ކުރިއަށް އޮތް ތާނގައިވެސް އަޅުގަނޑުމެން ޑިފޯލްޓް ވާނެ ހާލަތެއް އަންނާނެ ކަމަށް ލަފައެއް ނުކުރެވޭ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ރައްޔިތުންގެ މަޖިލީހުގައި ވާހަކަދައްކަވަމުން މިނިސްޓަރ ވިދާޅުވީ އެއްވެސް އިރެއްގައި ރާއްޖޭ ޑިފޯލްޑްވެފައެއް ނެތް ކަމަށެވެ. އަދި ދިވެހިރާއްޖެއަކީ ޒަމާނުއްސުރެ ބަރާބަރަށް ޑެޓް ސަރވިސް ކުރާ ޤައުމެއް ކަމަށެވެ.
"އެހެންވީމަ ދަރަންޏަށް ލުއިގޮތްތަކެއް ހޯދުމަށް، އެކި އެކި ފަރާތްތަކާއި ވާހަކަ ދައްކަން، އެ ވިސްނުމެއް އަޅުގަނޑުމެން ނުގެންގުޅެން." މިނިސްޓަރ އަމީރު ވިދާޅުވިއެވެ.
މިނިސްޓަރ އަމީރުގެ ވިދާޅުވީ ސަރުކާރުން ޚަރަދު ކުޑަކުރުމަށް ނިންމީ، ރަޝިޔާ ޔޫކްރެއިން ހަނގުރާމައިގެ ސަބަބުން ދުނިޔޭގެ ކާބޯތަކެތީގެ އަގުތައް މަތިވުމުން ކުރިމަތިވާ މައްސަލަތައް ކުޑަ ކުރުމަށް ކަމަށެވެ. އަދި ފިއުލް ސަބްސިޑީގެ ގޮތުގައި 343 މިލިއަން ރުފިޔާ ބަޖެޓް ކޮށްފައިވީނަމަވެސް މިހާރުވެސް ގާތްގަނޑަކަށް 1.3 ބިލިއަނަށް ވުރެ ގިނަ ރުފިޔާ އެކަމަށް ޚަރަދު ކުރެވިފައިވާ ކަމަށެވެ.
އެހެން ކަމުން ޚަރަދު ކުޑަ ކުރަން ޖެހިފައިވާކަން ފާހަގަކުރައްވާ މިނިސްޓަރ ވިދާޅުވީ ދައުލަތުގެ ޚަރަދުތައް ކުޑަކުރުމަށް ސަރުކާރުން މަސައްކަތް ކުރަމުންދާ އިރު ދަރަނި ދެއްކުމާއި މުސާރަ ދިނުން ފަދަ ކަންކަމަކީ އިސްކަމެއް ދެވިގެން ކުރެވެމުންދާ ކަންކަމަށް ވުމުން މިފަދަ ކަންކަމުގައި އެއްވެސް ދައްޗެއް މިހާތަނަށް ނެތް ކަމަށެވެ.
