"ޗާލު މާލެ ސިޓީ" އަމާޒަށް ވާސިލުވުމުގައި އެންމެހާ ފަރާތްތަކުގެ އެއްބާރުލުން މުހިންމު ކަމުގައި މާލޭ ސިޓީ ކައުންސިލުން ބުނެފި އެވެ.
އެ ކައުންސިލުން މިހެން ބުނީ ބޮޑުތަކުރުފާނުމަގު ޒީނަތްތެރި ކުރުމުގެ ގޮތުން އިންދާފައިވާ ބޯގަންވިލާ ގަސްތައް ވަގަށް ނަގާތީ އެކަމަށް ރިޔާއަތްކޮށް، ކޮށްފައިވާ ޓްވީޓެއްގަ އެވެ.
އެ ޓްވީޓުގައި ބުނީ ބޮޑުތަކުރުފާނު މަގުގައި އިންދާފައިވާ ކަދުރު ރުއްތަކުގެ ޕިޓްތަކުގައި ޖަހާފައި ހުރި ބޯގަންވިލާ ގަސްތައް ވަގަށް ނަގަމުންދާކަން ހިތާމައާއެކު ފާހަގަ ކުރާ ކަމަށެވެ. އަދި އެކަން ނުކުރުމަށް ނަސޭހަތްތެރިވާ ކަމަށެވެ.
ބޮޑުތަކުރުފާނު މަގުގައި ކަދުރު ރުއްތަކާއި ބޯގަންވިލާ ގަސްތައް އިންދާފައިވަނީ މާލޭގައި "އެއްލައްކަ ގަސް" އިންދުމަށް ސިޓީ ކައުންސިލުން ކުރިއަށް ގެންދާ ޕްރޮގްރާމުގެ ދަށުން ނެވެ.
މި ޕްރޮގްރާމަކީ މާލެ ސިޓީކައުންސިލުގެ ސްޓްރެޓެޖިކް އެކްޝަން ޕްލޭންގެ 2.6 ގައިވާ ގަސް އިންދާ ހައްދާނެ ގޮތުގެ ޕްލޭން ކަމާ ބެހޭ ފަންނީ ފަރާތްތަކުގެ ލަފައާއި މާލެ ސިޓީގެ ރައްޔިތުންގެ ބައިވެރިވުމާއި އެއްގޮތަށް އެކުލަވާލުމުގެ މަސައްކަތުގެ ތެރެއިން ކުރިއަށްދާ މަޝްރޫއެކެވެ.
