ކިރުއިލޮށި - 23

(31 މާރިޗު 2023 ގައި ޝާއިއުކުރި ބަޔާ ގުޅޭ)

ޚައިރާދު ، އޭނާގެ ރަޙުމަތްތެރިޔާ ، އަފްސީނަށް މެއިލެއް ލިޔަމުން ގެންދިޔައެވެ. ޚައިރާދުގެ ޙަޔާތަށް އައި ހެޔޮ ބަދަލުތަކާއި ، ހިތްހަމަޖެހުމާއި އުފާވެރިކަމުގެ ނަސީބު އޭނާއަށް މިންވަރުކުރެއްވިކަން ފާހަގަ ކުރިއެވެ. އަޝްހަރުވެސް މިހާރު ވަރަށްބޮޑަށް ބަދަލުވެ ، އޭނާއަށް އަޅާލާކަމުގައި ލިޔުނެވެ. އަދި އެންމެފަހުން ، ޚައިރާދުގެ ހިތުގައި އަޝްހަރުގެ މައްޗަށް މަޑުމަޑުން ، ލޯބި އުފެދެމުންދާކަމުގައިވެސް ލިޔުނެވެ. ޚައިރާދުގެ ހުރިހާ ވިސްނުމެއް މިހާރު ގެންގުޅެނީ ، އަޝްހަރު ބޭނުންވާފަދަ އަނތްބަކަށް އޭނާ ބަދަލުވުމަށެވެ. އަޝްހަރު ޤަބޫލުކުރާ ހުރިހާކަމެއް އޭނާ ކުރާނެއެވެ. އަދި ޤަބޫލުނޫން ހުރިހާކަމެއް ދޫކޮށްލާނެއެވެ.

ޚައިރާދު ، މެއިލް ލިޔަންއިންދާ އަޝްހަރު ސިޓިންގރޫމަށް ނުކުމެއެވެ. އަދި ކޮންކަމެއް ކޮށްލަނީތޯ ސުއާލުކުރިއެވެ. ޚައިރާދުގެ ރަޙުމަތްތެރިޔާ ، އަފްސީނަށް މެއިލްއެއް ލިޔަނީކަމުގައި ޚައިރާދު ބުންޏެވެ. އޭނާގެ ގޯސްވާހަކަ ލިޔަނީދޯއޭ ބުނެ އަޝްހަރު ސަމާސާ ކޮށްލިއެވެ. އަޝްހަރުގެ ބަސް ނުނިމެނިސް ، ޚައިރާދު ނޫނެކޭ ބުނެއެވެ. އަދި އަޝްހަރުގެ ގޯސް އެއްވެސްކަމެއް ނެތްއިރު ، އެވާހަކަ އޭނާ ލިޔާނީ ކިހިނެއްތޯ އަޝްހަރު ކުރެން އެހިއެވެ. އަދި އޭގެ ބަދަލުގައި އޭނާ ލިޔުނީ އަޝްހަރަށް ތަޢުރީފްކޮށްފައިކަމުގައި ބުންޏެވެ. ތަޢުރީފްކޮށް ލިޔުނުބަސްތަކުން މިސާލެއް ބުނުމަށް އަޝްހަރު އެދުނެވެ. މިސާލަކަށް ، އަޝްހަރު ވަރަށް ހެވެވެ. އެހާ ވާހަކަދައްކައެވެ. އޭނާއަށް އަޅާލައެވެ. އުފަލުގައި ބެހެއްޓުމަށް މަސައްކަތް ކުރެއެވެ. އެވަރު ފުދޭނޫންހޭ ބުނެ ޚައިރާދު ހީލިއެވެ.

ރަޙުމަތްތެރިޔާގާތު ބުނަން ، އެހާވަރު ނުފުދޭކަމުގައި އަޝްހަރު ބުންޏެވެ. އޭނާދެކެ ލޯބިވާވާހަކަ ނުލިޔަމެއް ނޫންހޭ ބުނެ ޚައިރާދު ލަދުގަންނުވައިލިއެވެ. ވާހަކަ ދައްކާއިރު ލޯ ސީދާކޮށްގެން އިނދެ ވާހަކަދައްކަން ލަދުގަންނަ ވާހަކަވެސް ނުލިޔަމެއްނޫންހޭ ، އަޝްހަރު ބުންޏެވެ. އަޝްހަރު ވާހަކަ ދައްކަމުން ދިޔައީ ޚައިރާދުގެ ލޮލަށް ބަލަހައްޓައިގެން އިނދެއެވެ. އޭރުވެސް ޚައިރާދު އިނީ އަޝްހަރާ ދިމާއަށް ބަލައިލަން ނުކެރި ، އިސްދަށަށް ޖަހައިގެންނެވެ. އޭނާގެހިތުގައި އަޝްހަރުގެ މައްޗަށް އޮތްލޯބި ، ސިއްރުކޮށްގެން އުޅުނު ނަމަވެސް ، އަޝްހަރު އެކަން ދެނެގެންފިއެވެ. ދެމީހުންދެމީހުންނަށް ދައްކާނެ އެތައްވާހަކައެއް މިހާރު އެބަހުއްޓެވެ.

ޚައިރާދު ހިތްހަމަޖެހިގެން އުފަލުގައި ހުރިކަން ޔަޤީންކުރުމަށްޓަކައި ، އެސުއާލު އަޝްހަރު ، ޚައިރާދާ ކުރިއެވެ. ޚައިރާދު އަޝްހަރާދިމާއަށް އެނބުރިލިއެވެ. އަދި އަޝްހަރުގެ ލޮލަށް ބަލަހައްޓައިގެން އިނދެ ، ވަރަށް އުފާވެއޭ ބުނެ ޖަވާބު ދިނެވެ. އެއަށްފަހު ، ހަމަ އެސުއާލު އަޝްހަރާ ކުރުމަށް ޚައިރާދުގެ ކިބައިން އަޝްހަރު އެދުނެވެ. އެތައް އިރަކު އަޝްހަރުގެ ލޮލަށް ބަލަހައްޓައިގެން އިނދެ ، އަޝްހަރު އުފާވޭތޯ ޚައިރާދު ސުއާލުކުރިއެވެ. އޭނާއަށް ލިބިފައިވާ ، އުފާވެރިކަން މާނަކޮށްދޭނެ ބަހެއް ހިތަށް ނުގެނެވޭވަރަށް އެނާ އުފާވާކަމުގައި އަޝްހަރު ބުންޏެވެ.

ޢާންމު އިންސާނުންގެ ދިރިއުޅުމާ ތަފާތުކޮށް ، އަހަރެމެންގެ ގުޅުން މިފެށުނީ މަތިން ތިރިޔަށޭ ބުނެ ، އަޝްހަރު އިތުރަށް ވާހަކަ ދައްކަން ފެށްޓިއެވެ. ޢާންމު އުޞޫލުން ކަންހިނގާ ގޮތަކީ ، ދެމީހަކު ދިމާވަނީއެވެ. އެއަށްފަހު އެކަކު އަނެކަކަށް އަޅައިގަންނަނީއެވެ. ދެމީހެއްގެ މެދުގައި ދެކެފަރިތަކަން އުފެދެނީއެވެ. އެއަށްފަހު އެކަކު އަނެކަކަށް ގަޔާވުމެވެ. އެއަށްފަހު އެދެމީހުން ގާތްމީހުންނަށް ވުމެވެ. އަދި އެއަށްފަހު ، އެކަކު އަނެކަކަށް ހިތްކިޔައި ، ދެމީހުންގެވެސް ހިތް އެދުމެވެ. އަދި އެއަށްފަހު ލޯބީގެ އެންމެފަހުން ، ވަކި ނުވެވޭވަރަށް ލޯބިވުމާއެކު ، ޒަވާޖީ ޙަޔާތެއް ފެށުމެވެ. އަހަރެމެންގެ މިގުޅުން އެންމެ ފުރަތަމަވެސް ފެށުނީ ކައިވެނިންނެވެ. ކިހާ އަޖައިބު ކަމެއްދޯއެވެ ؟ އަހަރެން އެންމެ ފުރަތަމަވެސް ކޮންމެ ޙާލަތެއް މެދުވެރިވެގެން ކަމަށްވިޔަސް ، ޚައިރާދާ ކައިވެނި ކުރީއެވެ. އޭގެފަހުން ، ޚައިރާދު ބަލައިގަތީއެވެ. ހިތްހަމަ ޖެހުނީއެވެ. އަދި އެންމެފަހުން ލޯބިވެސް ވެވުނީއެވެ. މިހުރިހާ ހަރުފަތްތަކެއް ގިރާކުރަން ، އެކަށީގެންވާ ވަރަށްވުރެ ގިނަ ވަގުތު ނެގިއެވެ. އެއީ ފެށުނުގޮތުން ވީކަމަކަށް ވެދާނެއެވެ.

އަޝްހަރު ، ޚައިރާދުގެ ލޮލަށް ކަޅިޖަހައިނުލާ ބަލަހައްޓައިގެން އިނދެ ވާހަކަ ދައްކަމުން ގެންދިޔައެވެ. ޚައިރާދުވެސް މޫނު އަނބުރައިނުލާ ، އުފާވެރި އިޙްސާސްތަކަކާއެކު ، އަޝްހަރާ ހަތަރުކަޅި ހަމަކޮށްގެން އިނެވެ. އަހަރެން ، އެންމެ ފުރަތަމަވެސް ، ޚައިރާދާ ކައިވެނިކުރާކަށް ބޭނުމެއް ނޫނެވެ. ޚައިރާދުވެސް ، އަހަރެންނާ ކައިވެނިކުރަން ނޭދުނު ފަދައިންނެވެ. އެކަމަކު ، މިއަދު އަހަރެން ﷲ އަށް ޙަމްދުކޮށް ޝުކުރު ކުރަމެވެ. ޚައިރާދުފަދަ ބައިވެރިޔަކު އަހަރެންނަށް މިންވަރު ކުރެއްވީތީއެވެ. އަޝްހަރު ހިނިތުންވެ އިނދެ ، ޚައިރާދުގެ އަތް އޭނާގެ އަތާލައި ބޮނޑިކޮށްލިއެވެ. ދެމީހުންވެސް ތިބީ އެކަކު އަނެކެއްގެ ލޮލާ ހަތަރުކަޅި ހަމަކޮށްގެން ، ފަރި އަދި ހަމަ އެހާމެ ލޯބި ހިނިތުންވުމެއްގައެވެ. އެގޮތަށް އެދެމީހުންނަށް ތިބެވުނީ ކިހާއިރަކުކަމެއްވެސް ނޭނގެއެވެ.

އަޝްހަރު އޮފީހުގައި ޕްރެޒެންޓޭޝަނެއް ތައްޔާރު ކުރުމަށް ، އޭނާގެ ސެކްރެޓަރީއަށް ކިޔައިދެމުން ގެންދިޔައެވެ. ކުއްލިޔަކަށް ، ސާރާއައިސް ، އަޝްހަރު ހޯދަން އޭނާ ނުބަލާތަނެއް ނެތްކަމުގައި ބުންޏެވެ. އޭނާއެއުޅެނީ ޕްރެޒެންޓޭޝަނެއް ނިންމުމަށްޓަކައި އެތަނުގައިކަމަށް އަޝްހަރު ބުންޏެވެ. އަދި އެނބުރި ޕްރެޒެންޓޭޝަނާ ބެހޭގޮތުން އޭނާއަށް ފެންނަ ގޮތްތައް ކިޔައިދޭން ފެށިއެވެ. ނިމިގެން އައިގޮތަށް އޭނާގެ ކެބިންގައި ހަމަޖެހިލިއެވެ. އޭރުވެސް ސާރާ ހުރިގޮތަށް ހުއްޓެވެ. ސާރާއަކާ އިތުރަކަށް އަޝްހަރު ވާހަކައެއް ނުދައްކައެވެ. ސާރާއައިސް އަޝްހަރުގެ ކެބިންއަށްވަދެ ، އަޝްހަރުގެ ކުރިމަތީގައި ހުއްޓުނެވެ. އަޝްހަރު ސާރާއާ ދިމާއަށް ބަލައިނުލާ އިނދެ ، ކިހިނެއްވީތޯ ސުއާލުކުރިއެވެ. ސާރާގެ ޝަކުވާއަކަށްވީ އަޝްހަރު އޭނާދެކެ ހިތްހަމަ ނުޖެހިފައި ހުރުމެވެ. އެހެން ނޫންނަމަ ، ނުފެންނަކަމަށް ހަދާފައި އަޝްހަރު އެކޮޓަރިން ނުކުމެގެންނެއް ނާންނާނެއެވެ.

ސާރާ އަނެއްކާވެސް އަޝްހަރަށް ގޮވައިލިއެވެ. އަދި ، އޭނާއާ ޚައިރާދާ ދެމީހުން މިހާރު ރައްޓެހިކަމުގައިވެސް ބުންޏެވެ. ކުރީރޭގެ ޕާޓީގައި ޚައިރާދު ގާތުގައި ، އޭނާ ހިތްހަމަ ނުޖެހޭވާހަކައެއް ..........

" ޚައިރާދަށް ފަހަރެއްގައި ، ޅަ ޒުވާނުންލާ ޑިޒައިނަރ ހެދުމާބެހޭ މަޢުލޫމާތު ލިބިފައިނެތީކަމުގައި ވެދާނެއެވެ. އެތެރެއިންނާއި ބޭރުން ހެދުމުގެ ކުލަތައް ގުޅެނީ ކޮންގޮތަކަށްކަންވެސް ޚައިރާދަށް ނޭނގިދާނެއެވެ. އެހެންނަމަވެސް ، ޚައިރާދު އެލާ ހެދުމަކީ ކޮންމެ ގޮތަކަށް ހުންނަ ހެދުމެއްކަމަށްވިޔަސް ، ޚައިރާދު ، އަހަރެންނަށް ވަރަށް މުހިންމެވެ. ކުރިޔަށް އޮތްތާނގައި ، ތިބުނާ ރައްޓެހިކަމުގެ މާނައިގާ ، ޚައިރާދުލާ ހެދުމަށް ގޮތްކިޔުމުގެކުރިން ވިސްނާލައްޗެވެ. އެކަހަލަ ކަންކަމުން ޚައިރާދުގެ ހިތަށް ވަރަށް އަސަރު ކުރާނެއެވެ. އެއީ އަހަރެން އެދޭކަމެއްނޫނެވެ. " ސާރާގެ ވާހަކަ މެދުކަނޑުވައިލުމަށްފަހު ، އަޝްހަރު ބުންޏެވެ.

އެރޭގެ ޕާޓީން ގެޔަށްދިޔަ މަގުމަތީ ، ކޮފީއެއް ނޫނީ އައިސްކްރީމެއް ބޯލަން ބޭނުންތޯ ޚައިރާދުކުރެން އަޝްހަރު އަހައިލުމުން އެކަމާ ގަޔާނުވިކަން އަޝްހަރުގެ ހަނދާނުގައި އެބަހުއްޓެވެ. އަދި އޭނާގެ ހެދުމުގެ ކުލަތައް ނުގުޅި ، އެއިނީ ، އެކަށީގެންނުވާ ހެދުމެއްލެވިފައިތޯ އަޝްހަރުކުރެން އެހި ހަނދާންވެސް އެބަހުއްޓެވެ. އެއީ ، ސާރާގެ ކަމަކަށްވާނެކަން އެވަގުތުވެސް އަޝްހަރު ޔަޤީން ކުރިއެވެ. ސާރާ އެވާހަކަ ދައްކައިގެން ޚައިރާދު އެއިނީ ހިތްނުތަނަވަސްވެފައިކަން އަޝްހަރު ދެނެގަތެވެ. އަނގަގަދަކަމުން ގޮސް ބައެއްފަހަރަށް ދައްކާފަ ނުދައްކާނެ ވާހަކައެއް ސާރާއަކަށް ނޭނގޭނެއެވެ.

އަޝްހަރު ވާހަކަ ދައްކަމުން ގެންދިޔައިރު ، ސާރާގެ ހިތުތެރޭގައި އަނދަމުންދިޔަ އަލިފާނުގެ އަސަރު ، ބޭރުނުކުރެވޭތޯ ވަރަށް ހިތްވަރު ކުރިއެވެ. ސާރާ އަޝްހަރުގެ ކިބައިން މަޢާފަށް އެދުނެވެ. ކުރިޔަށް އޮތްތަނުގައި އެކަމާމެދު ވިސްނާނެކަމުގައި ބުންޏެވެ. އަދި އެވަރުގެ އާދައިގެ ކަމެއް އެހާ ބޮޑު މައްސަލަޔަކަށް ނުހެދުމަށް ސާރާ އެދުނެވެ.

ސާރާ ގެޔަށް ދިޔައިރު އޭނާއަށް ކާރު ދުއްވެނީވެސް މާބާރަށެވެ. ހިތަށްވީތަދު ނުފިލައި ، އޭގެރޯޅި ކާރުގެ ހުންގާނަށް ބާލަމުން ، އިރުއިރުކޮޅުން ބަރުގޮނު އަޅަމުން ގެންދިޔައެވެ. އަޝްހަރު ގެޔަށް އައިއިރުވެސް ، ސާރާގެ ޢަމަލާމެދު ހިތުގައި އުފެދިފައި އޮތް ރުޅިވެރިކަން ފިލައިގެންނެއް ނުދެއެވެ. ގެޔަށް އައިގޮތަށް އައިސް ، ލެޕްޓޮޕް ހިފައިގެން މަސައްކަތަށް ފެށިއެވެ. އެވަގުތު ހެދުންތަކެއް ހިފައިގެން ، ޚައިރާދު އައިސް ، އެ ހެދުމާ އެއްކުލައިން ދޮޕައްޓާ މެޗްކުރާނެ ގޮތުގެ ލަފަޔަކަށް އަހަމުން ގެންދިޔައެވެ. އަޝްހަރު އިނީ މަސައްކަތުގެ ތެރެޔަށް ގެއްލިފައެވެ. ޚައިރާދު އެދައްކާ ވާހަކަޔަކަށް މާބޮޑު ސަމާލުކަމެއް ނުދެވުނެވެ. ޚައިރާދު އައިގޮތަށް އައިސް ، ލޯބިގޮތަކަށް އަޝްހަރުގެ ކުރިމައްޗަށް ހުއްޓި ، އަޝްހަރުގެ މަސައްކަތަށް ހުރަސްއަޅައި ލެޕްޓޮޕް އަތުލައި ދުރުގައި ބޭއްވިއެވެ.

ޚައިރާދުގެ ރައްޓެހިންގާތު ، މަސައްކަތަށް ދެވިހިފާފައިތިބޭ ފިރިހެނުންނާ ކައިވެނި ނުކުރަން ލަފާދޭނެކަމަށް ޚައިރާދު ބުންޏެވެ. އަޝްހަރުގާތަކަށް ރުޅިއެއް ނާދެއެވެ. ކުރިމަތީ އިށީނދެއިން ޚައިރާދާ ގާތަށް ޖެހިލައި ހީލުމަށްފަހު ކޮށްދޭންވީ ކޮންކަމެއްތޯ ސުއާލު ކުރިއެވެ.

" ޚައިރާދެވެ ! ޚައިރާދު ކޮންމެ ގޮތަކަށް ހެދުން ލިޔަސް ، އަހަރެންނަށް ރީއްޗެވެ. ޚައިރާދާ އަޅައިކިޔޭނެ އެހެންމީހަކު ނުފެންނާނެއެވެ. " އަޝްހަރު ބުންޏެވެ.

ޚައިރާދު ، ހެދުމުގެ ވާހަކަ ދެއްކީ ވަރަށް ސީރިއަސް ކޮށެވެ. އެކަމަކު ، އެކަންވެސް އަޝްހަރު އެހެދީ މަޖާ ކަމަކަށެވެ. ޚައިރާދު ހިތްހަމަ ނުޖެހިގެން ދުރަށްގޮސް އެނދުމަތީ އިށީނނެވެ. އަޝްހަރުވެސް ކަންބޮޑުވުމާއެކު ކުއްލިޔަކަށް ގޮސް ޚައިރާދުގާތު އިށީނދެލިއެވެ. ބޭރަށް ދާއިރު ، ރީތިކޮށް ހެދުން އަޅަން ދަސްކުރަން ޖެހޭކަމުގައި ޚައިރާދު ބުންޏެވެ. ހަމަ އެއާއެކު ، އެއީ ކާކާ ވާދަކުރަންތޯ އަޝްހަރު އެހިއެވެ. ޚައިރާދު ބޭނުންވަނީ މީހަކާ ވާދަކުރަން ނޫންކަމުގައި ބުންޏެވެ. އޭނާގެ ބޭނުމަކީ ، އަޝްހަރާއެކު ހުންނައިރު ، ރީތިކޮށް ހެދުން އަޅައިގެން ހުންނަންކަމުގައި ބުންޏެވެ. އޭނާއާ ގުޅިގެން ، އެއީ އޭނާ އަޅާ ހެދުންކަމަށްވިޔަސް ، އުޅޭގޮތްކަމަށްވިޔަސް ، އަޝްހަރާދިމާއަށް މީހަކަށް ކިޔޭނެ އެއްވެސް އެއްޗެއް އޮންނަން ބޭނުންނުވާކަމުގައި ޚައިރާދު ބުންޏެވެ.

ސާރާ ދެއްކި ވާހަކަތަކުން ، ޚައިރާދަށް ކޮށްފައިވާ އަސަރު އަދިވެސް ފިލައިގެން ނުދާކަން އަޝްހަރަށް އެނގުނެވެ. އަދި ސާރާގެ ވާހަކަޔަށް އެހާބޮޑަށް ސަމާލުކަން ނުދިނުމަށް އަޝްހަރު އެދުނެވެ. ސާރާގެ ހެދުން އެޅުމުގެ ވަށްޓަފާޅީގެ ތެރެޔަށް ގޮސް ޚައިރާދުގެ އަމިއްލަގޮތްތައް ދޫކޮށްނުލުމަށް އަޝްހަރު ބުންޏެވެ. ކޮންމެ ގޮތަކަށް ހުރިކަމަށްވިޔަސް ، ޚައިރާދުގެ ރީތިކަމާއި ފުރިހަމަކަން އެހެންމީހަކާ އަޅުވައި ނުކިޔޭނެކަމަށްވެސް އަޝްހަރު ބުންޏެވެ. ޚައިރާދުގެ ހިތަކީ ސާފު ހިތެކެވެ. އެހެން މީހުންހެން ދެއްކުންތެރިކަން އެހިތަކު ނުވެއެވެ. އެހިތުގެ ސާފުކަމާއި މަޢުޞޫމިއްޔަތު ބޭރުފުށަށްވެސް އެނގެއެވެ. ފެޝަން ޕެރޭޑްތަކުގައި އެހެންމީހުންނާއެކު ވާދަކުރާކަށް ޚައިރާދަކަށް ނުޖެހޭނެއެވެ. ޚައިރާދުގެ ރީތިކަމާއި ފުރިހަމަކަން ދައްކަންވީ އެހެން މީހުންނަކަށް ނޫނެވެ. އަޝްހަރަށެވެ. ކޮންމެ ހެދުމެއްލިޔަސް ، ކޮންމެގޮތަކަށް ހުއްޓަސް ، އަޝްހަރަށް ޚައިރާދު ރީއްޗެވެ. އެހެންވީމާ ހެދުން އެޅުމުގައި ޚައިރާދު ގެންގުޅޭ އަމިއްލަ ގޮތް ބަދަލުކުރާނެކަމެއް ނެތެވެ. އެއީ އަޝްހަރަށް އެންމެ ރީތި ގޮތެވެ. ޚައިރާދުގެ ރީތިކަން ދެއްކުމަށްޓަކައި ފެޝަންތަކުން މަސްހުނިވެފައި ހުންނަ ހެދުންލައި ، ދެއަތާއި ކަރު ފުރެންދެން ގަހަނާއަޅާކަށް ނުޖެހޭނެއެވެ. އެއިން އެކައްޗަކާ ނުލައިވެސް ، އެހެން މީހުންނަށްވުރެ ޚައިރާދު ފުރިހަމައެވެ.

ޚައިރާދުގެ އަތުގައި ހިފާލައި ، އެހުރިހާކަމެއް ދޫކޮށްލުމަށް ޚައިރާދުގެ ކިބައިން އަޝްހަރު އެދުނެވެ. އަދި އޭނާގެ ގޮތުގައި ޚައިރާދު ހުރުމަކީ އަޝްހަރު އެންމެ އެދޭގޮތްކަމަށް އަޝްހަރު ބުންޏެވެ. އަޝްހަރު ، ޚައިރާދާ ގާތަށް ޖެހިލިއެވެ. އަދި ޚައިރާދަކީ ، އޭނާއަށް ވަރަށް ޚާއްޞަ އަދި މުހިންމު އިންސާނެއްކަމަށް ބުންޏެވެ. އެއްވެސްމީހަކާ ވާދަނުކުރުމަށް އެދުނެވެ.

(ނުނިމޭ)