އޮކްޓޯބަރ 7 ވީ ހޮނިހިރު ދުވަހު ، ޙަމާސްއިން އިޒްރޭލަށް ދިން ޙަމަލާއާ ގުޅިގެން ، އެމެރިކާގެ ސިޔާސަތު ހާމަކުރަމުން ، އެމެރިކާގެ ރައީސް ، ޢުމުރުން 80 އަހަރުވެފައިވާ ޖޯ ބައިޑެން ވަނީ އެކިފަހަރުމަތިން ، ތިންދޮގެއް ހަދައިފައެވެ.
ބައިޑެން ހެދި ފުރަތަމަ ދޮގަކީ ، ޙަމާސްއިން ، ހިފައި ހައްޔަރުކުރާ ކުޑަކުދިންގެ ބޯ ބުރިކުރާ މަންޒަރު ފެނިދާނެކަމަށް ޚިޔާލަށްވެސް ގެނެވިފައިނުވާ ކަމަށާއި އެކަން ޔަޤީންކޮށްފައިވާ ކަމަށްބުނެ ، ހެދި ބުހުތާން ދޮގެވެ. މިއީ ، އެމެރިކާއިން ފަލަސްތީނުގެ ރައްޔިތުންނާމެދު ގެންގުޅޭ ދެފުށްދެގޮތް މުނާފިޤު ވިސްނުމުގައި ، ބައިޑެން ހެދި ދޮގެކެވެ. ބައިޑެން އެހެން ބުނުމާގުޅިގެން ، އެމެރިކާގެ ނޫސްތަކުގައި ހޫނު ޚަބަރުގެ ގޮތުގައި ފަލަ ޝުރުޚީގައި ފުރަތަމަ ޞަފުޙާގައި އެވާހަކަ ޖެހިއެވެ. އެއީ ، އިޒްރޭލުން ޙަމާސްއަށް ޙަމަލާދިނުމަށް ޙުއްޖަތެއްކަން ބަޔާންކޮށް ، މުޅިދުނިޔެއަށް ދޮގު މަޢުލޫމާތު ފެތުރިއެވެ. އެ ދޮގު ވެގެންދިޔައީ ހުޅަނގުގެ މީޑިއާގައި ބާރަށް ހިނގައި ހުޅަނގުގެ ސޯޝަލްމީޑިއާ ޕްލެޓްފޯމްތަކުގައި ވައިރަލްވެގެންދިޔަ ވާހަކަތަކެކެވެ.
އެމެރިކާގެ ދުވަހު ނޫހެއްކަމުގައިވާ " ވޮޝިންގޓަން ޕޯސްޓްގެ ރިޕޯރޓަރު ކުރި ސުއާލަކަށް ޖަވާބު ދެމުން ، ބައިޑެން ފަހުން ބުނެފައިވަނީ ، އެފަދަ ފޮޓޯއެއް އޭނާ ނުދެކޭ ކަމަށެވެ. އެވާހަކަ ބުނެވުނީ ، އިޒްރޭލުގެ ޙައިވާނީ ބޮޑުވަޒީރު ، ނަތަންޔާހޫ އާއި އިޒްރޭލުގެ މީސްމީޑިއާއިން ، ބައިޑެންއަށް ލިބުނު މަޢުލޫމާތުގެ މައްޗަށް ބުރަވެ ކަމުގައެވެ.
އެމެރިކާފަދަ ، ދުނިޔޭގެ އެންމެ ބާރުގަދަ ޤައުމެއްގެ ރައީސަކު ، ހަނގުރާމައިގެ ޙާލަތުގައި ، އެމެރިކާއާއި ހުޅަނގުގެ ރައްޔިތުންގެ ހަމްދަރުދީ ، އިޒްރޭލަށް ހޯދައިދިނުމަށްޓަކައި ، މަކަރާއި ޙީލަތުން މިފަދަ ބޮޑު ދޮގެއް ހެދުމަކީ އާކަމެއްނޫނެވެ. އެމެރިކާއިން ޢިރާޤަށް އަރައި އެ ޤައުމުގެ ރައީސް ޞައްދާމް ޙުސައިން ދަންޖައްސައި އަވަހާރަކޮށްލައި ، އެއަށްފަހު މުޅި ޢިރާޤު ސުންނާފަތިކޮށްލީވެސް ، ޢިރާޤުގައި ކެމިކަލް ހަތިޔާރު ހުރިކަމަށް ބުނެ ، މިފަދަ ދޮގުތަކެއް ހަދައި ، ދުނިޔެއަށް އޮޅުވާލައިގެންނެވެ. އެފަހަރު ދޮގުހެދީ ، އެމެރިކާގެ ކުރީގެ ރައީސެއްކަމުގައިވާ ޖޯޖު ޑަބްލިޔޫ ބުޝްއެވެ. ބައްޕަ ބުޝްގެ ދަރި ކުޑަ ބުޝް އެވެ.
ބައިޑެން ހެދި ދެވަނަ ދޮގަކީ ، އިޒްރޭލުގައި މިއުޒިކް ޙަފުލާއެއް ބާއްވަމުންދިޔަ ތަނަކަށް ، ޙަމާސްއިންވަދެ ، އަންހެންކުދިން ހިފައި ހައްޔަރުކޮށް ، ރޭޕްކޮށް ، ޖިންސީއަނިޔާކޮށްފައިވާ ކަމަށްބުނެ ، ނޫސްވެރިންނަށް ދިން މަޢުލޫމާތެވެ. ޙަމާސްއިން ދިން އެ ޙަމަލާއަށް ހަފުތާއެއްވީއިރުވެސް ، ޙަމާސްއިން އެފަދަ ކަމެއްކުރިކަމުގެ އެއްވެސް ހެއްކެއް ނުދެއްކުނެވެ.
އެމެރިކާގެ ދުވަހުނޫސްތަކުން ، ހަމައެކަނި ލޮސްއެންޖަލީސް ޓައިމްސްގައި މިކަމާބެހޭގޮތުން ރިކޯރޑަށްޓަކައޭ ކިޔާފަ ބުނެފައިވަނީ ، " އެއީ ކަށަވަރު ކުރެވޭ ތުހުމަތެއްނޫން " ކަމުގައެވެ. އިޒްރޭލުގެ ރަސްމީ ފަރާތަކުންވެސް އަދި އިންސާނީ ޙައްޤުތަކަށް މަސައްކަތްކުރާ މިނިވަން އެއްވެސް ޖަމާޢަތަކުންވެސް ، ޙަމާސްއިން އެފަދަ ޢަމަލެއް ހިންގައިފާވާ ކަމަކަށް ނުބުނެއެވެ.
ބައިޑްނެގެ ތިންވަނަ ދޮގަކީ ، ޙަމާސްއިން ޙަމަލާދޭގޮތަށް ބުނެފައިވާ ދޮގު ބަހެވެ. " ޓެރަރިސްޓުން ، ( ޙަމާސް އިން ) ކަނޑައެޅިގެން މަދަނީންނަށް އަމާޒުކޮށް އެބަ ޙަމަލާ ދެއެވެ. ހަނގުރާމައިގެ ޤާނޫނުތައް އަހަރެމެން އެބަ ދަމަހައްޓަމެވެ. އެއީ މައްސަލައެކެވެ. އެކަމުގައި ތަފާތުތަކެއް އެބަހުއްޓެވެ. " ނޫސްވެރިންނާ މުޚާތަބުކޮށް ، ބައިޑެން ބުނެފައި ވެއެވެ.
ޣައްޒާގައި އދ އިން ބަލަހައްޓާ ސްކޫލްތަކުން ޙިމާޔަތް ހޯދާފައިވާ މީހުންނަށް އަމާޒުކޮށް ، އިޒްރޭލުން ބޮންއަޅައި ، ކުޑަކުދިންނާއި އަންހެނުން މަރަމުން ގެންދާކަމަށް ، އދ އިން ބުނުމުން ، އެއީ ބައިޑެން ހެދި ބުހުތާން ދޮގެއްކަން ދުނިޔެއަށްވަނީ ސާބިތުވެފައެވެ.
ޣައްޒާގެ އެންމެފަހުގެ ޙާލަތަށްބަލާއިރު ، އިޒްރޭލުން ބިމުގެ މަގުން ޣައްޒާއަށް އަރައިގަނެ ، ޙަމަލާދޭން ފެށުމުގެ ކުރިން ، ފުރާނަ ސަލާމަތްކުރުމަށްޓަކައި ދެކުނު ޣައްޒާއިން ނުކުތުމަށް ދީފައިވާ މުއްދަތު ހަމަވިއިރުވެސް ، އަދި ޣައްޒާއަކަށް އަރައެއް ނުގަނެއެވެ. އެހެންނަމަވެސް ، އިޒްރޭލް ސިފައިން ޣައްޒާއަށް އަރައިގަންނާނީ ކޮންއިރަކުކަމެއް ނޭނގެއެވެ. ޓޭންކްތައް ގެނެސް ، ސިފައިންތިބީ ތައްޔާރީ ޙާލަތަށް ގެނެސްފައެވެ.
ޙަމާސްއިން ހިފަހައްޓާފައިވާ ހޮސްޓެޖުންގެ ޢަދަދަކީ 126 މީހުންކަން އިޒްރޭލުން ކަށަވަރު ކޮށްދެއެވެ. ކުރިން ބެލެވެމުންއައި ޢަދަދަކީ 150 އެވެ.
ފަލަސްތީނުގެ ދެހާސް ތިންސަތޭކައަށްވުރެ ގިނަމީހުން ، އިޒްރޭލުންވަނީ ޝަހީދު ކޮށްލާފައެވެ. ދިހަހާހަށްވުރެ ގިނަމީހުން ޒަޚަމްވެފައި ވެއެވެ. ޣާއްޒާގެ އެއްމިލިއަން މީހުން ، އެތަން މިތަނަށް ވަނީ ވިއްސިވިހާލިވެފައެވެ.
ހުޅަނގުގެ ޚަބަރުފަތުރާ ވަޞީލަތްތަކުން މަޢުލޫމާތު ގެނެސްދޭއިރު ، މުޅިންވެސް ގެނެސްދެނީ ، އިޒްރޭލުން މަރުވިމީހުންގެ ޢަދަދެވެ. ޣައްޒާގެ ރައްޔިތުންގެ ޙާލަތާއި ޝަހީދުވާ މީހުންގެ ޙާލަތެއް ގެނެހެއް ނުދެއެވެ. ހަނގުރާމައިގެ ޚަބަރުތައް މުޅިންވެސް ހުންނަނީ އިޒްރޭލުގެ ސަރުކާރާއި ޔަހޫދީން ޙިމާޔަތްކޮށް ، ޔަހޫދީންގެ މަޞްލަޙަތު ރައްކާތެރިކޮށްދިނުމަށް ، ތައްޔާރުކޮށްދީފައެވެ.
އީރާނާއި ޙިޒުބުﷲ ޖަމާޢަތުންވަނީ ، ވަގުތު ފާއިތު ނުވަނިސް ، އިޒްރޭލުގެ ޢުދްވާން ހުއްޓައިލުމަށް އިންޒާރު ކޮށްފައެވެ. އޭގެ މާނަޔަކީ ، މި ހަނގުރާމަ އިތުރަށް ފުޅާވުމުގެ ކޮޅުމަތި ފެނުމެވެ. މެދުއިރުމަތީގެ ކޮންމެ ސަރަޙައްދެއްގައިވެސް ، އިޒްރޭލަށް ހަނގުރާމަ ކުރެވިދާނެކަމަށް އިޒްރޭލުގެ ޙައިވާނީ ބޮޑުވަޒީރު ، ނަތަންޔާހޫވަނީ ބުނެފައެވެ.
ސޫރިޔާއާ ވީފަރާތުންވެސް އިޒްރޭލަށް މިއަދުވަނީ ރޮކެޓްގެ ޙަމަލާތަކެއް އަމާޒުވެގެން އައިސްފައެވެ. އިޒްރޭލުން މީގެ ދެދުވަހެއްކުރިން ، ސޫރިޔާގެ ދެ އެއަރޕޯޓަކަށްވަނީ މިސައިލުން ޙަމަލާދީފައެވެ.
ޣައްޒާއަށް އިޒްރޭލުން ދެމުންގެންދާ ޢުދުވާނީ ޙަމަލާތައް ނުހުއްޓައި ، ޣައްޒާގެ ވަޒަންވެރިން އެބިމުންނެރެ ، ޣައްޒާ ސުންނާފަތި ކޮށްލައިފިނަމަ ، އެއީ ސަރަޙައްދީ ހަނގުރާމަޔަކާ ދިމާއަށް ، މި ހަނގުރާމައިގެ މިޞްރާބު ބަދަލުވެގެން ހިނގައިދާނެކަމެއްކަމަށް ބައެއް ފަރާތްތަކުން އަންނަނީ ހާމަކުރަމުންނެވެ.
