މިއަހަރު ރަޝިޔާގައި އޮންނަ ފީފާ ވޯލްޑް ކަޕުގެ ފެވަރީޓުންނަކީ ވާދަވެރި އޭނާއާ ލިއޮނަލް މެސީގެ އާޖެންޓީނާ އާއި ބްރެޒިލްގެ އިތުރުން ސްޕެއިނާއި އެންމެފަހުގެ ޗެމްޕިއަން ޖަރުމަނު ކަމަށް މަޝްހޫރު ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ ބުނެފިއެވެ.
ޕޯޗުގަލް ގައުމީ ޓީމާއެކު 2016 ވަނަ އަހަރުގެ ޔޫރޯ ކާމިޔާބު ކުރި ރޮނާލްޑޯ ބުނީ ފެވަރީޓުންގެ ލިސްޓުގައި ޕޯޗުގަލް އޭނާ ނުގުނާނެކަށެވެ. "އަހަރެންގެ ނަޒަރުގައި ވޯލްޑް ކަޕުގެ ފަވަރީޓުންނަކީ ބްރެޒިލް، އާޖެންޓީނާ، ސްޕެއިން އަދި ޖަރުމަނު. އެހެން ގައުމުތަކަށްވުރެ މިހަތަރު ގައުމު އަހަންނަށް ފެންނަނީ ވަރުގަދަކޮށް. އަހަރެމެން (ޕޯޗުގަލް) މަސައްކަތް ކުރާނީ ގްރޫޕް ސްޓޭޖް ފަހަނަ އަޅައި ދިޔުމަށް. އެކަމަކު ފުޓްބޯޅައިގައި ކޮންމެ ނަތީޖާއެއްވެސް ނިކުމެދާނެ" ރޮނާލްޑޯ ބުންޏެވެ.
ގްރޫޕް ސްޓޭޖުގައި ޕޯޗުގަލް ހިމެނެނީ ސްޕެއިން އާއި މޮރޮކޯ އަދި އިރާނާއެކު ގްރޫޕް "ބީ" ގައެވެ. ތަޖުރިބާކާރުންގެ ނަޒަރުގައި މިއީ ގްރޫޕް ސްޓޭޖް ފަހަނަ އަޅައި ދިޔުމަށް ޕޯޗުގަލްއަށް ނިސްބަތުން ފަސޭހަ ގްރޫޕެކެވެ.
ގިނަބަޔަކު ހައިރާން ކޮށްލުމަށްފަހު މީގެ ދެއަހަރު ކުރިން ޕޯޗުގަލްއިން ޔޫރޯ ކާމިޔާބު ކުރިއިރު އެމުބާރާތުގެ ފައިނަލަށް ޕޯޗުގަލް ގެންގޮސްދިނުމަށް ރޮނާލްޑޯ ވަނީ މުހިއްމު ދައުރެއް އަދާކޮށްފައެވެ. އަނިޔާގެ ސަބަބުން ފައިނަލް މެޗުގެ ވިހި ވަނަ މިނެޓުގައި ރޮނާލްޑޯ ބަދަލު ކުރަން ޖެހުމުން މެޗުގެ ބޮޑުބައި ޕޯޗުގަލްއިން ފުރިހަމަ ކުރީ ރޮނާލްޑޯ ނުލައެވެ.
