ވިހަ ތީރު (110)

( 6 މޭ  2025 ގައި ޝާއިޢުކުރި ބަޔާގުޅޭ )

ގޭދޮރުމަތިން ދިލްނަޝީނާ ދިމާވީ ސެކިއުރިޓީއަކާއެވެ. ސެކިއުރިޓީ ބުނިގޮތުގައި ، ޙައިދަރުވެސް އަދި ސާރާވެސް އުޅެނީ މަންމަ މާބޮޑަށް ބަލިވެގެން ، މަންމަ ގޮވައިގެން ހޮސްޕިޓަލުގައެވެ. ރޭގަނޑު ނިދަން ޙައިދަރު ގެޔަށް އާދެއެވެ. ދިލްނަޝީން މަޑުމަޑުން ގޮސް ގޭތެރެޔަށްވަދެ ، މައްޗަށް އަރަންހުރި ސިޑީގެ މެދުގައި މަޑުކޮށްލިއެވެ. ކުރިމަތީ ބެހެއްޓިފައިހުރި ، ދިލްނަޝީނާއި ޙައިދަރުގެ ފޮޓޯއަށް ބަލަހައްޓައިގެން ހުރެ ، ސިޑިމަތީ ދިލްނަޝީން އިށީނދެލިއެވެ.

ކުޑައިރުކޮޅެއްވީތަނާ މީހަކު ހަޅޭއްލަވައިގަތްއަޑަށް ދިލްނަޝީން ސިއްސައިގެން ދިޔައެވެ.

" މިތާ ތިކުރަނީ ކީއް ހެއްޔެވެ ؟ މީކީ ދިލްނަޝީނަށް ޖާގައެއް އޮތް ގެޔެއްނޫނެވެ. "

އެ އަޑު އިވުމާއެކީ ، ދިލްނަޝީން ލޯހުޅުވައިލިއެވެ. ކުރިމަތީ އެހުރީ ޙައިދަރެވެ. އޭނާ އެއައީ ، އޭނާގެ ގެޔަށްކަމުގައި ދިލްނަޝީން ބުންޏެވެ. ޙައިދަރު ދޭނީ ކޮން ޖަވާބެއް ހެއްޔެވެ. މިހާރު އެއީ ، ދިލްނަޝީންގެ ގެޔެއްނޫންކަމަށް ޙައިދަރު ބުންޏެވެ. އެހެންނަމަވެސް ، މިހާރުވެސް އޭނާ އެއިނީ ޙައިދަރާއެކު ކުރި ކައިވެނިމަތީ ، ޙައިދަރުގެ އަނތްބެއްގެ ގޮތުގައިކަމަށް ދިލްނަޝީން ބުންޏެވެ. އެގޭގެ ފާރުތަކުގައި އެހުރީ ދިލްނަޝީނާއި ޙައިދަރުގެ ކައިވެނީގެ ފޮޓޯ ތަކެވެ. ގޭގެ ނޯކަރުން ، ދިލްނަޝީނަކީ އަދިވެސް ޙައިދަރުގެ އަނބިމީހާކަމަށް ޤަބޫލު ކުރެއެވެ.

" އާނއެކެވެ ! އެއީ އަހަރެންގެ ކުށެވެ. އަހަރެންގެ ޙަޔާތުން ދިލްނަޝީން ބޭރުކޮށްލުމަށްޓަކައި އަހަރެންނަށް ވަގުތު ނުލިބުނީއެވެ. " ޙައިދަރު ބުންޏެވެ.

ޙައިދަރާ ވަކިވާން އޭނާ ބޭނުން ނުވާކަމުގައި ދިލްނަޝީން ބުންޏެވެ. އެހެންނަމަވެސް ، ދިލްނަޝީނާއެކީ އިތުރަށް ދިރިއުޅޭކަށް ޙައިދަރު ބޭނުމެއްނޫނެވެ. ދިލްނަޝީން އިންތަނުން ތެދުވިއެވެ. އެދެމީހުންގެ ދިރިއުޅުމުގެ ނިންމުން އޭނާގެ އަތްމައްޗަށް ޙައިދަރު ދޫކޮށްލާފައި އޮތްކަން ، ދިލްނަޝީން ހަނދާން ކޮށްދިނެވެ. ދިލްނަޝީނަށްވެސް ޙައިދަރު ކަމެއް ހަނދާން ކޮށްދިނެވެ. އެއީ އޭނާގެ ޙަލާލު އަނބިމީހާގެ ގޮތުގައި އޭނާގެ ދަރިޔަކަށް ބަލިވެ އިނދެ ހުރެ ، ޙަމްޒާއާ ބައްދަލުކުރުމަށް ދިޔަ ނިންމުމަކީ ، ދިލްނަޝީންގެ ނިންމުން ކަމަށާއި އެހިސާބުން ހުރިހާކަމެއް އެއޮތީ ނިމިފައިކަމަށް ޙައިދަރު ބުންޏެވެ. ދިލްނަޝީން ތެދުވެގެން އައިސް ޙައިދަރާގާތަށް ޖެހިލިއެވެ.

" އަހަރެންނަށް އިތުބާރުކޮށްފައި އަހަރެންގެ ބަސް ޤަބޫލުކުރާށެވެ. އަހަރެން ޙަމްޒާއާ ބައްދަލުކުރަން ދިޔައީ ، ޙަމްޒާއާ ހުރިހާ ގުޅުމެއް ކަނޑާލައި ، ޙަމްޒާއާ ވަކިވުމަށެވެ. " ދިލްނަޝީން ބުންޏެވެ.

ދިލްނަޝީން އެގެޔަށް އައިއިރު ، ހުރިހާކަމެއް ނިމި ޚަލާޞްވެފައިވާކަމުގައި ޙައިދަރު ބުންޏެވެ. އެހެން ނުހަދާ އޭނާއަށް އިތުބާރުކުރުމަށް ދިލްނަޝީން ރޮމުން ، އާދޭސްކުރަމުން ގެންދިޔައެވެ. އެހެންނަމަވެސް ، ދެން އިތުރަށް ، ދިލްނަޝީނަށް އިތުބާރު ނުކުރާނެކަމަށް ޙައިދަރު ބުނެ ، ހަމަ މިހާރު އެގެއިން ނުކުމެގެން ދިއުމަށް ދިލްނަޝީނަށް އަމުރު ކުރިއެވެ.

އެގެ ދޫކޮށްލާފައި އެހެންތާކަށް ނުދާނެކަމަށް ދިލްނަޝީން ބުންޏެވެ. އެހެންނަމަވެސް ، އެގޭގައި ދިލްނަޝީނަށް އެއްވެސް ޖާގައެއް މިހާރު ނެތްކަމުގައި ޙައިދަރު ބުންޏެވެ.

" ޙައިދަރެވެ. އަހަރެންނަށް އިތުބާރު ކުރާށެވެ. އަހަރެން ދިޔައީ ހުރިހާކަމެއް ނިންމައި ، ޙަމްޒާއާ ވަކިވާކަން ޙަމްޒާއަށް އެންގުމަށެވެ. އެކަމާ ރުޅިއައިސްގެން ، ޙަމްޒާ އެ އެކްސިޑެންޓް ކުރުވީއެވެ. އެކަމާ ގުޅިގެން އަހަރެމެންގެ ދަރިފުޅު .... "

ދިލްނަޝީންގެ ވާހަކަ ޙައިދަރު ހުއްޓުވިއެވެ. އަހަރެމެންގެ ދަރިފުޅު ނޫންކަމަށާއި އެއީ ޙައިދަރުގެ ދަރިފުޅުކަމަށް ބުނާށޭ ބުނެ ޙައިދަރު ހަޅޭއްލަވައިގަތެވެ.

" އެއީ އަހަރެންގެ ދަރިއެކެވެ. އެދަރިފުޅުވެސް ދިލްނަޝީން ތިއައީ ، ދިލްނަޝީންގެ ލޯބިވެރިޔާއާ ދެމީހުންވެގެން ނައްތައިލާފައެވެ. އެކަމުން އަހަރެންނަށް ލިބޭނެ ތަކުލީފު ދިލްނަޝީނަށް އިޙްސާސްވޭ ހެއްޔެވެ ؟ އެ ފިރިހެންކުއްޖާގެ މަންމަ ، ހޮސްޕިޓަލްތެރޭ އެންމެންގެ ކުރިމަތީ އަހަރެންނާ ދިމާލަށް ކީ އެއްޗެތީގެ އަޑެއް ދިލްނަޝީނަކަށް ނީވޭނެއެވެ. ރައްދުގައި އަހަރެން ޗުއްޕުވެސް ނުބުނަމެވެ. މަރަށް ތައްޔާރުވެފައި އިން އަހަރެންގެ މަންމަ ، އެ އަންހެނާގެ ބަސްތަކުން ހިތްފަޅައިގެން ދިޔައެވެ. އަހަރެންގެ ހިތަކީ އެހާ ވަރުގަދަ އެއްޗެއްނޫނެވެ. މިހުރިހާކަމެއް އަހަރެންނަކަށް ތަޙައްމަލެއް ނުކުރެވޭނެއެވެ. އަހަރެންގެ ކުރިމަތިން ދިލްނަޝީން ދުރަށް ދާށެވެ. އަހަރެންނަކަށް ދެނެއް ކެތެއް ނުކުރެވޭނެއެވެ. " ޙައިދަރު ބުނަމުން ގެންދިޔައެވެ.

އޭނާއަށް މަޢާފު ކުރުމަށްއެދި ، ދިލްނަޝީން އާދޭސްކުރަމުން ގެންދިޔައެވެ. އެއިން އެއްވެސް ކަމަކީ ، ދިލްނަޝީންގެ ކުށުން ހިނގި ކަންކަމެއްނޫނެވެ. ބައެއްކަންކަމަކީ ، މަޢާފު ކުރެވޭވަރަށްވުރެ ބޮޑެތި ކަންކަންކަމުގައި ޙައިދަރު ބުންޏެވެ. ދިލްނަޝީން އެކުރީ މަޢާފު ކުރެވޭވަރުގެ ކަމެއްނޫނެވެ. އެހުރިހާކަމެއް ބަރުބާދު ކޮށްލީ ދިލްނަޝީންގެ އަމިއްލަ އަތުންނެވެ. ޙައިދަރުގެ ދިރިއުޅުމާއި އެގޭގެ ހަމަޖެހުން ، ނަގައިލީ ދިލްނަޝީނެވެ. މަންމަގެ ބަލިހާލަތު އިތުރަށް ބޮޑުވެ ، ހޮސްޕިޓަލްގައި ބާއްވަން ޖެހުނީ ދިލްނަޝީންގެ ޢަމަލު ތަކުންނެވެ. ދިލްނަޝީން އެގެޔަށް އެއައީ އޭނާގެ ދަރިފުޅުވެސް މަރައިލާފައެވެ.

އޭނާ އަމިއްލަގަޔަށް ބަޑިޖަހައި މަރުނުވަނިސް އެގެއިން ނުކުމެގެން ދިއުމަށް ޙައިދަރު އެދުނެވެ. އަދި ، ދިލްނަޝީންގެ އަތުގައި ހިފައި ދޮރާދިމާލަށް ދިލްނަޝީން ހޫރައިލުމާއެކީ ، ދިލްނަޝީން ތަޅުންގަނޑުމައްޗަށް ވެއްޓުނެވެ. ދިލްނަޝީންގެ ގައިގެ އެތަން މިތަނުގައިވާ ޒަޚަމްތައް މުޅިން ފަސޭހައެއް ނުވެއެވެ. ވެއްޓުމާއެކީ ވީތަދުން ދިލްނަޝީނަށް ބާރަށް ރޮއިގަނެވުނެވެ. އެހެންނަމަވެސް ، އެތާ މަޑުނުކޮށް ޙައިދަރު ދުވެފައި ކަހަލަ ގޮތަކަށް ، ސިޑިން މައްޗަށް އަރައިގެން ދިޔައެވެ.

ހޮސްޕިޓަލުގައި އުޅުމަށްފަހު ، މެހެމަލްއާ ބައްދަލުކޮށްލުމަށްޓަކައި ފޯނުކޮށް ގަޑިއެއް ހަމަޖައްސައިގެން ޙައިދަރުދިޔައީ ، މެހެމަލްގެ ގެޔަށެވެ. ދިލްނަޝީނަށް ކުރިމަތިވި ކަންކަން ޙައިދަރު ، މެހެމަލްއަށް ކިޔައިދިނެވެ. އަޑުންއަޑުނަގާ މެހެމަލް ރޯން ފެއްޓިއެވެ. އަދި ، ދިލްނަޝީން އެގެއިން ބޭރުކޮށްލުމަށްޓަކައި އަދި ޙައިދަރުގެ ޙަޔާތަށް އެނބުރި އައުމަށްޓަކައި ، މެހެމަލް ރޭވިރޭވުންތަކާއި ، ޙަމްޒާ ހައްލައިލުމަށް މެހެމަލްދިން ނަޞޭޙަތާއި ، ދިލްނަޝީނާއި ޙަމްޒާ ގުޅުވުމަށް އޭނާ ކުރި ކަންކަން ޙައިދަރަށް ސާފުކޮށްދިނެވެ. މެހެމަލްގެ ކެހިވެރި ރޭވުންތަކާއި ، ދިލްނަޝީނަށް ދިން އިންޒާރާއި ކުރި މަލާމާތާ އަދި އަނިޔާގެ ހުރިހާ ވާހަކަތަކެއް ޙައިދަރަށް ކިޔައިދިނެވެ. ޙައިދަރަށް މެހެމަލްހެދި ދޮގުތަކާއި ޙައިދަރު ހައްލައިލުމަށްޓަކައި ކުރި ހުރިހާކަމެއްގެ ވާހަކަ ކިޔައިދިނެވެ. ކުލްސޫމަށް އޮޅުވާލައިގެން ، ކުލްސޫމްގެ ހިތުގައި އަދި ޙައިދަރުގެ ހިތުގައި ދިލްނަޝީންގެ މައްޗަށް ރުޅިއާއި ނަފުރަތު އުފެއްދުމަށްޓަކައި ކުރިހާކަމެއްގެ ވާހަކަވެސް ކިޔައިދިނެވެ.

މެހެމަލްއާ ވާހަކަ ދައްކަން ގަޑިއެއްހާއިރު ޙައިދަރު އިނެވެ. މެހެމަލްގެ ވާހަކަތައް ކިޔައިދިންދިންހެން ، ޙައިދަރުގެ ލޮލަށް އެއްވަމުންދިޔަ ކަރުނަތައް ގިނަވަމުން ދިޔައެވެ. ޙައިދަރާއި މެހެމަލްގެ ވާހަކަތައް އަޑުއިވޭ ހިސާބުގައި އަންޞާބު އިށީނދެލައިގެން އިނެވެ. އިންސާނަކަށް ދެވޭނެ އެންމެ ބޮޑު އަނިޔާ ، މެހެމަލް އެހުރީ ދިލްނަޝީނަށް ދީފައެވެ. ދިލްނަޝީންގެ ކުށެއްނެތްކަން ، މެހެމަލްގެ ވާހަކަތަކުން ސާބިތު ވެއެވެ. މެހެމަލްގެ ފަރާތުން ޙައިދަރުގެ ޢާއިލާއަށް އެލިބުނީ ،  އެއްވެސް ސިފައެއްގައި އަނބުރާ ހޯދައިދެވޭނެ ވަރަށްވުރެ ބޮޑު އަނިޔާއެކެވެ.

" އަހަރެން ، ތިކަމުގެ ތެރެޔަށް ވަންނާކަށް ބޭނުމެއް ނޫނެވެ. އެކަމަކު ގާތްތިމާގެ މީހެއްގެ ޙައިޞިއްޔަތުން ، ޙައިދަރަށް ދޭން އޮތް ނަޞޭޙަތަކީ ، ދިލްނަޝީނަށް މަޢާފު ކުރުމެވެ. މެހެމަލް އެކުރި ކަމެއްގެ ޝަޒާ މެހެމަލްއަށް ލިބޭނެއެވެ. " އަންޞާބު ބުންޏެވެ.

އަންޞާބަށް ޝުކުރު އަދާކުރުމަށްފަހު ، ޙައިދަރު އެގެއިން ނުކުތެވެ. ޙައިދަރުގެ ގައިގާ ވަރެއްނެތެވެ. ސިކުނޑި މަސައްކަތެއް ނުކުރެއެވެ. މެހެމަލްގެ ޢަމަލުތަކުން ، ދިލްނަޝީންގެ އަމިއްލަ ޢާއިލާގެ މީހުންނަށްވެސް ދިލްނަޝީނަކީ އުޅުމެއްނެތް ވިޔާނުދާ މީހަކަށްވަނީ ހަދާފައެވެ. ދިލްނަޝީނަށް ލިބުނު ގެއްލުމަށްވުރެ ، އޭނާއަށް ލިބުނު ގެއްލުން ވަކި ކުޑައެއްނޫނެވެ. އެންމެބޮޑު ހިތާމަޔަކީ ، އޭނާގެ ދަރިފުޅު ދުނިޔެއަށް ނާންނަނިސް ނެތިގެން ދިއުމެވެ. މަންމަޔަށް ލިބުނު ހިތްދަތިކަން ވަކި ކުޑައެއްނޫނެވެ. މަޑުމަޑުން ކާރުދުއްވަމުން ، ޙައިދަރުދިޔައީ ހޮސްޕިޓަލާ ދިމާލަށެވެ.

ޙަމްޒާވެސް ބޭނުންވިގޮތަށް ، އޭނާއާ އަފްސިޔާގެ ކައިވެނި ހޮސްޕިޓަލްގައި ކުރުމަށްޓަކައި ކުރަންޖެހޭ ތައްޔާރީތައް ކުރެވެމުން ދިޔައެވެ. އެންމެ ބޮޑަށް އެކަމުގައި ނަގާކިޔާ އުޅެނީ ހާރޫނެވެ. ޙަމްޒާގެ ޙާލަތު ގޯސްވެގެން ، އޭގެފަހުންވެސް އެއްފަހަރު ، އައިސީޔޫއަށް ވައްދައިފިއެވެ. ޙަމްޒާގެ ޙާލަތު ވަރަށް ސީރިއަސްކަމަށް ޑޮކްޓަރުން އަންނަނީ ބުނަމުންނެވެ. ޙަމްޒާއަށް ގޮތެއްނުވެ އޮއްވާ ، އަފްސިޔާއާ ކައިވެނިކުރެވިއްޖެނަމަ ، ހާރޫނުގެ ބޭނުން ފުދުނީއެވެ. ކައިވެނީގެ ފަހުން ޙަމްޒާ ދުނިޔޭގައި އޮތަސް އަދި ދުނިޔެއާ ވަކިވިޔަސް ، ހާރޫނަށް ތަފާތެއް ނެތެވެ. ކޮންމެ ޙާލެއްގައިވެސް ، އެކައިވެނި ކުރެވުނީމަ ، އޭނާއަށް އެ ވީއެވެ. ބުޝްރާގެ ބޭނުމަކީ ، އޭނާގެ ގޮތްދޫނުކުރުމުގެ ތެރެއިން ކަމަށްވިޔަސް ، އަދި ޙަމްޒާ ކޮންމެ ޙާލެއްގައި އޮތަސް ، އެކައިވެންޏަށް ޙަމްޒާ އެއްބަސްވީ ވަގުތު ، ޙަމްޒާގެ ކައިވެނި ކުރުވުމެވެ. އޭރަށް ދިލްނަޝީންގެ ކިބައިން އޭނާގެ ދަރިފުޅު ސަލާމަތް ކުރެވުނީއެވެ.

ކައިވެނީގެ މައުޛޫނާއި ދެހެކިން ، އަދި ހާރޫނުގެ ދެބަފައިންނާއި ބުޝްރާވެސް ،  ކައިވެނީގެ ރަސްމިއްޔާތަށް ، އައިސް ، ޙަމްޒާ ބޭއްވިފައި އޮތް ކޮޓަރީގައި ޖަމާވެފައި ތިއްބެވެ. ހާރޫން ، އޭނާގެ ދަރިފުޅު އަފްސިޔާގެ ވަލީ މައުޛޫނާ ޙަވާލު ކުރިއެވެ. ކައިވެނީގެ ރަނަކަށް ، އަފްސިޔާ ކިޔާފައިވަނީ ދެލައްކަ ރުފިޔާއެވެ. ކައިވެނީގެ ޚުޠުބާ ކިޔައި ކައިވެނި ލައިދެމުން ، އަނބި ބަލައިގަންނަންތޯ ޙަމްޒާގާތު އެހުނެވެ.  ޙަމްޒާ އޮތީ ، ވެންޓިލޭޓަރުން ނެރެގެން ގެނެސް ، ކައިވެނީގެ ރަސްމިއްޔާތަށް ތައްޔާރު ކުރުވައި ރީތި ކޮށްފައެވެ. އޭނާގެ ލޮލެއް އޭރަކުވެސް ރަނގަޅަކަށް ނުހުޅުވެއެވެ. އަނބި ބަލައިގަތުމަށް މައުޛޫނު އެދުމާއެކު ، ޙަމްޒާގެ ޖަވާބެއް ނުލިބިގެން ، ބުޝްރާ ޙަމްޒާއާ ގާތަށް ޖެހިލިއެވެ. އަދި ޙަމްޒާގެ އަތުގައި ހިފައި ފިރުމާލަމުން ، އަނބި ބަލައިގެންފީމޭ ބުނުމަށް ބުޝްރާ އެދުނެވެ. ޙަމްޒާ އޮތީ އަނެއްފަރާތަށް އެނބުރިގެންނެވެ. ޖަވާބެއް ނުދިނެވެ. ޙަމްޒާގެ މޫނު އަނބުރައިލުމަށް ، ބުޝްރާގެ އަތް ޙަމްޒާގެ އަތުން ދޫކޮށްލުމާއެކީ ، ޙަމްޒާގެ އަތް އެނދުމައްޗަށް ވެއްޓުނެވެ. އޭރު ޙަމްޒާގެ ފުރާނައެއް ނެތެވެ.

ބުޝްރާއަށް އަޑުގެ ނެތްތަނަށް ހަޅޭއްލަވައި ގަނެވުނެވެ. މުޅިކޮޓަރި ތެރޭ އަޑުގަދަވެގެން ދިޔައެވެ. ރިދާއާއި ބުޝްރާ ، ބައްދާލައިގެން ތިބެ ބާރަށް ރޮމުން ގެންދިޔައެވެ.

މަޑުމަޑުން ކާރު ދުއްވަމުން ޙައިދަރަށް ހޮސްޕިޓަލަށް އާދެވުނީ ، އޭނާ އަންނަން ބޭނުންވި ވަރަށްވުރެ ލަހުންނެވެ. ޑ. ޝާހިދު މިހާރު ހުންނާނީ މަންމަގެ ރިޕޯޓްތައް ހިފައިގެން އައިހެވެ. ޙައިދަރަށް ކިޔައިނުދީ ، ރިޕޯޓްގައިވާ އެއްވެސް ނަތީޖާއެއް އެއްވެސް މީހަކަށް ނުއެންގުމަށް ޙައިދަރު އޮތީ ޝާހިދު ގާތު އެދިފައެވެ. ޑިއުޓީ ގަޑިވީމަ ، ޝާހިދަކަށްވެސް އެހާ ގިނައިރު ، ޙައިދަރަކަށް އިންތިޒާރެއް ނުކުރެވޭނެއެވެ.

ދުވަމުން ކަހަލަ ގޮތަކަށް ޙައިދަރު ހޮސްލިޓަލަށް ވަދެގެން އައެވެ. އޭނާގެ ކުރިމަތިން އެ ފެނުނީ ، އެނދަކަށް ލައިގެން މީހަކު އެމްބިއުލެންސަށް ވެއްދި މަންޒަރެވެ. އޭނާ އޮތީ މަރުވެފައިކަން ، މޫނާއެކު އެޅިފައި އޮތް ފޮތިގަނޑުން ޙައިދަރު ދެނެގަތެވެ. އޭނާގެ ވަށައިގެން ތިބި އެންމެން އޭރު އަޑުންއަޑުނަގާ ރޮމުން ގެންދެއެވެ. އޭގެތެރޭގައި ބުޝްރާ ހުރިތަން ޙައިދަރަށް ފެނުނެވެ.

" އެ ފިރިހެންކުއްޖާއަކީ ، މަޢުޞޫމް އަންހެންކުއްޖަކަށް ، އެވަރުގެ ލަނޑެއްދިނީމަ ، ދެރަގޮތަކަށް ނިމިގެންދިޔަ މީހެކެވެ. މީހަކަށް ލަނޑެއްދީފައި ސަލާމަތެއް ނުވެވޭނެއެވެ. އަހަރެން ޚިދުމަތްކުރި ބަލި އަންހެނާގެ މުޅި ދުނިޔެ ބަރުބާދުވެގެން އެދިޔައީ ، އެ ފިރިހެން ކުއްޖާގެ ސަބަބުންނެވެ. " ޙައިދަރާ ދާދި ގާތުގައިހުރި ނަރުސްކުއްޖަކު ، އެހެން ނަރުސްކުއްޖަކާ ދިމާލަށް ބުނިއަޑު ޙައިދަރަށް އިވުނެވެ.

އެއީ އެއްކަލަ ޙަމްޒާއެވެ. ދިލްނަޝީނާއި ޙައިދަރުގެ ދިރިއުޅުން ބަރުބާދުކޮށްލި އަނިޔާވެރިޔާއެވެ. މި ދުނިޔެއާ ވަކިވެގެން ދިޔައީއެވެ. ކައިވެނީގެ ހެދުމުގައި އޮވެއެވެ. ޤާޟީއަކުވެސް އެތާހުއްޓާ ފެނުނެވެ. ޙަމްޒާގެ ކައިވެނި ކުރެވުނީއެއްކަމެއް ނުވަތަ އެއީ ، ދައްކާ ފޮނިމަންޒަރެއްނޫންކަމެއް ނޭނގެއެވެ. ކައިވެނީގެ ހެދުން އަޅައި ޒީނަތްތެރިވެގެންހުރި ޅަ އަންހެން ކުއްޖަކުވެސް އެތާ ހުއްޓެވެ. އެއީ ކާކުކަމެއް ޙައިދަރަކަށް ނޭނގެއެވެ. އެއީ ، ކާކުތޯ ބަލާކަށްވެސް ޙައިދަރު ބޭނުމެއް ނޫނެވެ.  އެއީ ކޮންމެ ގޮތަކަށް ނިމިދިޔަ ކަމެއްކަމަށް ވިޔަސް ، ޙައިދަރަށް ކީކީ ހެއްޔެވެ ؟ އެކަމަށް ވިސްނައި ފިކުރު ކުރުމަށްވުރެ ، އޭނާގެ މަންމަގެ ކަންކަމަށް ސަމާލުވުން ، މިވަގުތު ޙައިދަރަށް މާމުހިންމެވެ. ޑރ. ޝާހިދު ބުނެފައިވާ ގޮތުގައި ، ބަލައިގެން ގެންގުޅެފިނަމަ ، މަންމައަށް އަދި ދުވަސްކޮޅެއް އެބައޮތެވެ. ރަނގަޅަށް ފަރުވާ ދެވިއްޖެނަމަ ، މުޅިން ރަނގަޅުވުމަކީވެސް އެކަށީގެންވާ ކަމެކެވެ.  ( ނުނިމޭ )