ފިންލޭންޑުގައި އާދިއްތަ ދުވަހު އޮތް އާއްމު އިންތިޚާބުގައި ކާމިޔާބުހޯދާފައިވާކަން ކަނާތު ފިޔައިގެ ނޭޝަނަލް ކޯލިޝަން ޕާޓީ (އެންސީޕީ) އިން އިއުލާންކުރިތާ ގިނަ އިރެއް ނުވެ، ބޮޑުވަޒީރު ސަނާ މާރިންގެ ސޯޝަލް ޑިމޮކްރެޓްސްއިން ބަލި ގަބޫލުކޮށްފިއެވެ.
ހުރިހާ ވޯޓެއް ގުނާ ނިމިފައިވާއިރު، އިންތިޚާބުގެ ނަތީޖާ ދައްކާ ގޮތުން، 200 ގޮނޑި ހިމެނޭ ގާނޫނު ހަދާ މަޖިލިސްގެ 48 ގޮނޑި ކާމިޔާބުކުރީ އެންސީޕީންނެވެ. ވަޠަނީ ޕާޓީއެއް ކަމަށްވާ ފިންސް ޕާޓީން 46 ގޮނޑި ހޯދިއިރު، ބޮޑުވަޒީރު މާރިންގެ ސޯޝަލް ޑިމޮކްރެޓްސްއަށް ލިބުނީ 43 ގޮނޑިއެވެ.
އުމުރުފުޅުން 37 އަހަރުފުޅުގެ ސަނާ މާރިންއަކީ ޔޫރަޕްގެ އެންމެ ޒުވާން ލީޑަރުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. ޔުކްރޭން ހަނގުރާމައިގައި ފާޅުގައި ޔުކްރޭނަށް ތާއީދުކުރެއްވުމާއި، ނޭޓޯ (ނޯތު އެޓްލާންޓިކް ޓްރީޓީ އޮގަނައިޒޭޝަން) ގައި ފިންލޭންޑު ބައިވެރިކުރައްވަން މަސައްކަތްޕުޅު ކުރެއްވުމުގެ ސަބަބުން ގިނަ ގައުމުތަކެއްގެ މާރިންއަށް ލިބިވަޑައިގެންފައި ވެއެވެ.
އާއްމު އިންތިޚާބުގެ ނަތީޖާ އައިސްފައިވާ ގޮތުން އެއްވެސް ޕާޓީއަކަށް އެކަނި ސަރުކާރެއް އެކުލަވައިނުލެވޭނެއެވެ. އެހެންކަމުން، އުފައްދަން ޖެހޭނީ ކޯލިޝަން ސަރުކާރެކެވެ.
"ނަތީޖާގެ މައްޗަށް ބިނާކޮށް، ފިންލޭންޑުގައި އާ ސަރުކާރެއް އެކުލަވާލުމުގެ ވާހަކަތައް ފަށާނީ ނޭޝަނަލް ކޯލިޝަން ޕާޓީން." އިންތިޚާބުގެ ނަތީޖާއާމެދު އުފާފުޅުވެފައި ހުންނެވި އެޕާޓީގެ ލީޑަރު ޕެޓެރީ އޮރްޕޯ ވިދާޅުވިއެވެ.
ފިންލޭންޑުގެ ފިނޭންސް މިނިސްޓަރުކަން ކުރިން ކުރައްވާފައިވާ، ދެން ބޮޑުވަޒީރަކަށް ވެވަޑައިގަންނަވާނެކަމަށް އެންމެ ބޮޑަށް ބެލެވޭ، އުމުރުފުޅުން 53 އަހަރުފުޅުގެ އޮރްޕޯ ޔަގީންކަން ދެއްވި ގޮތުގައި ފިންލޭންޑުން ޔުކްރޭނަށް ކުރާ ތާއީދަށް އޭނާގެ ވެރިކަމެއްގައި އެއްވެސް ބަދަލެއް ނާންނާނެއެވެ.
"އިންތިޚާބު ކާމިޔާބުރި ފަރާތަށް މަރުހަބާ. ނޭޝަނަލް ކޯލިޝަން ޕާޓީއަށް މަރުހަބާ އަދި ފިންސް ޕާޓީއަށް މަރުހަބާ. ޑިމޮކްރަސީ މިވަނީ ބަސްބުނެފައި." ބަލި ގަބޫލުކުރައްވަމުން ބޮޑުވަޒީރު ސަނާ މާރިން ދެއްކެވި ވާހަކަފުޅުގައި ވިދާޅުވިއެވެ.
ސަނާ މާރިންގެ ވެރިކަމުގައި ގައުމުގެ އިގްތިސާދު ހީނަރުވެ، ޔުކްރޭންގެ ހަނގުރާމައިގެ ސަބަބުން ޔޫރަޕަށް ކުރިމަތިވެފައިވާ ހަކަތައިގެ ދަތިކަމުގެ އަސަރު ފިންލޭންޑަށް ކުރި މިންވަރު އިތުރުވެ، ދިރިއުޅުމުގެ ޚަރަދުތައް މައްޗަށް ގޮސްފައިވާކަމަށް އެންސީޕީން ދެކެއެވެ.
އެ ޕާޓީން ބުނާގޮތުގައި އެ ޕާޓީގެ ވެރިކަމެއްގައި ޚަރަދުތައް ކުޑަކޮށް، ދައުލަތުގެ ދަރަނި ކޮންޓުރޯލުކުރާނެއެވެ.
