(13 އޯގަސްޓް 2023 ގައި ޝާއިއުކުރި ބަޔާ ގުޅޭ)
މުރުތަޟާ އާއި ނޫރުއާ ދެމީހުންގެ ގޭގެ އެންމެންގެ މެދުގައިވެސް ، އޮތީ ނުތަނަވަސްކަމެވެ. ނޫރުގެ ބޭބެ ހާރިސް މިއަދު ގުޅީމަ މުރުތަޟާ ފޯނެއްވެސް ނުނަގައެވެ. ނޫރު އެއުޅެނީ ، މުރުތަޟާއާ ، ކޮންފަދަ ވާހަކައެއް ދައްކައިގެން ކަމެއްވެސް ނޭނގެއެވެ. ހާރިސްއާއި މުރުތަޟާއަކީވެސް ވަރަށް ގާތް ދެމީހުންނެވެ. ފޯނު ނުނަގަންވީ ސަބަބެއް ނުވިސްނެއެވެ. އަނެއްކޮޅުން ، ރައިދާވެސް ހުރީ އެކަމާ ކަންބޮޑުވެފައެވެ. މިހާރު އެފެންނަމުންދަނީ ، ނޫރުގެ ފަރާތުން ދުވަހަކުވެސް ނުފެންނަފަދަ ކަންތައްތަކެކެވެ. ބޭބެ އެއްގެ ޙައިޞިއްޔަތުން ހާރިސް އެދެނީ ނޫރުއަށް ހުރިހާ ކާމިޔާބީއެއް ލިބުމެވެ. އެހެނަސް ، ދިރިއުޅުމެއް ފަށަން އެލިބުނު ރަނގަޅު ފުރުޞަތުގައި ނޫރުގެ ޢަމަލުތައް އެހުރިގޮތުން ހާރިސްގެ ހިތަށްވެސް އެލިބެނީ ތަކުލީފެވެ. މުރުތަޟާއަކީވެސް ފިރިހެނެކެވެ. ނޫރު ކޮންމެ ވާހަކައެއް ދައްކާފައި އޮތްކަމަށްވިޔަސް ، އެވާހަކަތަކަށް މުރުތަޟާ އެހުރީ ނުރުހުންވެފައެވެ. ނޫރުގެ ފަލްސަފާ އެއިން އެކަކަށްވެސް ވިސްނައިގަންނާކަށް ނޭނގެއެވެ. ރަނގަޅަށް އަދި މޮޅަށް ލިބޭ ތަޢުލީމެއްގެ މަޤްޞަދަކީ ، އެހެންމީހުންގެ އަގު ވަޒަން ނުކޮށް ، ތިމާގެ އަމިއްލަ ޙާލަތު ވަޒަންކުރަން ނޭނގުންކަމަށް ވަންޏާ އެއީ ދެރަ ކަމެކެވެ. އޭނާގެ އަމިއްލަ ބޭބެގެ ބަސްވެސް ނޫރުއަކަށް ނޭހުނެވެ. ހާރިސްއާއި ރައިދާ ، އެކަމާބެހޭގޮތުން ވާހަކަ ދައްކަން ތިއްބާ ގޭގެ ބޭރު ރަނގަބީލު ޖެހުނެވެ.
ރައިދާގޮސް ، ދޮރުހުޅުވައިލިއިރު ، ދޮރުމަތީގައިހުރީ ޙަފުޞާއެވެ. ސަލާމް ގޮވައިލުމަށްފަހު ، ގޭތެރެޔަށް ވަނުމަށް އެދުނެވެ. ޙަފުޞާހުރީ ހިތްހަމަ ނުޖެހިފައެވެ. ގޭތެރެޔަށް ވަދެގެން އައިގޮތަށް އައިސް ، އިށީންނަން ބުނުމުންވެސް އިށީންނާކަށް ނޫޅުނެވެ. ވަސީމް ، ގޭގައި އުޅޭތޯ ޙަފުޞާ ސުއާލުކުރިއެވެ. ވަސީމްވީ އޮފީހަށް ގޮހެވެ. އަދި އޮފީސް ނިންމައިފާ ގެޔަކަށް ނާދެއެވެ. ވަސީމް ގެޔަށް އައުން މިއަދު ތަންކޮޅެއް ލަސްވެސް ވެއްޖެއެވެ.
ނޫރުލްޢައިނު ކޮބައިތޯ ޙަފުޞާ ސުއާލު ކުރިއެވެ. ނޫރުވެސް އަދި ގެޔަކަށް ނާދެއެވެ. ފަހަރެއްގައި މިހާރު އުޅޭނީ ގެޔަށް އައުމުގެ މަގުމަތީގައެވެ.
މުރުތަޟާއާއެކު ، ނޫރުދެއްކީ ކޮންވާހަކައެއްތޯ ހާރިސްމެން ސުއާލުކުރިންތޯ ޙަފުޞާ އެހިއެވެ. ނޫރުހުރީ ވަރަށް ނުތަނަވަސްވެފައިކަމަށްވާތީ ، އެކަމާ ބެހޭގޮތުން ނޫރުއާ އެމީހުން ސުއާލު ނުކުރާކަމަށް ، ވަރަށް ޖެހިލުންވެހުރެ ، ހާސިމް ބުންޏެވެ. މުރުތަޟާއާއި ނޫރުއަކީ ، ކިޔަވައިގެންތިބި ، ވިސްނޭ ދެމީހުންނެވެ. އެދެމީހުން ވާހަކަ ދައްކާފައި ނިންމާނީ ރަނގަޅުގޮތަކަށްކަމުގައިވެސް ހާސިމް ބުންޏެވެ. އެކަމާ ޙަފުޞައްތަ ކަންބޮޑު ނުވުމަށް ހާސިމް އެދުނެވެ.
ޙަފުޞާ މާނޭވާއެއްލިއެވެ. އޭނާ ބައްދަލުކުރަން އައި އެކަކުވެސް ގެޔަކު ނެތެވެ. އެމީހުންނާ ކުރަންހުރި އެތައް ސުއާލެއް އެބަހުއްޓެވެ. އެތައްވަރަކަށް ކިޔައިގެން ، ސިޓިންގރޫމަށްގޮސް ، އެތަނުން ގޮނޑިއެއްގައި ޙަފުޞާ ޖައްސައިލިއެވެ. ހާސިމް ދިޔައީ ، ޙަފުޞައްތަޔަށް ސައިތަށްޓެއް ގެނެސްދޭށޭ ރައިދާ ގާތު ބުނެ ، ކޮޓަރީގައި ދަބަސް ބާއްވާލައިފާ އަންނާނަމޭ ކިޔާފައި އޭނާގެ ކޮޓަރިޔަށެވެ. އެވަގުތު ނޫރުވެސް އައިސް ގޭތެރެޔަށް ވަނެވެ. އޭނާއަށް ކުރިމަތިލާންޖެހުނީ ޙަފުޞާގެ ރުޅިމޫނާއެވެ. ވަރަށް ހިތްވަރުކޮށްފައި ހަފުޞައްތަޔަށް ސަލާމް ގޮވައިލިއެވެ. ކުޑައިރުކޮޅެއްވީ ނަމަވެސް ، ޙަފުޞާ ގަދަކަމުން ބަލައިގަތް ސަލާމުގެ އަޑު ނޫރާއަށް އިވުނެވެ. ޙަފުޞާ އެއިނީ ވަރަށް ހިތްހަމަ ނުޖެހިފައިކަން ، ޙަފުޞާގެ ބަހާއި ރާގުން ، ނޫރު ދެނެގަތެވެ. ވަރަށް ހިތްވަރުކޮށްފައި ، ޙަފުޞާގާތު އިށީނދެލިއެވެ. އެއީ އޭނާގެ މަންމައެއްފަދަ މީހެކެވެ. ނޫރާގެ ހިތުގައި ޙަފުޞައްތަގެ މައްޗަށް އޮތް ޤަދަރާއި އިޙްތިރާމް އަދިވެސް ހަމަ ، އެއޮތްގޮތަށް އެބައޮތެވެ. އެއީ ރޭވެފައި އަލިވިލޭހެން ބަދަލުވާނެ އެއްޗެއްނޫނެވެ.
ޙަފުޞާ އެއައީ ނޫރުލްޢައިނާ ބައްދަލުކުރަންކަމަށް ، ފޫހި އަޑަކުން ޙަފުޞާ ބުނިއިރު ، ކުރިން އޭނާ ލޯބިން ނޫރުއަށް މުޚާޠަބު ކުރަމުން ގެންދިޔަ ނޫރު ގެ ކުރުނަން އެހިތުން އަދި ފިލައިގެންނެއް ނުދާނެއެވެ. އައިސްހުރި ރުޅީގައި ، ނަން ދިގުވުން އެއީ ނޫރުއަށް މައްސަލައެއްނޫނެވެ. އެ ރުޅިވެރިކަމާއި ފޫހިކަމާވެސް ނޫރު ކުރިމަތިލާނެއެވެ. އެއީ ، އާ ކަމަކަށްވިޔަސް ނޫރުއަށް އެއީ އެއްވެސްކަމެއް ނޫނެވެ. ޙަފުޞައްތަ ހިތްހަމަ ނުޖެހިފައި އެއިނީ އެއްވެސް ކަމަކުންކުރެ ކަމަކާ ނުލައެވެ. ވަރަށް ހިތްވަރުކޮށްފައި ޙަފުޞާއާ ވާހަކަ ދައްކަން ނޫރު ނިންމިއެވެ.
ކައިވެންޏާ ބެހޭގޮތުން ، މުރުތަޟާއާއި ނޫރުއާ ދެމީހުން އެއައީ ވަރަށް ދިގުކޮށް ވާހަކަ ދައްކާފައެވެ. އެކަމުގައި އެދެމީހުންތިބީ އެއްވިސްނުމެއްގައެއް ނޫނެވެ. ދެމީހުން އެއްވިސްނުމެއްގައި ނެތި ، އެއީ ކުރިޔަށް ދެވެން އޮންނާނެ ކަމެއްނޫންކަމަށް މުރުތަޟާ އޮތީ ނޫރުގާތު ބުނެފައެވެ. އެވާހަކަ އިތުރަށް ދައްކާކަށް މުރުތަޟާ ބޭނުމެއްނޫނެވެ.
ނޫރުގެ ގޮތާއި ފޮތް މިހާރު އެވަނީ ވަރަށްބޮޑަށް ބަދަލު ވެފައިކަމުގައި ޙަފުޞާއަށް ފެނުނެވެ. ވިސްނުމާއި ފިކުރާ އަދި ޚިޔާލާތު ޙަފުޞާމެންނަކާ މިހާރަކު ނުގުޅެއެވެ. ޙަފުޞާ ޤަބޫލުކުރާ ގޮތުގައި ، ޙަފުޞާމެންނާއެކު ނޫރުގެ ގުޅުން ކުރިން އޮތްގޮތާއި ، މިހާރު އެގުޅުން ބަދަލުވާން އެއުޅޭގޮތް ނޫރުއަކަށް ނުވިސްނެއެވެ. ޙަފުޞާ އިންގޮނޑިން ކޮޅަށް ތެދުވެ ވާހަކަ ފެށްޓިއެވެ.
" އަހަރެމެންނާ ނޫރުލްޢައިނާ ދެމެދު އުފެދިގެން އައިސްފައި އޮތީ ކޮން ކަހަލަ ، ކިހާވަރެއްގެ ގުޅުމެއްކަން ނޫރުލްޢައިނަށް އެނގޭ ނޫން ހެއްޔެވެ ؟ އަދި އެގުޅުމަށް ދެންވާން މިއުޅޭގޮތެއްވެސް އެނގޭ ނޫންހެއްޔެވެ ؟ އެހުރިހާކަމެއް އެނގިހުރެ ، އޮފީހުން އިއްޔެ ގެޔަށް އައިސް އަހަރެމެން ކުރިމަތީ އެޖެއްސި ވައްތަރަކީ ، ކިޔަވައިގެންހުރި ، ޢިލްމީ ޤާބިލް އަދި ޚުލްޤުހެޔޮ އަންހެންކުއްޖަކު ޖައްސާނެ ވައްތަރެއްކަމަށް ޤަބޫލުކުރަން ހެއްޔެވެ ؟ " ޙަފުޞާ ބުންޏެވެ.
" އަހަރެންނަކީ ، ނޫރުގެ ވާންއުޅޭ މައިދައިތައެވެ. އަހަރެން އިއްޔެ އައީ ނޫރުއާއި މުރުތަޟާގެ ކައިވެނީގެ ތާރީޚު ކަނޑަ އަޅާށެވެ. އެކަމަކު ، އޮފީހުން އައިގޮތަށް އައިސް އަހަރެމެންނާ ވާހަކަ ދެއްކީ ލަދުޙަޔާތްކުޑަ ގޮތަކަށެވެ. އެއީ ނޫރު ، ކުރިން އުޅުނުގޮތެއްނޫނެވެ. ނޫރުގެ މައްސަލައަކީ ކޮބައި ހެއްޔެވެ ؟ ތި އުޅެނީ ، އަހަރެމެންގެ ފަރާތުން ކޮންކަމެއް އުނިވެގެން ހެއްޔެވެ ؟ ޙަފުޞާގެ ވާހަކަ ކުރިޔަށް ގެންދިޔައެވެ.
ޙަފުޞައްތަގެ ހިތުގައިވާ ގޮތަށް ސީދަލަށް ވާހަކަ ދެއްކީތީ ނޫރު އެކަމާ އުފާކުރިއެވެ. އަދި އޭނާ ބުނަންބޭނުންވާ އެއްޗެއް ބުނެ ، ޙަފުޞައްތަޔަށް ޖަވާބުދިނުމަށް ތައްޔާރުވިއެވެ. ޖަދަލުކުރާކަށް ނޫނެވެ. ނޫރު އެބުނާ އެއްޗެއް އެބުނަނީ ، ނޫރުގެ ހިތުގައި ޙަފުޞައްތަގެ މައްޗަށް އޮތް އިޙްތިރާމާއި ޤަދަރާ އެކުގައެވެ.
" ޙަފުޞައްތަގެ ވާހަކަތަކުގައި ފާހަގަ ކުރިގޮތަށް ، އަހަރެންނަކީ ޢިލްމީ ، ޤަބިލްމީހެއްކަން އެއީ ފެންނަން އޮތް ޙަޤީޤަތެކެވެ. އެކަމަށް ޙަފުޞައްތަވެސް އެއްބަސްވެއްޖައީމުއެވެ. ކިޔަވައިގެންތިބޭ ޢިލްމީ ، ޤާބިލް އަންހެންކުދިންނަށް އެކުދިންގެ އަމިއްލަ ނިންމުންތައް ރަނގަޅުގޮތުގައި ނިންމަން އެނގޭނެކަންވެސް ޤަބޫކު ކުރާށެވެ. އެނިންމުމަކީ އަހަރެންގެ ދިރިއުޅުމާ ގުޅިފައިވާ ނިންމުމެކެވެ. އަމިއްލަ އިޚުތިޔާރުގައި ، ހިތުން ރުހުމުން ނިންމަންޖެހޭ ނިންމުމެކެވެ. އަހަރެންކުރެން އަހައިލުމެއްނެތި ، އަހަރެންގެ ދިރިއުޅުމާބެހޭ އެވަރުގެ ނިންމުމެއް ނިންމުމުގެ ޙައްޤު އެއްވެސްމީހަކަށް ނޯންނާނެއެވެ. " ނޫރު ބުންޏެވެ.
ނޫރު ވާހަކަ ދައްކަމުން ގެންދިޔައިރު ، ޙަފުޞާހުރީ އޭނާއާ ދިމާއަށް ކަޅިއަޅައިގެންނެވެ. ނޫރުއަކީ ، ވަރަށް ތުއްތުއިރު މަންމަ ނިޔާވުމާގުޅިގެން ، ޙަފުޞާގެ ބެލުމުގެދަށަށް އައި ކުއްޖެކެވެ. ކާންދީ ނެޕީ ބަދަލުކޮށް ، ފެންވަރުވާ ހެދުންލައްވައި ބޮލުފުނާ އަޅުވައިދިނީ ޙަފުޞާގެ ދެއަތުންނެވެ. ފިރުކެމުން ތެދުވަމުންގޮސް ހިނގައި ދުވެހެދީ ޙަފުޞާގެ އިނގިލީގައި ހިފަހައްޓައިގެން ހުރެއެވެ. ސްކޫލަށްދާން ތައްޔާރުކޮށްދެނީ ހަފުޞާއެވެ. ހަމަ އެކުއްޖާ ، މިއަދު އެބުނަނީ އޭނާގެ މައްޗަށް ޙަފުޞާގެ އެއްވެސް ޙައްޤެއް ނޯންނާނެ ވާހަކައެވެ. ހަރާންކޯރުވިޔަސް އެއީދެން ތަންފުކެއް ބޮޑު ވަރެކެވެ. ޙަފުޞާގެ ރުޅިވެރި ބަސްތަކުން ނޫރުގެ ދެލޮލުގައި ކަރުނަ ހިލުނެވެ. އެހެނަސް ، އޭނާގެ ހިތުގައިވާ ވަރުގަދަ ޢަޒުމުން ، އެކަރުނަތައް ބޭރުވިޔަކަ ނުދިނެވެ.
މުރުތަޟާއާއި ނޫރުގެ ކައިވެނީގެ ވާހަކަ ދައްކައި އެކަމަށް އެކިގޮތަށް ، ދެޢާއިލާއިންވެސް ޢިޝާރާތް ކުރަމުން ގެންދާތާ އެތައް ދުވަހެއް ވެއްޖެއެވެ. އެއީ ދެޢާއިލާއިންވެސް ނުހަނު ބޭނުން ކަމެކެވެ. ނޫރު ، އެކަމަށް އިންކާރު ކުރަންޖެހޭ ސަބަބެއް ޙަފުޞާއަކަށް ނުވިސްނުނެވެ. ޙަފުޞާގެ ނަޒަރުގައި ، ނޫރު އޭނާއަށް ހަރާންކޯރުވަނީއެވެ. ޙަފުޞާގެ އަޅައިލުމާއި އެހީތެރިކަމާ އަދި ހެޔޮކަމުގެ ބަދަލުގައި ނޫރު އޭނާއަށް އެދެނީ ތެޔޮހަމެކެވެ. ނޫރު ، އެކައިވެންޏަށް އިންކާރުކުރާ ސަބަބަކީ ކޮބައިތޯ ޙަފުޞާ ސުއާލު ކުރިއެވެ. ރުޅިއައިސް ރަތްވެފައި ހުރެ ހަރުކަށި ޢިބާރާތުންނެވެ.
ނޫރުގެ ޖަވާބު ސާފުވެފައި ވަރަށް ސާދާއެވެ. ނޫރު ބުނީ ، އެކައިވެންޏަށް އޭނާ އެއްވެސްވަރަކަށް އިންކާރު ނުކުރާ ކަމުގައެވެ. އަދި މުރުތަޟާ ދެކެ އިންތިހާއަށް ލޯބިވެސްވާ ކަމުގައެވެ. ނޫރު ބޭނުންވަނީ އެކަމަށް އޭނާގެ ހިތާއި ނަފުސު ތައްޔާރުވުމަށްޓަކައި ވަގުތުކޮޅެއް ދިނުމަށެވެ. އެވާހަކަ މުރުތަޟާގާތުވެސް އަދި އޭނާގެ ޢާއިލާގެ މީހުންގާތުވެސް އޮތީ ބުނެފައެވެ. ނޫރުގެ ދުލުން ޙަފުޞައްތަގާތު އެވާހަކަ ބުނަން ޙަފުޞައްތަ ބޭނުންކަމަށް ވަންޏާ ޙަފުޞައްތަގާތުވެސް އެވާހަކަ ބުނަން އޭނާ ޖެހިލުމެއް ނުވެއެވެ.
" ޙާފުޞައްތާއެވެ ! މި ކައިވެންޏަށް އަހަރެން އަދި ތައްޔާރެއްނޫނެވެ. އެއަޑު އެހާ އަވަހަށް އަހާކަށް އޭނާބޭނުމެއްނޫނެވެ. އެކަމަށް އަހަރުތަކެއްވެސް ނަގައިފާނެއެވެ. އަހަރެންގެ ވަޒީފާގައި ކުރިޔަށްގޮސް އެކަށީގެންވާ މަޤާމަކަށް ވާޞިލުވާން ބޭނުމެވެ. އަމިއްލަ ފައިމައްޗަށް ތެދުވާން ބޭނުމެވެ. ކައިވެންޏަކީ އިންސާނެއްގެ ޙަޔާތުގައި ވަރަށް މުހިންމު ފިޔަވަޅެކެވެ. އަހަރެންގެ މިނިންމުމަށް އިޢުތިރާޒުކުރުމުގެ ޙައްޤު އެއްވެސް މީހަކަށް ލިބިގެންވާކަމަކަށް އަހަރެންނަކަށް ނުފެނެއެވެ. " ނޫރު އޭނާގެ ގޮތް ނިންމިއެވެ.
ނޫރުގެ އެ މުހިންމު ވާހަކަތަކުގެ މާނަ ، ޙަފުޞާނެގީ މުޅިން އިދިކޮޅަށެވެ. ނޫރުގެ ވާހަކަތަކަށް ޙަފުޞާ ރައްދުދިނީ މަލާމާތެއްގެ ސިފައިގައެވެ. ނޫރު ބޭނުންވަނީ ، މިނިވަންކަން ލިބިގެންވާ މާޙާއުލެއްގައި ވިސްނުމެއް ޚިޔާލެއްނެތި ، ގެވެހި ދިރިއުޅުމެއްގެ ޒިންމާއާއި މަސްއޫލިއްޔަތާ ދުރު ، އާވާރާ ދިރިއުޅުމެއްކަމުގައި ޙަފުޞާ ބުންޏެވެ. ނޫރުއަށް އެހުރީ އޭނާ ފެނިފައެވެ. އަމިއްލަ ނަފުސަށް ބޮޑާވެގަނެވިފައެވެ. ޙަފުޞާގެ އެހީތެރިކަމުން ލިބުނު ތަޢުލީމުން ޢިލްމު ޙާޞިލްކޮށް ޙަފުޞާއާ ދެކޮޅަށް ބަސްބުނުމަށް ތެދުވެއެވެ. މުރުތަޟާއަކީ ، އާވާރާވެގެން ، އިންނާނެ މީހަކު ނުވެގެން އުޅޭމީހެއްނޫނެވެ. މުރުތަޟާއާ ނޫރު އިންނާނެ ދުވަހަކާ ކައިވެނި ކުރާނެއިރެއް ބުނާނީ ނޫރުއެއް ނޫނެވެ. އެއީ މުރުތަޟާގެ ޙައްޤެކެވެ. އެކަން ނިންމާނީ މުރުތަޟާއެވެ.
ޙަފުޞާގެ ވާހަކަތަކާމެދު ، ނޫރު ކަންބޮޑުވިއެވެ. އެކައިވެނީގެ ވާހަކަ މިހާރު އެދަނީ މާމައްޗަށެވެ. ނޫރުއަށް ފެނުނުގޮތުގައި މުރުތަޟާއަށް ފޯނުކޮށްގެން އެތަނަށްގެނެސް ، އެވާހަކަ ދައްކަން އެބަ ޖެހެއެވެ.
" ސާހިބު ކަމަނާއެވެ ! އަހަރެންނަކީ މުރުތަޟާގެ މަންމައެވެ. މުރުތަޟާގެ ޣައިރު ޙާޟިރުގައި އަހަރެން ނިންމާ ކޮންމެގޮތެއް އެއީ އެންމެ ފަހުގެ ނިންމުމެވެ. ކޮންމެގޮތަކަށް އަހަރެން ނިންމިޔަސް އެނިންމުމެއް ، މުރުތަޟާ ، ހެޔޮހިތުން ޤަބޫލު ކުރާނެއެވެ. އެއީ ކަމަނާ ކަހަލަ ޚުދުމުޚުތާރު މީހެއްނޫނެވެ. އެއީ މައިންބަފައިންގެ ނިންމުން ޤަބޫލުކޮށް ، އެމީހުންގެ ބަސްއަހަން ދަންނަ މީހެކެވެ. އަދި ، އެއްވާހަކައެއް އަޑުއަހާށެވެ ! ކުރިޔަށްއޮތް ދެތިންމަހެއްގެ ތެރޭގައި އަހަރެން ، މުރުތަޟާ މީހަކާ ދެވާނަމެވެ. ނިކަން ބަލަން ހުންނާށެވެ ! " ޙަފުޞާގެ އަޑުގައިވަނީ ގޮތް ދޫނުކުރުމާއި ރުޅިވެރިކަމެވެ.
ނޫރުގެ ބޭބެ ހާރިސްއަށް އެތަނަށް އާދެވުނުއިރު ، ކަންތައް އެއޮތީ މާގޯސްވެފައެވެ. އެކަހަލަ ވާހަކަޔަކީ ހަމަޖެހިލައިގެން ޞުލްޙަވެރިކަމާއެކު ދައްކަންޖެހޭ ކަހަލަ ވާހަކަކަމަށްބުނެ ، ޙަފުޞައްތަ އިށީނދެ ހަމަޖެހިލުމަށް ހާރިސް އެދުނެވެ. އަދި ރައުދާ އެގެނައި ސައިތަށި ބޯލައި ހަމަޖެހިލުމަށް އެދި ހަފުޞާ ހަމަޖެއްސޭތޯ ބަލަމުން ގެންދިޔައެވެ. ޙަފުޞާހުރީ ނޫރުގެ ބަސްތަކުން ރުޅިއައިސް ކޮންޓްރޯލުން ނައްޓާފައެވެ.
އެގެޔެއްގައި އޭނާއަށް އިޙްތިރާމާއި ޤަގަރެއްނެތް ގެޔަކުން ސައިތަށްޓެއް ކީއްކުރަން ހެއްޔެވެ ؟ ފެންފޮދެއްވެސް ބޯލުމަކީ ޙަފުޞާއަށް ޙަރާމް ކަމެއްކަމުގައި ޙާފުޞާ ނިންމިއެވެ. މުރުތަޟާ ކަހަލަ ޖަވާހިރެއްފަދަ ކުއްޖަކު ދޫކޮށްލައިގެން ނޫރުއަށް ކެހިނޫން އެހެން އެއްޗެއް ނުލިބޭނެކަމަށް ޙަފުޞާ ބުންޏެވެ. އަދި އެކަމާ ނޫރު ފަހުން ދެރަވާނެއެވެ. އޭރު އޮންނާނީ ވަގުތު ފާއިތުވެގެން ގޮއްސައެވެ.
" ޙަފުޞައްތާއެވެ ! މުރުތަޟާ އަހަރެންދެކެ ނުހަނު ލޯބި ވެއެވެ. ތިކަހަލަ ވާހަކަ ނުދައްކާށެވެ. އަހަރެންނޫން އެހެން އަންހެނަކާ ދިމާއަށް މުރުތަޟާ ބަލައިވެސް ނުލާނެއެވެ. މުރުތަޟާއަށް އެފަދަ އަނިޔާއެއް ދޭކަށް ނުވާނެއެވެ. އެހެން ކައިވެންޏެއްގެ ވާހަކަ މުރުތަޟާއާ ނުދައްކާށެވެ. އޭނާގެ ހިތް ހަލާކުވެދާނެއެވެ. " ފެންކަޅިވެފައިހުރެ ނޫރު ބުނަމުން ގެންދިޔައެވެ.
ނޫރު އެދެއްކި އެއްވެސް ވާހަކައެއް އަޑުއަހާކަށް ޙަފުޞާ ބޭނުމެއް ނުވިއެވެ. ޙަފުޞާއަށް ވިސްނައިދީ ހަމަޖައްސައިލުމަށްޓަކައި ، ހާރިސްއާއި ރައުދާ އަދި ނޫރު ދައްކަމުން ގެންދިޔަ އެއްވެސް ވާހަކައެއް އަޑުއަހާކަށް ޙަފުޞާ ބޭނުމެއް ނޫނެވެ.
" އަހަރެންގެ ފަރާތުންނާއި މުރުތަޟާގެ ފަރާތުން ، މިގުޅުން މިހިސާބުން މިނިމުނީކަމުގައި ، ވަސީމު ގެޔަށް އައިމަ ބުނާށެވެ ! މުރުތަޟާއާއި ނޫރުގެ ކައިވެނީގެ ވާހަކަ މިހިސާބުން މި ނިމުނީއެވެ. އެކަން ކުރާކަށް އަހަރެން ދެނެއް ނޫޅޭނަމެވެ. އަހަރެމެންގެ ގުޅުން މިހިސާބުން މި ކެނޑުނީއެވެ. " ޙަފުޞާގެ އަޑަށް ބާރުލާފައި އޭނާގެ ގޮތް ނިންމިއެވެ. އަދި ، ދަބަސްގަނޑު ކޮނޑުއަޅުވައިގެން ތެދުވެ ، އެގެއިން ނުކުތެވެ.
އެގެޔަށް އައިސް ، ދުވަހަކުވެސް އެފަދަ ރުޅިވެރިގޮތަކަށް ، ޙަފުޞާ އެގެއިން ނުކުމެފައެއް ނުވެއެވެ. ނުބައިތާކަށް ވަދެވިގެން މީހަކު ، އަވަސް އަވަހަށް ސަލާމަތްވާން ނުކުމެގެންދާ ގޮތަށް ، އަވަސް ފިޔަވަޅުތަކެއް އަޅަމުން ޙަފުޞާ އެގެއިން ނުކުމެގެން އެދިޔައީ ، ދެވަނަ ފަހަރަށް އެގެޔަށް ނުވަންނަ ގޮތަށެވެ. އެއްދުވަސްވަރެއްގައި އެއީ އޭނާގެ އަމިއްލަ ގެއެކެވެ. އެގޭގައި ދިރިއުޅުނީ އޭނާގެ އަމިއްލަ މީހުންނެވެ. އެގެޔަށް އައުމުން ، ގޭގެ އެންމެންވެސް އޭނާއައިގެން އުޅޭގޮތުން ، ޙަފުޞާ ލަދުގަންނަ ވަރުވެއެވެ. އެހެނަސް ، މިއަދު އެގެއިން ނުކުމެގެން އެދިޔައީ އެގެޔާއި އެގޭ މީހުންނާ ޙަފުޞާއާ ދެމެދު އޮތް ހުރިހާ ގުޅުމެއް ކަނޑައިލާފައެވެ.
އެތާހުރި ގޮނޑިއެއްގެ މައްޗަށް ނޫރު ތިރިވިއެވެ. މޫނުގައި ދެއަތް އަޅައި ގުދުވެ އޮވެ ދެއަތުން ބޮލުގައި ބާރަށް ހިފައިލިއެވެ. ހާސްވެގެންގޮސް ، އިސްއުފުލައިލައި ، މާނޭވާއެއް ލިއެވެ. ލޮލުން އޮހޮރެމުންދިޔަ ކަރުނަތައް ބޭބެއާއި ފަހަރިޔަށް ދައްކާކަށް ނޫރު ބޭނުމެއް ނޫނެވެ. އޭނާގެ އިޙްސާސްތަކަށް އިޙްތިރާމް ނުކުރާ ބައެއްގެ ޢަމަލުންނާއި ބަހުން ކުރާ އަސަރަކުން އުފެދޭ ކަރުނައެއް އޭނާގެ ލޮލުން ބޭރުކުރާކަށް ނޫރު ބޭނުމެއްނޫނެވެ. އެއްފަރާތަކަށް މޫނު އަނބުރާލައި ، ދެލޯ ފުހެމުން ތެދުވެގެން އޭނާގެ ކޮޓަރިޔަށް ގޮސް ވަނެވެ. އެވަގުތު އޭނާއަށް ވެފައިހުރިގޮތް އެހެން މީހުންނަށް ދައްކާކަށް ނޫރު ބޭނުމެއް ނުވިއެވެ.
(ނުނިމޭ)
varahves reethi shukuran