ގާސިމް އިބްރާހިމްގެ ކެމްޕެއިން މެނޭޖަރުންގެ ގޮތުގައި އަމީން އިބްރާހިމް އާއި އިލްހާމް އަހްމަދު ހަމަޖައްސައިފިއެވެ.
މިއަހަރު ބާއްވާ ރިޔާސީ އިންތިޚާބުގައި ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމްގެ ކެމްޕެއިން މެނޭޖަރުންގެ ގޮތުގައި މި ދެ ބޭފުޅުން ހަމަޖައްސާފައިވަނީ ރާއްޖޭގެ ދެ ސަރަހައްދަކަށް ބަހާލައިގެންނެވެ.
އެގޮތުން ގާސިމް އިބްރާހިމްގެ ސްޕެޝަލް އެންވޯއީ އިލްހާމް އަހުމަދު ހަމަޖައްސާފައިވަނީ ދެކުނުގެ ކެމްޕެއިން މެނޭޖަރުގެ ގޮތުގައެވެ. އަދި ޖޭޕީގެ ޑެޕިއުޓީ ލީޑަރު އަމީން އިބްރާހިމް ހަމަޖައްސާފައިވަނީ އުތުރުގެ ކެމްޕެއިން މެނޭޖަރުގެ ގޮތުގައެވެ.
އިލްހާމްއާ ހަވާލު ކުރެވިފައިވަނީ ވ. އަތޮޅާއި މ. އަތޮޅާއި ފ. އަތޮޅާއި ދ. އަތޮޅާއި ތ. އަތޮޅާއި ލ. އަތޮޅާއި ގއ. އަތޮޅާއި ގދ. އަތޮޅާއި އައްޑޫ ސިޓީއެވެ. އަދި މާލޭގެ ދެބައިކުޅަ އެއްބައި އިލްހާމްއާ ވަނީ ހަވާލު ކޮށްފައެވެ.
އަމީންއާ ހަވާލު ކުރީ ހއ. އަތޮޅާއި ހދ. އަތޮޅާއި ށ. އަތޮޅާއި ނ. އަތޮޅާއި ރ. އަތޮޅާއި ބ. އަތޮޅާއި ޅ. އަތޮޅާއި ކ. އަތޮޅާއި އއ. އަތޮޅާއި އދ. އަތޮޅާއި މާލޭގެ ދެ ބައިކުޅަ އެއްބައެވެ.
ސިޔާސީ ދާއިރާގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ އިލްހާމް ވަނީ މީގެ ކުރިން ރައްޔިތުންގެ މަޖިލިހުގެ ގެމަނަފުށީ ދާއިރާގެ މަޖިލީސް މެންބަރުކަމާއި، ދަނގެތީ ދާއިރާގެ މަޖިލީސް މެންބަރުކަންވެސް ކުރައްވާފައެވެ. ޖޭޕީގެ އިތުރުން ޑީއާރްޕީއާއި ޕީޕީއެމް ގެ އިސް މަގާމުތައް ވެސް އިލްހާމް ވަނީ ފުރުއްވާފައެވެ.
މީގެ ކުރިން ޓްރާންސްޕޯޓް މިނިސްޓަރު ކަމުގެ މަގާމު އަދާކުރައްވާފައިވާ އަމީނަކީ ފެށުނީންސުރެ ޖޭޕީއަށް ގިނަ ޚިދުމަތްތަކެއް ކުރައްވާފައިވާ ބޭފުޅެކެވެ.
