ފަލަސްތީނު : 100 އަހަރުކުރިން (4)

(31 އޮކްޓޯބަރ 2023 ގައި ޝާއިއުކުރި ބަޔާ ގުޅޭ)

ފަލަސްތީނުގެ އަލްޤުދްސްގައި ބޭއްވުނު ، ވޯލްޑް އިސްލާމިކް ކޮންގްރެސްގެ ވާހަކަތަކާއި ޚަބަރުތައް ، މުޅިދުނިޔެއަށް ފެތުރިގެން ދިޔައެވެ. އެވާހަކަތައް ، ދުނިޔޭގެ މުހިންމު އަދި މަޝްހޫރު ނޫސްތަކުގައި ލިޔެވިގެންދިޔައެވެ. ޚަބަރުފަތުރާ ރޭޑިއޯއާއި ޓީވީތަކުން އެ ވާހަކަތައް ކިޔަމުން ދައްކަމުން ދިޔައެވެ.

1920 އާއި 1930 ގެ އަހަރުތަކުގައި ، ފަލަސްތީނު ނިސްބަތްވާ ސަރަޙައްދަށް ޙިޖުރަކުރަމުންގެންދިޔަ މީހުން ގިނަވުމާއި އެކަންކަމާގުޅިގެން އެ ސަރަޙައްދުގައި ހިނގައިދިޔަ އެކިކަންކަމުގެ ހިޔަނި ، ވޯލްޑް އިސްލާމިކް ކޮންގްރެސްގެ މުހިންމު ނިންމުންތަކަށް އެޅިގެންދިޔައެވެ. އެއަށްވުރެވެސް ބޮޑަށް ޔޫރަޕްގެ ބައްރުގައި ދިރިއުޅެމުންގެންދިޔަ ޒަޔަނިސްޓް ޔަހޫދީން ދުނިޔޭގެ އެކި ޤައުމުތަކަށް ރެފިއުޖީންގެ ގޮތުގައި ވިއްސިވިހާލިވެގެން ދިއުން އެއީ ވަކިން ބޮޑު ކަމަކަށް ވިއެވެ.

ޒަޔަނިސްޓް ޔަހޫދީންނަކީ ، އެއްވެސް ޒަމާނެއްގައި އަމިއްލަ ވަޒަނެއް ލިބިގެންވީ ބައެއްނޫނެވެ. ޤަދީމީ ޒަމާނުއްސުރެ އެމީހުންނަށް އުޅެންޖެހިފައި އޮތީ އެގޮތަށެވެ. އެމީހުންނަށް ނިސްބަތްވާ ވަކި ޤައުމެއް ނެތިއެވެ. 1933 ގައި ދުނިޔޭގެ ޔަހޫދީންގެ އާބާދީއަކީ ، 15.3 މިލިއަނެވެ. ޔޫރަޕްގެ އެކި ޤައުމުތަކުގައި 9.5 މިލިއަން ޔަހޫދީން ދިރިއުޅެއެވެ. އެންމެ ގިނަޔަހޫދީން ، އެދުވަސްވަރު ، ދިރިއުޅެމުންގެންދިޔައީ ކުރީގެ ސޮވިއެޓް ޔޫނިއަންގެ 15 ޖުމްހޫރިއްޔާގައެވެ. އެއީ އެދުވަސްވަރުގެ ދުނިޔޭގެ އެންމެބޮޑު އެއްބާރެވެ. ސޮވިއެޓް ޔޫނިއަންގެ ގެ 15 ޖުމްހޫރިއްޔާގައި 2.5 މިލިއަން ޔަހޫދީން ދިރިއުޅެމުން ގެންދިޔައެވެ. ދެން އެންމެ ގިނަމީހުން ދިރިއުޅުނީ ރޯމޭނިއާގައެވެ. ރޯމޭނިއާގައި މިލިއަނެއްހާ ޔަހޫދީން ދިރިއުޅުނެވެ. އިނގިރޭސިވިލާތުގައި 3 ލައްކަ ޔަހޫދީން ، ފަރަންސޭސިވިލާތުގައި 2 ލައްކަ ޔަހޫދީން ދިރިއުޅުނެވެ. ޖަރުމަނުވިލާތުގައި 6 ލައްކައެއްހާ ޔަހޫދީން ދިރިއުޅުނެވެ. ޖަރުމަނުގައި ދިރިއުޅުނު ޔަހޫދީންކުރެ ، ލައްކައެއްހާ ޔަހޫދީންނަކީ އަވަށްޓެރި ޤައުމުތަކުން ޖަރުމަނަށް އެތެރެވެ ، އެކިއެކި މަސައްކަތްކުރަން ، ބިދޭސީންގެ ގޮތުގައި ދިރިއުޅުނު ޔަހޫދީންނެވެ. އެ ލައްކައެއްހާ މީހުން ، ޖަރުމަނުގެ ރައްޔިތުންނަކަށް ނުހަދައެވެ.

ޒަޔަނިސްޓް ޔަހޫދީންނަށް އެންމެބޮޑު ނުރައްކަލެއް އެދުވަސްވަރު ކުރިމަތިވެފައި އޮތީ ޖަރުމަނުވިލާތުގައެވެ. އަދި ދެވަނަ ބޮޑުހަނގުރާމައިގާ ޖަރުމަނުން ހިފަމުންދިޔަ ޤައުމުތަކުގައެވެ. ޖަރުމަނުގެ ޚުދުމުޚުތާރު ވެރިޔާ އެޑޮލްފް ހިޓްލަރ ގެ ސިޔާސަތަކީ ، ޔަހޫދީންނާ ދެކޮޅު އަދި ޔަހޫދީ ނަސްލު ނައްތައިލުމުގެ ސިޔާސަތެކެވެ. މިސިޔާސަތުގެ ސަބަބުން ، 1940 ގައި ، ދެވަނަ ބޮޑުހަނގުރާމައިގެ ތެރޭގައި ޖަރުމަނުން ހިފަމުން އަޅުވެތިކުރަމުން ގެންދިޔަ ، ހުޅަނގު ޔޫރަޕްގެ ޤައުމުތަކުގައި ދިރިއުޅެމުންގެންދިޔަ ޒަޔަނިސްޓް ޔަހޫދީން މަރައި ހުސްކުރަމުން ގެންދިޔައެވެ. އަދި ޔޫރަޕްގެ އެކި ޤައުމުތަކުގައި ދިރިއުޅެމުންގެންދިޔަ ޒަޔަނިސްޓް އާބާދީގެ އެތައްމިލިއަން ޔަހޫދީންނެއް ، އެކިޤައުމުތަކަށް ފިލަންގޮސް ، ވިއްސިވިހާލިވެގެންދިޔައެވެ.

1939 ގައި އެކަނިވެސް ، ޖަރުމަންވިލާތާއި ، އެޤައުމުގެ އަޅުވެތިކަމުގެ ދަށަށް އައި އޮސްޓްރިއާގެ 4 ލައްކަ ޔަހޫދީން ، ރަށުންބޭރަށް ދިޔައެވެ. އެމީހުން ހިޖުރަކުރީ ފަލަސްތީނަށާއި އެމެރިކާ އަދި އިނގިރޭސިވިލާތާއި ދެކުނު އެމެރިކާ އާއި ޗައިނާގެ ސެންގހާއީއަށެވެ. ރަށުންބޭރަށް ނުދެވި ޖަރުމަނުގައި ތިބި ދޮޅުލައްކައެއްހާ ޔަހޫދީންގެ ތެރެއިން ގިނަބަޔަކު ، ޖަރުމަނުން މަރައިފާ ވެއެވެ.

ޒަޔަނިސްޓް ޔަހޫދީ ނަސްލު ދުނިޔެއިން ނައްތައިލުމަށް ޖަރުމަންވިލާތުން ، އެޑޮލްފް ހިޓްލަރ ހިންގި ކާމިޔާބު ޙަރަކާތް ތަކުގައި 6 މިލިއަނެއްހާ ޔަހޫދީން މަރުވެފައި ވެއެވެ. އަދި 5 މިލިއަން ޔަހޫދީން ހައްޔަރުކޮށްފައި ވެއެވެ.

1939 ގައި ޖަރުމަނުވިލާތުން ، ޕޮލޭންޑް ހިފައި އަޅުވެތިކުރުމާއެކު ، އިތުރު 2 މިލިއަން ޔަހޫދީން ޖަރުމަނުގެ ކޮންޓްރޯލްގެ ދަށަށް އައެވެ. ޖަރުމަނުން ރޭވީ އެއެންމެން ، އެކިފަހަރުމަތިން ، މަޑަގަސްކަރަޔަށް ފޮނުވުމަށެވެ. އެހެންނަމަވެސް ދެވަނަ ބޮޑުހަނގުރާމަ ހިނގަމުންދިޔަ ދުވަސްވަރުކަމަށްވެފައި ، މަޑަގަސްކަރަޔަށްދާން ކަނޑުމަގުން ދަތުރުކުރާއިރު ، އިނގިރޭސީންނާ ކުރިމަތިލައި ހަނގުރާމަކުރަން ޖެހިދާނެތީ އެނިންމުން ބަދަލުކޮށް ، އޭގެތެރެއިން ގިނަބަޔަކު ، ޕޮލޭންޑްގައި މަރައިފާ ވެއެވެ.

ދެވަނަ ބޮޑުހަނގުރާމަ ނިމުނުއިރު ، ދުނިޔޭގެ އެތަންމިތަނުގައި ދިރިއުޅެމުންއައި ޔަހޫދީންގެ ތެރެއިން 7 މިލިއަން ޔަހޫދީން އެމީހުން ދިރިއުޅުނު ޤައުމުން ބޭރަށް ދާން ޖެހުނެވެ. ހަނގުރާމަ ނިމުމާއެކު ، އޭގެތެރެއިން 6 މިލިއަން މީހުންނަށް އެމީހުންގެ ޤައުމަށް އެނބުރި އާދެވުނެވެ. އެމީހުންނަށް އެނބުރި އާދެވުނުއިރު ، އޭގެތެރެއިން ގިނަމީހުންގެ ގެދޮރުހުރީ ހަލާކުކޮށް ނެތިކޮށްލާފައެވެ. ބާކީތިބި 1 މިލިއަން ޔަހޫދީންނަށް އެމީހުންގެ ޤައުމަށް އެނބުރި އާދެވިފައެއް ނުވެއެވެ. އެމީހުން ވިއްސިވިހާލިވެގެން ދިޔައީ އެކި ޤައުމުތަކަށެވެ.

ފުރަތަމަ ބޮޑުހަނގުރާމަޔަކީ ، ދުނިޔޭގެ ބޮޑެތި ބާރުތަކެއް ދެބައިވެ އިއްތިޙާދު ވެގެން ، ދެ އިއްތިޙާދެއްގެ މެދުގައި ހިނގި ހަނގުރާމައެކެވެ. އިނގިރޭސިވިލާތް އިސްވެ އޮތް އިއްތިޙާދުގައި ނަގާކިޔަން އޮތީ ފަރަންސޭސިވިލާތާއި އެމެރިކާއެވެ. މިތިން ޤައުމަކީވެސް ޒަޔަނިސްޓް ޔަހޫދީންނާ އެއްކޮޅު ތިން ޤައުމެވެ. އަނެއްކޮޅުން ، ޖަރުމަންވިލާތުން އިސްވެ އޮތް އިއްތިޙާދުގައި ޖަރުމަންކޮޅަށް ނަގާކިޔަން އޮތީ އިޓަލީވިލާތާއި ޖަޕާނެވެ. މިތިން ޤައުމުގެ ތެރެއިން ޚާއްޞަކޮށް ޖަރުމަނަކީ ޒަޔަނިސްޓް ޔަހޫދީންނާ ދެކޮޅުވެރި ޤައުމެކެވެ. ޔޫރަޕްގެ ހުރިހާ ސަރަޙައްދަކާއި މެދުއިރުމަތި ، އެފްރިކާއާއި ޕެސިފިކް އަދި އޭޝިއާގެ ބައެއް ސަރަޙައްދުގައި މި ހަނގުރާމަ ހިނގިއެވެ. ފުރަތަމަ ބޮޑުހަނގުރާމަ ފެށުނީ ސާބިއާއިންނެވެ. 1914 ވަނައަހަރުގެ ޖުލައިމަހުގެ ތެރޭގައި ، އޮސްޓްރިއާއިން ސާރބިއާ ހިފުމާގުޅިގެންނެވެ. ފުރަތަމަ ބޮޑުހަނގުރާމަ ހިނގީ 28 ޖުލައި 1914 އިންފެށިގެން 11 ނޮވެމްބަރ 1918 އަށެވެ.

ފަލަސްތީނު ހިފުމަށް އިނގިރޭސީންކުރި ، މައިގަނޑު ހަނގުރާމަ ފެށީ 1917 ވަނައަހަރުގެ ޑިސެމްބަރ މަހުގެ ތެރޭގައި ، އަލްޤުދްސް އިންނެވެ. ޤުދްސް ހިފުމަށްފަހު ، ދުޝްމަނުންގެ ޙަރަކާތްތައް ބެލެހެއްޓުމަށް އެބިމުގައި އިނގިރޭސީން މަރުކަޒެއް ޤާއިމް ކުރިއެވެ. އަދި ، 30 ހާސް ސިފައިން ފަލަސްތީނަށް ގެންގޮސް ، ހަނގުރާމަ އިތުރަށް ފުޅާކޮށް 1918 ވަނައަހަރުގެ އޮކްޓޯބަރ މަހުގެ ތެރޭގައި މުޅި ފަލަސްތީން އެއްކޮށް ހިފިއެވެ.

ފަލަސްތީނަކީ އިނގިރޭސިވިލާތުގެ މޭންޑޭޓަރީ ސަރަޙައްދެއްކަމަށް ނިންމައި ، ފަލަސްތީނުގެ ބިން އިނގިރޭސިވިލާތާ ޙަވާލު ކުރެވުނެވެ. ފަލަސްތީނު އިނގިރޭސި ވިލާތާ ، ރަސްމީގޮތުން ޙަވާލުކުރެވުނު ޤާނޫނީ ތާރީޚަކީ ، ފުރަތަމަ ބޮޑުހަނގުރާމަ ނިމުނުތާ 4 އަހަރުފަހުން ،  24 ޖުލައި 1922 އެވެ.

އިނގިރޭސީންގެ މޭންޑޭޓަރީގެ މަސްއޫލިއްޔަތުގެ ދަށުން ، އިނގިރޭސީންގެ ޒިންމާއަކީ ، " ފަލަސްތީނުގެ ރައްޔިތުންނަށް ، އެބައިމީހުންގެ އަމިއްލަ ވެރިކަމެއް ޤާއިމްކޮށް ، ފަލަސްތީނުގެ ޤައުމީ މިނިވަންކަމަށް އެހީތެރިވެ މަގުފަހިކޮށްދިނުން " ކަން ، ގުޅިފައިވާ އިއްތިޙާދުގެ އެއްބަސްވުމުގައި ވަރަށް ސާފު ޢިބާރާތުން ބަޔާން ކޮށްފައި ވެއެވެ.

ފަލަސްތީނުގެ މޭންޑޭޓަރީ ޒިންމާ ، އިނގިރޭސިވިލާތާ ޙަވާލުކުރެވުނު އިރު ، އޭގެ 5 އަހަރުކުރިން ، 1917 ވަނައަހަރު ، އިނގިރޭސިވިލާތުން ، ޒަޔަނިސްޓް ޔަހޫދީންނަށް ވަޢުދެއް ވެފައި އޮތްކަން ، އިނިރޭސީންނަކަށް ހަނދާން ނައްތައެއް ނުލެވުނެވެ. އެވަޢުދަކީ ، ހަނގުރާމައާ ގުޅިގެން ، " ފަލަސްތީނަށް އައި ޒަޔަނިސްޓް ޔަހޫދީންނަށް އެހީތެރިވެ ، ފަލަސްތީނު އަޅުވެތިކުރުމާއެކު ، ޔަހޫދީންގެ ޤައުމީ ގެދޮރުވެރިކަމެއް ފަލަސްތީނުގެ ބިމުގައި ޤާއިމްކޮށްދިނުން " ކަން ލިޔެކިއުމުން ސާބިތުވާން އެބައޮތެވެ.

މަތީގައި ބަޔާންކުރެވިފައިވާ " ފަލަސްތީނުގެ މައްޗަށް އޮތް ، އިނގިރޭސީންގެ މޭންޑޭޓަރީ ޒިންމާ " އާއި ، " ފަލަސްތީނުގެ ބިމަށް އައި ޒަޔަނިސްޓް ޔަހޫދީންނަށް އިނގިރޭސިވިލާތުން ވީ ވަޢުދު " އަކީ ސީދާ އިދިކޮޅު ދެކަމެކެވެ. މީގެ ތެރެއިން ، އިނގިރޭސީންގެ މޭންޑޭޓަރީ ޒިންމާގެ މަތިން ހަނދާންނައްތައިލާފައި އިނގިރޭސީން ފުއްދީ ، ޒަޔަނިސްޓް ޔަހޫދީންނަށް ވީ ވަޢުދެވެ. މަކަރާއި ޙީލަތުން ފުރިގެންވާ ސިޔާސަތު ތަކުން ބަށްޓަންކުރެވިގެން ، އިނގިރޭސީންނާއި ފަރަންސޭސީން އަދި އެމެރިކާގެ އެހީތެރިކަމާއެކު ، ޒަޔަނިސްޓް އިޒްރޭލުގެ އަނިޔާވެރި ސަރުކާރުން ، އެއިރުއްސުރެ ފެށިގެން މިހާތަނަށްވެސް ހިންގަމުން ފުރިހަމަކުރަމުން އެގެންދަނީ ، މީގެ 106 އަހަރުކުރިން ، ޔަހޫދީންނަށް އިނގިރޭސީން ވީ ވަޢުދެވެ. އެވަޢުދަކީ ، ޒަޔަނިސްޓް ޔަހޫދީންނަށް އެހީތެރިވެ ، ފަލަސްތީނު އަޅުވެތިކުރުމާއެކު ، ޒަޔަނިސްޓް ޔަހޫދީންގެ ޤައުމީ ގެދޮރުވެރިކަމެއް ފަލަސްތީނުގެ ބިމުގައި ޤާއިމްކޮށްދީ ، ބައިނަލް އަޤްވާމީ ޤާނޫނުތަކާއި އދ ގެ މުޢާހަދާތަކާ ދެކޮޅަށް ، ފަލސްތީނުގެ މުޤައްދަސް ބިމުގައި ، ޒަޔަނިސްޓުން ވަޒަންވެރި ކުރުވުމެވެ. ފަލަސްތީނުގެ މުސްލިމުން ޝަހީދުކޮށް ނަސްލު ނައްތައިލުމެވެ.

1947 ގައި ފަލަސްތީނުގެ އާބާދީއަކީ 1.9 މިލިއަނެވެ. 1920 އިންފެށިގެން 1947 އަށް ފަލަސްތީނަށް ޙިޖުރަކުރި ޒަޔަނިސްޓް ޔަހޫދީންގެ އާބާދީއަކީ 376،415 އެވެ. 1947 ގައި ފަލަސްތީނުގައި އޮތް އާބާދީގައި ޒަޔަނިސްޓް ޔަހޫދީންނަށްވުރެ ތިންގުނަ އިތުރަށް ، ޢަރަބި މުސްލިމުން ދިރިއުޅުނެވެ. އެހެންނަމަވެސް ، އިނގިރޭސިވިލާތާއި ފަރަންސޭސިވިލާތާ އަދި އެމެރިކާއިން އިސްކުރީ އާބާދީގެ އަޣުލަބިއްޔަތެއް ނެތް އެންމެ ހަތަރުލައްކައެއްހާ ޔަހޫދީންގެ މަސްލަޙަތެވެ. 1.9 މިލިއަން މުސްލިމުންގެ މަސްލަޙަތަކަށް ނުވިސްނައެވެ. ޙިމާޔަތް ކުރަމުން ގެންދިޔައީ ޒަޔަނިސްޓް ޔަހޫދީންގެ މަސްލަޙަތެވެ. ޝަހީދުކުރަމުން ގެންދިޔައީ މުސްލިމުންނެވެ.

ފަލަސްތީނުގެ ރައްޔިތުންނަށް ، ފަލަސްތީނުގެ ބިމުގައި މިނިވަން ދައުލަތެއް ޤާއިމްކޮށްދިނުމަކީ ، އިނގިރޭސިވިލާތުގެ ޒިންމާއެކެވެ. އެކަން ކުރުމަށް އެއްބަސްވެ ، އިއްތިޙާދުގެ އެހެންޤައުމުތަކާއެކު 24 ޖުލައި 1922 ގައިވަނީ ސޮއިކޮށްފައެވެ. އެމުޢާހަދާއަށް ، 100 އަހަރު ނުވަތަ އެއްޤަރުނުވީއިރުވެސް ، އިނގިރޭސިވިލާތަކަށް އެކަމެއް ފުރިހަމަކޮށެއް ނުދެވުނެވެ. އެހެނަސް ، އެމުޢާހަދާގެ ކުރިން 1917 ވަނައަހަރު ، ޒަޔަނިސްޓް ޔަހޫދީންނަށް ފަލަސްތީނުގެ ބިމުގައި ޤައުމީ ރަށްވެހިކަމެއް ހަމަޖައްސައިދިނުމަށް ވީ ވަޢުދު ، 30 އަހަރުގެ ތެރޭގައި ފުއްދައި ފުރިހަމަ ކޮށްދީފިއެވެ.

އިނގިރޭސިވިލާތުގެ މޭންޑޭޓަރީ ޒިންމާ އަދާނުކޮށް ، އެޒިންމާ ދޫކޮށްލައި ، ފަލަސްތީނުގެބިން އދ އާ ޙަވާލުކުރުމަށް ، އިނގިރޭސީން ނިންމައި 1947 ގެ ފެބްރުއަރީ މަހުގެ ތެރޭގައި އެކަން އދ އަށް ހުށަހެޅިއެވެ. އޭރު ޒަޔަނިސްޓުން އޮތީ ، ފަލަސްތީނުގެ ބިމަށް ހަދާނެ އެއްޗެއް ހަދާފައެވެ. ފަލަސްތީނުގެ ބިމަށް ފެތުރި ބިންތައް ހިފައި ފައިހިއްޕާލާފައެވެ. އިނގިރޭސި ޒިންމާއިން ފަލަސްތީނު ދޫކޮށްލަން ، އިނގިރޭސީން ނިންމީ ، އެމީހުންގެ ޒިންމާއާއި މަސްއޫލިއްޔަތަށް ރެކެން ވެގެންނެވެ. ޔަހޫދީންނަށް އެމީހުންގެ އަމިއްލަ ދައުލަތެއް އުފައްދަން މަގުތަނަވަސް ކޮށްދިން އިރު ، ފަލަސްތީނުގެ ދައުލަތެއް ނުއުފެއްދިގެން އުޅެނީ ، ފަލަސްތީނުގެ ރައްޔިތުންގެ ދެކޮޅުވެރިކަމާއި އިދިކީލިކަމާހުރެ ކަމުގައި އިނގިރޭސީން އދ އަށް ސާފުކޮށްދެމުން ގެންދިޔައެވެ. ފަލަސްތީނުގެ އަމިއްލަ ބިން ފޭރި އެބިމުގައި ޔަހޫދީން ވަޒަންވެރި ކުރުވަމުން ދާއިރު ، ފަލަސްތީނުގެ ރައްޔިތުންގެ ދެކޮޅުވެރިކަން އެއީ ޖާއިޒު ކަމެއްކަމުގައި  ވިސްނާކަށް ، ސިޙުނޫޔިއްޔަތަށް ވާގިވެރިވާ ހުޅަނގުގެ ޤައުމުތަކުން ބޭނުމެއް ނުވިއެވެ. މިކަމާބެހޭގޮތުން ، އދ މަޖިލީހުގައި އެތައް މަޝްވަރާއެއް ކުރުމަށްފަހު ، ފަލަސްތީނުން އެކަމާ ދެކޮޅު ހަދަހަދާ އޮއްވައި ، ފަލަސްތީނުގެ މައްސަލައަށް ، އދ ގެ ޢާންމު މަޖިލީހުން ޤަރާރެއް ފާސްކުރިއެވެ. 1947 ގެ ނޮވެމްބަރ މަހުގެ ތެރޭގައި ފާސްކުރި އެ ޤަރާރުގައިވަނީ ، ފަލަސްތީނާއި ޒަޔަނިސްޓް ޔަހޫދީންނަށް ، ފަލަސްތީނުގެ ބިމުގައި " ދެ ދައުލަތުގެ ޙައްލު " ހޯދައިދިނުމަށް ނިންމާފައެވެ. " ނަމެއް ލިބިގެންނުވާ ދެ ދައުލަތަކަށް " މަގުފަހިކޮށްދީ ، " ނަމެއްނެތް ޔަހޫދީ ވެރިކަމެއް " އަދި " ނަމެއްނެތް ޢަރަބި ވެރިކަމެއް " އުފައްދައި ، ފަލަސްތީނުގެ ބިން ބައިކުރުމަށް ، އެ ޤަރާރުގައި ފާސްކޮށްފައި ވެއެވެ. އޭގެ އިތުރަށް ، އަލްޤުދްސްގެ މުޤައްދަސް ބިމަކީ ، އދ ގެ ބެލުމުގެދަށުގައި އޮންނަންޖެހޭނެ ތަކެއްކަމަށްވެސް ފާސްކޮށްފައި ވެއެވެ. ފަލަސްތީނުގެ ބިމުގެ 55 އިންސައްތަ ފޭރިގަނެ  ، ޒަޔަނިސްޓް ޔަހޫދީންނަށް ނުވަތަ އިޒްރޭލަށްދީ ، 42 އިންސައްތަ ފަލަސްތީނަށް ދިނުމަށް އެ ޤަރާރުގައި ނިންމާފައި ވެއެވެ. ފަލަސްތީނުގެ އަސްލު ވަޒަންވެރިންނަށް އެބައިމީހުންގެ އަމިއްލަ ބިމުގެ މަދުބައެއްދީ ، ބޭރުން އައި ބައިމަދު ޒަޔަނިސްޓުންނަށް ، ފަލަސްތީނުގެ ބިމުގެ ބޮޑުބައެއް ދޭން ނިންމި އެ ޤަރާރަކީ އިންސާފުން އެއްކިބާވެފައި އޮތް ޤަރާރެކެވެ. ޤަރާރު ފާސްކުރީ އެމެރިކާއާއި އިނގިރޭސިވިލާތުގެ ބާރާއި ނުފޫޒުގައެވެ. މި ޤަރާރަށް ފަލަސްތީނުން ދެކޮޅު ހެދިއެވެ. އަދި ޢަރަބި ބައެއް ޤައުމުތަކުންވެސް މި ޤަރާރު ބަލައެއް ނުގަނެއެވެ. ޢަރަބި ނޫން ބައެއް ޤައުމުތަކުންވެސް ، މި ޤަރާރުގެ އިންސާފުވެރިކަމާމެދު ސުއާލު އުފައްދައި ، މިއީ އދ އިން ފާސްކޮށް ނިންމަން އެންމެ ޢަދުލުވެރި ގޮތެއްނޫންކަމަށް ބުނެ ، އަޑުއުފުލާފައި ވެއެވެ.

ޒަޔަނިސްޓް ޔަހޫދީންގެ އަމިއްލަ ބިމެއް އޮތުމަށް ވަކާލާތުކޮށް ، އެވާހަކަ އެކިގޮތަށް ދައްކައި ، އިސްލާމްނޫން އެހެން  ޤައުމުތަކު ވެރިންގެ ކަންފަތަށް އެއަޑުތައް އިއްވައި ، އެކަން ހަމަޖެއްސުމަށް ނުފޫޒެއް ފޯރުވެން އޮތް އެއްވެސް ފުރުސަތެއް ޒަޔަނިސްޓް ޔަހޫދީންގެ އިސްމީހުން ދޫކޮށެއް ނުލައެވެ. 1930 ގެ ފަހުގެ އަހަރުތަކުގައި އެއަޑު ވަކިންބޮޑަށް ގަދަވެ ، ދުނިޔެއަށް ފެތުރިގެން ދިޔައެވެ. އޭރު ޒަޔަނިސްޓުން ގެންދިޔައީ ފަލަސްތީނުގެ ރައްޔިތުން އެބައިމީހުންގެ އަމިއްލަ ބިމުން ނެރެ ހުސްކުރަމުންނެވެ. (ނުނިމޭ)