ރެއާލް މެޑްރިޑުން ނޭމާ ގަތުމަށް އެކްލަބާއި ބްރެޒިލްގެ ކުރީގެ ތަރި ރޮނާލްޑޯ ނަޒާރިއޯ އެދިއްޖެއެވެ.
ރެއާލް މެޑްރިޑާއެކު ހަތަރު ސީޒަން ހޭދަކޮށް އެކްލަބާއެކު ގިނަ ކާމިޔާބީތަކެއް ހޯދާފައިވާ ރޮނާލްޑޯ ބުނީ ކުރިއަށް އޮތް ދެތިން އަހަރު ތެރޭގައި ދުނިޔޭގެ ފުޓްބޯޅައިގެ އެންމެ ވަރުގަދަ އެއްނަމަކަށް ވާނީ ނޭމާ ކަމަށާއި ރެއާލް މެޑްރިޑަށް ބޭނުން ވަނީ އެފަދަ ކުޅުންތެރިއެއް ކަމަށެވެ.
"ރެއާލް މެޑްރިޑަށް ބޭނުން ވަނީ އެންމެ މޮޅެތި ކުޅުންތެރިން. ކުރިއަށްއޮތް ދެތިން އަހަރު ތެރޭގައި އެންމެ މޮޅު ކުޅުންތެރިޔަކަށް ވެގެންދާނީ ނޭމާ. އަހަރެން އެދެނީ ރެއާލްއިން ނޭމާ ގަތުމަށް" ރޮނާލްޑޯ ބުންޏެވެ.
ނޭމާ ގަތުމަށް ރެއާލްގެ ކިބައިން ރޮނާލްޑޯ އެދިފައިވާއިރު ފާއިތުވެދިޔަ ތިން ސީޒަނުގައި ނޭމާ ކުޅުނީ ރެއާލްއާ އެންމެ ވާދަވެރި ބާސެލޯނާއަށެވެ. ބާސާ ދޫކޮށް ޕީއެސްޖީއަށް މިސީޒަނުގައި ނޭމާ ބަދަލުވީ ދުނިޔޭގެ ރެކޯޑް އަގެއް ކަމަށްވާ ދުއިސައްތަ މިލިޔަން ޔޫރޯއަށެވެ.
"ޕީއެސްޖީން ރެއާލްއަށް ނޭމާ ގެންދިޔުން ވާނީ ވަރަށް ބުރަ މަސައްކަތަކަށް. އެކަމަކު އެއީ ރެއާލްއަށް ނުކުރެވޭނެ ވަރުގެ ކަމެއް ނޫން" ބްރެޒިލްއަށް 2002 ގެ ވޯލްޑް ކަޕް ކާމިޔާބު ކޮށްދިނުމުގައި މުހިއްމު ދައުރެއް އަދާކުރި ރޮނާލްޑޯ ބުންޏެވެ.
