ދިވެހި ރާއްޖޭގެ އެމްބަސީއެއް ތައިލެންޑުގައި ހުޅުވައިފިއެވެ.
ރައީސް އޮފީހުން ބުނި ގޮތުގައި ރާއްޖޭގެ ޖުމްހޫރިއްޔާގެ ޤާނޫނު އަސާސީގެ 116 ވަނަ މާއްދާއިން ރައީސުލްޖުމްހޫރިއްޔާއަށް ލިބިދޭ އިޚްތިޔާރުގެ ދަށުން، "ތައިލެންޑުގައި ހުންނަ ދިވެހިރާއްޖޭގެ އެމްބަސީ"ގެ ނަމުގައި އެމްބަސީއެއް ހުޅުވީ ހުސްވި ޑިސެމްބަރު މަހުގެ 30 ވަނަ ދުވަހުއެވެ.
ރައީސް އޮފީހުން ބުނީ ދިވެހި ރާއްޖޭގެ އެމްބަސީއެއް ތައިލެންޑުގައި ޤާއިމުކުރެއްވީ، ދިވެހި ސަރުކާރުގެ ޚާރިޖީ ސިޔާސަތާ އެއްގޮތްވާ ގޮތުގެމަތިން ބޭރު ދުނިޔެއަށް ރާއްޖެ ތަޢާރުފުކޮށް، ތައިލެންޑާއި ދިވެހިރާއްޖެއާ ދެމެދު ވިޔަފާރިއާއި އިންވެސްޓްމަންޓުގެ ދާއިރާއިން ގުޅުން އިތުރަށް ހަރުދަނާކުރުމަށާއި، ދިވެހި ވިޔަފާރިވެރިންނަށް ތައިލެންޑުގައި އެހީތެރިކަން ފޯރުކޮށްދިނުމަށާއި، ދިވެހިރާއްޖެއާއި ތައިލެންޑާ ދެމެދު އެކުވެރިކަން ބަދަހިކުރުމުގެ ބޭނުމުގައި ކަމަށެވެ.
ރާއްޖެއިން ތައިލެންޑަށް ކަނޑައަޅުއްވާފައިވާ ހުންނަވާ ސަފީރަކީ ކުރީގެ ރައްޔިތުންގެ މަޖިލީހުގެ މެމްބަރުކަންވެސް ކުރެއްވި ޑީއާރުޕީގެ މިހާރުގެ ވަގުތީ ލީޑަރު ކާނަލް މުޙަންމަދު ނަޝީދުއެވެ.
