އިންޑިއާގެ ސެންޓްރަލް ބިއުރޯ އޮފް އިންވެސްޓިގޭޝަން (ސީބީއައި) އިން ބަލަމުންދާ މައްސަލައަކާ ގުޅިގެން ފާއިތުވި ބުދަ ދުވަހު ހައްޔަރު ކުރި ކާރްތީ ޗިދަމްބަރަމް ގެ ބަންދުގެ މުއްދަތު ނިއު ދިއްލީގެ ޕަޓިއާލާ ހައުސް ކޯޓުން 5 ދުވަހުގެ މުއްދަތަށް އިތުރުކޮށްފިއެވެ.
އިންޑިއާގެ ކުރީގެ ފިނޭންސް މިނިސްޓަރ ޕީ ޗިދަމްބަރަމްގެ ދަރިކަލުން ކާރްތީ ހައްޔަރު ކުރީ ބޭރުގައި އުޅުއްވުމަށް ފަހު އޭނާ ޗެންނާއީއަށް ފޭބިތަނާ ޗެންނާއީ އެއާޕޯޓުންނެވެ. ޕީ ޗިދަމްބަރަމްއާއި އޭނާ ނިސްބަތްވާ ކޮންގްރެސް ޕާޓީން މިއީ ސިޔާސީ މައްސަލަައެެއް ކަމަށް ބުނާއިރު އިންޑިއާ ސަރުކާރުންނާއި ސީބީއައި އިން މިކަން ދޮގުކުރެެއެެވެ.
ކާރްތީ ހައްޔަރުކޮށްފައި ވަނީ އޭނާ ހައްޔަރުކުރަން ފާއިތުވި މޭ މަހު ނެރުނު އަމުރަކާ ގުޅިގެންނެެވެ. އެއީ، އިންޑިއާގެ މީޑިއާ ކުންފުންޏެއް ކަމުގައިވަ އައިއެންއެކްސް މީޑިއާއަށް 2007 ވަނަ (ކާރްތީގެ ބައްޕާފުޅު ޕީ ޗިދަމްބަރަމް ފިނޭންސް މިނިސްޓަރަކަށް ހުންނެވި އިރު) އެ ކުންފުނިން ރިޝްވަތު ހޯދުމަށް ފަހު ފިނޭންސް މިނިސްޓްރީގައި އޮތް އޭނާގެ ނުފޫޒު ބޭނުންކޮށްގެން ނާޖާއިޒު ފައިދާތަކެއް ހޯދައިދިން މައްސަލައިގައެވެ. އޭނާއަށް ރިޝްވަތުގެ ގޮތުގައި އައިއެންއެކްސް މީޑިއާއިން 10 ލައްެކަ (އެއް މިލިއަން) އިންޑިއަން ރުޕީސް ދިން ކަމުގެ ހެކި ލިބިފައިވާ ކަމަށް ސީބީއައި އިން ބުނެއެވެ.
ކޯޓުން ދިން 5 ދުވަހުގެ މުއްދަތުގެ ތެރޭގައި ސީބީއައި އަށް އެކަށީގެންވާ ހެކި ހުަށަނޭޅިއްޖެނަމަ، ކާރްތީ ބަންދުން ސަލާމަތްވާނެއެެވެ. އަދި ސިޔާސީ ވާދަވެރިންނާ ދެކޮޅަށް ސަރުކާރުން މައްސަލަތައް ނަގަނީ ކަމަށް ދެކެވޭ ވާހަކަތަކުގެ އަޑު ގަދަވެގެންދާނެއެވެ.
ސީބީއައި އިން ބުނަނީ އެމީހުން އަތުގައި ކަރްތީ ޗިދަމްބަރަމްއާ ދެކޮޅަށް ދައުވާ ކުރެވޭ ވަރުގެ ހެކި އެބަހުރި ކަމުގައެެވެ، އަަދި އެކަން މައްސަލަ ކުރިއަށް ދާ ވަރަކުން ހާމަވެގެން ދާނެ ކަމުގައެވެ. (މަޢުލޫމާތު: ދަ ހިންދޫ، ފަސްޓް ޕޯސްްޓް، ހިންދުސްތާން ޓައިމްސް)
