ކިރުއިލޮށި - 27

(4 އޭޕްރީލް 2023 ގައި ޝާއިއުކުރި ބަޔާ ގުޅޭ)

ޚައިރާދުގެ ހިތަކީ ވަރަށް ސާފު ހިތެކެވެ. އެއްވެސްމީހެއްގެ މައްޗަށް ޚައިރާދުގެހިތް ނުބައެއް ނުވާނެއެވެ. މީހަކަށް ދެރައެއް ނޭދޭނެއެވެ. އެހެންމީހުންނަށް އަޅައިލުމަށްޓަކައި ، އެހިތް އެއްބަސްނުވާނެ ކަމެއް ނުއޮންނާނެއެވެ. އޭނާ މަރައިލުމަށްޓަކައި ، މީހަކު އައިސް ކުރިމައްޗަށް ހުއްޓޭހިނދު ، ކަރުތިރިކޮށްލައި ، އެކަމަށްވެސް އެމީހަކަށް ކިޔަމަންތެރިވާފަދަ ނިޔަނެތި ކުއްޖެކެވެ. ޚައިރާދަށް ، އެއްވެސްމީހަކު ، ދެރަގޮތެއް ހަދާނެކަމަކަށް ، ޚައިރާދަކަށް ނުވިސްނޭނެއެވެ. އޭނާއާމެދު ގޯސްގޮތަކަށް އެއްވެސްމީހަކު ނުވިސްނާނެއެވެ.

ޚައިރާދުގެ ބޮޑުބޭބެ ، ބަޝީރަތުގެ މަރުމަތީގައި ، އަޝްހަރަށް ހަނދާންކޮށްދިން ކަމަކީ އެއީއެވެ. ޚައިރާދަކީ ތޫނުފިލި ކުއްޖެއްނަމަވެސް ، އެކުއްޖާފުޅަށް ދުނިޔެ އަދި ނުފެންނަ ވާހަކައެވެ. މީހުންގެ ތެރެޔަށް ނުކުމެ ނުއުޅުމުގެ ސަބަބުން ، މީހުންދަސްކުރަން ނޭނގޭނެ ވާހަކައެވެ. މަންމަޔާ ދެމައިން އެކު އުޅުނު ކުޑަކުޑަ ދުނިޔޭގައި ، ދިރިއުޅުމުގެ އެއްވެސް ތަޖުރިބާއެއް ޚައިރާދަށް ލިބިފައިނުވާނެ ވާހަކައެވެ. ހައްދާލައިގެން ، ހައްލާލައިގެން ޚައިރާދު ލައްވައި ، ކަމެއްކުރުވާއިރުވެސް ޚައިރާދަށް އަދި އެވަނީ ކީއްކަން ނޭނގޭނެ ވާހަކައެވެ. އެކަންކަން އޮޅުންފިލުވައިދީ ، ޚައިރާދުގެ ސިކުނޑި ހުޅުވައިދީ ، އިންސާނުންގެ ކެހިވެރި ދުނިޔެ ، ޚައިރާދަށް ދަސްކޮށްދިނުމުގެ މަސްއޫލިއްޔަތު ، ބަޝީރަތުގެ މަރުމަތީގައި ޙަވާލުކުރީ އަޝްހަރާއެވެ.

ތޫނުފިލިކަމުން ، ކިޔަވަންމޮޅުވެދާނެއެވެ. އެހެނަސް ، ތަޖުރިބާއިން ދަސްކޮށް ވަކިކުރަންޖެހޭ ، އިންސާނުންގެ އުޅުމާއި ގުޅުމުގެ ޢަމަލުތައް އެއީ ، ހަމައެކަނި އިންސާނާގެ ތޫނުފިލިކަމުން އެނގޭނެ އެއްޗެއްނޫނެވެ. އެއީ ދިރިއުޅުމުގެ ވަށްޓަފާޅިއާ ދިރިއުޅޭ މާޙައުލާ ގުޅުންހުންނަ އަދި އެމީހެއްގެ މަޢުޞޫމިއްޔަތުކަމާއި ގުޅިފައިހުންނަ ކަންކަމެވެ.  އެކަންކަން ދަސްވާނީ މީހުންގެ ތެރެޔަށް ނުކުމެ އުޅުމުގައި ، ދިމާވާ ކަންކަމުންނާއި މީހުން ކުރާ އަދި ކޮށްފައި ހުންނަ ތަޖުރިބާއިންނާއި ޢިލްމީ ދިރާސާތަކުންނެވެ.

ޚައިރާދު އެދުވަހު ، ޔުނިވަރސިޓީން ގެޔަށްދިޔައީ ކައިސަރާއެކުގައިކަމަށް ، ޚައިރާދު ، އަޝްހަރުގާތު ބުނެއެވެ. އަދި ، އެކަން އެގޮތަށްކުރަން ޖެހުނީ ކާރުހަލާކުވެގެން ޑްރައިވަރު ފޯނުކުރިވަގުތު އެތާ ކައިސަރުހުރީތީ އެވެ. ކައިސަރާއެކު ގެޔަށްދާކަށް ޚައިރާދު ބޭނުމެއްނޫނެވެ. އެހެނަށް ، ޚައިރާދު  އެއްގޮތަކަށްވެސް ކުރު ނުކޮށްގެން ދާންޖެހުނީއެވެ. އަޝްހަރަށް އެކަން އަންގައިނުލެވުނީވެސް އެހެންވެގެންކަމުގައި ޚައިރާދު ބުންޏެވެ. ޚައިރާދަށް އެކަން އެކުރެވުނީ ރަނގަޅަށްތޯ ، އަޝްހަރުކުރެން ޚައިރާދު އަހައެވެ. ޚައިރާދުގެ ސުއާލަށް މާބޮޑު ސަމާލުކަމެއް ނުދީ ، އާނއެކޭ ބުނެ އަޝްހަރު އެކަން ނިންމައިލައެވެ.

ޚައިރާދަށް އެކަން އެ ކުރެވުނީ އެންމެ ރަނގަޅަށްނޫންކަމުގައި ބުނާކަށް އަޝްހަރު ބޭނުމެއްނޫނެވެ. އެކަހަލަ ކަންކަން ޚައިރާދަށް ވިސްނައިދެމުންގެންދަންވާނީ ލަސްލަހުންނެވެ. ކެތްތެރިކަމާއެކުގައެވެ. އަޝްހަރު ނިތްކުރީގައި އަތްވިއްދައިލިއެވެ. ޚައިރާދުގެ ކަންކަމުގައި ކޮންމެވެސް މިންވަރެއްގެ ލިމިޓެއް އޮންނަންޖެހޭކަމުގެ އިޙްސާސް އަޝްހަރަށް އެބަކުރެވެއެވެ. ކަންކަން ގޯގުންގޯހަށް ނުދަނިސް ، އަޝްހަރުގެ ފަރާތުން ޚައިރާދަށް ލިބެންޖެހޭ ލަފަޔާއި އިރުޝާދަކީ މުހިންމު އެއްޗެއްކަމުގައި އަޝްހަރަށް ފެނުނެވެ.

ޚައިރާދުގެ ފޯނު ނިމުމުން ، އަޝްހަރު ކުޑަކޮށް ވިސްނައިލިއެވެ. އޭނާގެ މޫނުމަތިން ހިތްހަމަ ނުޖެހުމާއި ރުޅީގެ އަސަރު ފާޅުވާން ފެށިއެވެ. ކައިސަރުގެ އަނގައިން އެކިފަހަރުމަތިން ، ޚައިރާދަށް ރައްދުކުރެވުނު ތަޢުރީފުގެބަސްތައް އަޝްހަރުގެ ކަންފަތުގައި ތަކުރާރު ވަމުން ދިޔައެވެ. ހަމައެއާއެކު ، ކައިސަރުގެ ކޮޅަށް ޖެހިލެވި ޚައިރާދަށް ބުނެވިފައިހުރި ، ޝުކުރުވެރިވުމުގެ ބަސްތައްވެސް ގުގުމަމުން ދިޔައެވެ. އަޝްހަރުގެ ހިތަށް ޖަމާވަމުންދިޔަ ، އޭނާ ހިތްހަމަނުޖެހޭ އަދި  ނުރުހޭ ބަސްތަކުން ހިތަށް ތަދުވަމުން ދިޔައެވެ. ކައިސަރުގެ މަޤްޞަދެއް އަޝްހަރަކަށް ނޭނގެއެވެ. އޭނާގެ ހިތުގައި ޚައިރާދާމެދު ، އެއްވެސް ގޯސް ނިޔަތެއްނެތްކަމުގައިވެސް ވެދާނެއެވެ. ޔުނިވަރސިޓީގެ ފިރިހެން އަދި އަންހެންކުދިންނާއި ލެކްޗަރަރުންނާއި ޕްރޮފެސަރުންގެ މެދުގައި އެންމެ ހިނގާ ނަމަކީ ޚައިރާދު ކަމަށްވާތީ ، ކައިސަރަކީވެސް އޭގެތެރެއިން އިސްތިސްނާވާނެ މީހެއްނޫނެވެ. ކައިސަރުގެ ބޮޑުދައިތައާއި ފަރީދާއާ ދެމެދު އޮތް ދުރުތާ ތިމާގެ ގުޅުމާއި ގާތްރައްޓެހިކަމުގެ ގުޅުމުގެ ތެރެއިން ، އޭނާއަކީ އެހެން އެންމެންނާ ޚިލާފަށް ، ޚައިރާދާ ކޮންމެވެސް ވަރެއްގެ ގުޅުމެއް އޮތް މީހެކެވެ. އެ ޚާއްޞަކަމުގެ ޙައްޤު އޭނާއަށް ލިބުމަކީ ، އޭނާއަށް އޭނާ އޮޅޭނެ ކަމެއްކަމަށްވެސް ވެދާނެއެވެ. ޚައިރާދުމެންގެޔަށް ގޮސް ކެއުމާއި ، ޚައިރާދުގެ ލޭ އޭނާގެ ހަށިގަނޑުގައި ދައުރުވުމާއ އަދި ޚައިރާދުގެ ލޭ ހަދިޔާކޮށްގެން ، ކައިސަރުގެ ފުރާނަ ސަލާމަތްކުރުންފަދަ ކަންކަމަކީ ، އާދައިގެ ކަމެއްނޫނެވެ.

މީހަކާ މީހަކު ގުޅުވާލައި ، ހިތްނުބައި ކުރެވިދާނެ އެތައްކަމެއް ޚާއިރާދާ ކައިސަރާ ދެމެދު މިހާރުވެސް ހިނގާފައި އެބަހުއްޓެވެ. އެހެންނަމަވެސް ، އަދިއެއް އެއްވެސްމީހަކު އެއިން ކަމެއް ފާހަގައެއް ނުކުރެއެވެ. އަޝްހަރު ފިޔަވައެވެ. ޚައިރާދުދެކެ ވާލޯބީގައި ، އެހެން ފިރިހެނަކު ޚައިރާދާ ދިމާއަށް ބަލައިލުމަކީވެސް އަޝްހަރު އެދޭނެކަމެއްނޫނެވެ. މިހާރު ކަންކަން ހިނގަމުން އެދަނީ އެއަށްވުރެ މާމަތިންނެވެ. ޚުދު ކައިސަރަށްވެސް އޭނާގެ ނިޔަތް ގޯސްނޫންކަން ނޭނގިއެއް ނުހުންނާނެއެވެ. ޚައިރާދަކީ ، އޭގެތެރެއިން ގޯސްގުޅުމެއް އުފެދިދިއުމަށް ދުވަހަކުވެސް އެދޭނެ މީހެއްނޫނެވެ. އެއަށްވުރެ ބޮޑަށް އަޝްހަރުދެކެ ، ޚައިރާދު ލޯބިވެއެވެ. އަޝްހަރުގެ ހިތަށް އުނދަގޫވާނެ އެއްވެސްކަމެއް ، އޭނާއަށް އެނގިގެން ، ޚައިރާދެއް ނުކުރާނެއެވެ. އަޝްހަރަކީ އޭނާގެ ހިތުގެ ވިންދެވެ.

އަޝްހަރު ގެޔަށް އައުން ލަސްވެގެން ޚައިރާދާއި ފަރީދާ ކަންބޮޑުވެފައި ތިއްބެވެ. އެމީހުން ނުކައި އެތިބީ އަޝްހަރު އަންނަންދެންނެވެ. ޚައިރާދު ނުގުޅަން ހުރެފައިވެސް ، ފަރީދާވެސް ބުނުމާއެކު އަޝްހަރަށް ގުޅިއެވެ. އަދި ގެޔަށް އަންނަނީ ކޮންއިރަކުންތޯއާއި މަންމައާއި އޭނާ އަޝްހަރުގެ އިންތިޒާރުގައި ނުކައިތިބިވާހަކަ ބުންޏެވެ. އަޝްހަރު ބުނިގޮތުގައި އޭނާ އެއުޅެނީ މީޓިންގއެއްގައެވެ. ގެޔަށް ދެވޭނީ ވަރަށް ލަސްވާފަހުންނެވެ. ފަރީދާ ބަޑުހައިވެގެން އުޅެންފެށީމަ ، އަޝްހަރު އައިސް ފަހުން ކައިފާނޭ ކިޔާފަ ދެމައިން ކާގެޔަށް ވަނެވެ.

ސާރާ ، މަޢުރަޒެއް ބަލައިލުމަށް ޖައްސައިލި ދުވަހެކެވެ. މަޢުރަޒުގެ ތެރޭގައި އުޅެނިކޮށް ކައިސަރު އެތަނަށް އާދެއެވެ. އަދި ސާރާއާ ދިމާވެ ، ވާހަކަ ދައްކާލުމުގެ ފުރުޞަތު ލިބުނީތީ އުފާކުރިއެވެ. އެހެންނަމަވެސް ، ސާރާހުރީ ކައިސަރާ ވާހަކަ ދައްކާގޮތަކަށް ނޫނެވެ. އަނގަތަޅަމުން ހިނގަމުން ކުރެހުންތަކުގެ އަޞްލު ތަޞައްވުރު ނުކުރެވޭނެކަމުގައި ސާރާ ބުންޏެވެ. ކައިސަރު ދައްކަންވެފައިހުރި ކިތަންމެ ވާހަކައެއް ހުށްޓެވެ. ސާރާމެންގެޔަށް ދިޔަޔަސް ، ސާރާއެއް ކައިސަރަކާ ބައްދަލެއް ނުކުރެއެވެ. ކޮފީއަކަށް ގޮސް ތިބެ އެގަޑީގައި ، އަނގަތަޅާލަން ވަގުތު ބޭކާރުކުރާކަށް ސާރާ ބޭނުމެއް ނުވިއެވެ. ކައިސަރުގެ ސުއާލުތައް ނިމިއްޖެނަމަ ، އޭނާ މަޢުރަޒު ބަލައިލަންތޯ އަހައި ، ކައިސަރުގެ ކިބައިން ސަލާމަތްވުމަށް ، ސާރާ ބަހަނާއެއް ހޯދިއެވެ.

ކުޑަވަގުތުކޮޅަކަށްވެސް ފުރުޞަތުނުދީ ސާރާ އެތަނުން ދިއުމުން ، ކައިސަރުގެ ހިތަށް ވަރަށް އަސަރު ކުރިއެވެ. ފަހަރެއްގައި ، ކައިސަރާއެކު ވަގުތުކޮޅެއް ހޭދަކުރުމުގެ ފުރުޞަތު އޭނާގެ ނަސީބުގައި ނެތީކަމަށްވެދާނެއެވެ. ސާރާގެ ރީތި މޫނަށް ވަށްކަޅިޔަކުން ނަމަވެސް ބަލަހައްޓާލައިގެންހުރެ ، ހިތްއުފާކޮށްލުމުގެ ވަގުތު އޭނާގެ ފިރިއުޅުމުގައި ތާވަލް ކުރެވިފައި ނެތީއެވެ. ސާރާގެ ސަމާލުކަން ކައިސަރުގެ މައްޗަށް ހުއްޓިދާނެ ދުވަހެއް އައުމަކީ އެކަށީގެންވާކަމެއްނޫންކަން ޤަބޫލުކުރުން އެއީ ކައިސަރަށް މިވަގުތު އޮތް ގޮތެވެ. އެކަން ކައިސަރަށް ބަދަލުކުރެވޭކަށް ނެތެވެ. ކައިސަރަށް ނޭނގުނު ނަމަވެސް ، ސާރާ ވަނީ ، އޭނާގެ ލޯތްބާއި ހިތް ، މާކުރިން އެހެންމީހަކަށް ހަދިޔާ ކޮށްފައެވެ. އެމީހެއްގެ އަތުން ، އަނބުރާ އެތަކެތި އަތުލެވޭނެފަދަ ހިތްވަރެއް ، ސާރާގެ ކިބަޔަކު ނެތެވެ. އެއާއެކު ، އެމީހަކަށް އޭގެ ބޭނުންހިފޭނެ ގޮތެއްވެސް ނެތެވެ. އެހެނީ ، އެމީހަކު ވަނީ ، އޭނާގެ ލޯތްބާއި ހިތް އެހެން އަންހެންކުއްޖަކަށް ހަދިޔާކޮށްފައެވެ.

ގޮނޑުދޮށަށް ބީއްސާލަމުންދާ ރާޅުތައް އަލްވަދާޢުކިޔާފައި އެނބުރި އުރަފަށަށް ރުޖޫޢަވާއިރު ، އެއާއެކު އެގެންދާ ހަނދާންތަކަކީ ، މިނެޓަކު ދެފަހަރު ހިނގާ ކަމެކެވެ. އަޝްހަރުގެ ހިތުގައި ސާރާއަށް ޓަކިޖަހައިލެވުނީ ، ކުޑަތަންކޮޅެއް ލަހުންނެވެ. ޚައިރާދު އައިސް ކޮންމެވެސް ސިފައެއްގައި އެހިތާ ކުޅެލިފަހުންނެވެ. ހިތަށް އުނދަގޫވާ ހިތްދަތި ޙާލަތެއްގައިކަމަށްވިޔަސް ، މަޖުބޫރުން ބެނދެވިގެންކަމަށްވިޔަސް ، އަޝްހަރުގާތަށް ފުރަތަމަ އައީ ޚައިރާދެވެ. ސާރާއަށް އާދެވުނީ ވަގުތު ފާއިތުވީފަހުންނެވެ. ސާރާއާއި ޚައިރާދާ ދެމީހުންކުރެ ، އަޝްހަރުގެ ހިތަށް ޤަބޫލުކުރެވުނީ ޚައިރާދުދެކެ އޭނާއަށް ވެވުނު ލޯތްބެވެ. ސާރާއާމެދު އުފެދިފައި އޮތް ރަޙުމަތްތެރިކަމުގެ ގާތްކަން ލޯތްބަކަށް ބަދަލެއް ނުވިއެވެ.

އަޝްހަރު ލަސްވެގެން އަނެއްކާވެސް ޚައިރާދު ފޯނުކުރިއެވެ. އަޝްހަރު ހުރީ ކުޑަދޮރު ކައިރިޔަށް ޖެހިލައިގެން ، ފުން ވިސްނުމެއްގެ ތެރެޔަށް އޭނާގެ ފިކުރު ދޫކޮށްލައިގެންނެވެ. އޮފީހުގައި އެރޭ އުޅެނީ އޭނާ އެކަންޏެވެ. އަޝްހަރުގެ ތަބީޢަތަށް ލިބިފައިވާ ހިތްނުތަނަވަސްކަމުގެ އަސަރު ، ޚައިރާދާ ފޯނުން ވާހަކަ ދެއްކިއިރުވެސް ފާޅުވެގެންދިޔައެވެ.

ޢަޝްހަރު އެއުޅެނީ މީޓީންގއެއްގައި ކަމަށާއި މީޓިން ނުނިމޭކަމަށް ބުނެ ދޮގުހެދިއެވެ. މީޓިން ނިމޭނެއިރެއް ނޭނގޭކަމަށާއި މީޓިންގއެއްގައި އުޅޭއިރު އުނދަގޫ ނުކުރުމަށް ޚައިރާދަށް އަމުރު ކުރިއެވެ. އަދި ރުންކުރު ގޮތަކަށް ފޯނު ކަނޑައިލިއެވެ.

އަޝްހަރު އެހާ ލަސްވީއިރުވެސް ގެޔަށް ނާންނާތީ ، ޚައިރާދު ހުރީ ކަންބޮޑުވެފައެވެ. އޮފީހުގައި ބިޒީވިއެއްކަމަކު ، ރުޅިއަންނާކަށް ނުޖެހޭ ނޫންހެއްޔެވެ ؟ މަސައްކަތް ބޮޑުކޮށް އުނދަގޫކޮށް އަދި ފަސޭހަކުރަނީވެސް އަމިއްލަޔަށް ނޫންހެއްޔެވެ ؟ ފޯނެއް ނުކުރާ ތާނގައި މެސެޖެއްވެސް ކޮށްލީކީ ނޫނެވެ. ފޯނުކުރީމަ ބުނަން ބޭނުންއެއްޗެއް ބުނެފަ ، ރުޅިއައިސް ހިތްހަމަ ނުޖެހިގެން ފޯނު ކަނޑައިލީއެވެ. ގެޔަށް އައިމަ އޭނާވެސް އަޝްހަރާ ވާހަކަ ނުދެއްކުމަށް ޚައިރާދު ނިންމިއެވެ.

ބައެއްހީއަކީ ފާފައެކެވެ. މިނެއްނެތް އޯގާތެރިކަމާއި ޙައްދެއްނެތް ލޯތްބަކީ ވޭނެކެވެ. ކައިވެނީގެ މާތް ޢަޤްދުގެ މަތީގައި އުފެދި އާބާދުވާ ދެމީހެއްގެ ގުޅުމުގައި ، ލޯތްބާއި ކުލުނުގެ ވަސްމީރު ހުވަނދުން އެއްވަސް ވުމަށްފަހު ، އުފެދޭ އެއްވެސް އިޙްސާސެއް ވޭނަށް ބަދަލުވުމަކީ ، ވެދާނެ ކަމެކެވެ.  ވާނުވާއެއް ނޭނގި ، އިންސާނާގެ ހިތަށް އަންނަ ކޮންމެ ގޮތަކަށް އަނެކާއާމެދު ކަންކުރުމަކީ ، އަދި ގޮތް ނިންމުމަކީ ، އިންސާފެއްނޫނެވެ. ކޮންމެ ދެމަފިރިއެއްގެ މެދުގައިވެސް މައްސަލަ ޖެހޭނެއެވެ. އެނގިގެންނާއި ނޭނގި ނަމަވެސް ހިތްހަމަނުޖެހުން އުފެދޭނެއެވެ. ރުޅިވެސް އަންނާނެއެވެ. އެހެންނަމަވެސް ، ވާހަކަ ދައްކައިގެން ޙައްލުނުކުރެވޭނެކަމެއް ދެމަފިރިއެއްގެ ދެމެދަކަށް ނުއަންނާނެއެވެ. ޙައްލު ނުކުރެވޭނެ ކަމެއް ހިތާކުޅެ ، އެހިތް ގަޑުބަޑުކުރަން އިންސާނާ ފުރުޞަތު ދެނީ އަމިއްލަޔަށެވެ. ހިތްނޭދޭކަންކަން ، ހިތްއެދޭގޮތަކަށް ނިންމަން ދޫކޮށްލައިގެން ނުވާނެއެވެ. އެހިތުގެ މައްޗަށް ބާރުފޯރުވައި ، ވާހަކަ ދައްކައިގެން ހޯދޭ ތަސައްލީއަކީ ، ހިތަށް އެންމެ އަރާމު ލިބޭ ވަޞީލަތެވެ.

އަޝްހަރު ގެޔަށް އައިއިރު ޚައިރާދު އިނީ ، އެނދުމައްޗަށް އަރައި ، ދެފައިވަށްކޮށްލައިގެން ކިޔަވާށެވެ. އޭނާގެޔަށްއައިއިރު ހުރީ ވަރަށް ލަސްވެސް ވެފައެވެ. ފާޚާނާޔަށްވަދެ ނިދަން ތައްޔާރުވެލައިގެން އެނދުގައި އޮށޯވެލިއެވެ. އަދި ކިހާއިރެއްވަންދެންހޭ ކިޔަވާނީ ބުނެ ނިދަން ބޭނުންވާކަން ޚައިރާދަށް އަންގައިލިއެވެ. އޭނާ ކުރަމުންގެންދާ މަސައްކަތް ނިމޭނެއިރެއް ނޭނގޭކަމަށް ޚައިރާދު ބުންޏެވެ. އަދި އޭނާ ނިދާނީ އެމަސައްކަތް ނިންމާފައިކަމަށާއި ، އަޝްހަރު ނިދަންޏާ ނިދައިލަން ބުންޏެވެ. ޚައިރާދުގެ ވާހަކަޔަށް ބުނާނެ ވަކިއެއްޗެއް ނޭނގި ، އެންމެ ރަނގަޅޭ ބުނެ އަޝަހަރު އަނެއްފަރާތަށް އެނބުރުނެވެ.

(ނުނިމޭ)