މާލޭގައި އުޅޭ ސްރީލަންކާ މީހުން އިއްޔެކުރި މުޒާހަރާއިން ހައްޔަރުކުރި ލަންކާ މީހާ ޝަރުތުތަކަކާއެކު ދޫކޮށްލައިފިއެވެ.
ފުލުހުން ބުނީ އޭނާ ހައްޔަރުކުރީ މުޒާހަރާގެ ތެރެއިން ފުލުހުންގެ ދައުރު އަދާކުރުމަށް ހުރަސް އަޅައި، އަމުރަށް ނުކިޔަމަންތެރިވި ކަމުގެ ތުހުމަތުގައި ކަމަށެވެ. އަދި އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ޝަރުތު ކުރުމަށްފަހު ދޫކޮށްލާފައިވާ ކަމަށެވެ.
ރާއްޖޭގައި އުޅޭ ސްރީލަންކާގެ މީހުން މުޒާހަރާކުރީ ސްރީލަންކާގެ ރައީސް ގޮތަބަޔާ ރާޖަޕަކްސަ ފިއްލަވައިގެން ރާއްޖެ ވަޑައިގަތުމުން އެކަމާ ދެކޮޅު ހެދުމުގެ ގޮތުންނެވެ.
އަލިމަސް ކާނިވާ ސަރަހައްދު ކައިރިން ޕެޓްރޯލް ޝެޑް ކުރިމަތީގައި އެ މުޒާހަރާ ފަށާފައިވަނީ އިއްޔެ މެންދުރުފަހު 3:30 އެހާކަންހާއިރުއެވެ.
މުޒާހަރާގެ ބައިވެރިން ތިބީ އެފަދަ އަނިޔާވެރިންނަށް ދިވެހި ސަރުކާރުން ހިމާޔަތް ނުދިނުމަށް ދިވެހި ރައްޔިތުން ބާރުއަޅައި ދިނުމަށް ޖަހާފައިވާ ބެނަރތަކާއި ޕޯސްޓަރުތައް ހިފައިގެންނެވެ.
