އިންޑިއާއިން ރާއްޖެއަށް އެެތެރެކުރެވޭ އަސާސީތަކެއްޗާއި އެހެނިހެން މުދަލުގެ ކޯޓާ އިތުރުކޮށްދިނުމުން ރާއްޖެއިން ޝުކުރު އަދާކޮށްފި އެވެ.
ރާއްޖޭގައި ހުންނަ އިންޑިއާގެ ހައިކޮމިޝަނުން އިއްޔެ ހާމަކުރި ގޮތުން އިމާރާތްކުރުމަށް ބޭނުންވާ ހިލައާއި ހިލަވެއްޔާއި އެހެނިހެން މުހިންމު ތަކެތި އިންޑިއާއިން ރާއްޖެއަށް އެތެރެކުރެވޭ އަދަދު މިހާރު ވަނީ 30 ޕަސެންޓް އިތުރުކޮށްދީފަ އެވެ.
އޭގެ އިތުރުން ބިހާއި، އަލުތްވާއި، ފިޔާ ހަކުރު، ހަނޑޫ އަދި ފުށް އެތެރެކުރެވޭ މިންވަރުވެސް ފަސް ޕަސެންޓް ވަނީ އިތުރުކޮށްދީފަ އެވެ. އަދި މުގު އެތެރެކުރެވޭ މިންވަރު 56 ޕަސެންޓަށް އިންޑިއާއިން ވަނީ އިތުރުކޮށްދީފަ އެވެ.
ރާއްޖޭގެ ފޮރިން މިނިސްޓްރީން މިއަދު އެކްސްގައިކުރި ޕޯސްޓެއްގައި ވަނީ މި އަހަރާއި އަންނަ އަހަރަށް ރާއްޖެއަށް ބޭނުންވާ ޒަރޫރީތަކެތި އެތެރެކުރެވޭ މިންވަރު އިތުރުކޮށްދިނުމުން އިންޑިއާ ސަރުކާރަށް ޝުކުރު އަދާކޮށްފަ އެވެ.
އިންޑިއާގެ ނިންމުމުން ދެ ގައުމުގެ ގުޅުން ބަދަހިކަމާއެކު ކުރިއަށްދާކަން ހާމަވެގެން ގޮސްފައިވާ ކަމަށް ވެސް ފޮރިިން މިނިސްޓްރީން ބުންޏެވެ.
މީގެ ކުރިން އިންޑިއާގައި ޒަރޫރީ ތަކެތި ބޭނުން ވަރަށް ނުއުފެއްދި އެ ގައުމުން އެފަދަ ތަކެތި ބޭރުކުރުން މަނާކޮށްފައި އޮތް ދުވަސް ވަރުވެސް ހާއްސަ ހުއްދައެއްގެ ދަށުން ރާއްޖެއަށް އެފަދަ ތަކެތި އެތެރެކުރުމުގެ ހުއްދަދީފައި ވެއެވެ.