(16 އޭޕްރީލް 2023 ގައި ޝާއިއުކުރި ބަޔާ ގުޅޭ)
އަޝްހަރުގެ މޫނުމަތިން ފާޅުވެހުރި ނުތަނަވަސްކަން ސާރާއަށްވެސް ފާހަގަވެއްޖެކަން އަންގައިލުމަށް ސާރާ ބޭނުންވިއެވެ. އަދި މަސައްކަތަށް އެހާބޮޑަށް އަދި ފޯކަސް ނުކޮށް އަޝްހަރު އަރާމުކޮށްލަންޖެހޭކަމުގައި ސާރާ ބުންޏެވެ. އަޝްހަރަށް ދިމާވި ހިތްދަތިކަމުގައި އޭނާ ބައިވެރިކުރަން ބޭނުންނުވަނީތޯ ސުއާލުކުރިއެވެ. އޭނާއަކީ އަޝްހަރުގެ ރަޙުމަތްތެރިޔެއްކަމަށާއި ހިތުގައިވާ އުދާސްތައް ޙިއްޞާ ނުކުރަނީ ކީއްވެތޯ ސާރާ ސުއާޅު ކުރިއެވެ. ސާރާގެ ވާހަކަތަކަށް އަޝްހަރު ވަކިޖަވާބެއް ނުދެއެވެ.
ޚައިރާދު ދެކެ އަޝްހަރު އިންތިހާއަށް ލޯބިވާކަން އެނގޭކަމުގައި ސާރާ ބުންޏެވެ. އެހެނަސް ، ސާރާ ދައްކަމުން ގެންދިޔަ ވާހަކަތައް އަޝްހަރު އެހިސާބުން ، ހުއްޓުވިއެވެ. އަދި ހިތްހަމަ ނުޖެހުމާއެކު ސާރާއާ ދިމާއަށް ބުންޏެވެ.
" އެއީ އަހަރެންގެ އަމިއްލަ ޙަޔާތާ ބެހޭ ކަމެކެވެ. އެކަމުގެ ތެރެޔަށް ސާރާވެސް އަދި އިތުރު އެހެން މީހަކު ވައްދާކަށްވެސް އަހަރެން ބޭނުމެއް ނެތެވެ. އަހަރެން އެކަމަކާ ބެހޭގޮތުން ވާހަކަދައްކަން ބޭނުންނުވާކަމެއްގެ ވާހަކަ އަހަރެން ލައްވާ ސާރާވެސް ނުދައްކާށެވެ. ނުކުމެގެން ދަމުން ދޮރުލައްޕާލާށެވެ ! އަދި ސާރާ އެކަނިގޮސް މެންދުރު ކާލާށެވެ ! އަހަރެންނަށް އިންތިޒާރު ކުރާނެކަމެއް ނެތެވެ. " އަޝްހަރު ރުޅިވެރިކަމާއެކު ސާރާއާ ދިމާއަށް ބުންޏެވެ.
ސާރާ ޙައިރާންވެގެން އިރުކޮޅަކު އިނދެފައި އަޝްހަރުގެ ކޮޓަރިން ނުކުމެގެން ދިޔައެވެ.
އުޑުގައި ފޮރެޅެމުން ވަޔާ ސަމާސަ ކުރަމުންގެންދާ ވިލާތަކަށް ބަލަހައްޓައިގެން ކުޑަދޮރުކައިރީ ޚައިރާދު ހުއްޓެވެ. އޭނާގެ މޫނުމަތީގައިވަނީ މޮޅިޔާއި ހިތާމައެވެ. ކުރާނީ ކީއްކަމެއް ނުވިސްނެއެވެ. އަޝްހަރާ ވާހަކަ ދައްކައިލެވޭނެ އެއްވެސް މަގެއް އޭނާއަކަށް ނުފެނުނެވެ. އިރުކޮޅަކު ކުޑަދޮރުން ބޭރު ބަލަހައްޓައިގެން ހުރުމަށްފަހު ، ވަރުބަލިވެގެން އައިސް އެނދުގައި ޖައްސައިލިއެވެ. ޚާލާވެސް އިރުކޮޅަކުން އައިސް ޚައިރާދުގާތު ޖައްސައިލިއެވެ. އަދި ﷲ އަށް ވަކީލު ކުރުމަށާއި ، އެއްވެސް އިންސާނަކަށް އެކަލާނގެ ދެރަގޮތެއް އިރާދަ ނުކުރައްވާނެކަމަށް ބުނެ ، ޚައިރާދަށް ނަޞޭޙަތް ދިނެވެ.
ޚާލާގެ ގެޔަށް ޚައިރާދު އަންނާނީ ބުނެކިޔައިގެން ކަމަށް މަންމަގާތުވެސް ބުނާވާހަކަ ޚާލާދައްތަޔަށް ޚައިރާދު ހަނދާންކޮށްދިނެވެ. އަދި މިއަދުގެ ޙާލަތަށް ވިސްނައިލުމަށް އެދުނެވެ. މިއަދު ، ޚައިރާދު އެއިނީ ، ޚާލާދައްތަ ނުވެސް ބުނަނިސް ، އިތުރު ބުރަޔަކާއެކު އެގެޔަށް އައިހެވެ. ދަޢުވަތެއްވެސް ނުލިބި އޮއްވައި ކުއްލިޔަކަށެވެ.
އެގޮތަށް ނުވިސްނުމަށް ޚާއިރާދުގެ ކިބައިން ޚާލާ އެދުނެވެ. އަދި ދަރިންނަކީ ، މައިންނަށް އުނދަގުލަކަށް ނުވާނެކަމަށް ޚާލާ ބުންޏެވެ. އަދި އޭނާ އަބަދުވެސް ، ޚައިރާދު ދެކެނީ އަމިއްލަ ދަރިއެއްގެ ގޮތުގައިކަމުގައި ޚާލާ ބުންޏެވެ.
އަޝްހަރާ ވާޙަކަ ދައްކައިލެވޭތޯ އޭނާ ނުގުޅާ އެންމެ ނަންބަރެއްވެސް ނެތެވެ. ނުގުޅާ އެކަކުވެސް ނެތެވެ. އެއްވެސް މީހަކު ފޯނެއް ނުނަގައެވެ. ހަމައެކަނި ފޯނު ނަގަނީ އަޝްހަރުގެ އޮފީހުންނެވެ. ފޯނުނަގާ މީހާބުނަނީ ، އަޝްހަރު އޮފީހުގައި ނޫޅޭ ކަމަށެވެ. އެއީވެސް ، ޚައިރާދު ގުޅީމަ ދޭން ، އަޝްހަރު ބުނެފައި އޮތް ޖަވާބަކަށް ވެދާނެއެވެ. އޭނާދެކެ ލޯބިވާކަމަށް ހަދައިގެން އަޝްހަރު އޭނާގެ މައްޗަށް ލަނބުވައިލާފައި ، އޭނާއަށް އެހާ އިގާނެތިކޮށް ހިތަނީ ކީއްވެގެން ބާވައެވެ. އަޝްހަރަކީވެސް ، އޭނާގެ މަންމަފަދައިން ހިތްނުބައި ، ޚަޞީލަތްގޯސް މީހަކީ ބާވައެވެ.
އަޝްހަރާމެދު ހިތްގޯސް ނުކުރުމަށް ޚާލާ އެދުނެވެ. އެވަރުގެ ނުބައި ނުލަފާ އަންހެނަކު ، ޚައިރާދު ހައްލާލައި ، ހިލަމެއްވެސް ނުވާގޮތަށް ލޯބިވާކަމަށް ހަދައިގެން މަކަރުވެރި ރޭވުންތަކުގައި ޚައިރާދު ޖެއްސިއިރު ، އޭނާގެ އަމިއްލަ ދަރިފުޅުގެ ހިތާކުޅެލައި ހައްލާލާކަށް އުނދަގުލެއް ނުވާނެކަމުގައި ޚާލާ ބުންޏެވެ. ފަރީދާގެ މަކަރާއި ޙީލަތުން ، އަޝްހަރު އޭނާގެ މުށުތެރެޔަށް ލައިގެން އަޝްހަރުގެ ފިކުރާއި ވިސްނުމާ ކުޅެމުން ހިނގައިދާނެކަމަށް އަޝްހަރަކަށް ޤަބޫލެއް ނުކުރެވޭނެއެވެ. އެއަންހެނާ އެ ބަރުބާދު ކޮށްލަނީ ހަމައެކަނި ، އޭނާގެ ދަރިފުޅުގެ ދިރިއުޅުން އެކަންޏެއްނޫނެވެ. އޭނާގެ މާމަ ދަރިފުޅުގެ ދިރިއުޅުންވެސް މެއެވެ. އެފަދަ މީހުންނަށް ރަނގަޅުގޮތެއް ނުވާނެއެވެ. މިއަދަކީ އެމީހުންގެ ދުވަހަށް ވެދާނެއެވެ. އެފަދަމީހުން ، މާދަމާއާ ކުރިމަތިލާނީ ކޮންފަދަ މުޞީބާތަކާއެކުގައިކަން އެނގޭނީ ކާކަށް ހެއްޔެވެ ؟
އަޝްހަރު ރުޅިއައިސްހުރީ ޚައިރާދު ދެކެއެވެ. އަޝްހަރާ ވާހަކަދައްކައިލުމަށް ޚާލާ ނިންމިއެވެ. ޚާލާ ވާހަކަ ދައްކައިލީމަ ، ހުރިހާކަމެއްވެސް ، އިރާދަކުރެއްވިއްޔާ ރަނގަޅުވެދާނެކަމަށް ޚާލާ ބުންޏެވެ. އަދި ކެތްތެރިވެ ﷲ އަށް ވަކީލު ކުރުމަށް ބުންޏެވެ.
ޚާލާ ވަރަށް އުއްމީދާއެކު ، އަޝްހަރަށް ފޯނުކުރިއެވެ. އަޝްހަރު ފޯނުނެގުމާއެކު ކާކުތޯ އަހައި ސުއާލުކުރިއެވެ. ޚާލާ އޭނާއާ މައިމުނާއާ އޮތްގުޅުން ކިޔައިދީ ، ޚައިރާދުގެ ކުށެއްނެތްކަމާއި އެއީ މަޢުޞޫމް ކުއްޖެއްކަމުގައި ޚާލާ ބުންޏެވެ.
ޚައިރާދުގެ ނަން އިވުމާއެކު ، އެނަންކިޔާ މީހަކު އޭނާ ނުދަންނަ ކަމަށާއި މީގެފަހުން ، އެނަމުގެ ވެރިޔަކާބެހޭ އެއްވެސްކަމެއްގައި އޭނާއަށް ފޯނު ނުކުރުމަށް ބުނެ އަޝްހަރު ފޯނު ކަނޑައިލިއެވެ. އަޝްހަރުގެ ޖަވާބުންނާއި އަޝްހަރު ޢަމަލުކުރިގޮތުން ޚާލާއަށް ވަރަށް އަސަރު ކުރިއެވެ. އަދި ޙާލަތުގެ ނާޒުކުކަން ޚާލާ ދެނެގަތެވެ. ފަރީދާ އެވަނީ ފަސޭހައިން ނުފިލާނެފަދަ ވިހައެއް މުޅިގޭތެރެޔަށް ދޫކޮށްލާފައެވެ. އަޝްހަރުގެ ހިތަށްވެސް ، އިންސާނެއްގެ ހިތަށް ވަނުން ހުއްދަނޫންވަރަށް ވިހަލާފައެވެ. ޚާލާވެސް ހަދާނެގޮތް ބޮޑުވިއެވެ. ދެއަތުން ބޮލުގައި ހިފައި ފިތައިގަނެވުނެވެ.
އަޝްހަރު އިނީ މަސައްކަތެއްގެ ތެރެޔަށް ގެއްލިފައެވެ. ސާރާ ހެވިދިލިފައި އައިސް ، މެންދުރުފަހުން ފިލްމެއް ބަލައިލަން ދަމާހިނގާށޭ ބުނުމުން އަޝްހަރުގާތަށް އަނެއްކާވެސް ރުޅިއައެވެ. އެކަމަކުވެސް ސާރާ ދުލެއް ނުކުރިއެވެ. ފިލްމުބަލާ މޫޑު އަޝްހަރުގެ ނުހުންނާނެކަން އޭނާއަށް އެނގޭ ކަމަށާއި ، އޭނާ އެހުރީ ފިލްމެއްބަލައިލަން ބޭނުންވެފައިކަމަށް ބުންޏެވެ. އަދި ، ރަޙުމަތްތެރިކަމުގެ ޙައްޤުގައި އަޝްހަރު އޭނާއާއެކީ ދާން ޖެހޭނެކަމަށް ބުންޏެވެ.
އަޝްހަރު އިތުރަށް ހިތްހަމަ ނުޖެހުނެވެ. އަދި ސާރާ މިހާރު އޭނާއަށް އެކުރަނީ އުނދަގޫ ކަމަށް ބުންޏެވެ. އަދި ކޮންމެހެން ފިލްމެއް ބަލާހިތުން ނުހުރެވެންޏާ ކޮންމެވެސް ރައްޓެއްސަކު ގޮވައިގެން ދާށޭ ބުނެ ސާރާ ފޮނުވައިލިއެވެ.
ޚައިރާދު އެރޭ ނިދަން އުޅެއުޅެ ނުނިދިގެން ފުރޮޅި ފުރޮޅި އޮތެވެ. އޭނާގެ ލޮލުން ކަރުނަ ނުފިލައެވެ. މިއަދު ، އަޝްހަރާ ވާހަކަ ދައްކާލާނެކަމަށް ޚާލާ އޮތީ ބުނެފައެވެ. އެކަމަކު ވާހަކަ ދެއްކިކަމެއް ނޭނގެއެވެ. ޚާލާދައްތަ ހަނދާން ނެތުނީކަމަށްވެސް ވެދާނެއެވެ. ޚައިރާދު ނިދަން އޮތީ ޚާލާއާ އެއް އެނދެއްގައެވެ. ޚައިރާދު ފުރޮޅި ފުރޮޅި އޮއްވައި ޚާލާއަށް ހޭލެވުނެވެ. އަދި ، ޚައިރާދު އަދިވެސް ނުނިދަނީތޯ ސުއާލުކުރިއެވެ. އަދި ނުނިދެޔޭ ބުނެ އަޝްހަރާ ވާހަކަ ދެއްކުނުތޯ ޚައިރާދު އަހައިލިއެވެ.
ޚާލާއަށް މިއަދު ވަގުތު ނުވެގެން ފޯނުނުކުރެވޭކަމަށާއި މާދަމާ ގުޅާނެކަމަށް ބުނެ ޚާލާ ދޮގެއް ހެދިއެވެ. އަޝްހަރަށް ގުޅިމަ ކަންހިނގިގޮތް އެރޭ އެދަންވަރު ޚައިރާދުގާތު ބުނެފިނަމަ ، ޚައިރާދު އެންމެ ލޮލުފިޔައެއްވެސް ނުޖަހާންކަން ޚާލާއަށް އެނެގެއެވެ.
ޚައިރާދަށް އިޙްސާސް ކުރެވުނުގޮތުގައި ޚާލާ އެދުވަހު އަޝްހަރާ ގުޅިއެވެ. އަޝްހަރު ޚާލާދައްތައާވެސް ވާހަކަ ނުދެއްކީދޯއޭ ޚައިރާދު ބުންޏެވެ. އޭނާއަށް ރަޙުމުކުރުމަށް އެދި ، ޚާލާދައްތަ ދެއްކި އެއްވެސް ވާހަކައެއް ، އަޝްހަރު އަޑުނޭހީދޯއޭ އެއްސެވެ. އެހެން ނޫންކަމަށް ޚާލާ ބުންޏެވެ. އަޝްހަރު މިވަގުތު އެހުރީ ރުޅިވެރިކަމެއްގެ ތެރޭގައެވެ. އަޝްހަރަށް ވަގުތުކޮޅެއް ދޭށެވެ. އޭރަށް އަޝްހަރަށްވެސް ހެޔޮގޮތް ވިސްނޭނެއެވެ. އަދި ރަނގަޅާއި ނުބައިވެސް ވަކި ކުރެވޭނެއެވެ. ﷲ ވޮޑިގެންވަނީ ކެތްތެރިންނާއެކުގައެވެ. ޚައިރާދު ކެތްތެރިވެ ، ﷲ އަށް ވަކީލުކޮށް ، އަޝްހަރަށް ކުޑަ ވަގުތުކޮޅެއް ދޭށެވެ ! އެހާބޮޑެތި ކަންކަން އެހާ ފަސޭހައިން ، އަވަހަކަށް ނުނިމޭނެއެވެ. ޚާލާ ބުންޏެވެ.
" ޚައިރާދުގެ ހިތުގައި ތިއޮތް ނުބައި ވަހުމުތައް އެއްފަރާތްކޮށް ، ހަމަޖެހިލައި ، ނިދާލެވޭތޯ ބަލާށެވެ. މިވަގުތު ، ޚައިރާދު އެހާބޮޑަށް ފިކުރުބޮޑުވެ ހާސްކަންމަތީ އުޅުމަކީ އެއްގޮތަކަށްވެސް ކޮށްގެންވާނެ ކަމެއްނޫނެވެ. ބަނޑުގައި އޮތް ދަރިފުޅަށްވެސް އެކަމުގެ ނޭދެވޭ އަސަރު ކުރާނެއެވެ. ނިދި ނާންނަންޏާ އާޔަތުލްކުރުސި ކިޔަވާލައި ﷲ ގެ މަތިން ހަނދާން ކޮށްލާށެވެ ! އޭރަށް ނިދައި ލެވިދާނެއެވެ. " ޚާލާ ، ޚައިރާދަށް ނަޞޭޙަތްދިނެވެ.
ޚައިރާދު ނިދޭތޯ ލޯމަރައިލިއެވެ. ލޯމަރައިލުމާއެކު ، ޚައިރާދަށް ފެނުނީ އޭނާގެ ބައްޕައެވެ. ސްކޫލްގެ ހޯމްވޯކް ނުހަދާ ، ހޯމްވޯކް ހަދައިފީމޭ ބުނެ ޚައިރާދު ދޮގު ހެދުމުން ބައްޕަދިން ނަޞޭޙަތެވެ.
" ދަރިފުޅުގެ ހޯމްވޯކް ނުނިމި އޮތްވާހަކަ ، މިސްގާތު ތެދަށް ނުބުނީ ކީއްވެ ހެއްޔޭ ބައްޕަ އަހައެވެ. ޚައިރާދު ބުނީ މިސް އެއްޗެތިކިޔާނެތީ ނުބުނީ ކަމުގައެވެ. މިސް އެއްޗެތިކިޔަސް ތެދު ހެދީމަ ، ފަހުން ލޯބިވާނެކަމަށާއި ، ޚައިރާދަކީ ކިހާލޯބި ކުއްޖެއްހޭ އަބަދުވެސް ތެދު ހަދާ ކުއްޖެކޭ ބުނާނެކަމަށް ބައްޕަ ބުންޏެވެ. ދޮގެއް ހެދުމަކީ އެދޮގުހަދާއިރު ވަރަށް ފަސޭހަ ކަމެކެވެ. އެކަމަކު ފަހުން އެއީ މުޞީބާތަކަށް ވާނެއެވެ. އެ ހެދުނު ދޮގު ފޫބައްދަން އިތުރު ދޮގުތައް ހަދަން މަޖުބޫރުވާނެއެވެ. އަދި ބުނަން ހެއްޔެވެ ؟ ތެދަކީ އެތެދެއްހަދާއިރު ހިތަށް އުނދަގޫވާނެ އެއްޗެކެވެ. އެކަމަކު ފަހުން ހިތަށް އަރާމުވާނެއެވެ. ބައްޕަ އެކިޔައިދެނީ ވަރަށް އުނދަގޫކަމެއްކުރަން ކަމުގައި ޚައިރާދު ބުނެއެވެ. އެވަގުތު އޭނާގެ ބައްޕަ އޭނާނަގައި އުނގުމަތީ ބައިންދާފައި ބުންޏެވެ. އަހަރެންގެ ލޯބިވާ ދަރިފުޅާއެވެ ! ކޮންމެ ޙާލެއްގައިވެސް ކޮންމެ ވަގުތެއްގައިވެސް ، ކިތަންމެ އުނދަގޫވިޔަސް ، އަބަދުވެސް ދޮގުނުހަދާ ތެދު ހަދާށެވެ ! އެހެނީ ތެދު އެއީ އެންމެފަހުން ކުރިހޯދާނެ އެއްޗެކެވެ. ތެދެއްހަދައިގެން ، އެތެދުގެ ޛަޤީޤަތް ކޮންމެވެސް ދުވަހަކުން ކާމިޔާބު ހޯދާނެއެވެ. "
ބައްޕާއެވެ ! ބައްޕަ ކޮބައިހެއްޔެވެ ؟ އައިސް ނިކަން ބަލައިލަ ބަލާށެވެ ! ބައްޕަގެ ދަރިފުޅަކީ ތެދުވެރިޔެކެވެ. އެކަމަކު ނާކާމިޔާބުވަނީއެވެ. އަހަރެންގެ ތެދުގެ އަޑު އެއްވެސް މީހަކު ނޭހިއެވެ. ޙީލަތާއި މަކަރުން ދޮގުހެދި މީހުން އެހޯދަނީ ކާމިޔާބެވެ. ބައްޕަ ބުނި ހުރިހާ ވާހަކައެއް އަހަރެން އެހީމެވެ. ތެދު ހެދުމަށްޓަކައި އަހަރެން ވަރަށް މަސައްކަތް ކުރީމެވެ. އެކަމަކު ، އަހަރެންގެ ތެދާއި ތެދުވެރިކަން މިއަދު މިވަނީ ކުނިވަށިގަނޑަށް ލެވިފައެވެ. ތެދު ހަދަމުން ހަދަމުންގޮސް އޭގެ އަގެއްނެތި ، އަހަރެން މިއޮއް ގެއްލިދަނީއެވެ. ދޮގު އެއީ ބަލިކަށި އެއްޗަކަށްވެ އޮވެ ، އެގެންދަނީ ، ކާމިޔާބު ހޯދަމުންނެވެ. ދޮގާއި ތެދުގެ ހަނގުރާމައިގާ ދޮގު ފަތަޙަ ހޯދަނީއެވެ. ބައްޕާއެވެ ! ދޮގު ބަލިވަނީއެވެ. އަހަރެން ހަދާނީ ކިހިނެއް ހެއްޔެވެ ؟
އަޝަހަރު އޮފީހުގައި މަސައްކަތް ކުރަމުން ، ވަރުބަލިފިލުވަމުން ، ހިތުގައިހުރި ސުއާލުތަކަށް ހިތާ ސުއާލުކުރަމުން މޭޒުދޮށުގައި އެކަނި އިނެވެ. އޭރު ރޭގަނޑު ވަރަށް ލަސްވެއްޖެއެވެ. ކުއްލިޔަކަށް އޭނާއަށް ފޯނެއް އައެވެ. އެއީ ފަރީދާގެ ފޯނެކެވެ. އަޝްހަރު ގެއިން ނުކުންނަމުންވެސް ، އެރޭ ލަސްވާނެކަމަށް މަންމަގާތު ބުންޏެވެ. މަސައްކަތް ކުޑައަޑި ކޮށްލާފައި ގެޔަށްދާނެކަމަށް ބުނެ ފޯނު ބޭއްވިއެވެ.
އަޝްހަރު އަޙްމަދުއާބާދަށް އައިސްހުރިކަން އެނގުމުން ، އޭނާގެ ރަޙުމަތްތެރި އަފުސީން އޭނާއާ ބައްދަލުކޮށްލުމަށްޓަކައި ހެނދު ހެނދުނާ ޒިޔާރަތް ކުރިއެވެ.
އޭނާގެ ބަނޑުގައި އޮތީ އަޝްހަރުގެ ދަރިއެއްކަން ދުވަހަކުވެސް އޭނާއަށް ސާބިތުކޮށް ނުދެވޭނެކަމުގައި ބުނެ ، އަޝްހަރުގެ މަންމަ އޭނާއަށް ގޮންޖަހާފައިވާކަމުގައި ޚައިރާދު ބުންޏެވެ. އެވާހަކަ އަޑުއިވިފައި އަފްސީނަށް ، ހުރެވުނުތަންވެސް ނޭނގުނެވެ. ދެލޯ ބޮޑުވިއެވެ.
އޭނާގެ މައްޗަށް އެޅުވިފައިވާ އިލްޒާމަކީ ، ފަރީދާ ރާވައިގެން ކޮށްފައިވާކަމެއްކަމުގައި ބުނެ ، ކުރުގޮތަކަށް އެކަން ހިނގައިދިޔަގޮތް އަފްސީނަށް ކިޔައިދިނެވެ. އެކަމަކު ، އަޝްހަރު އެއީ އޭނާދެކެ ލޯބިވި މީހަކަށްވީއިރު ، އެންމެ ފަހަރަކުވެސް ، އޭނާގެ ދުލުން ތެދަކީ ކޮބައިތޯ އަހައިލަން އޭނާއާ ވާހަކަވެސް ދައްކައިލަން ބޭނުންނުވާކަމަށް ޚައިރާދު ބުންޏެވެ. އެންމެ ދެރަވެގެން ، އޭނާގެ ވާހަކަ އަޝްހަރު އަހައިލަން އެންމެ ރަނަގަޅުތާއެވެ. އެކަމަކު އަޝްހަރަކަށް އެވަރުވެސް ކޮށްލާކަށް ނުކެރުނެވެ.
ޚައިރާދުގެ އަޑު އަޝްހަރު އަހަންޖެހޭނެކަމަށް އަފްސީން ބުންޏެވެ. ކިތަންމެ ޗާލާކީ އަންހެނަކަސް ، ފަރީދާގެ ދޮގުގެ މައްޗަށް ޚައިރާދުގެ ތެދު ، އިސްވާނެ ދުވަހެއް އަންނާނެކަމަށް އަފްސީން ބުންޏެވެ. އަދި ، ﷲ ގެ ޙަޟުރަތުން އުއްމީދު ނަގައި ނުލުމަށާއި ކެތްތެރިކަން އިސްކުރުމަށް އަފްސީންވެސް ޚައިރާދަށް ނަޞޭޙަތްތެރި ވިއެވެ.
(ނުނިމޭ)
khairaadhah insaafu libeyne dhoguge mahchah thedhu kurihodhaane
dhen vrh foohi...abadhu ehvaahaka thakeh
ރުފިޔާ ފައިސާ އާއި ދޮގާއި، މަކަރާއި، ނުބައިރޭވުމާ
މިއީ ބާރަށް ވަޔަށް ވާދަގޮވާލާފާ ދާ ދޫނީގެ ކުރީގާ
ހުރެގެން ދަތުރުކުރާ އެއްޗަކީބާ!
ޚައިރާދަށް އިންޞާފު މިދުނިޔެއިން ލިބޭނެބާ!
އިންޑިޔާ، އާއި ޕާކިސްތާނުގެ ޘަޤާފަތް މިއީ އެއީ
މުއްސަދި މަހުޖަނުންގެ އެއްޗަކީބާ!