އިންޑިޔާގައި ދެ ރޭލު އެކްސިޑެންޓުވެ 200 އަށްވުރެ ގިނަ މީހުން މަރުވެއްޖެ

އިންޑިޔާގެ އޮޑީޝާ ސްޓޭޓުގައި ދެ ރޭލު ޖެހި ހިނގި ވަރުގަދަ އެކްސިޑެންޓެއްގައި 233 މީހުން މަރުވެ، 900 މީހުން ޒަޚަމްވެއްޖެއެވެ.

އޮޑީޝާގެ ޗީފް ސެކްރެޓަރީ ޕްރަދީޕް ޖެނާ ކުރެއްވި ޓުވީޓެއްގައި ވިދާޅުވި ގޮތުގައި މަރުވި މީހުންގެ އަދަދު އިތުރުވުމަކީ އެކަށީގެންވާ ކަމެކެވެ.

ދެ ރޭލު އެކްސިޑެންޓުވި ސަރަހައްދު ކަމުގައިވާ ބާލާސޯރް ޑިސްޓްޓިރިކްޓަށް 200 އެންބިއުލާންސާއި، 100 ޑޮކްޓަރުން ފޮނުވާފައިވާކަމުގައި ވެސް އޭނާ ވިދާޅުވިއެވެ. އެރަށުގައި ތިބެނީ ގާތްގަނޑަކަށް 80 ޑޮކްޓަރުންނެވެ.

ރޭ 7:00 ޖެހިއިރު (ރާއްޖޭ ގަޑިން އިރުއޮއްސި 6:30) އެކްސިޑެންޓު ހިނގާފައި ވަނީ ކަލްކަތާއިން ޗެންނާއީއަށް ދަތުރުކުރި ކޮރޮމެންޑަލް އެކްސްޕްރެސް ރޭލާއި، ބެންގަލޫރުން ހޯރާއަށް ދަތުރުކުރަމުން ދިޔަ ހޯރާ ސުޕަރފާސްޓް އެކްސްޕްރެސް ރޭލު ޖެހިގެންނެވެ. އެއް ރޭލުން ދަތުރުކުރަމުން ދިޔަ ދަގަނޑުން ނައްޓާލާފައި ވަނިކޮށް އަނެއް ރޭލު އައިސް އޭގައި ޖެހުނީއެވެ.

ދެ ރޭލުގެތެރޭން ދަގަނޑުން ނައްޓާލީ ކޮން ރޭލެއް ކަމާމެދު ކަމާބެހޭ މަސްއޫލުވެރިން މައުލޫމާތު ދެއްވާފައި ވަނީ ތަފާތުކޮށެވެ. އަދި ރޭލު ދަގަނޑުން ނައްޓަން ޖެހުނު ސަބަބާމެދު ރަސްމީކޮށް އެއްވެސް އެއްޗެއް ބުނެފައި ނުވެއެވެ.

އިންޑިޔާގެ ބައެއް ނޫސްތަކުން ބުނެފައިވާ ގޮތުގައި ކޮރޮމެންޑަލް އެކްސްޕްރެސް ރޭލު ދަތުރުކުރަމުން ދިޔަ ދަގަނޑުން ނައްޓާލައިގެން ގޮސް އޭގެ ބައެއް ބައިތައް އަނެއް ދަގަނޑަށް އެރީއެވެ. އެވަތުގު އަނެއް ކޮޅުން އައި ހޯރާ އެކްސްޕްރެސް އެ ރޭލުގައި ޖެހުނީއެވެ. މީގެ ސަބަބުން ކޮރޮމެންޑަލް އެކްސްޕްރެސް ރޭލުގެ 15 ބައި ވަނީ ވިއްސައިގެން ގޮސް ފުރޮޅާލާފައެވެ.

"އަހަރުމެން އެންމެ އިސްކަން މިދެނީ ދިރިތިބި މީހުން ފުރަތަމަ ހޮސްޕިޓަލްތަކަށް ގެންދިއުމަށް. އަހަރުމެންގެ އެންމެ ބޮޑު ސަމާލުކަމެއް މިވަގުތު ހުރީ އެކަމަށް. ދިރިތިބީ މީހުންނާ އަޅާލުމަށް." އޮޑީޝާގެ ޗީފް މިނިސްޓަރު ނަވީން ޕަޓްނާއިކް ވިދާޅުވިއެވެ. އޭނާ ވަނީ މި އެކްސިޑެންޓުގެ ހިތާމައިގައި މިއަދު 3 ޖޫންއަކީ އެ ސްޓޭޓުގައި ރަސްމީ ބަންދު ދުވަހެއް ކަމުގައި ކަނޑައަޅުއްވާފައެވެ.

ބޮޑުވަޒީރު ނަރެންދްރަ މޯދީ ކުރެއްވި ޓުވީޓެއްގައި ވިދާޅުވި ގޮތުގައި، "ދެވެންހުރި ހުރިހާ އެހީތެރިކަމެއް" ފޯރުކޮށްދިނުމަށް އެހީތެރިކަން ފޯރުކޮށްދޭ ޓީމުތައް މިހާރު ދަނީ މަސައްކަތްކުރަމުންނެވެ. ރޭލްވޭ މިނިސްޓަރު އަޝްވިނީ ވައިޝްނާއު ވިދާޅުވި ގޮތުގައި އޮޑީޝާގެ ވެރިރަށް ބޫބަނޭޝްވަރާއި، ވެސްޓް ބެންގޯލްގެ ވެރިރަށް ކަލްކަތާއިން ވަނީ އެހީދޭ ޓީމުތައް ފޮނުވާފައެވެ.

ދުނިޔޭގެ ރޭލްވޭ އެންމެ ބޮޑު ވިއުގަ އޮންނަ އިންޑިޔާގައި ރޭލުތަކުން ދުވާލަކު 13 މިލިއަން މީހުން ދަތުރުކުރެއެވެ. ރޭލްވޭ ވައުގައިގެ ސަލާމަތީ ކަންކަން އެންމެ ފުރިހަމަ ނޫންކަން ދޭހަކޮށްދޭ މިފަދަ އެތައް އެކްސިޑެންޓެއް އިންޑިޔާގައި ހިނގާފައި ވެއެވެ.