( 11 ޖޫން 2025 ގައި ޝާއިޢުކުރި ބަޔާގުޅޭ )
ކަރާޗީއަށް ދިއުމަށްފަހު ، މީރަބް ނެތުމާގުޅިގެން ، ގޭތެރެޔަށް ވެރިވެފައިވާ ފަޅުކަމުން ، ވައްޤާސްގެ ދެމަފިރިންނަށް ލިބިފައިވާ ތަކުލީފަށް އެދެމީހުންނަށް ކެތްކުރެވެނީކީ ނޫނެވެ. އަހަރެންގެ ލޯބިވާ ބައްޕާއޭ ބުނެ ، ދުވެފައި އައިސް ، ވައްޤާސްގެ ގައިގައި މީރަބް ބައްދާލާ ހަނދާން އެއީ ، ދުނިޔޭގައި ވައްޤާސް ދިރިހުރުމުގެ ފަރުވާއެވެ. މީރަބް ނުކާން ބޮޑާ ހެދީމާ ، ފަހަތުން ދުވެގޮސް ، އަތުލަފިކޮށްގެން ، އުނގުތެރެޔަށްލައިގެން ، ކާންދޭ ހަނދާން އެއީ ، އަނީލާގެ ހިތުގެ ތަސައްލީއެވެ. އެދެމަފިރިންނަށް ލިބިފައިވާ ތަކްލީފުން ހިތްފަޅައިގެންދާ ވަރު ވެއެވެ.
ބައްޕައާއި މަންމަޔަށް މީރަބް ފޯނުކުރިއިރު ، ދެމީހުންކުރެ އެކަކުވެސް ފޯނެއް ނުނަގައެވެއެވެ. އެންމެ ފަހަރަކު އެމީހުންނާ ވާހަކަ ދައްކާލަން މީރަބް ބޭނުން ވިއެވެ. އޭގެފަހުން ، އެދެމަފިރިން ، އޭނާ ދޫކޮށްލިޔަސް މައްސަލައެއް ނެތެވެ. އެކަމަކު ، އޭނާ ކަރާޗީއަށް ދާނީ ކިހިނެއް ހެއްޔެވެ ؟ އޭނާ އަމިއްލަޔަކަށް އެކަމެއް ނުކުރެވޭނެއެވެ. ގޭގެ އެއްވެސް ކާރެއްގައި މީރަބް އަމިއްލަޔަށް ، އެކަނި ބޭރަށްދިއުން ، ޚާނަމް އޮތީ މަނާކޮށްފައެވެ. ގޭގެ ޗޯކީދާރުންނާ ހަނގުރާމަކޮށްގެން ، މީރަބަކަށް އެކަމެއް ނުކުރެވޭނެއެވެ. އޭނާއަށް އެކަން ކޮށްދެވޭނެ ހުރީ ހަމަ އެންމެ މީހެކެވެ. އެއީ މުރުތަސިމެވެ.
މުރުތަސިމް ގާތަށްގޮސް ، އޭނާ ކަރާޗީއަށް ގެންގޮސް ދިނުމަށް މީރަބް އެދުނެވެ. މުރުތަސިމްގެ އެތައް ސުއާލުތަކެއް މީރަބާ ކުރިމަތި ވިއެވެ. މުރުތަސިމް ބޭނުންވީ ، އެވާހަކަ އަންވަރުގާތު ބުނެގެން ، މީރަބް ކަރާޗީއަށް ދިއުމަށެވެ. އެހެނަސް ، މީރަބް ބޭނުންވީ ، މުރުތަސިމް އޭނާއަށް އެކަން ކޮށްދިނުމަށެވެ. އަންވަރުގާތު ، އެއްވެސް ކަމަކު ކިޔާކަށް މީރަބް ބޭނުމެއް ނޫނެވެ. އެންމެ ފަހުފަހަރަށް އޭނާ ކަރާޗީއަށް ގެންގޮސްދިނުމަށް ، މުރުތަސިމްގެ ކިބައިން މީރަބް އެދުނެވެ. ވައްޤާސްގެ ދެމަފިރިންނާ އެންމެ ފަހުފަހަރަށް ބައްދަލުކޮށްލުމަށްފަހު ، މުރުތަސިމާއެކީ އޭނާ އަނބުރާ އަޙްމަދުއާބާދަށް އަންނާނެއެވެ.
މީރަބް ހަމަޔަކަށް އެޅެންދެން ، މީރަބްގެ ކަންކަން ބެލެހެއްޓުން ، ޚާނަމް ޙަވާލުކޮށްފައި އޮތީ މަރިޔަމްއާއެވެ. ޙަޔާގެ ފަހަތުން ނުދުވެ ، ދުވަސްކޮޅަކަށް މީރަބާއެކީ ވަގުތު ހޭދަކޮށް ، މީރަބް ބެލެހެއްޓުމަށް މަރިޔަމްއަށް ޚާނަމް އޮތީ އަންގާފައެވެ.
މީރަބް އެދުނުގޮތަށް ، ކަރާޗީއަށް ގެންގޮސް ދިނުމަށް މުރުތަސިމް އެއްބަސްވިއެވެ. އެހެނަސް ، ޝަރުތަކާ އެކީގައެވެ. އެއީ ، އޭނާއާއެކީ ، މީރަބް އެނބުރި ކަރާޗީއަށް އައުމެވެ. އެކަމަށް މީރަބް ވަޢުދުވިއެވެ.
ދޮރުގައި ތަޅައިގަތްގޮތުންވެސް ، އެއީ މީރަބްކަން ވައްޤާސްއަށް އެނގުނެވެ. އެކަމަކު ، އޭނާގެ ގޭގެދޮރު ، މީރަބަށްޓަކައި ބަންދުކޮށްގެންހުރެ ، އެދޮރ ހުޅުވާނީ ކިހިނަކުން ހެއްޔެވެ ؟ އެގެޔަކީ މީރަބްގެ ކާފަ ، ޝާހްނަވާޒްގެ ދީލަތިކަމުން ، ވައްޤާސްއަށް ހޯދައިދީފައިހުރި ގެޔެކެވެ. އޭގޭގެ ދޮރު ، މީރަބަށްޓަކައި ، ވައްޤާސްއަކަށް ބަންދެއް ނުކުރެވޭނެއެވެ. މީރަބް ކަމަށް ވަންޏާ ، ކަރާޗީއަށް އެއައީ ކިހިނެއް ހެއްޔެވެ ؟ މީރަބް އެގެއިން ނުކުމެގެން އަންނާކަށް ޚާނަމް ދުލެއް ނުކުރާނެއެވެ. އެކަމަކު ، އެއީ މީރަބެވެ. މީރަބް ބޭނުންވާ ކަމެއް ކޮންމެ ގޮތަކުން ނަމަވެސް ކުރާނެއެވެ. އެތައް ވަރަކަށް ދޮރުގައި ތެޅީމާ ، އަނީލާ އާދޭސްކޮށްގަތީމަވެސް ، ދޮރު ހުޅުވާކަށް ވައްޤާސް އެއް ނޫޅުނެވެ. އެ ސެމަފިރިންނަށްވެސް ހީކުރެވުނީ ހަމަ ރަނގަޅަށެވެ. އެއީ މީރަބެވެ. އެންމެ ފަހު ފަހަރަށްނަމަވެސް ، ދޮރުހުޅުވާލަ ދިނުމަށް ، ރޮމުން އާދޭސް ކުރަމުން ދޮރުގައި ތަޅަމުން އެގެންދަނީ މީރަބެވެ. އެއީ ، މީރަބްގެ އަޑުކަން އެދެމީހުންނަށްވެސް އެނގެއެވެ.
ޚާނަމް ބުނެގެން މީރަބަށް ކާންހިފައިގެން މަރިޔަމް ދިޔައިރު ، މީރަބް ކޮޓަރިޔަކު ނެތެވެ. ގޭގެ އެތަންމިތަން ހޯދާވެސް މީރަބެއް ނުފެނުނެވެ. މީރަބް އެދިޔައީ ކަރާޗީއަށްކަމުގައި ޙަޔާއަށް ބުނެވުމާއެކީ ، މީރަބް ކަރާޗީއަށް ދާން އެހީތެރިވެދިނީ ޙަޔާކަމަށް ޚާނަމް ޝައްކު ކުރިއެވެ. އެހެންނޫނީ ، މީރަބް ކަރާޗީއަށް ދިޔަކަން ޙަޔާއަށް އެނގެންވީ ސަބަބެއް ނެތެވެ. އެހެނަސް ، މަރިޔަމްވެސް އަދި ޙަޔާވެސް ، އެކަމުގައި މީރަބަކަށް އެހީތެރިއެއް ނުވެއެވެ. މީރަބަށް އެކަހަލަ ކަމެއްގައި އެހީތެރިވާން ، ދެން އެގޭގައި ހުންނާނީ ކާކު ހެއްޔެވެ ؟
" މުރުތަސިމެވެ. މީރަބް ކަރާޗީއަށް ގެންގޮސްދިނީ މުރުތަސިމެވެ. " ފަހަތުން ހިނގާފައި އަންނަމުން ، އަންވަރު ބުންޏެވެ.
އަންވަރު ހުރީ އެކަމާ ހިތްހަމަ ނުޖެހިފައެވެ. މީރަބް އެދިޔައީ ފިލައިގެންނެއްނޫނެވެ. މީރަބް އެދިޔައީ ، މުރުތަސިމް ގެންގޮސްދިނީމައެވެ. މުރުތަސިމް އެކަން ކޮށްދޭންވީ އެއްވެސް ސަބަބެއް ނެތެވެ. އެވާނީ ، މީރަބް ކިޔައިގަތްގަތީނުންގޮސް ، ސަލާމަތް ނުވެގެން ، މުރުތަސިމް އެކަން ކޮށްދިނީ ކަމަށެވެ. މީރަބް ދިޔަތޯ ބަލަން ، ވައްޤާސްއާ އަންވަރު ގުޅިއެވެ. އަދި ، މީރަބް ދިޔައިމަ އަނބުރާ ކަރާޗީއަށް ފޮނުވައިދިނުމަށް އެންގިއެވެ. ޚާނަމްހުރީ އެކަމާ ކަންބޮޑުވެފައިކަމުގައިވެސް އަންވަރު ބުންޏެވެ. އެކަން ކުރާނެކަމަށް ބުނެ ، ވައްޤާސްވެސް އެކަމަށް ވަޢުދުވިއެވެ.
ދޮރުހުޅުވައިލަދިނުން އެދި ރޮމުންރޮމުން މީރަބް އާދޭސްކުރަމުން ގެންދިޔައެވެ. އޭނާގެ މުޅި ޙަޔާތުގައި އެދެމަފިރިންގެ ފަރާތުން ލިބިފައިވާ އޯގާތެރިކަން ހަނދާން ކޮށްދީ ، އޭނާއަށް އެހެން ނުހެދުމަށް މީރަބް އާދޭސް ކުރަމުން ގެންދިޔައެވެ. އެމީހުންނާ ބައްދަލުކޮށްލާފައި އޭނާ އެނބުރި ކަރާޗީއަށް ދާނެކަމަށް ބުނަމުން ގެންދިޔައެވެ. އެމީހުންނަށް މީރަބް ގޮވާއަޑު ، އެމީހުންނަށް އިވޭކަން މީރަބަށް އެނގެއެވެ. އެމީހުންނަށް އާދޭސް ކުރަމުން ، ރޮމުންރޮމުން ދޮރުގައި ތަޅަމުން ގެންދާތަން ބަލަން ، ފަހަތުގައި ހުއްޓިލައިގެން މުރުތަސިމް ހުއްޓެވެ.
އެގޭގެ ދޮރު ، އެމީހުން ނުހުޅުވާނެކަމަށް މުރުތަސިމް ބުންޏެވެ. އޭނާ ތުއްތުއިރުއްސުރެ އުޅެބޮޑުވިގޭގެ ދޮރު އޭނާއަށް ބަންދުކުރެވިގެން ނުވާނެއެވެ. ބަފަޔަކު އޭނާގެ ދަރިފުޅަށް އެހެން ހަދާފާނެ ހެއްޔެވެ ؟ އެގޭގެ ދޮރު އޭނާއަށްޓަކައި ބަންދުކުރެވުނީ ، މީރަބްގެ ކޮންކުށެއް އޮވެގެން ހެއްޔެވެ؟ އޭނާގެ މައިންބަފައިންގެ ގޭގެދޮރު ، އޭނާއަށްޓަކައި ބަންދު ކުރެވުނީމަ ، ދެން އޭނާދާނީ ކޮންތާކަށް ހެއްޔެވެ ؟
" އަހަރެންނާއެކީ ، އަހަރެންގެ ގެޔަށް ހިނގާށެވެ ! " މުރުތަސިމް ބުންޏެވެ.
މީރަބްގެ ޙާލު ފެނިފައި ، އެއޮށް ހަރުކަށި މުރުތަސިމްގެ ލޮލުންވެސް ހުރީ ކަރުނަ ފާއްދާލާފައެވެ. ހިތްތިރިކަމާއެކީ ، ހިތިއަސަރަކުން މުރުތަސިމް އެބުނިބަސް ، މީރަބްގެ ކަންފަތުގައި ޖެހުމާއެކީ ، މީރަބް ކޮޅަށް ތެދުވިއެވެ. މުރުތަސިމްގެ ލޮލުން ފާޅުވާންހުރި ހަމްދަރުދީގެ އަސަރު ، މީރަބަށްވެސް އިޙްސާސް ކުރެވުނެވެ. އަދި މުރުތަސިމްގެ ލޮލުން ފާއްދާލާފައިހުރި ކަރުނަވެސް މީރަބަށް ފެނުނެވެ. މުރުތަސިމްގެ އަތް އޮތީ މީރަބާ ދިމާލަށް ދިއްކޮށްލެވިފައެވެ.
މުރުތަސިމްގެ އަތުގައި ހިފައިގެން ތެދުވެ ، މީރަބް މަޑުމަޑުން ހިނގާފައިގޮސް ކާރަށް އެރިއެވެ. ކަރާޗީއަށް އައި މަގުމަތީ ، ދެންހަދާނީ ކިހިނެއްތޯ ، މީރަބްއާ މުރުތަސިމް ސުއާލު ކުރިއެވެ. އެއަކަށް މީރަބް ޖަވާބެއް ނުދެއެވެ.
" މިހާރު އިރުއަރަން ތައްޔާރުވަނީއެވެ. ފަތިސްނަމާދުކޮށްލަން އަހަރެން ބޭނުމެވެ. މިތަނުން ތާކަށް ކާރު ހުއްޓާލަ ދޭށެވެ ! " މީރަބް ބުންޏެވެ.
ނަސީބަކުން ކަރާޗީގެ ޖަމާއީ މަސްޖިދު އެހިސާބާ އެހާ ދުރެއްނޫނެވެ. ކަރާޗީގެ ޖަމާއީ މަސްޖިދަކީ ، މުޅި ޕާކިސްތާނުގައިވެސް ހުރި އެންމެ ބޮޑު މިސްކިތެވެ. އެމިސްކިތަށް އަށްލައްކަ މީހުންނަށް އެއްފަހަރާ އެރެއެވެ. މިސްކިތުގެ ގޯތި ތެރެޔަށް ކާރު ހުއްޓާލައި ، ނަމާދުކުރަން މީރަބް ފޮނުވުމަށްފަހު ، މުރުތަސިމްވެސް ނަމާދު ކުރުމަށްޓަކައި ފިރިހެނުން ނަމާދަށް އަރަން ޚައްޞަ ކޮށްފައިވާ ބަޔަށް ވަނެވެ. ނަމާދުކޮށްނިމިގެން ، މީރަބް ކޮބައިތޯ ބަލައިލަން މުރުތަސިމް ހިނގައިގަތްތަނުން ، އަންހެނުން ނަމާދަށް އަރާބައިގާ ، ނަމާދުކޮށް ނިމިގެން ދުޢާކުރުމަށް ދެއަތް އުފުލާލައިގެން ، މީރަބް އިންތަން މުރުތަސިމަށް ފެނުނެވެ. އޭރު ، މީރަބް ދުޢާކުރަމުން ގެންދިޔައެވެ.
" އޭ މަތިވެރިވަންތަ އިލާހެވެ ! މިއަޅާއަށް ކުރިމަތިވެފައިވާ ހިތާމައާއި ހިތްދަތިކަމުގެ ތަކުލީފު ދެނެވޮޑިގެންވާނީ ، ހަމައެކަނި އިބަ އިލާހެވެ. މިއަޅާގެ ދިރިއުޅުމުގައި ، އިބައިލާހު ފިޔަވައި ހަމައެކަކުވެސް ނެތެވެ. އެންމެންވެސް މިއަޅާ ދޫކޮށްލައިފިއެވެ. މިއަޅާ އެކަނިވެރި ނުކުރައްވާދޭނވެ ! މިއަޅާގެ ހުރިހާ އުއްމީދެއް ނެތި ހިގައްޖެއެވެ. އިބަ އިލާހަކީ ، ހުރިހާކަމެއް މޮޅަށް ދެނެވޮޑިގެންވާ އިލާހެވެ. މިއަޅާގެ އޮތީ ހަމަ އެންމެ އުއްމީދެކެވެ. އެކަން ފުއްދައި ދެއްވޭނީ ، ހަމައެކަނި އިބައިލާހުގެ ޙަޟްރަތުން މިއަޅާއަށް މިންވަރު ކުރައްވާ ގޮތަކުންނެވެ. މިއަޅާއަށް ، މިއަޅާ އެދޭ ގޮތްތަކުގައި ސާބިތުވެ ، ހަރުދަނާކަންމަތީ ހުރުމުގެ ހިތްވަރާއި ތަވްފީޤު ދެއްވާށިއެވެ ! "
މިސްކިތުން ނުކުމެގެން މީރަބް ހިނގައިގަތްތަނާ ، ދުވަސްވީ ފިރިހެނަކާ މީރަބާ ދިމާވިއެވެ.
" ދަރިފުޅާއެވެ ! ކޮންމެކަމެއްވެސް ވާނީ ރަނގަޅަކަށެވެ. އެއްވެސް އިންސާނަކަށް އެކަލާނގެ ދެރަގޮތެއް އިރާދައެއް ނުކުރައްވާނެއެވެ. ވެދިޔަކަމެއް އެވީވެސް ރަނގަޅަކަށެވެ. ކުރިޔަށް އޮތްތަނުގައި ވާކަމެއްވާނީވެސް ރަނގަޅަކަށެވެ. އިންސާނާގެ ބޭނުމާއި މަޤްޞަދު ، އެނގޭނީ އެކަލާނގެ ނޫން އެހެން ކޮންފަރާތަކަށް ހެއްޔެވެ ؟ ދަރިފުޅުގެ ދުޢާވެސް އެކަލާނގެ އައްސަވައި ވޮޑިގެންފިއެވެ. އިންސާނާ ޚަލްޤު ކުރައްވައި މިބިންމައްޗަށް ފޮނުއްވީ ﷲ އެވެ. އެއްވެސް އިންސާނަކު އެކަލާނގެ ރަޙުމަތުން ބޭރެއް ނުކުރައްވާނެތެވެ. އަދި ، އެއްވެސް އިންސާނަކު އެކަނިވެރިޔެއްވެސް ނުކުރައްވާނެތެވެ. ﷲ އަށް ވަކީލު ކުރާށެވެ ! ހުރިހާކަމެއްވެސް ރަނގަޅު ވާނެއެވެ. " އެބޭބެ ، މީރަބާ މުޚާތަބު ކޮށް ބުންޏެވެ.
އެ ބޭބެގެ ވާހަކަތަކުން ، މީރަބްގެ ހިތަށް ކޮންމެވެސް މިންވަރެއްގެ ތަސައްލީއެއް ލިބުނެވެ. ހިތްހަމަ ޖެހުމުގެ ނޭވާއެއްލައި ، މަތިބަލައިލާ ، ދެލޯމަރައިލުމަށްފަހު ،މީރަބް ކުރިޔަށް ހިނގައިގަތެވެ.
މީރަބް ކުރި ދުޢާގެ އަޑު ، މުރުތަސިމަށްވެސް އިވުނެވެ. އޭނާގެ މޫނު މައްޗަށް އުފުލި ، މީރަބްގެ ދުޢާ ޤަބޫލުކޮށްދެއްވުން އެދި ﷲ ގެ ޙަޟްރަތުގައި ދަންނަވައި ، މީރަބް ބޭނުންވާ ގޮތަކަށް އޭނާގެ މުރާދުތައް ޙާޞިލްކޮށްދެއްވުން އެދި ، ދެއަތް މައްޗަށް ނަގައި ، މުރުތަސިމްވެސް ދުޢާ ކުރިއެވެ. ދުޢާކުރުމަށް ދެލޯމަރާލައިގެން ހުރެ ، ނިމިގެން ، ދެލޯހުޅުވައިލިއިރު ، މީރަބް ހުރިތަނަކު މީރަބެއް ނެތެވެ. މުރުތަސިމްގެ ދެލޯ ބޮޑުވިއެވެ. ދުވަމުންގޮސް ، އެކޮޅު މިކޮޅު ހޯދައި ބެލިއިރުވެސް ، މީރަބެއް ނުފެނުނެވެ. އެތައް ތަނެއް ބެލުމަށްފަހު ، ހާސްވެފައިހުއްޓާ ، މިސްކިތުގެ ބޭރުގައިހުރި ތަނބެއްގައި މީރަބް ލެނގިލައިގެން ހުއްޓާ ފެނުނެވެ. ފިނިކަމުން ، މީރަބްހުރީ ތުރުތުރު އަޅައަޅައެވެ.
މުރުތަސިމް ކަންބޮޑު ނުވުމަށް މީރަބް ބުންޏެވެ. އޭނާ ފިލައިގެން އެއްވެސްތާކަށް ނުދާނެއެވެ. އެހެން އެއްވެސްގޮތެއް އޭނާއަކަށް ނެތެވެ. މަންމަޔާ ވާހަކަ ދައްކައިގެން އެހެންގޮތެއް ފެނޭތޯ ބަލާނެކަމަށް މުރުތަސިމްވެސް ބުންޏެވެ.
ގެޔަށް އައިސް ވަތްތަނުން ، ޚާނަމްގެ ސުއާލުތަކާ މީރަބަށް ކުރިމަތިލާން ޖެހުނެވެ. ޚާނަމްގެ ސުއާލުތަކަށް ޖަވާބު ދިނުމުގެ ބަދަލުގައި މީރަބް ބުނީ އެހެން ވާހަކައެކެވެ. އެއީ އެތާ ތިބި އެންމެން ސއްސައިގެންދިޔަ ވާހަކައެކެވެ.
" އަހަރެން ، މުރުތަސިމާ ކައިވެނިކުރަން އެއްބަސް ވަމެވެ. " މީރަބް ބުންޏެވެ.
މީރަބްގެ އެ ވާހަކައިން ، ޚުދު މުރުތަސިމްވެސް ދިޔައީ ސިއްސައިގެންނެވެ. އެއީ ، މީރަބްގެ ދުލުން ބޭރުވެދާނެކަމަށް ، މުރުތަސިމް ހީކޮށްގެންހުރި ވާހަކައެއް ނޫނެވެ. ޙަޔާގެ ދެލޯ ވަކިން ބޮޑުވެގެން ދިޔައެވެ. އެވާހަކައިން މޫނުމައްޗަށް ހިނިތުންވެރިވެގެންދިޔަ ދެމީހަކުވެސް އެތާ ތިއްބެވެ. އެއީ ، ޚާނަމްއާއި އަންވަރެވެ. ޚާނަމްގެ އަނގަވެސް ތަންމިނަށް ހުޅުވުނެވެ. އެހެނަސް މަޑުމަޑުން ، ހިނިތުންވުމަކަށް ބަދަލުވިއެވެ. މަރިޔަމްވެސް ހުރީ އާގަމަ ވެފައެވެ.
ޚާނަމްއަށް މީރަބް އެބުނި ވާހަކައެއް ޤަބޫލެއް ނުކުރެވުނެވެ. މީރަބްގެ ގާތަށްޖެހިލައި ، މީރަބް އެބުނީ ކީކޭތޯއާއި އަދި އެއްފަހަރު އެހެން ބުނެލުމަށް ޚާނަމް އެދުނެވެ. މީރަބް ، މުރުތަސިމާ ދިމާލަށް ބަލައިލިއެވެ. އެކަމަށް އެއްބަސް ނުވުމަށް މުރުތަސިމްގެ ބޮލުން އިޝާރާތް ކުރަމުން ގެންދިޔައެވެ. އެހެންނަމަވެސް ، ދެލޯ މަރައިލުމަށްފަހު ، މީރަބް އެބުނި ވާހަކައެއް އަލުން ތަކުރާރު ކުރިއެވެ. އޭނާ ، މުރުތަސިމާ ކައިވެނިކުރަން ތައްޔާރަށް ހުރިކަން ހާމަކުރިއެވެ.
ޙާލާގެ ހިތަށްވީތަދުން ، އެތާ ހުންނަން ނުކެރިގެން ފަހަތަށް އެނބުރި އޭނާގެ ކޮޓަރިޔާ ދިމާލަށް ދުއްވައިގަތެވެ. މުރުތަސިމްހުރީ މީރަބްދެކެ ރުޅިއަންނަންވެސް އަދި ޙައިރާންވާންވެސް ނޭނގި ދެލޯ ބޮޑުވެފައެވެ.
ޚާނަމަށް ލިބުނު އުފާވެރިކަން އިތުރު ވިއެވެ. މީރަބްގެ ނިތްކުރީގައި ޚާނަމް ބޮސްދިނެވެ. އޭނާއަށް އެލިބުނީ ، ދުވަހަކުވެސް ނުލިބޭފަދަ އުފާވެރިކަމެކެވެ. ކޮލުދަތަށް ދަންދެން ދިއްކޮށްގެންހުރެ ، މުރުތަސިމާ ދިމާލަށް ޚާނަމް އެނބުރިލިއެވެ. ޚާނަމް އެއްޗެކޭ ނުބުނަނިސް ، އެކަމަށް ގޮތެއް ނިންމަން ، އޭނާއަށް ވަގުތު ބޭނުންވާކަމަށް ބުނެ ، ކޮޓަރިޔާ ދިމާލަށް މުރުތަސިމް ހިނގައިގަތެވެ.
ޚާނަމްވެސް އިރުކޮޅެއްކޮށްލާފައި ، މީރަބް ކޮޓަރިޔަށް ފޮނުވައިލުމަށްފަހު ، މުރުތަސިމްގެ ކޮޓަރިޔަށް ދިޔައެވެ. މީގެ ކުރިން މުރުތަސިމް އޮތީ ކުއްޖަކާ ރައްޓެހިވެފައެވެ. އެ ކުއްޖާއާ މުރުތަސިމްގެ ކައިވެނި ނުކުރެވުނީ ، ޚާނަމް އެކަމަށް އެއްބަސް ނުވެގެންނެވެ. އޭގެ މާނަޔަކީ ، އެ ޢާއިލާގެ ވާރިސެއްގެ ގޮތުގައިހުރެމެ ، މުރުތަސިމަށް އޭނާގެ އަމިއްލަ ނިންމުންތައް ނިންމުމުގެ އިޚްތިޔާރު ލިބިފައި ނެތުމެވެ. އެހެނަސް ، އެކައިވެންޏަށް ޚާނަމް އެއްބަސް ނުވުމުގައި ، އޭރުގެ ޙާލަތާގުޅޭ ސަބަބުތަކެއް ހުއްޓެވެ. އެއީ ، މުރުތަސިމަށް ޤަބޫލު ކުރެވޭފަދަ ސަބަބުތަކެއް ނޫންކަމަށްވިޔަސް ، ޚާނަމް އޭނާގެ ގޮތްދޫނުކުރުމުގެ ނަތީޖާއަކަށް ވެގެން ދިޔައީ ، މުރުތަސިމަށް އޭނާގެ ލޯބިވެރިޔާއާ ވަކިވާން ޖެހުމެވެ.
މީރަބާ މުރުތަސިމް ކައިވެނިކުރަންޖެހޭ އެތައް ޙުއްޖަތެއް ޚާނަމް ދައްކަމުން ގެނދިޔައެވެ. މީރަބަކީ ، އެޢާއިލާގައި ހުރި އެންމެ ރީތި ކުއްޖާއެވެ. އެންމެ މޮޅަށް ކިޔަވައިގެންހުރި ކުއްޖާވެސް މެއެވެ. އަދި ، މުދާވެރިކަމުގެ ގޮތުންވެސް ، މީރަބަކީ މިހާރު މުރުތަސިމާ އެއް ފެންވަރެއްގެ ކުއްޖެކެވެ.
މީރަބާ ކައިވެނިކުރަން މުރުތަސިމް ބޭނުންނުވާ އެންމެބޮޑު އެއްސަބަބަކީ ، އެކައިވެންޏަށް މީރަބް ހިތްހަމަ ނުޖެހުމެވެ. އެހެންނަމަވެސް ، މީރަބް އާނއެކޭ ބުނުމުގެ މާނަޔަކީ ، އެކައިވެނިން އުފާވެރިކަމެއް ލިބިދާނެކަމަށް މީރަބަށް އުއްމީދެއް އޮތުމެވެ. އެކަން ޤަބޫލުކުރާކަށް މުރުތަސިމް ބޭނުމެއްނޫނެވެ. އެއީ ، ޚާނަމް މެންނަށްވުރެ ބޮޑަށް ، މުރުތަސިމަށް މީރަބް އެނގޭތީއެވެ. އެކަމަކު ، އެކައިވެންޏަށް މީރަބް އެއްބަސްވި ސަބަބު މީރަބްކުރެން އަހަން ބޭނުންކަމަށްބުނެ ، މުރުތަސިމް އެތަނުން ނުކުމެގެން ދިޔައެވެ. ( ނުނިމޭ )
