ބްލޫ ރިބަން: ނަންބަރުން ބުނާ ވާހަކަ

ނަންބަރު 3 

ނިއުމަރޮލޮޖީ ޢިލްމުގައި ނަންބަރު 3 މާނަކޮށްދެނީ ، އުފެއްދުންތެރި އީޖާދީ ވިސްނުމާއި ، އަމިއްލަ ނަފުސަށް އިތުބާރު ކުރުމާއި ، ރަނގަޅަށް ވިސްނުމެވެ. ނަންބަރު 3 ރަމްޒުކޮށްދެނީ ، ދިރުންހުރި އުއްމީދާއި ، ނަމޫނާއަކަށްވުމެވެ. ޢާންމުގޮތެއްގައި ، މި ނަންބަރާ ގުޅިފައިތިބޭ މީހުންގެ ތަޞައްވުރަކީ ، އެމީހަކު ކުރާ ކޮންމެ ކަމެއްގައިވެސް ، އުފެއްދުންތެރިކަމާއި އަމިއްލަ ނަފުސަށް އިތުބާރު ކުރުމެވެ.

ނިއުމަރޮލޮޖީ ޢިލްމުގައި ނަންބަރު 3 އަށް ނިސްބަތްވާ މީހުންނަކީ ، ދިރިއުޅުމުގެ ހުރިހާ ހަރުފަތެއްގައިވެސް ، ރަނގަޅާއި ނުބައި ވަކިކޮށް ދެނެގަންނަން އެނގޭނެ ބަޔެކެވެ. އަމިއްލަ ނަފްސުގައި ދެރަކޮށް ބަލިކަށިކޮށް ހުރީ ކޮންކަމެއްކަމާއި ، ގަދަޔަށް އަދި ބާރުވެރިކުރުވާ ކަންކަމަކީ ކޮބައިކަމާއި އެނޫންވެސް ، ޝަޚުޞީ ތަޞައްވުރުގެ ހަރުދަނާ ސިފަތައް ފާޅުވެ އެނގެން ހުންނަ މީހުންނެވެ. ނަންބަރު 3 އަށް ނިސްބަތްވާ މީހުން ބެލެވެނީ ، ކަންކަމުގެ ޙައްލު ހިފައިގެން ދުނިޔެއަށް އަންނަ ބަޔެއްގެ ގޮތުގައެވެ.

އެހެންކަމުން ، ހަރުދަނާ އަދި މާނަވީ ދިރިއުޅުމަކަށް ބޭނުންވާ ހުރިހާކަމެއް ފުރާ ފުރިހަމަވެގެން ، ނަންބަރު 3 އަށް ނިސްބަތްވާ މީހުންގެ ޙަޔާތަކީ ، ބާއްޖަވެރިކަމުން ފުރިގެންވާ ޙަޔާތަކަށް ހެދުމުގެ ޤާބިލްކަން އެފަދަ މީހުންނަށް ލިބިގެން ވެއެވެ.

ނިއުމަރޮލޮޖީ ޢިލްމުގައި ، ތިން ނަންބަރެއް އެއީ ، އިސް ނަންބަރުތަކެއްކަމަށް ބެލެވިފައި އޮވެއެވެ. އޭގެ ތެރޭގައި ނަންބަރު 3 ހިމެނިފައެއް ނުވެއެވެ. އެ ތިން ނަންބަރަކީ ، އެގާރަ ، ބާވީސް އަދި ތެއްތިރީހެވެ. އެއީ އެ ނަންބަރުތަކަށް ޚާއްޞަވެގެންވާ ސިފަތަކެއް ހިމެނިފައި އޮންނާތީއެވެ. ދެ ތިނަކުން އުފެދޭ ނަންބަރު ތެއްތިރީހަށް ނިސްބަތްވާ މީހުންނަކީ ، އުފެދުމުގައިވެސް ވަރަށް ހިތްތިރި ، ޖަޒުބާތީ އަދި އޯގާތެރިކަމުގެ ސިފައިން ، އޭނާގެ ވަށައިގެންވާ މީސްތަކުންގެ މައްޗަށް ނުފޫޒު އޮވެ ، އިސްދައުރެއް އަދާކުރުމަށް ފުރުޞަތު އޮންނަ އިސްމީހެކެވެ. މިއީ ވެރިޔެއްގައި ހުންނަންޖެހޭ މުހިންމު ސިފަތެކެކެވެ.

ރޫހާނީގޮތުން ، ނަންބަރު 3 މާނަކޮށްދެނީ ، ރޫހާނީ ބާރަށް ބޭނުންވެފައި އޮންނަ މިންވަރެވެ. ދުނިޔެއާއި އާޚިރަތުގެ ބާއްޖަވެރިކަމަށް ބޭނުންވާ 3 ކަމެއް އޭގައި ހިމެނެއެވެ. އެއީ ، އިންސާނާ އޭނާގެ ދުނިޔެ އާބާދުކޮށް ، ބާއްޖަވެރި ޙަޔާތަކަށްފަހު ، އާޚިރަތުގެ ބާއްޖަވެރިކަމަށް ދަތުރުކުރުމަށް ބޭނުންވާ ، އީމާންތެރިކަމާއި އިޢުތިޤާދާއި ، ދުނިޔެއާއި ﷲ ގެ ރަޙުމަތްފުޅެވެ.

ގްރީކްގެ އިހު އެވޭލާ ވިސްނުމަށް ބަލާއިރު ، ނަންބަރު 3 އެއީ ނިއުމަރޮލޮޖީ ޢިލްމުގައި އެންމެ ބާރުގަދަ ނަންބަރުކަމަށް ބެލެވެއެވެ. އެއީ ފެށުމަކާއި ނިމުން އަދި އެދެ ޙާލަތުގެ ދެމެދު އެ ނަންބަރުން ތަޞައްވުރު ކުރާތީއެވެ. އެކެއް އެއީ ހަމައެކަނި ފެށުމެކެވެ. ނިމުމެއް އަދި މެދެއް ނެތެވެ. ދެޔެއް އެއީ ފެށުމަކާއި ނިމުމެކެވެ. މެދެއް ނުއޮވެއެވެ. ތިންޙާލަތު ލިބިފައި އޮންނަ ހަމައެކަނި ނަންބަރަކީ ތިނެކެވެ. އެއީ ނަންބަރު 1 ފިޔަވައި އެހެން ނަންބަރަކާ ގުޅިފައި ނުއޮންނަ އޮނަހިރި ޢަދަދެކެވެ.

ދީނީގޮތުން ބަލާއިރު ، ނަންބަރު 3 އެއީ ޚާއްޞަ ނަންބަރެކެވެ. ނަމާދަށް ނިސްބަތްކުރާއިރު ، ނަމާދު ކުރުމުގެ ކުރިން ވުޟޫ ކުރާއިރު ، ތިންތިންފަށް ކުރަން ޖެހެއެވެ. ކޮންމެ ގުނަވަނެއް 3 ފަހަރު ދޮންނަން ޖެހެއެވެ. ނަމާދުކޮށް ނިމިގެން ، ޛިކުރު ތަސްބީޙަ ކިޔާއިރު ކިޔަނީ 3 ޛިކުރެވެ. އެއީ ، ސުބްޙާނަﷲ ، އަލްޙަމްދު ލިﷲ އަދި ﷲ އަކުބަރެވެ. ޛިކުރު ތަސްބީޙަ ކިޔާއިރު ކިޔަނީ ، ކޮންމެ ޛިކުރެއް 33 ފަހަރުއެވެ. މި ޢަދަދަކީ ، ނިއުމަރޮލޮޖީ ޢިލްމުގައި ޚާއްޞަ ކަމަށް ކުރިން ދެންނެވި ތިން ނަންބަރުން ދެނަންބަރާ ގުޅިފައި އޮންނަ ޢަދަދެކެވެ. އެއީ 11 އަދި 33 އެވެ. 33 ޖުމްލަވަނީ 11 އާއި 3 އާ ގުނަކުރުމުންނެވެ. މިނޫނަސް ، ނަންބަރު 3 އެއީ ދީނީ ބައެއް އެހެން ކަންކަމުގައި ޚާއްޞަ ކުރެވޭ ނަންބަރެކެވެ.

ދުނިޔޭގެ ވަރަށްގިނަ މުޖުތަމަޢުތަކުގައި ، ނަންބަރު 3 އެއީ ނަޞީބުގަދަ ނަންބަރެއްކަމަށް ބަލައެވެ. އެއީ ދުނިޔެއާއި ދިރިއުޅުމުގެ ތިން ޙާލަތެއް އެ ނަންބަރުން ތަމްސީލު ވާތީއެވެ. އެއީ ، މާޒީއާއި މިހާރާއި މުސްތަޤްބަލެވެ.

ނަންބަރު 4

ނިއުމަރޮލޮޖީ ޢިލްމުގައި ، ނަންބަރު 4 އެއީ ، ޙަޤީޤަތެއް އޮންނަ އަދި އެހެން ޢަދަދަކާ ގުޅުމެއް އޮންނަ ނަންބަރެކެވެ. އެއީ 2 އެވެ. ތަރުތީބުވެގެން ވުމާއި ރައްކާތެރިކަން ، މި ޢަދަދާ އޮންނަނީ ގުޅިފައެވެ. އެއީ ، ދިރިއުޅުން ، ޝަޚުޞިއްޔަތު އަދި އިންސާނާގެ ޙަޔާތާ ގުޅިފައި އޮންނަ ނަންބަރެކެވެ.

ނަންބަރު 4 އަށް ނިސްބަތްވާ މީހުންނަކީ ، ގަދައަޅާ މަސައްކަތް ކުރުމާއި ، ޚުލްޤާއި ކެތްތެރިކަމާ އަދި ތަރުތީބުވުމާއި މަޞްލަޙަތާ ގުޅުންހުރި ކަންކަން އިތުރަށް ދަސްކުރަން ޖެހޭ ބަޔެކެވެ. ބުނެވޭގޮތުގައި ، އެއްވެސް މަހެއްގެ 4 ، 22 އަދި 31 ގައި އުފަންވެއްޖެ މީހަކު ނިސްބަތްވަނީ ނަންބަރު 4 އަށެވެ. ނަންބަރު 4 ނިސްބަތްވަނީ ، ދުނިޔޭގެ އެދުމާއި ބާރަށެވެ. އެއީ ވެރިކަމާއި ، ހިންގުމާ އަދި އަމާންކަމާއި ޚުލްޤަށް ނިސްބަތްވާ ޢަދަދެކެވެ. ނަންބަރު 4 އަށް ނިސްބަތްވާ މީހުންނަކީ މަސައްކަތުގައި މުރާލި އަދި ތަރުތީބު ބަޔެކެވެ. އިހުގެ އާދަކާދައާއި ޒަމާނީ އާދަތައް ގުޅުވައިގެން އުފެދޭ މެދުމިންވަރެއްގެ ޙައްލުތައް ، ނަންބަރު 4 ގެ އަހުލުވެރިން ދެނެގަންނާނެއެވެ. އެފަދަމީހުން އެހާ ފަސޭހައިން ބަލިކޮށްލެވިދާނެކަމަށް ވިސްނައިގެން ނުވާނެއެވެ. އެފަދަ މީހުންގެ ވިސްނުމާ އަދި ފިކުރާއި ޚިޔާލާތަކީ ، އޭނާގެ ވަށައިގެން އެނބުރޭ އެހެން މީހުންނާ ތަފާތު އެއްޗެކެވެ. އެއީ އަޣުލަބިއްޔަތަށް ބުރަވެ ، ކަންކަން ނިންމާނެ ބައެއްނޫނެވެ. އެފަދަ މީހުން ގޮތް ނިންމާނީ އެމީހުންނަށް ފެންނަ ، އަމިއްލަ ގޮތްގޮތަށެވެ. އެގޮތްގޮތަކީ އެހެން މީހުންނަށް ފެންނަ ގޮތްކަމަށް ނުވެދާނެއެވެ. އެފަދަ ނިންމުންތައް ގިނަފަހަރަށް ހުންނާނީ އެހެންމީހުންނާ އިދިކޮޅަށެވެ. އަދި އެކަންކުރާމީހާ އެކަމަށް ފަޚުރުވެރިވާނެ މެއެވެ. ނަންބަރު 4 ނިސްބަތްވަނީ ، އަމުރުވެރި ، ގޮތްދޫނުކުރާ އަދި ބުނަން ބޭނުންއެއްޗެއް ބުނަން ފަހަށް ނުޖެހޭ މީހުންނަށެވެ. އެއީ ފިލާވަޅު ލިބިގަންނަ އަދި ފިލާވަޅު ނަގައިދޭ ބަޔެކެވެ.

ނަންބަރު 4 އަށް ނިސްބަތްވާ މީހުންނަކީ ، ޤާނޫނީ ޢިލްމާއި ސައިންސް އަދި ދަނޑުވެރިކަމާއި އިދާރީ ހިންގުންތެރިކަން އަދި ބޭންކިންގ ދާއިރާއަށް ޚާއްޞަ ބަޔެކެވެ. އައިޓީ އާއި ޢުމްރާނީ ޞިނާޢަތަކީ އެފަދަ މީހުންނަށް ކާމިޔާބު ޙާޞިލްކުރަން ފަސޭހަ ދެ ދާއިރާއެވެ. ކޮންމެ ވަޒީފާއަކަށްވެސް އެމީހުން ފެތޭނެއެވެ. އަދި ނަތީޖާވެސް ނެރެދޭނެއެވެ. އެހެންނަމަވެސް ، އެކަން ވެފައި އޮންނަނީ ،  އެމީހުންގެ ބުރަ މަސައްކަތުން ނުކުންނަ ނަތީޖާއަކަށްވުރެ ، ނަޞީބުގަދަކަމުން ނުކުންނަ ނަތީޖާއަކަށެވެ. ނަންބަރު 4 އަށް ނިސްބަތްވާ މީހުންނަކީ ، ބޭވަފާތެރިވެ ޣައްދާރުވުމަށް ފުރުޞަތު ދޭވަރަށްވުރެ ސިކުނޑި ރަނގަޅު ބަޔެކެވެ. އެފަދަ މީހުންނާ ކުޅޭލާކަށް އެހާ ފަސޭހައެއް ނުވާނެއެވެ.

ނަންބަރު 4 އަށް ނިސްބަތްވާ މީހުންނަކީ ކެތްތެރިކަން ދަންނަ ބައެއްނޫނެވެ. އެހެންމީހުންގެ އިޙްސާސްތަކަށް ޖާގައެއް ނުއޮންނާނެއެވެ. މި ނަންބަރަށް ނިސްބަތްވާ މީހުންގެ ބަލިފަޔަކަށްވެފައި އޮންނަނީ ކެތްތެރިކަން ނެތުމެވެ. ކެތްމަދުވެގެން ކުރެވޭ ކަންކަމުން ހެދޭ ގޯސްތަކަކީ މިމީހުންނާ ކުރިމަތިވާނެ އެންމެ ބޮޑު ގޮންޖެހުމެވެ. ނަންބަރު 4 އަށް ނިސްބަތްވާ މީހުން ހުވަފެން ދެކޭކަށް ބޭނުމެއް ނުވާނެއެވެ. ބުރަވާނީ ޙަޤީޤަތަށެވެ.

ނަންބަރު 4 އަށް ނިސްބަތްވާ މީހުންނަކީ ، އުފެދުމުގައިވެސް ރުޅިގަދަވެފައި ގޮތްދޫނުކުރާ ބަޔެކެވެ. އެހެންމީހުންގެ އަގު ވަޒަންކޮށް ،  އެހެންމީހުންގެ އަޑު އެހުމަކީ ، ނަންބަރު 4 އަށް ނިސްބަތްވާމީހުންގެ ސިފައެއްނޫނެވެ. ނަންބަރު 4 އަށް ނިސްބަތްވާ މީހުންނާ ޚިޔާލު ތަފާތުވާ މީހުން އެކަހެރިކޮށް އެފަދަ މީހުންނާ ދުރުވާނެއެވެ. އަމިއްލަ ދިފާޢުގައި ކޮންމެފަދަ ކަމެއްވެސް އެފަދަ މީހުން ކޮށްފާނެއެވެ. އެހެންކަމުން ، ޢާންމު ގޮތެއްގައި ނަންބަރު 4 އަށް ނިސްބަތްވާ މީހުންނަކީ ، ޢަދާވާތްތެރިން ގިނަ ބަޔެކެވެ.

ނަންބަރު 4 އަށް ނިސްބަތްވާ މީހުންނަކީ ކޮންމެ ކަމެއްވެސް އެންމެ ފުރިހަމަޔަށް ކުރަން ބޭނުންވާ ބަޔެކެވެ. އޭނާއާ އެކުގައި އުޅޭ އެހެންމީހުންވެސް ، ކުރާކަމެއް އެންމެ ފުރިހަމަޔަށް ކުރުމަށް އެދޭނެއެވެ. އެހެނަސް ، އަވަސް އަރުވާލައިގެން ކަންކުރުމުގެ އާދަޔާހުރެ ، ގިނަކަންތައްތައް ދާނީ ބޮއްސުންލައިގެންނެވެ. ދެފަހަރަށް ކުރަންޖެހޭ ކަންކަން ގިނަވާނެއެވެ.

ނިއުމަރޮލޮޖީގެ ޢިލްމަށް ބަލާއިރު ، ހިސާބު ޢިލްމުގައި ބޭނުންކުރެވޭ ކޮންމެ ނަންބަރެއްގައިވެސް ފޮރުވިފައިވާ މާނަތަކެއް ހުރެއެވެ. އަދި ކޮންމެ ނިޝާނަކަށްވެސް ފޮރުވިފައިވާ މާނަވީ ސިފަތަކަކާއި ، މާނަތަކެއް ލިބިގެން ވެއެވެ. އެއިން ކޮންމެ މާނައެއް ގުޅިފައި އޮންނަނީ ، ދުނިޔެއާއި ދުނިޔަވީ ދިރިއުޅުމާ އަދި އާޚިރަތާއެވެ. ދުނިޔޭގެ ފެށުމާއި ދުނިޔެ ދައުރުވުމާ އަދި ދުނިޔޭގެ ނިމުމަށް ނިސްބަތްވާ ، އުފެދި ފާއިތުވެ ގޮސްފައިވާ މާޒީއާއި ، ހިނގަހިނގާ ނުންނަ މިހާރާ ، އަދި ކުރިޔަށް އޮންނަ މުސްތަޤްބަލާއެވެ.