އިނގިރޭސި ޕްރިމިއަރ ލީގުގައި ރޭ އާރޮން ރަމްސީގެ ހެޓްރިކުން އާސެނަލްއިން އެވަޓަންގެ މައްޗަށް 1-5 ގެ ބޮޑު މޮޅެއް ހޯދައިފިއެވެ.
މިމެޗުގައި އާސެނަލްގެ ފަރާތުން މޮޅު ކުޅުމެއް ފެނިގެންދިޔައިރު އެޓީމާ އަލަށްގުޅުނު ހެންރިކް މިކިތާރިޔަން ވަނީ މޮޅުކުޅުމެއްދައްކައި ތިން ލަނޑުޖެހުމަށް އެހީތެރިވެދީފައެވެ. މިއީ މެންޗެސްޓާ ޔުނައިޓެޑް ދޫކޮށް އާސެނަލަށް ބަދަލުވިފަހުން ފުރަތަމަ އެގާރައިގައި އޭނާ ކުޅުނު ފުރަތަމަ މެޗެވެ.
އާސެނަލްގެ އެމިރޭޓްސް ސްޓޭޑިއަމްގައި ކުޅުނު މިމެޗުގައި އެޓީމުގެ ފުރަތަމަ ލަނޑުޖަހައިދިނީ 6 ވަނަ މިނެޓުގައި ހެންރިކް މިކިތާރިޔަން ދިން ބޯޅައަކުން ރަމްސީ އެވެ. އާސެނަލްގެ ދެވަނަ ލަނޑު ކާމިޔާބުކޮށްދިނީ 14 ވަނަ މިނެޓުގައި އެޓީމުގެ ކެޕްޓަން ކޮޝިއެލްނީއެވެ. އޭގެ 5 މިނެޓު ފަހުން ތިންވަނަ ލަނޑު ޖަހައިދިނީ ރަމްސީ އެވެ. ފުރަތަމަހާފު ނިމުމުގެކުރީން އާސެނަލްވަނީ އިތުރު ލަނޑެއްޖަހައި ހަތަރުލަނޑުގެ ލީޑެއްނަގައިފައެވެ. މިލަނޑު ކާމިޔާބުކޮށްދިނީ 37 ވަނަ މިނެޓުގައި ޕިއޭރް އެމެރިކް އޮބަމަޔަންއެވެ. މިއީ އާސެނަލްގެ ރެކޯޑް ޓްރާންސްފާ ފީއަކަށް އެޓީމަށް ބަދަލުވުމަށްފަހު އެޓީމަށް ކުޅެދިން ފުރަތަމަ މެޗުގައި އޭނާ ކާމިޔާބުކޮށްދިން ފުރަތަމަ ލަނޑެވެ.
ދެވަނަހާފު ފަށައިގެން އެވަޓަންވަނީ ކުޅުން ރަނގަޅުކޮށް އާސެނަލް އަށް އުނދަގޫތައް ކުރިމަތިކޮށްފައެވެ. މިގޮތުން އެޓީމުގެ ހަމައެކަނި ލަނޑު ކާމިޔާބުކޮށްދިނީ 64 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެންނިކުތް ޒުވާން ފޯވާޑް ޑޮމިނިކް ކަލްވަޓް ލުވިންއެވެ. މިމެޗުގައި ފަހުބައިގައި އާސެނަލްގެ އެއްވަނަ ގޯލްކީޕަރު ޕީޓަރ ޗެކް އަށް އަނިޔާވެ އެޓީމަށް އިތުރު މައްސަލަތަކާ ކުރިމަތިލާންޖެހިފައިވެއެވެ. އޭނާގެ ބަދަލުގައި ކުޅެންނިކުތް ޑޭވިޑް އޮސްޕީނާގެ ފަރާތުން ރަނގަޅު ސޭވްތަކެއް ފެނިގެންގޮސްފައިވެއެވެ. މިމެޗުގައި އާސަނަލް އިން ޖެހި ފަސްވަނަ ލަނޑު ކާމިޔާބުކޮށްދިނީ 74 ވަނަ މިނެޓުގައެވެ. އެލަނޑު ޖަހައިދިނީ މެޗުގެ މޮޅު ކުޅުންތެރިޔާގެ މަޤާމް ހޯދި ރަމްސީއެވެ.
މިމެޗުން ލިބުނު ތިން ޕޮއިންޓާއިއެކު އާސެނަލް އަދިވެސް އޮތީ ތާވަލްގެ ހަވަނައިގައި 26 މެޗުން 45 ޕޮއިންޓް ހޯދައިގެންނެވެ. އެވަޓަން އޮތީ 31 ޕޮއިންޓާއިއެކު ތާވަލްގެ 10 ވަނައިގައެވެ.
