ސްޕެނިޝް ލަލީގާގައި ރޭ ރަށުން ބޭރުގައި ލެގާނެސް 1-3 އިން ބަލިކޮށް އެންމެފަހުގެ ޗެމްޕިއަން ރެއާލް މެޑްރިޑް ތާވަލުގެ ތިންވަނަ މަގާމަށް ކުރިއަށް ޖެހިލައިފިއެވެ.
ކުރިއަށް ދެހަފްތާ ތެރޭގައި ކައިރިކައިރީގައި ގިނަ މެޗުތަކެއް ރެއާލްއަށް ކުޅެން އޮތުމުން މިމެޗަށް ރެއާލްއިން ނިކުތީ، ނުރައްކާތެރި ފޯވާޑް ކްރިސްޓިއާނޯ ރޮނާލްޑޯ ނުލައެވެ. އަދި އަނިޔާގެ ސަބަބުން ޕްލޭމޭކަރު ލޫކަރ މޮޑްރިޗާއި މިޑްފީލްޑަރު ޓޯނީ ކްރޫސް މިމެޗުގައި ނުކުޅެއެވެ.
މެޗް ފަށައިގެން 6 ވަނަ މިނެޓުގައި ރެއާލް ސިއްސުވާލުމަށްފަހު ލެގާނެސްއަށް ލީޑް ނަގައިދިނީ އުނައި ބުސްޓިންޒާއެވެ. އޭގެ ފަސް މިނެޓްފަހުން ރެއާލްއަށް އެއްވަރު ކޮށްދިނީ ލޫކަސް ވަޒްކުއެޒްއެވެ. ރެއާލްއިން ލީޑް ނެގީ 29 ވަނަ މިނެޓުގައި ކެސެމެއިރޯއެވެ. ރެއާލްގެ ތިންވަނަ ލަނޑު މެޗުގެ އިތުރު ވަގުތުގައި ލިބުނު ޕެނަލްޓީއަކުން ކާމިޔާބު ކޮށްދިނީ ކެޕްޓަން ސާޖިއޯ ރާމޮސްއެވެ.
މިމެޗުން ލެގާނެސް ބަލިވިނަމަވެސް މިސީޒަނުގައި ސްޕެނިޝް ކޮޕާޑެލްރޭ ކުއާޓާފައިނަލުން ރެއާލް ކަޓުވާލީ ލެގާނެސްކަން ފާހަގަ ކޮށްލެވެއެވެ.
މިމެޗުގައި ރެއާލްއަށް ލިބުނު ޕެނަލްޓީ ބޭލް އަތަށް ނުދީ ރާމޮސް ޖެހުމާއި ގުޅިގެން ނޫސްވެރިން ވަނީ ރާމޮސްއއާ ގިނަ ސުވާލުތަކެއް ކުރިމަތިކޮށްފައެވެ. "ރޮނާލްޑޯ ދަނޑުމަތީ ނެތް ހާލަތެއްގައި ޕެނަލްޓީ ޖަހާނީ ބޭލް ނުވަތަ އަހަރެން. ބޭލް އާއި އަހަންނާއި ދެމެދު އެއްވެސް މައްސަލައެއް ނެތް" ރާމޮސް ބުންޏެވެ. އަނެއްކޮޅުން މިއީ ލަލީގާގައި ރާމޮސް ކުޅުނު 550 ވަނަ މެޗެވެ.
މިމެޗުން ލިބުނު ތިން ޕޮއިންޓާއެކު ތާވަލުގެ ތިންވަނައިގައި ރެއާލް އޮތީ 48 ޕޮއިންޓާއެކުއެވެ. ދެވަނައިގައި އޮތް އެތުލެޓިކޯ މެޑްރިޑަށް 55 ޕޮއިންޓް ލިބިފައިވާއިރު އެއްވަނައިގައި ބާސެލޯނާ އޮތީ 62 ޕޮއިންޓާއެކުއެވެ.
