދި ، ބަލައިގެން އުޅުމަށް ، ޚާއްޞަކޮށް މީރަބް މިހާރުހުރި ތަނަށް ސަމާލުކަން ދީގެން ހުރުމަށް ނަޞޭޙަތްތެރިވަމުން ، މުރުތަސިމް ގޭތެރެޔަށް ވަންނަން ހިނގައި ގެންފައި މީރަބް ބިރުގަތީތޯ ސުއާލު ކުރިއެވެ.
މީރަބް ބިރުނުގަންނަކަމަށް ޖަވާބު ދިނެވެ. އެކަމަކު ، މުރުތަސިމް އެތަނުން ނުގޮސް ހުރީތީ ، އޭނާ ގޭތެރެޔަށް ދަނީކަމަށްބުނެ ހިނގައިގަތެވެ. ފަހަތުން މުރުތަސިމްވެސް ހިނގައިގަތެވެ. ދަމުން ދަމުން ، މުރުތަސިމަށް އެތާހުރި ސްވިޗެއް ފެނުމުން ނިއްވައިލާ ތަން އަނދިރި ކޮށްލިއެވެ. ކުއްލިޔަކަށް މުޅިތަން އަނދިރިވުމުން ބިރުންގޮސް ، މުރުތަސިމަށް ގޮވައިލުމަށްފަހު ، މުރުތަސިމް ގާތަށްގޮސް ، މީރަބަށް މުރުތަސިމްގެ ގައިގައި ބައްދައިލެވުނެވެ.
މުރުތަސިމްގެ އަތުގައި އޮތް ލައިޓަރ ދިއްލައިލުމާއެކު ، މީރަބަށް މުރުތަސިމާ ދިމާލަށް ބަލައި ލެވުނެވެ. އަދި އެ ދެމީހުންނަށް އެތައް އިރެއް ވަންދެން އެކަކު އަނެކަކުގެ ލޮލަށް ބަލަހައްޓައިގެން ތިބެވުނެވެ. އެހެނަސް ، އެތަން ދިއްލައިލުމާއެކީ ، އެއީ މުރުތަސިމް ކުރިކަމެއްކަން މީރަބަށް އެނގުނެވެ.
މީރަބާއެކީ ، އެނދުގައި އޮށޯވެލުމަށް މުރުތަސިމް ބޭނުންވިއެވެ. އެހެނަސް އެކަން މީރަބަށް ވިސްނިގެން ، ބާލީސް ދިއްކޮށްލުމުން ، އެއީ މީރަބް އެދޭގޮތެއްނޫންކަން މުރުތަސިމް ދެނެގަތެވެ.
ސޯފާއަށްގޮސް ، ނިދަން އުޅެއުޅެ މުރުތަސިމަކަށް ނުނިދުނެވެ. ނިދިނައިސްގެން އުޅެނީ ކީއްވެތޯ މީރަބް ސުއާލު ކުރިއެވެ.
" އަހަރެންނަކަށް ނޭނގެއެވެ. ( މުރުތަސިމްގެ މެޔަށް ޢިޝާރާތްކޮށް ) މިތަނަށް ތަދުވަނީއެވެ. މީރަބަކަށް އެއްވެސްކަމެއް ނުވިސްނޭނެއެވެ. " މުރުތަސިމް ބުންޏެވެ.
އަނީލާ ބާރުއަޅައިގެން ، ވައްޤާސްގޮސް އަންވަރާ ބައްދަލުކޮށް ، އެދެމަފިރިންގެ ކަންބޮޑުވުން ، އަންވަރާ ޙިއްޞާ ކުރިއެވެ. އަންވަރުވެސް ޤަބޫލުކުރިގޮތުގައި ، މީރަބާ ދޭތެރޭ އެގޭގައި ކަންކުރެވެނީ އެންމެ ރަނގަޅަކަށް ނޫނެވެ. އެއީ ، އޭނާގެހުރި ހަމަ އެކަނި ދަރިފުޅެވެ. މީރަބާ ދޭތެރޭ އެގޭގައި ބޭއިންސާފުން އެއްވެސްކަމެއް ހިނގިޔަނުދޭނެކަމަށް ، ވައްޤާސްއަށް އަންވަރު ވަޢުދު ވިއެވެ.
އަންވަރުގެ ކަންބޮޑުވުންތަކައިގެން ، ޚާނަމްގާތަށްގޮސް ، މީރަބާދޭތެރޭ ޚާނަމް ކަންކުރާގޮތާމެދު ޝަކުވާ ކުރިއެވެ. މީރަބްގެ ޢަމަލުތައް އެގޮތަށް ހުންނަކަމަށްވަންޏާ ، ޚާނަމްވެސް ހުރީ ގޮތްދޫކުރާގޮތަކަށް ނޫނެވެ. ޚާނަމްގެ ގާތުން އަންވަރު އެދުނީ ، މީރަބްގެ އަސްލުގޮތުގައި މީރަބް ބަލައިގަތުމަށެވެ. ޢާއިލީ ކަންކަމަށް އަހުލުވެރިވުމަށް ، މީރަބަށް ވަގުތު ދިނުމަށެވެ. ލޯތްބާއި އަޅާއިލުމާއެކީ ، މީރަބަށް ނަސޭޙަތްދީ މަގުދައްކައި ދިނުމަށެވެ. އޭނާއަށް އަނިޔާ ނުކުރުމަށެވެ. މަރިޔަމްއާއި ޙަޔާއަކީ ، ޚާނަމްގެ ދަރިންގެ ގޮތުގައި ބަލައި ބޮޑުކުރަމުން އަންނަ ގޮތަށް ، މީރަބަށްވެސް އެދަރަޖަ ދިނުމަށެވެ.
މުރުތަސިމާއި ޚާނަމްއާ ދެމައިންވެސް ، މީރަބާ ބެހޭގޮތުން ވާހަކަ ދައްކައި ބަހުސް ކުރިއެވެ. މުރުތަސިމްވެސް ބޭނުންވީ ، މީރަބަށް ޙައްޤު މަޤާމު އޭނާއަށް ދިނުމަށެވެ. ގޭގައި އޭނާގެ އަނބިމީހާއަށް އޮންނަ ޙައްޤުތަކާއެކީ ، ޒިންމާއާއި މަސްއޫލިއްޔަތުވެސް މީރަބާ ޙަވާލު ކުރުމަށެވެ. އެހެން ނޫންކަމަށް ވަންޏާ ، މަންމައާއި އޭނާގެ ޤަދަރާއި ޢިއްޒަތްވެސް އިސާހިތަކު ، މީސްތަކުންގެ ކުރިމަތީ ނެތި ދާނެއެވެ. މީރަބަކީ އާދައިގެ އަންހެންކުއްޖެއްނޫންކަން އޭނާގެ މަންމަޔަށް ، މުރުތަސިމް ހަނދާން ކޮށްދިނެވެ. އެއީ ، މުރުތަސިމްގެ ދައްތަގެ ދަރިއެކެވެ. އޭނާގެ އަނބިމީހާ ހަމަމަގަށް އެޅުވުމަށް އޭނާ ކުރަންޖެހޭ ކަންކަން އޭނާ ކުރާނެކަމަށް މުރުތަސިމް ބުންޏެވެ.
މީރަބްގެ މިޒާޖާއި ބަހުސްތަކަށް މުރުތަސިމް ގަޔާވަމުން ދިޔައެވެ. އަދި ، މުރުތަސިމް ދޫކޮށްލާފައި ނުދިއުމަށް މީރަބްގެ ކިބައިން އެދުނެވެ. މުރުތަސިމަކީ އޭނާގެ ފިރިމީހާކަމަށް މީރަބް ބަލައިގެންފިނަމަ ، މީރަބާދޭތެރޭ ހިތްހަމަ ނުޖެހޭ އެންމެންވެސް ، މުރުތަސިމްގެ މަސައްކަތުން މައިތިރި ކުރާނެއެވެ. މީރަބް ރުޅިއަންނަ ވަރަކަށް މުރުތަސިމްގާތަށް އަންނަނީ ހިންޏެވެ. އަދި ، އެކަމާ ގުޅިގެން މީރަބްގާތަށް އަންނަ ރުޅި އިތުރަށް ގަދަވަމުން ދެއެވެ. މީރަބް ފަދައިން މުރުތަސިމަކީވެސް ، އޭނާ ބޭނުންވާ ކަމެއް ޙާޞިލް ކުރުމަށްޓަކައި ކޮންމެފަދަ ކަމެއްވެސް ކޮށްފާނެ މީހެކެވެ. މުރުތަސިމް ހުންނަނީ އެކަމުގައި މީރަބަށްވުރެ އެތައް ދަރަޖައެއް ކުރީގައެވެ. މީރަބް އެހުރީ ، މުރުތަސިމްގެ އަނތްބަކަށް ވެފައެވެ. އެހެނަސް މީރަބް އެކަން ބަލައެއް ނުގަނެއެވެ. މީރަބް އެކަމަށް އެއްބަސް ކުރުވުމަށްޓަކައި ، މުރުތަސިމްގެ ކުރިމަތީގައިވާ ގޮންޖެހުން އޭނާ ކާމިޔާބު ކުރާނެއެވެ. އެހެން ނޫންކަމަށް ވަންޏާ ، އެއީ ، މުރުތަސިމް އަޙްމަދު ޚާން އެއްނޫނެވެ. އަދި ޝާހް ނަވާޒްގެ ދަރިއެއްވެސް ނޫނެވެ.
މީރަބްވެސް ޚާނަމްގާތަށް ޙާޟިރު ކުރެވުނެވެ. އޭގެކުރިން ، މުރުތަސިމް އޮތީ ޚާޟިރު ކުރެވިފައެވެ. މަންމަގާތު މުރުތަސިމް ބުނީ ކީކޭތޯ މީރަބް ސުއާލު ކުރިއެވެ.
" މަންމަ ހިތްހަމަ ނުޖެހޭ އެއްވެސްކަމެއް މީރަބް ކޮށްފިއްޔާ ، ކަންކަށިމަތީ ޖަހަން ނުހަދައި ، އެއްފަހަރުން ބަޑިޖަހައި މަރައިލާށޭ އަހަރެން ، މަންމަ ގާތު ބުނީމެވެ. " މުރުތަސިމް ބުންޏެވެ.
މުރުތަސިމްގެ އެ ސަމާސާ ވާހަކައިންވެސް މީރަބްގާތަށް އިތުރަށް އައީ ރުޅިއެވެ. މުރުތަސިމާއެކީ ، ދިރިއުޅުމާމެދު ، އެންމެ ސިކުންތަކަށްވެސް އޭނާ ނުވިސްނާނެކަމަށް ، މީރަބް ބުންޏެވެ.
މީރަބް ގެންގޮސް ، ޢާއިލާގެ ހުރިހާ ރަނާއި ފައިސާއެއް ރައްކާކުރެވިފައިވާ ތިޖޫރީތަކުގެ ތަޅުދަޑިފަތި ، ޚާނަމްގެ އަތުން މީރަބާ ޙަވާލު ކުރިއެވެ. އެއީ ، ޚާނަމްގެ މަރްޙޫމް ފިރިމީހާ އޭނާއާ ޙަވާލުކުރި އަމާނާތެކެވެ. އެއަމާނާތް ، ޚާނަމް އެ ޙަވާލުކުރީ ، އެޢާއިލާގެ ހުރިހާ ޒިންމާއަކާއި މަސްއޫލިއްޔަތެއް ކުރިޔަށް އޮތްތާނގައި އުފުއްލަންހުރި މީރަބާއެވެ. އެތަކެތި އަމާނާތްތެރިކަމާއެކީ ބެލެހެއްޓުމަށް ވަޢުދުވުމަށް ، ޚާނަމް އެދުނެވެ. ޚާނަމްގެ އެދުމާ އެއްގޮތަށް ، އެކަމަށް މީރަބް ވަޢުދު ވިއެވެ. ހެއްކެއްގެ ގޮތުގައިހުރީ ޙަޔާއެވެ. އެއީ ، ޙަޔާގެ ހިތަށް ތަކުލީފުލިބިގެންދިޔަ ވަގުތު ކޮޅެކެވެ. ޙަޔާގެ މުޅި ޙަޔާތުގައި އުއްމީދުކޮށްގެންހުރި އެންމެ މުހިންމު ކަންތައްވެސް އަތުން ބީވެގެންގޮސް ، އެލައްވާލީ މީރަބާއެވެ. ޙަޔާގެ ހިތަށް ލިބުނު ކެކުޅުމުން އުފެދުނު ކަރުނަތައް ލޮލުން ފައިބައިގަތެވެ. ( ނުނިމޭ )
