( 15 ސެޕްޓެމްބަރ 2024 ގައި ޝާއިޢުކުރި ބަޔާގުޅޭ )
( އެހާރީތި އަންހެންކުއްޖަކު ކުރިމަތީ އިންދާ ފެނުނީމަ ، އޭނާއަށްވެސް ހުރިހާކަމެއް ހަނދާން ނައްތައިލެވިދާނެކަމަށް ބުނެ ، ޙައިދަރު ސަމާސާ ކޮށްލިއެވެ. އޭނާއަށް ވާވަރަށްވުރެ ބޮޑުވަރު ، އެ ފިރިހެންކުއްޖާއަށް ވާނެތާއެވެ. އެދިޔައީ ، ފުދޭވަރަކަށް ޅަ އަދި ޒުވާން ފިރިހެން ކުއްޖެކެވެ. )
ޙައިދަރު އޮފީހަށްގޮސް ވަނުމާއެކީ ، ކައިވެނިވާންއުޅޭ އަނބިމީހާއާއެކީ ، ވަގުތު ދިޔައީ ކިހިނެއްތޯ ސުއާލު ކުރެވުނެވެ. އެ ސުއާލުކުރީ ، ޙައިދަރުގެ ނައިބަކަށް ގެންގުޅޭ ، ވަރަށް ގާތްމީހެކެވެ. އެ ސުއާލަށް ދޭނެ ޖަވާބެއް ޙައިދަރަކަށް ކުއްލިޔަކަށް ނޭނގުނެވެ. އަށާރަ އަހަރުގެ ޒުވާނަކަށްވެގެން ، އެންމެ ފުރަތަމަ ފަހަރަށް ، އަންހެންކުއްޖަކާއެކީ އަމިއްލަ ބައްދަލުވުމަކަށް ގޮސްއައިމަ ، ކުރެވޭކަހަލަ ސުއާލު އޭނާއާ ނުކުރުމަށް ، ޙައިދަރު އެދުނެވެ. އެނޫންވެސް އެތައް ސުއާލެއް ޙައިދަރާ ކުރިމަތިވިއެވެ. ޙައިދަރަކީ އަށާރައަހަރުގެ ޒުވާނަކަށް ނުވިޔަސް ، ދިލްނަޝީނަކީ ، ޒުވާންކުއްޖެކެވެ. އެ ކައިވެންޏަށް ދިލްނަޝީން ހިތްހަމަ ޖެހޭތޯވެސް ޙައިދަރު ކުރެން އެހުނެވެ. އެކަން އޭނާއަކަށް ރަނގަޅަކަށް ނޭނގެއެވެ. ދިލްނަޝީންގެ ޢަމަލުތައް ހުރިގޮތުން ، ކައއިވެންޏާމެދު ދިލްނަޝީން ދެކޭގޮތް ދެނެގަންނާކަށް ، ޙައިދަރަކަށް ފުރުސަތެއް ނުލިބެއެވެ. ދިލްނަޝީން ، ރަނގަޅަށް ވާހަކަ ދައްކައިލީކީވެސް ނޫނެވެ. އެއްވެސް ސުއާލެއްވެސް ނުކުރެއެވެ. އެއްޗެއް ބުނަނީ ، ވަކިކަމަކާ ބެހޭގޮތުން ޙައިދަރު ސުއާލު ކުރީމައެވެ. އެކަހަލަ ބައްދަލުވުމަކުން ، މާގިނަ ކަންކަމެއް ނުވެސް އެނގޭނެއެވެ.
ދިލްނަޝީނާއި ޙައިދަރު ، ފުރަތަމަ ފަހަރަށް ބައްދަލުވީމަ ވީގޮތެއްކަމަށްވެސް ވެދާނެއެވެ. އެކަމަކު އެއީ ، އެއީ އެމީހުންގެ ފުރަތަމަ ބައްދަލުވުމެއްވެސް ނޫނެވެ. އެންމެ ފުރަތަމަ ބައްދަލުވީ ، ބަންދު ކޮޓަރިއެއްގައެވެ. ދެވަނަ ބައްދަލުވުން އެއީ އެންގޭޖްމަންޓް އޮތް ދުވަހު އަނގޮޓިއަޅުވަން ބޭއްވުނު ބައްދަލު ވުމެވެ. މިއަދު އެއީ ތިންވަނަ ބައްދަލުވުމެވެ.
ދިލްނަޝީނާއެކީ ، މިނިވަންކޮށް ޙައިދަރަށް ބައްދަލުވެވުނު އެއީ ފުރަތަމަ ފަހަރެވެ. ދިލްނަޝީން ދެއްކި ވާހަކަތަކުން ، ދިލްނަޝީނާ ގުޅިފައިވާ ކޮންމެވެސް ކަމެއް ސިއްރު ކުރެވޭކަމުގެ އިޙްސާސް ޙައިދަރަށް ކުރެވުނެވެ. ރައްޓެހިވެގެން އުޅުނު އަންހެންކުއްޖަކު ، ޙައިދަރު ދޫކޮށްލާފައި ދިޔަތާ ލައްކަ ދުވަސް ވެއްޖެއެވެ. މިޒަމާނުގެ ކުދިންގެ އުޅުމާއި ގުޅުން ހުންނާނެގޮތް ، ޙައިދަރު ޖެހޭނީ އަލުން ދަސްކުރާށެވެ. މިޒަމާނުގެ ކުދިންގެ ވިސްނުމާއި ފިކުރު ތަފާތުވާނެއެވެ.
*******************************
އެރޭ ، ރޭވެ އެތައްއިރެއްވީއިރުވެސް ، ޙަމްޒާ ކޮޓަރިޔަކުން ނުނުކުމެއެވެ. އެކަމާ އަމީން ޞާދިޤް ހުރީ ކަންބޮޑުވެގެން ގޭތެރޭގައި ދެކޮޅަށްދެކޮޅަށް ހިނގާލަހިނގާލަ އެވެ. ކަންބޮޑުވެގެން ދެކޮޅަށް ހިނގިޔަސް ވާނެ އިތުރުކަމެއް ނުއޮންނާނެކަމަށް ، ބުޝްރާ ބުނަމުން ގެންދިޔައެވެ.
ޞާދިޤްގެ ކަންބޮޑުވުމަކީ ޖާއިޒް ކަމެކެވެ. ޙަމްޒާގެ ޙާލަތު މިހާރު އެ ހުންނަނީ ކަންބޮޑުވާ މިންވަރެއްގައެވެ. ބޯ ހޭވި ތުނބުޅި ނުބާލައި ، ރޫޖެހިފައި ހުންނަ ހެދުންލައި ، ސަލާންޖަހަން މަގުމަތީ އުޅޭ މީހެކޭ ، ޙަމްޒާއެކޭ މިހާރު ތަފާތެއް ނެތެވެ.
ކޮންމެ ގެއެއްގައިވެސް މިހާރު އޮންނާނީ އެހާލަތުކަމަށް ބުޝްރާ ބުނަމުން ގެންދިޔައެވެ. ޒުވާން ފިރިހެންކުދިންގެ ހިތުގައި އުފެދޭ ޖަޒުބާތުގައިޖެހި ، އެކަހަލަ ގޮތްގޮތްވެސް ވާނެއެވެ. އެމީހުން ޖަހާހާ ބެރަކަށް ، މިޒަމާނުގައި މައިންބަފައިންނެއް ނުނަށާނެއެވެ. ތަންކޮޅެއް ހަރުކަށިކޮށް ޢަމަލުކޮށްގެންނޫނީ ، އެމީހުން މައިތިރިއެއް ނުކުރެވޭނެއެވެ. ޙަމްޒާއަށްވެސް ވެގެން އެއުޅެނީ އެގޮތެވެ. ކުޑަކޮށް ހިފަހައްޓައިލީމަ ، ޙަމްޒާއަށްވެސް ވިސްނިގެން މައިތިރިވެދާނެކަމަށް ބުޝްރާ ބުންޏެވެ.
ބުޝްރާގެ ހަރުކަށިކަމުގައި ގޮތްދޫނުކުރިޔަސް ، ޞާދިޤްގެ ހިތުގައި ޙަމްޒާގެ މައްޗަށް ހަމްދަރުދީ އުފެދެއެވެ. ޞާދިޤްގެ މައްޗަށް ޙަމްޒާގެ ހިތުގައި އުފެދިފައިވާ ޝަކުވާތައް ، ޙަމްޒާގެ ލޮލުން ޞާދިޤަށް ފެނެއެވެ. ނިދަން އުޅެއުޅެވެސް ، ޞާދިޤަށް ނިދޭގޮތެއް ނުވިއެވެ. ޞާދިޤަށް ޤަބޫލުކުރެވޭގޮތުގައި ، އެމީހުންނަށް ހަމައެކަނި ޙަމްޒާގެ ހިތްހަލާކު ކޮށްލެވުނީކީ ނޫނެވެ. ޙަމްޒާވެސް ދުނިޔެއިން ބާކީކޮށްލެވުނީއެވެ. އެޙާލަތުގައި ، ޙަމްޒާގެ ދިރިއުޅުން އެކޮޅުކޮޅުން ޖެހިއްޖެނަމަ އަލުން އަނބުރާ ޢާންމު ޙާލަތަށް ، ޙަމްޒާ ގެނައުމަކީ އުނދަގޫކަމަކަށް ވާނެކަމަށް ޞާދިޤަށް ފެނުނެވެ. ޞާދިޤް އެންމެ ބިރުގަންނަނީ އެކަމާއެވެ. މަޖުނޫނަކަށްވެގެން ، ޙަމްޒާ މަގުމައްޗަށް ނުކުމެއްޖެނަމަ ، ޞާދިޤްމެންގެ އަބުރަށް ހުތުރުވާނެއެވެ. އަތުންފައިން ގޯހެއް ހަދައިފިނަމަ ، މުޅި ސަހަރަށް އެމީހުން ބޭޒާރުވާނެއެވެ. އޭގެ އަސަރު ، އެމީހުންގެ ވިޔަފާރިޔަށްވެސް ކުރާނެއެވެ. އަބުރާއި ޢިއްޒަތް ގެއްލޭނެއެވެ.
އެއިން އެއްވެސްކަމަކާ ، ބުޝްރާ ނުވިސްނާތީ ، ޞާދިޤް ހިތްހަމަ ނުޖެހުނެވެ. ކުދިންގެ އެކަހަލަ ކަންކަން ބޮޑަށް އެނގެންޖެހޭނީ މައިންނަށެވެ. ބައްޕަމެން ލައްވާ ހަރުކަށި ފިޔަވަޅު އަޅުވަމުން ގެންދާއިރު ، މައިން ތިބޭނީ ހުރިހާ އިލްޒާމަކުން ރެކިގެންނެވެ.
ހަމްޒާ މިރޭ އެއުޅެނީ ، ކޮޓަރިން ބޭރަށް ނުނުކުމެ ، ކޮޓަރި ތެރޭގައެވެ. ކާކަށްވެސް ނުނުކުމެއެވެ. ރައްޓެހި ދެކުއްޖަކު ޙަމްޒާއާއެކީ ކޮޓަރިތެރޭ އުޅެއެވެ. ޙަމްޒާއަކަށް ކިޔޭ ނުކިޔޭ އެއްޗެއް ނޭނގެއެވެ. އެމީހާޔާއެކީ ، ދިލްނަޝީން ބާޒާރަށްވެސް ދަނީއެވެ. ދުއްވަންވެސް ދަނީއެވެ. ކެއުމަށްވެސް ދަނީއެވެ. ޙަމްޒާގެ މަތިން ދިލްނަޝީން ހަނދާން ނައްތާލައިފިއެވެ. މިއީ ، ޙަމްޒާގެ ދުލުން ތަކުރާރުކޮށް ކިޔަމުން އަންނަ ބަސްތަކެވެ.
އެކުއްޖާގެ މަތިން ހަނދާން ނައްތައިލުމަށް ރައްޓެހިން ބުނަމުންދާއިރު ، އެހެންބުނާ ކޮންމެ ކުއްޖަކުދެކެވެސް ، ޙަމްޒާ ރުޅިއާދެއެވެ. އޭނާގެ ޙާލަތު އެއިން އެކަކަށްވެސް އިޙްސާސެއް ނުކުރެވެއެވެ. އޭނާގެ އަމިއްލަ މީހުންނަކަށްވެސް ، ދިލްނަޝީނަކަށްވެސް އަދި ރައްޓެހިންނަކަށްވެސް ، ޙަމްޒާގެ ޙާލަތު ރަނގަޅަކަށް ވަޒަނެއް ނުކުރެވެއެވެ. ޙަމްޒާމަތިން އެހާ ފަސޭހައިން ދިލްނަޝީން ހަނދާން ނައްތައިލިގޮތެއް ޙަމްޒާއަކަށް ނުވިސްނެއެވެ. ޙަމްޒާދެކެ އިންތިހާއަށް ދިލްނަޝީން ލޯބިވެއެވެ. އެކަން ޙަމްޒާއަށް ކަށަވަރެވެ. އެކަން އެހެން އޮތްއިރު ، އެހާ ފަސޭހައިން ، އެހެންމީހަކާ ކައިވެނިކުރަން ދިލްނަޝީން ބޭނުންވަނީ ކޮންސަބަބަކާހުރެ ހެއްޔެވެ ؟
" ހަނދާން ނައްތައިލަން މަޖުބޫރުވާނެއެވެ. ދިލްނަޝީން ނިސްބަތްވާ ޢާއިލީ ފެންވަރަކީ ، ދިލްނަޝީނަށް ގޮތްކިޔައި އަމިއްލަ ނިންމުންތައް ނިންމޭވަރުގެ ފެންވަރެއްނޫނެވެ. މައިންބަފައިންބުނާ ގޮތްހަދަން ، އެފެންވަރުގެ ކުދިންނަށް މަޖުބޫރު ވާނެއެވެ. މުއްސަނދި އަންހެންކުދިން ނިންމާގޮތަށް ، ދިލްނަޝީންމެންނަކަށް ، ބޭނުންވާހާ ގޮތްގޮތަކަށް ކަންކަމެއް ނުނިންމޭނެއެވެ. އެއީ ދުނިޔޭގެ އާދައެވެ. އެހެން ނޫނަސް ، ދިލްނަޝީން މިހާރު އެހުރީ މީހަކާ ކައިވެނިކުރަން ރައްޔާރުވެފައެވެ. ޙަމްޒާއަށް އޮތް އެންމެ ރަނގަޅު ގޮތަކީ ، ދިލްނަޝީންގެ މަތިން ، ހަނދާން ނައްތައިލުމެވެ. ދިލްނަޝީން ، އޭނާގެ އަމިއްލަ ޙާލައިގެން އުޅެން ދޫކޮށްލާށެވެ! " ޙަމްޒާގެ ރަޙުމަތްތެރިން އޭނާއަށް ވިސްނައިދެވޭތޯ މަސައްކަތް ކުރަމުން ގެންދިޔައެވެ.
އިރުކޮޅެއް ކޮށްލުމަށްފަހު ، މާބޮޑަށް ލަސްވާތީ ، އެކުދިންވެސް ގެޔަށްދާން ނުކުތެވެ.
ނިދަން އުޅެއުޅެ ، ޙަމްޒާއަކަށް އެއްގޮތަކަށްވެސް ނުނިދުނެވެ. ކުރިމަތީގައި ހުރި މޭޒެއްމަތީ ބެހެއްޓިފައިހުރި މޭވާތަށްޓަށް ޙަމްޒާއަށް ބަލައި ލެވުނެވެ. ތެދުވެގެންގޮސް ، އެތަށީގައި އޮތް ވަޅި ނެގުނުކަން ޙަމްޒާއަށް އެނގުނެވެ. ދެންވީގޮތެއް އޭނާއަކަށް ނޭނގެއެވެ.
ޞާދިޤަށްވެސް ، ނިދަން އުޅެއުޅެ ނުނިދިގެން ، ޙަމްޒާގެ ޚަބަރު ބަލައިލަން ، ޙަމްޒާގެ ކޮޓަރިޔަށް އައިސް ވަނެވެ. ކަމަކު ދާކަށް ނެތެވެ. މުޅި ތަޅުންގަނޑުގައި އޮތީ ލޭތަކެވެ. ޞާދިޤަށް ހަޅޭއްލަވައި ގަނެވި ، ބުޝްރާއަށް ގޮވިއެވެ. އަދި އަވސްއަވަހަށް ، އެމްބިއުލެންސަކަށް ގުޅައިގެން ގެނެސް ، ޙަމްޒާ ހޮސްޕިޓަލަށް ގެންދިޔައެވެ. ލޭތައް ފޭބިލެއް ގިނަކަމުން ، ޙަމްޒާއޮތީ ޚަބަރު ހުސްވެފައެވެ.
ދިލްނަޝީނަކަށްވެސް އެރޭ ނިދޭގޮތެއް ނުވިއެވެ. އެނދުމަތީ އުއްޑުން ދެލޯ ބޮޑުކޮށްލައިގެން ، ނިތްކުރިމަތީ އަތްބާއްވައިލައިގެން ދިލްނަޝީން އޮތެވެ. އޭނާއެއޮތީ ޙަމްޒާއާ އޭނާއާ ދެމީހުންގެ ލޯބީގެ ޙަޔާތުގެ އެކި ޞާފުޙާތައް ކިޔާށެވެ. ބައެއްފަހަރަށް ހިނިތުން ވެލެވެއެވެ. އަނެއްބައިފަހަރަށް ލޮލުން ކަރުނަ ފައިބައެވެ. ދިލްނަޝީން ނުލިބިއްޖެނަމަ ، އޭނާ ދުނިޔޭގައި ނުހުންނާނެކަމަށް ޙަމްޒާ އެންމެފަހުން ބުނެފައިވާ ބަސްތަކުން ، ދިލްނަޝީން ސިއްސައިގެން ދިޔައެވެ. އެއީ ، ހަނދާން ކުރަން ބޭނުންވާ ބަސްތަކެއް ނޫންކަމަށްވިޔަސް ، ޙަމްޒާ އެހެންބުނެ ، ދިލްނަޝީނަށް އެޖަވާބުދިނީ ، އޭނާ ނުލިބިއްޖިއްޔާ ޙަމްޒާ ހަދާނީ ކިހިނެއްތޯ އަހައި ދިލްނަޝީން ކުރި ސުއާލެއްގެ ޖަވާބުގައެވެ.
ބުޝްރާއާއި ރިދާވެސް އަދި ޞާދިޤްވެސް ޙަމްޒާއާއެކީ ، ހޮސްޕިޓަލަށް ދިޔައެވެ. ބުޝްރާވެސް އަދި ރިދާވެސް އަޑުންއަޑުނަގައި ރޮމުން ގެންދިޔައެވެ. މިހާރު ދެން ތިރޮނީ ކޮން ރުއިމެއްހޭ ބުނެ ، ބުޝްރާއާ ދިމާލަށް ޞާދިޤް ހަޅޭއްލަވައިގަތެވެ. ޞާދިޤް ހުރީ ބުޝްރާދެކެ ވަރަށް ރުޅިއައިއްސައެވެ. ޙަމްޒާގެ ޙާލަތު ގޯސްވަމުންގޮސް ، އަތުންފައިން ގޯހެއް ހަދާފާނެކަމުގެ އިންޒާރު ، ޞާދިޤް އޮތީ ބުޝްށްރާއަށް ދީފައެވެ. އެހެނަސް ، ބުޝްރާގެ ގޮތްދޫނުކުރުމުގެ ސަބަބުން ، ޞާދިޤް ދެއްކި އެއްވެސް ވާހަކައެއްގެ އަޑު ، ބުޝްރާއެއް ނާހައެވެ. މިހާރު އެފެންނަނީ އެކަމުގެ ހިތި ނަތީޖާއެވެ. ޙަމްޒާއަކީ ، އެމީހުންގެ ހުރި ހަމައެކަނި ފިރިހެންދަރިފުޅެވެ. އޭނާގެ ފުރާނަ ސަލާމަތްވާނެކަމެއްވެސް ނޭނގެއެވެ.
ޞާދިޤް އަމީންގެ ހުރިހާވެސް މިލްކަކީ އަދި އުއްމީދަކީ ޙަމްޒާއެވެ. ފިރިހެންދަރިންނަކީ ، ޢާއިލާގެ ދަރިފަސްކޮޅު ދެމިގެން ދިއުމުގެ އަޞްލެވެ. ޙަމްޒާއަށް ގޮތެއްވެއްޖެނަމަ ، ބުޝްރާއަށް ދުވަހަކުވެސް މާފުނުކުރާނެކަމަށް ، ޞާދިޤް ބުންޏެވެ. ބުޝްރާގެ ގޮތްދޫނުކުރުމާގުޅިގެން ، ޙަމްޒާގެ ފުރާނަ އަޅިޔަށް ވެއްޖެނަމަ ، ޞާދިޤްގެ ފުރާނަވެސް އަޅިޔަށް ވެގެންދާނެކަމަށް ، ޞާދިޤް ބުންޏެވެ.
ޞާދިޤްވެސް ، ޙަމްޒާގެ ކައިވެންޏާ ކުރިން ދެކޮޅުކަން ، ރޮމުންރޮމުން ބުޝްރާ ހަނދާން ކޮށްދިނެވެ. އެކަމަކު ، މިހާރު ޞާދިޤް އެހުރީ އެކައިވެންޏަށް ރުހިގެންނެވެ. ޙަމްޒާގެ ޙާލަތަށް ޞާދިޤަށް ކެތެއް ނުކުރެވޭނެއެވެ. އެމީހުންނަށްވުރެ ފެންވަރުގެ ގޮތުން ދަށް ޢާއިލާއެއްގެ ޅީދަރިޔަކު ގެޔަށް ގެނެސްގެން އުފުއްލަންޖެހޭ ތަކުލީފަށްވުރެ ، އޭނާގެ ދަރިފުޅަށް ގޮތެއްވެގެނެ ލިބޭނެ ތަކުލީފު މާބޮޑުވާނެއެވެ.
ހޮސްޕިޓަލްގެ ގޯތިތެރޭހުރި މިސްކިތަކަށްގޮސް ، ދެރަކުޢަތުގެ ސުންނަތް ނަމާދެއް ކޮށް ، އޭނާގެ ދަރިފުޅު ސަލާމަތްކޮށްދެއްވާތޯ ﷲ އަށް ޞާދިޤް ދުޢާކުރިއެވެ. ޛިކުރު ކުރުމަށްޓަކައި މަޑުކޮށްލައިގެން މިސްކިތުގައި އިންދާ ރިދާ އައިސް ، ބައްޕަޔަށް ޑޮކްޓަރ އެބަ ގޮވާކަމުގައި ބުންޏެވެ. ޙަމްޒާ ހޭއެރީތޯ ކުރި ސުއާލަށް ނޫނެކޭބުނެ ، ރިދާ ޖަވާބު ދިނެވެ. ރިދާވެސް ހުރީ ، އިންތިހާއަށް ކަންބޮޑުވެފައެވެ. ރޮއިރޮއި ދެލޯ ރަތްވެފައެވެ. މިސްކިތުން ފައިބައިގެން އަވަސްއަވަހަށް ، ހޮސްޕިޓަލާދިމާލަށް ، ޞާދިޤް ދުއްވައިގަތެވެ.
*******************************
އަނީސާގެ ހެދުމެއްގައި ވީދިފައިއިން ތަންކޮޅެއް ފަހައިލަން އެނދުމަތީ އިށީނދެލައިގެން ، އަނީސާ އިނެވެ. ތިނޯހުގެ ފަގަޔަށް ރޮދި ނުލެއްވިގެން އުޅެނިކޮށް ، އެތަނަށް ދިލްނަޝީން އައިސް މަންމަގާތު އިށީނދެލިއެވެ. އަދި ފަގަޔަށް ރޮދިލައްވަން އޭނާއަތަށް ދިނުމަށް ދިލްނަޝީން އެދުނެވެ. އެހެނަސް ، އެއީ އަނީސާ ބޭނުންވާކަމެއްނޫނޭ ބުނެ ، ދިލްނަޝީންގެ އަތް ދުރުކޮށްލިއެވެ. ދިލްނަޝީންގެ ފަރާތުން ، އަނީސާމެންނަށް ލިބެންޖެހޭ ހުރިހާ ފަސޭހަތަކެއްލިބި މިހާރު އެއޮތީ ނިމިފައެވެ. އަނީސާމެން އުއްމީދުކުރި ވަރަށްވުރެ ބޮޑަށްވެސް ދިލްނަޝީންގެ ފަރާތުން އެމީހުންނަށްވަނީ އެހީތެރިކަން ލިބިފައެވެ. އަންހެންދަރިއަކަށްވުމުގެ ޙައްޤު ، ދިލްނަޝީންވަނީ ފުރިހަމަ ކޮށްދީފައެވެ. ދިލްނަޝީންގެ ހިތަށް ލިބިފައިވާ ތަކުލީފުތައް ، އަނީސާގެ އެ ބަސްތަކުން ، އިތުރު ވެގެން ދިޔައެވެ.
މަންމަ އަދިވެސް އެއިނީ ، އޭނާދެކެ ރުޅިއައިސްތޯ ، ދިލްނަޝީން ސުއާލު ކުރިއެވެ. ދިލްނަޝީނަށް އިނީ ރޮވިފައެވެ. އަނީސާ އަނގަޔަކުން ނުބުނެއެވެ. ހުރިހާކަމެއްވެސް ދިލްނަޝީން މިހާރު އެކުރަނީ ، މަންމަމެން ބުނާގޮތަށެވެ. އޭނާއަކީވެސް ، އެހެންމީހުންފަދަ އިންސާނެކެވެ. ކުށްކުރެވޭނީ އިންސާނުންނަށެވެ. ދިލްނަޝީނަށް ގޯސްކޮށް އުޅެވުނުކަމަށް ، އޭނާ އިޢުތިރާފް ވިއެވެ. އެކުށުގެ އަދަބު އޭނާއަށްވަނީ ލިބިފައެވެ. މިހާރުވެސް އެދަނީ ، އިތުރަށް އަދަބު ލިބެމުންނެވެ. އެތައް އިރެއްވަންދެން ނުރޯ އެންމެ ދުވަހެއްވެސް ނުދެއެވެ. ހަމަޔަށް ލޮލުފިޔައެއް ނުޖެހެއެވެ. ދިލްނަޝީނަށް ކުރެވުނު އެކުށަށް އަދަބު ލިބުމަށްފަހު ، މާފުލިބުމުގެ ޙައްޤު އޭނާއަށް ލިބެންޖެހޭނެކަމަށް ދިލްނަޝީނަށް ޤަބޫލު ކުރެވެއެވެ.
އޭނާއަށް މާފުކޮށްދިނުންއެދި ، އަނީސާއަށް ، ދިލްނަޝީން އާދޭސްކުރަމުން ގެންދިޔައެވެ. މަންމަމެންގެ މަޢާފާނުލައި ، އޭނާއަކަށް ހަމަޖެހުމެއް ނުލިބޭނެއެވެ. އޭނާ ބޮޑުވެގެންއައީ ، މަންމަމެންގެ ހިޔާވަހިކަމުގެ ދަށުގައެވެ. މަންމަގެ ލޯތްބާއި އަޅައިލުމާ އަދި އޯގާތެރިކަން ލިބިގެންނެވެ. ބޮޑުވެ ތަޞައްރުފު ފުދިފައިހުއްޓައި ، މަންމަމެންގެ ހިތްހަލާލާ ނުލައި ދުނިޔޭގައި އުޅުމަކީ އޭނާއަށް އުފުއްލޭވަރުގެ ތަކުލީފެއްނޫނެވެ. އަދި އަމްދުން ، ކައިވެނިކޮށްގެން މަންމަމެންނާ ދުރަށްގޮސް ، ފިރިމީހާގެ ގޭގައި ހިނިތުންވެލައިގެން އަދި ހަމަޖެހިލައިގެން އޭނާއަށް އުޅެވޭނީވެސް ، އޭނާގެ މައްޗަށް މަންމަމެންގެ ހިތްހެޔޮ ވެގެންނެވެ. އެތައް އިރެއްވަންދެން ، ރޮއިރޮއިފައި ދިލްނަޝީން ކުރަމުންގެންދިޔަ އާދޭހުގެ އަޑެއް އަނީސާއަކަށް ނީވުނެވެ. އެއީ ކީއްވެ ހެއްޔެވެ ؟ ދިލްނަޝީނަކީ ޒުވާން އަންހެންކުއްޖެކެވެ. ޒުވާންކަމުގެ ޖަޒުބާތުގައިޖެހި ، އެ ޢުމުރުގައި އެތައް ކުދިންނަކަށް އެކިވަރުގެ ކުށްކުރެވޭނެއެވެ. ދިލްނަޝީނަށްވެސް ކުރެވިފައި އެއޮތީ އެކަހަލަ ކުށެކެވެ. ދިލްނަޝީނަށް ކުރެވުނު ކުށަށް ، އަނީސާ މަޢާފުނުކުރަން އެއުޅެނީ ކީއްވެ ހެއްޔެވެ ؟ ދިލްނަޝީންގެ މައްޗަށް އަނީސާގެ ހިތުގައި އުފެދިފައިވާ ލޯތްބާއި މައިވަންތަކަމުގެ ކުލުނު ، އަނީސާގެ މޫނުމަތިން ފާޅުވެއެވެ. އެކަން އެ ސިއްރުކުރަނީ ކީއްވެގެންކަމެއް ނޭނގެއެވެ. ( ނުނިމޭ )
