(18 އޭޕްރީލް 2023 ގައި ޝާއިއުކުރި ބަޔާ ގުޅޭ)
އޮޕަރޭޝަން ކުރުމަށްޓަކައި ޚައިރާދު ، ތިއޭޓަރަށް ވެއްދުނެވެ. ދުވަސްނުފުރުނަމަވެސް ، ދެމައިންގެ ފުރާނަ ސަލާމަތް ކުރެވޭނެ އެހެންގޮތެއްނެތްކަމަށް ޑޮކްޓަރުން ނިންމިއެވެ. ގަޑިއެއްހައި އިރުކޮށްފައި ނަރުސްކުއްޖާ ނުކުމެ ޚާލާއަށް މަރުޙަބާ ކިޔެވެ. އަދި ޚާލާއަށް މާމަ ކުއްޖަކަށް ލިބުނީ އަންހެންކުއްޖެއްކަމުގައި ބުންޏެވެ.
ދަރިފުޅު އަތްދަނޑިމައްޗަށް ލައިގެން ، ޚައިރާދު އޮށޯވެލައިގެން އޮތެވެ. އޭނާގެ ދަރިފުޅާ ޚައިރާދު މުޚާތަބު ކުރިއެވެ.
" ދަރިފުޅާއެވެ ! މަންމަޔަށް މައާފު ކުރާށެވެ ! ދަރިފުޅު މިދުނިޔެއަށް އެންމެ ފުރަތަމަ ފަހަރަށް ލޯހުޅުވައިލާ ، އެންމެ ފުރަތަމަ ނޭވާ ލީ ހިނދު ، ބައްޕަގެ މަޤާމް ދޭނެ ، ދަރިފުޅުގެ ބައްޕައެއް ނެތެވެ. މަންމަގެ ފުރާނައާއެވެ ! ދަރިފުޅު ދުނިޔެއަށް އައިއިރު ، އެ އަނިޔާވެރި އިންސާނާގެ ނަމާ ދަރިފުޅު ގުޅިގެންނުދިޔަކަން އެއީ ދަރިފުޅުގެ ބަދުނަޞީބެވެ. މިއަނިޔާވެރި ދުނިޔެ ، އެކަން ކޮށްދޭނެ ފުރުޞަތު މިމަންމަޔަކަށް ނުދިނެވެ. ދަރިފުޅަކީ ، އެބައްޕައެއްގެ ނަމާ ދަރިފުޅު ގުޅުމަށް ނުރުހުންވެ ދަރިފުޅާ ދުރަށްދިޔަ އަނިޔާވެރި ބަފައެއްގެ ޙަލާލު ދަރިޔެކެވެ. މަންމަޔަށް މަޢާފު ކުރާށެވެ ! " ދަރިފުޅުގެ ގައިގާ ފިރުމައިލަމުން ޚައިރާދު ބުންޏެވެ.
ޚައިރާދު އިސްއުފުލައިލިއެވެ. ދަރިފުޅުގެ މޫނަށް ބޮސްދިނުމަށް ފަހު ބުނެލިއެވެ.
" އަޝްހަރު ޙުސައިނެވެ ! އަޝްހަރާ މުޤާބިލާ ކުރުމަށްޓަކައި ދުނިޔެއަށް އިރުއަރާ ކޮންމެ ދުވަހަކު އަހަރެން ހަނގުރާމަ ކުރާނަމެވެ. އަހަރެންނަށް އަނިޔާ ލިބުނުއިރު ، އަޝްހަރަކީ އެއަނިޔާގެ އަޞްލެވެ. ތިއީ އަނިޔާވެރިޔެކެވެ. ދުވަހަކުވެސް އަހަރެންގެ ހިތުން އެކަން ހަނދާން ނައްތައެއް ނުލާނަމެވެ. ޤިޔާމަތަށްދާނދެން އަހަރެންގެ ހިތުގައި އެކަން ބާއްވާނަމެވެ. މި ލޯބި ދަރިފުޅުގެ ޙައްޤުގައެވެ. ބާރާއި އަރާމާއި ފައިސާގައި ، އަޝްހަރުގެ ދުނިޔެ މިއަދު ، އާބާދު ކުރެވިދާނެއެވެ. އެހެނަސް ، ﷲ ގެ ދަރުބާރުގައި ހިސާބު ބެއްލެވޭ ހިނދު ، އަނިޔާލިބޭނެ މީހަކީ އަޝްހަރެވެ. ﷲ ގެ ނިޔާއަށް އިންތިޒާރު ކުރާށެވެ ! އެދުވަހުން ، އެއްވެސް ނަފުސަކަށް ބޭއިންސާފެއް ނުކުރެވޭ ހުށްޓެވެ. އަހަރެން ، އަޝަހަރަށް މަޢާފު ނުކުރަނިސް ، ﷲ ތަޢާލާ ، އަޝަހަރަށް މަޢާފެއް ނުދެއްވާނެއެވެ. އަޝްހަރު ޙުސައިނެވެ. އަހަރެންގެ ދަރިފުޅުގެ ޙައްޤުގައި ހުވާކޮށްފައި ބުނަމެވެ. އެދުވަހުން ، އަހަރެން އަޝްހަރަށް މަޢާފެއް ނުކުރާނަމެވެ. "
ޚާލާއަށް ލިބުނު އުފަލުގައި ، އެތާތިބި މީހުންނަށް ، އޭނާގެ އަތުގައިހުރި ފައިސާކޮޅުން ޞަދަޤާތް ކުރިއެވެ. އަދި އޭނާގެ ފިރިހެން ދަރިފުޅަށް ފޯނުކޮށްފައި ، ޚައިރާދުގެ ހޮސްޕިޓަލް ބިލް އަދާކުރުމަށްޓަކައި ބޭންކުން ލާރިކޮޅެއް ނަގައިގެން އަންނަން ބުންޏެވެ.
ދެތިންދުވަހު ހޮސްޕިޓަލުގައި ބޭއްވުމަށްފަހު ޚައިރާދު ގެޔަށް ބަދަލުކުރިއެވެ. ދަރިފުޅަށް އޭނާދިން ނަމަކީ ހަރީން އެވެ. ހަރީންގެ ޙާލަތު އެހާ ރަނގަޅެއްނޫނެވެ. ވަރަށްގިނަ ބޭސް އޭނާއަށް ދޭން ޖެހެއެވެ. ފުރަތަމަ ފަހަރަށް ނަގަން ޖެހުނު ބޭސްތައް ޚާލާ ނަގައިދިނެވެ. އެކަމާ ޚައިރާދު ހުރީ ވަރަށް ކަންބޮޑުވެފައެވެ. އެހާ ނިކަމެތި ބަޔެއްގެ އަތްމައްޗަށް އޭނާއާ އޭނާގެ ތުއްތު ދަރިފުޅުގެ ނަފްސު ދޫކޮށްލަން ޖެހުމަކީ ޚައިރާދުގެ ހިތަށް އުނދަގޫވި ކަމެކެވެ. އެހެންނަމަވެސް ، އޭނާއަށް މިވަގުތު އެހެން އެއްވެސް ގޮތެއް ނެތެވެ. ދާނެ ތަނެއް ނެތެވެ. އެހީއަކަށްއެދި އަތްދިއްކޮށްލާނެ މީހަކު ނެތެވެ. ހުރިހާވެސް މީހަކީ ، މަންމަޔެއްގޮތަށް ކުޑައިރު ދެކެމުން އައި ޚާލާއެވެ. ޚާލާއަކީ ، އޭނާ އެކަނިވެ ދުނިޔެއިން ގިނަވި ދުވަހު މަންމަޔެއްފަދައިން ، އޭނާއާ އަޅައިލި އިންސާނާއެވެ. އެހެންނަމަވެސް ، ޚައިރާދާއި ހަރީންއަށް ޚަރަދުކޮށް ، ޚާލާއާއި އޭނާގެ ކުދިންނަށް ނިސްބަތްވާ ލާރިކޮޅު ހުސްވެގެންދާކަށް ޚައިރާދެއް ނޭދެއެވެ.
ވަޒީފާއަކާ ބެހޭގޮތުން ، އަފްސީނާ އޭނާ ވާހަކަ ދައްކައިފިއެވެ. އަފްސީން މަސައްކަތްކުރާ ސްކޫލްގައި މެތްސް ޓީޗަރެއްގެ ވަޒީފާ އޮތްކަމުގައި އޭނާ އޮތީ ބުނެފައެވެ. އެވަޒީފާ ލިބޭތޯ މަސައްކަތް ކުރުމަށް ޚައިރާދު ނިންމިއެވެ. ޚާލާއަށް އޭނާގެ ފަރާތުން އިތުރު އުނދަގުލެއް ފޯރާކަށް ޚައިރާދު ބޭނުމެއް ނޫނެވެ. އެޙާލަތުގައިވެސް ޚައިރާދު ބޭނުމީ ، އޭނާއާއި ދަރިފުޅުގެ ޚަރަދުތައް ހަމަޖައްސައި ލެވޭވަރުކޮށް ، އޭނާގެ އަމިއްލަ ފައިމައްޗަށް ތެދުވުމަށެވެ. ކިތަންމެ ބޮޑު ތަކުލީފެއް އުފުއްލަން ޖެހުނުނަމަވެސް އެކަމަކާ އޭނާ ކުރިމަތިލާނެއެވެ.
ކަރާޗީއަށް ގޮސް އަޝްހަރާ ބައްދަލުކުރާކަށް ޚައިރާދު ބޭނުމެއްނޫނެވެ. ޚާލާގެ ވިސްނުން ޚައިރާދާ ތަފާތެވެ. ކަރާޗީއަށްގޮސް ، އަޝްހަރާ ބައްދަލުކޮށްލުން މުހިންމުކަމުގައި ޚާލާ ބުންޏެވެ. ފަހަރެއްގައި ޚައިރާދުގެ މައްޗަށް އަޝްހަރުގެ ހިތުގައި ރުޅިވެރިކަން އޮތްނަމަވެސް ، ދަރިފުޅަށް އެރުޅި ނުބާލާނެކަމަށް ޚާލާ ބުންޏެވެ. އެއީ ޚައިރާދު ބަލާނެކަމެއް ނޫނެވެ. އަޝްހަރުގެ ހިތުގައި ކޮންމެ އެއްޗެއް އޮތްނަމަވެސް ، އޭނާ އަޝްހަރަކާ ބައްދަލެއް ނުކުރާނެއެވެ. އަޝްހަރު ނިންމައިގެން އެހުރީ ޚައިރާދު މަރުވެފައިވާ ކަމުގައެވެ. އޭނާގެ މޫނު ފެނިލާކަށްވެސް އަޝްހަރު ބޭނުމެއްނޫނެވެ. އެހެންކަމުން ، އެފަދަ އިންސާނެއްގެ ފައިބުޑަށް ވެއްޓި އާދޭސް ކުރުމަށް އިންސާނިއްޔަތުވެސް ހުއްދަ ނުކުރާނެއެވެ.
އަޝްހަރު ޙުސައިން ، ޚައިރާދަށްޓަކައި މަރުވެފައިވާކަމަށް ، ޚައިރާދުވެސް ނިންމިއެވެ. ފަރީދާ އެވެ ކިޔާމީހަކު ޚައިރާދުގެ ޙަޔާތަށް އައިކަން އޭނާ ހަނދާން ނައްތައިލިއެވެ. އަދި ފަރީދާއެވެ ކިޔުނު މީހަކު އޭނާއަށް ދިން އަނިޔާވެސް ޚައިރާދު ހަނދާން ނައްތާލައިފިއެވެ.
ޚައިރާދު އެކަނި ހަރީން ބަލައި ބޮޑުކުރާނީ ކިހިނެއްތޯ ޚާލާ ސުއާލުކުރިއެވެ. ދިރިއުޅުމުގައި ދަތިވަގުތެއް އަތުވެއްޖެނަމަ ، ޚައިރާދު އެކަނި އެކަމަކާ ކުރިމަތިލާނީ ކިހިނެއްތޯ ޚައިރާދުކުރެން އެއްސެވެ.
ޚައިރާދުގެ ޙަޔާތުގައި މިހާރަށްވުރެވެސް ނިކަމެތި ޙާލެއް އަތުވެދާނެތޯ ޚާލާ ކުރެން ޚައިރާދު އެއްސެވެ. އޭނާގެ ބަނޑުގައި އޮތް ދަރިފުޅާއެކު ، އެދަރިފުޅުގެ ބައްޕަގެ ގެއިން ، ރޭގަނޑު ދަންވަރު ، ބޭރުކޮށް އެއްލައިލި އެވެ. ޚައިރާދުގެ ފުރާނަ ސަލާމަތްވިއެވެ. އޭނާގެ ދަރިފުޅުގެ ފުރާނަޔަށްވެސް ، ﷲ ގެ ރައްކާތެރިކަން މިންވަރު ކުރެއްވިއެވެ. އިރާދަކުރެއްވިއްޔާ ، ފިރިހެނަކާ ނުލައި އޭނާ އާއި އޭނާގެ ދަރިފުޅު ދިރިދުނިޔޭގައި އުޅޭނެކަމަށް ޚައިރާދު ބުންޏެވެ.
ޒަރީނާއާއި ފަރީދާ ފޯނުން ވާހަކަ ދައްކަމުން ގެންދިޔައެވެ. ކޮންފަރެންސަކަށް ރަށުން ބޭރަށް ދާން ޖެހުމުން ފަރީދާހުރީ ވަރަށް ކަންބޮޑުވެފައެވެ. ފަރީދާ ގޭގަހުންނައިރުވެސް އަޝްހަރު އުޅެނީ ރަނގަޅަށް ނުކައެވެ. ރަށުން ބޭރަށް ދިޔައިމަ އަޝްހަރު އުޅޭނެގޮތެއްވެސް ނޭނގެއެވެ. އަޝްހަރު އުޅޭނޫޅޭގޮތް ބަލައިދޭން ސާރާގާތު ބުނެލަދިނުމަށް ފަރީދާ އެދުނެވެ. ސާރާއާ ދެމީހުން ކައިވެނިކުރަން އަޝްހަރު އެއްބަސްވާނެނަމަ ކިހާ ރަނގަޅުހޭ ފަރީދާ ބުނިވަގުތު އަޝްހަރު އައިސް ވަނެވެ. އެއާއެކު ފަރީދާގެ ވާހަކަ ބަދަލުކޮށްލިއެވެ. އަދި ފޯނު ބާއްވާފައި އަޝްހަރާ ވާހަކަ ދައްކަން ފެށްޓިއެވެ.
މަންމަ ޑޮކްޓަރަށް ދައްކަން އެޕޮއިންޓްމަންޓް ހަމަޖައްސާފައި އޮންނާނެކަމަށް އަޝްހަރު ބުންޏެވެ. އަދި ފުރުމުގެ ކުރިން ޑޮކްޓަރަށް ދައްކާލަން އެދުނެވެ. ފަރީދާގެ ބީޕީއާއި ކޮލެސްޓްރޯލް އަބަދުވެސް ހުންނަނީ މަތިގައެވެ. އެކަން ރަނގަޅުވާނީ އަޝްހަރު އޭނާގެ ނަފުސަށް ބަލައިގެން އުޅެން ފެށީމާކަމުގައި ފަރީދާ ބުންޏެވެ. އަދި އަޝްހަރުގެ އެކަނިވެރިކަން އެއީ ފަރީދާ އެންމެ ކަންބޮޑުވާ ކަންތައްކަމުގައިވެސް ބުންޏެވެ. ކިތަންމެ ވަރަކަށް ޑޮކްޓަރަށް ދެއްކިޔަސް ، އަޝްހަރު ހަމަޔަކަށް ނޭޅެނިސް ، ފަރީދާއަށް ހަމަޖެހުމެއް ނުލިބޭނެކަމަށް ފަރީދާ ބުންޏެވެ. އެކަނިވެރި ދިރިއުޅުން ދޫކޮށްލައި ، ދިރިއުޅުމެއް ފަށަން އަޝްހަރުގެ ކިބައިން ފަރީދާ އެދުނެވެ.
ފަރީދާގެ އެވާހަކަތަކަށް އަޝްހަރު އެހާ ހިތްހަމައެއް ނުޖެހުނެވެ. އަދި އޭނާގާތު އެވާހަކަ ނުދެއްކުމަށް މާކުރިންވެސް ބުނެފައި އޮންނާނެކަން ހަނދާން ކޮށްދިނެވެ. އަދި އޭނާ އެއުޅޭގޮތަކަށް އުޅެން ދޫކޮށްލަން އަޝްހަރު އެދުނެވެ. އޭނާގެ ދިރިއުޅުމާމެދު ގޮތްގޮތް ނިންމަން ، މަންމަ އަށް ކޮށްދެވޭނެކަމެއް ނުއޮންނާނެކަމުގައިވެސް އަޝްހަރު ބުންޏެވެ.
އަޝްހަރުގެ އޮފީސްކުރިމައްޗަށް ކުރޮޅިއެއް އައިސް ހުއްޓައިލިއެވެ. އެއިން އެފޭބީ ޚައިރާދެވެ. ފުން މާނޭވާއެއްލުމަށްފަހު ، ޚައިރާދު އިސްއުފުލާލައި ، އޭނާގެ ކުރިމަތީގައިހުރި ޢިމާރާތަށް ބަލައިލިއެވެ.
ހަވީރު އޮފީސްނިންމާފައި އެންމެން ގެޔަށް ދިޔައިރުވެސް އަޝްހަރު މަސައްކަތުގައި އިނެވެ. އަދި އަޝްހަރު ގެޔަށް ނުދާތީ ސާރާވެސް އޮފީހުގައި މަޑުކޮށްލައިގެން އިނެވެ. ސާރާ އިންޓަކަމުން އަޝްހަރާ ގުޅިއެވެ. އަދި ސާރާމެންގެޔަށްގޮސް ރޭގަނޑު ކައިގެން ގެޔަށް ދާން ހިނގާށޭ ބުންޏެވެ. އަޝްހަރުގެ އުޅުމަށް އައި ބަދަލާއެކު ، އޭނާގެ ރަޙުމަތްތެރިކަމަށްވެސް ބަދަލު އައިސްފައިވާކަމުގައި ސާރާ ބުންޏެވެ. އެއީ އޭނާއަށް މައްސަލައެއް ނޫނެވެ. އޭނާގެ ކުރީގެ ރަޙުމަތްތެރިޔާ ، ކުރިން ހުރިގޮތަށް ލިބެންދެން ، އޭނާ މަސައްކަތްކުރާނެކަމަށް ސާރާ ބުންޏެވެ.
ޚައިރާދު އޮފީސްތެރެޔަށް ވަދެ ، ސިޑިންމައްޗަށް އަރަމުންދަނިކޮށް ސާރާވެސް ސިޑިން ފައިބައިގެން ދިޔައެވެ. ދެމީހުންކުރެ އެކަކަށްވެސް އަނެކަކު ނުފެނެއެވެ. ޚައިރާދު ، ރިސެޕްޝަނަށް ގޮސް ، އަޝްހަރު ޙުސައިނާ ބައްދަލުކޮށްލުމަށް އެދުނެވެ. އޭނާގެ ނަމަކީ ކޮބައިތޯ އެހުމުން ، އުއްމު ހަރީންކަމުގައި ޚައިރާދު ބުންޏެވެ.
ޚައިރާދު ވަދެގެންގޮސް ، އަޝްހަރުގެ ކެބިންއަށް ގޮސް އަޝްހަރުގެ ކުރިމަތީގައި ހުއްޓިލިއެވެ. އިރުކޮޅަކު ހުރުމަށްފަހު ، ޚައިރާދު ވާހަކަ ދައްކަން ފެށްޓިއެވެ. އޭނާ އާ ވާހަކަ ދައްކަން އަދި އޭނާގެ މޫނު ދެކިލަންވެސް އަޝްހަރު ނޭދޭނެކަން އެނގޭކަމުގައި ޚައިރާދު ބުންޏެވެ. އަޝްހަރުގެ މޫނުމަތިން ރުޅިވެރިކަން ފާޅުވ ެޖަވާބުދޭން ، ޚައިރާދާ ދިމާއަށް އިނގިލި ދިއްކޮށްލިއެވެ. އަޝްހަރު ވާހަކަ ދައްކަން ފުރުޞަތުނުދީ ، ހަށީގަނޑުގައިވާ ހަކަތަ ބޭކާރު ކޮށްނުލުމަށް ޚައިރާދު ބުންޏެވެ.
ޚައިރާދު އެއައީ ، އަޝްހަރުގާތު މުހިންމު ވާހަކައެއް ބުނުމަށްކަމަށާއި މާގިނަވަގުތެއް ނުނަގާނެކަމުގައި ބުންޏެވެ. ގަޑިޔަށް ބަލާށެވެ ! ދިހަމިނިޓްގެ ތެރޭގައި އޭނާގެ ވާހަކަ ނިންމާފައި އެތަނުން ނުކުމެގެން ދާނެކަމަށް ކައިރާދު ބުންޏެވެ.
ޚައިރާދުގެ އަތުގައި އޮތް ފައިލް ހުޅުވާލާފައި ފޮޓޯއެއްނަގައި އަޝްހަރުގެ ކުރިމަތީގައި ބޭއްވިއެވެ. އަދި ބުންޏެވެ.
" މިއީ އަހަރެންގެ ދަރިފުޅެވެ. ހަރީން ޙުސައިނެވެ. އޭނާގެ ދަރިފުޅުގެ ނަޞީބު ދެރަކަމުން ، އެދަރިފުޅުގެ އުފަން ބައްޕަޔަކީ އަޝްހަރެވެ. އެދަރިފުޅު ދުނިޔެއަށް އައުމުގައި މެދުވެރިޔަކީ އަޝްހަރެވެ. އަހަރެން މިއައީ ، ދަރިފުޅުގެ ޚަރަދު ހޯދަންކަމުގައި ، އޮޅުމަކުންވެސް ހީ ނުކުރައްޗެވެ ! އަހަރެންނަށް އަންނަން މަޖުބޫރުކުރުވީ ، ދަރިފުޅަށް ކުރަންޖެހޭ ޚަރަދެއްނޫނެވެ. އެދަރިފުޅުގެ ޙައްޤެވެ. ދުނިޔަވީގޮތުންވެސް ، ޤާނޫނީ ގޮތުންވެސް ، ދަރިފުޅުގެ ބައްޕަ ، އެދަރިފުޅު ޤަބޫލުކުރުމަކީ ، އެދަރިފުޅުގެ ޙައްޤެކެވެ. އަހަރެންގެ ދަރިފުޅު ވަރަށް ބައްޔެވެ. އެދަރިފުޅުގެ އޯޕަން ހާޓް ސާޖަރީއެއް ކުރަން ޖެހެއެވެ. އަހަރެން އަޝްހަރުގެ ކުރިމައްޗަށް އަންނަން މަޖުބޫރުވީ ހަމައެކަނި އެސަބަބަށްޓަކައެވެ. އަހަރެން ބޭނުމީ އަހަރެންގެ ދަރިފުޅަށް އޭނާގެ ޙައްޤު ލިބުމެވެ. އަދި އެދަރިފުޅުގެ ސާޖަރީ ހަދަން ބޭނުންވާ ފައިސާ އޭނާގެ ބައްޕަގެ އަތުން ލިބުމެވެ. " ޚައިރާދު ހުއްޓުމެއްނެތި ވާހަކަ ދައްކަމުން ގެންދިޔައެވެ.
" ޚައިރާދު ތި ދައްކާ ކޫސަނި ، ބޭކާރު ވާހަކަ އަޑުއަހާކަށް އަހަރެންގެ ވަގުތެއް ނެތެވެ. ރީތި ގޮތުގައި ދާން ބޭނުންނަމަ ހަމަ މިހާރު މިތަނުން ނުކުމެގެން ދާށެވެ ! އެހެންނޫނީ މީހުންނަށް ގޮވައިގެން ގެނެސް މިތަނުން ނެރެލެވިދާނެއެވެ. " އަޝްހަރު ބުންޏެވެ.
" އަޝްހަރުގެ ގެ ދޫކޮށްލާފައި އަހަރެން ދިޔައިރު އަހަރެންގެ ބަނޑުބޮޑެވެ. އޭރު ބަނޑަށް ހަތަރުމަހެވެ. އަހަރެންގެ ވާހަކައިގެ ތެދުކަން ސާބިތުކުރަން ބޭނުންނަމަ ، އަޝްހަރުގެ މަންމައާއެކު އަހަރެންގޮސް ދެއްކި ޑޮކްޓަރު ކުރެން އެހިދާނެއެވެ. " ޚައިރާދު ބުންޏެވެ.
ޚައިރާދުގެ އެއްވެސް ވާހަކައެއް އަޑުއަހާކަށް އަޝްހަރު ބޭނުމެއް ނޫނެވެ. އެތަނުން ނުކުމެގެން ދާށޭ ބުނިއަޑެއް ނީވޭހޭ ، ހަމަ މިހާރު މިތަނުން ނުކުމެގެންދާށޭ ބުނެ ، ޚައިރާދާ ދިމާއަށް އަޝްހަރު އަޑުގެ ނެތްތަނަށް ހަޅޭއްލަވައިގަތެވެ.
ޚައިރާދު ހަމަހިމޭންކަންމަތީ ހުށްޓެވެ. އަޝްހަރުގެ ހަޅޭއްލަވައިގަތުމަކުން އޭނާއަކަށް އެއްވެސް އަސަރެއް ނުކުރެއެވެ. ޚައިރާދު އެތަނަށް އައީ އެހުރިހާކަމަކަށް ، އޭނާގެ ސިކުނޑި ތައްޔާރު ކުރުމަށްފަހުގައެވެ. ކަންތައްތައް ވަމުން އެދަނީވެސް ޚައިރާދު ހީކުރިގޮތަށެވެ. އަނެއްކާވެސް ފައިލުން ކަރުދާސްގަނޑެއް ނަގައި އަޝްހަރުގެ ކުރިމަތީ ބޭއްވިއެވެ. އަދި ބުންޏެވެ.
" މިއީ އަހަރެންގެ ދަރިފުޅުގެ އުފަންދުވަހުގެ ސެޓްފިކެޓެވެ. އަހަރެން ވިހެއީ ، އަޝްހަރުގެ ގެއިން އަހަރެން ދިޔަތާ ހަތަރުމަހުގައެވެ. އަހަރެން ވިހެއީ ދުވަސް ނުފުރައެވެ. އެކަމާމެދު އަޝްހަރަށް ޝައްކުވާނަމަ ، ޤާނޫނީ ފިޔަވަޅު އެޅިޔަސް އަހަރެންގެ މައްސަލައެއް ނެތެވެ. ސާބިތުކޮށްދޭން ޖެހޭކަންކަން އަހަރެން ސާބިތު ކޮށްދޭނަމެވެ. "
ޚައިރާދު ، އޭނާގެނައި ފައިލް ތެރެއިން ، އިތުރު ކަރުދާސްގަނޑެއް ނަގައި އަނެއްކާވެސް އަޝްހަރުގެ ކުރިމަތީ ބޭއްވިއެވެ. އަދި އެއީ ، އޭނާގެ ދަރިފުޅުގެ ބްލަޑް ގްރޫޕް ރިޕޯޓްކަމުގައި ބުންޏެވެ. އެދަރިފުޅުގެވެސް ބްލަޑް ގްރޫޕަކީ އޯ ޕޮޒިޓިވްކަމުގައި ބުންޏެވެ. ފަހަރެއްގައި ، ޚައިރާދުގެ ބްލަޑް ގްރޫޕަކީ އޯ ޕޮޒިޓިވް ނޫންކަން އަޝްހަރު ހަނދާން ނުހުރެދާނެކަމުގައި ބުންޏެވެ.
(ނުނިމޭ)
varahves reethi
މި އަޝްހަރަކީ ހާދަގޮތެއްނެތް ފިރިހެނުންގެ ނަން
ހުތުރު ކުރަން ފިރިހެނުންގެ ސަފަށްވަދެވިފާހުރި
ރަޑުމީހެއް، މައްމަގެގޮތް މީނާގެ ވެސް މިހުރީ ކެޔޮ
ގަހަކުން އަލަނިރެއް ނުފަޅާނެ! ެ