(17 އޭޕްރީލް 2023 ގައި ޝާއިއުކުރި ބަޔާ ގުޅޭ)
ހޫދުގެފާނާއި އެކަލޭގެފާނަށް ތަބާވީ މީސްތަކުން ، ﷲ ގެ ވަޢުދުފުޅަށް ، އިންތިޒާރުކޮށްގެން ތިއްބެވެ. އެހެން ތިއްބަވަނިކޮށް ، އެބައިމީހުންނާ ތަދުމަޑުކަމެއް ކުރިމަތިވިއެވެ. އުޑުން ވާރޭވެހުން ހުއްޓުނެވެ. އިރުގެ ގަދަހޫނުން ސަހަރާގެ ފަސްގަނޑު ދޮންވެގެންދިޔައެވެ. އެބައިމީހުންގެ ބޯމަތީ އަލިފާންގަނޑެއް އެންދުންފަދަ ގަދަހޫނެއް ތަޖުރިބާކުރަން ޖެހުނެވެ.
މިއީ ކޮން ތަދުމަޑުކަމެއްތޯ އެބައިމީހުން އެކަލޭގެފާނާ ސުއާލުކުރިއެވެ. ހޫދުގެފާނު އެބައިމީހުންނަށް ޖަވާބު ދެއްވިއެވެ.
" ﷲ ، ތިޔަބައިމީހުންގެ މައްޗަށް ކޯފާވެވޮޑިގެންފިއެވެ. ތިޔަބައިމީހުން ، އެކލާނގެ ރަސްކަންފުޅަށް އީމާންވެއްޖެނަމަ ، އެކަލާނގެ ރަޙުމަތްފުޅުގެ ދަށަށް ، ތިޔަބައިމީހުން ހިނގައްޖެއެވެ. ތިޔަބައިމީހުން ، އެކަލާނގެ ރަސްކަންފުޅަށް އީމާންވެއްޖެނަމަ ، އުޑުން ވާރޭވެސް ވެއްސަވާނެތެވެ. އަދި އިހުއޮތް ދަރަޖަޔަށް ، ތިޔަބައިމީހުން ބާރުވެރި ކުރައްވާނޭ މެއެވެ. "
އެބައިމީހުން އެކަލޭގެފާނުގެ ބަސްފުޅު ދޮގުކުރިއެވެ. އަދި އިހުނަށްވުރެ ހަރުކަށި ގޮތުގައި އެކަލޭގެފާނާ ދިމާކުރިއެވެ. އަދި ގޮރްދޫނުކޮށް ، އެބައިމީހުންގެ ގޮތުގައި ކާފަރުކަންމަތީ ދެމިތިއްބެވެ.
ހޫދުގެފާނުގެ ޤައުމުގެ މީސްތަކުންނަށް ކުރިމަތިވި ތަދުމަޑުކަން އިތުރު ވިއެވެ. ގަސްތައް ރީނދޫކުލަޔަށް ބަދަލުވެ ، ގަސްތައް ހިކި މަރުވާން ފެށްޓިއެވެ.
އެއްދުވަހެކެވެ. އުޑުމަތި ބަނަވެ ، މުޅި އުޑުގައި ވިލާބޯވިއެވެ. އެބައިމީހުން ، އެމީހުންގެ ފޭލިގެތަކުން ނިކުމެ ، އުފާފާޅުކޮށް ، އުޑުމަތީގައިވާ ވިލާތަކުން ވާރޭ ވެހޭނެ ކަމަށް ގޮވަމުން ގެންދިޔައެވެ. ކުއްލިގޮތަކަށް މޫސުންބަދަލުވެ ، ގަދަހޫނު ގަނޑުފެނަށް ބަދަލުވެ ، ވައިގަދަވެ ، ގަސްގަހާ ގެއްސާއި ، ފޭލިގެތައް މުލުންލުހި ، އަންހެނުންނާއި ފިރިހެނުން އެތައްމިތަނަށް ވިއްސި ވިހާލިވެގެންދިޔައެވެ. ވައިގެ ތޫފާނު ، އެއްދުވަހުން އަނެއްދުވަހަށް ، ބާރުވެ ޤުދްރަތީ ބޮޑު ކާރިސާއަކަށް ބަދަލުވިއެވެ. އެކަލޭގެފާނުގެ ޤައުމުގެ މީސްތަކުން ފިލަން ދުއްވައިގަތެވެ. ރައްކާތެރިކަން ހޯދުމަށްޓަކައި ފޭލިގެތަކަށް ވަނެވެ. އެހެންނަމަވެސް ވައިގެ ތޫފާނުން ، އެ ފޭލިގެތައް ބިމުން އުފުރި އެތައްމިތަނަށް ފެތުރިގެންދިޔައެވެ. ފޭލިގެތައް ލުހި އުޑުމައްޗަށް ކަޝްފުވުމާގުޅިގެން ، އެބައިމީހުން އަތުގައިހުރި ފޭރާމުން ، ހަށިގަނޑު ނިވައިކުރެވޭތޯ މަސައްކަތް ކުރިއެވެ. އެހެންނަމަވެސް ، އެބައިމީހުން ނިވާކަން ހޯދަމުން ގެންދިޔަ ފޭރާންތައްވެސް ވަޔަށް އަރައިގެން ދިޔައެވެ. ތޫފާނުގެ ގަދަފަދަކަން ޙައްދުންމައްޗަށްގޮސް ، އެބައިމީހުންގެ ހަށިގަނޑުން މަހާ ކަށްޓާ ވަކިވާ ހިސާބަށް ދިޔައެވެ. ތޫފާނުގެ މުޞީބާތް ފޯރި ކޮންމެ އެއްޗެއް ފަނާވެދިޔައެވެ. ފަނާވެދާ ކޮންމެ އެއްޗެއް ވަޅުލެވި ފަސްއެޅިގެންދިޔައެވެ. މި ތޫފާން ، 8 ދުވަހާއި 7 ރޭ ވަންދެން ކުރިޔަށް ދިޔައެވެ.
ކީރިތި ޤުރުއާނުގެ އަލް އަޙްޤާފް ސޫރަތުގެ 24 އަދި 25 ވަނަ އާޔަތުގެ މާނައިގާ ވެއެވެ.
" ފަހެ ، އެއުރެންގެ ވާދީތަކާދިމާޔަށް ކުރިމަތިލައި ، އުދަރެހަށް ހުރަސްވީ ވިލާގަނޑެއްގެ ސިފައިގާ ، އެއުރެންނަށް އެ (ޢަޒާބު) ފެނުނު ހިނދު ، އެއުރެން ބުނޫއެވެ. މިއީ ތިމަންމެންނަށް ވާރޭވެއްސައިދޭނޭ ވިލާގަނޑެކެވެ. ( އެންގެވިއެވެ ) އަދި ކިއެއްތަ ! އެއީ ، އަވަސްވުމަށް ، ތިޔަބައިމީހުންނއެދިގެން އުޅުނު ކަންތަކެވެ. ވޭންދެނިވި ޢަޒާބު އޭގައި ހިމެނިގެންވާ ގަދަވަޔެކެވެ. (24) އެ ވައި ، އޭގެ ވެރިރަސްކަލާނގެ އަމުރުފުޅަށް ކޮންމެ އެއްޗެއް ހަލާކުކޮށް ނެތިކޮށްލަތެވެ. ފަހެ ، އެއުރެން އުޅުނު ތަންތަން މެނުވީ ، ފެންނާންނެތް ބަޔަކުކަމުގައި އެއުރެން ވެއްޖައޫއެވެ. ކުށްވެރިވި މީހުންނަށް ، ތިމަންރަސްކަލާނގެ ޖަޒާދެއްވަނީ އެފަދައިންނެވެ. "
(ނުނިމޭ)
