ވިލިމާލޭގައި ހުރި އަންހެން ކަނބަލުންގެ މައްސަލަތަކުގައިވެސް މިއަދު ބޭނުންވަނީ އަޑު އުފުލާނެ ހިތްވަރު ހުރި ކަނބަލެއް ކަމަށް މޯލްޑިވްސް ނެޝަނަލް ޕާޓީ (އެމްއެންޕީ) ގެ ރައީސް ކާނަލް ރިޓެއަރޑް މުޙައްމަދު ނާޒިމް ވިދާޅުވެއްޖެއެވެ.
އެ ޕާޓީގެ ފަރާތުން ވިލިމާލޭ އަންހެނުން ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަންގައި ވާދަކުރާ އަމިނަތު ޝީޒާގެ ކެމްޕޭން ޖަގަހަ ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ނާޒިމް ވިދާޅުވީ އެޤާބިލްކަމާއި ކެރުންތެރިކަން ހުރި ކެނޑިޑޭޓަކީ ޝީޒާ ކަމަށެވެ.
ދަނގެތީ ދާއިރާގެ މެމްބަރުކަން ވެސް ކުރައްވާ ނާޒިމް ވިދާޅުވީ މިހާރު އޮތް ވެރިކަމުގައާއި، ނިމިދިޔަ ވެރިކަމުގައި ވެސް ވިލިނގިއްޔަކީ ވަރަށް ބޮޑަށް އެކަހެރިކޮށްފައިވާ ތަނެއްކަމަށެވެ.
"މިހާރުވެސް ވިލިމާލޭ ދާއިރާގެ މަޖިލިސް މެމްބަރު ސަރުކާރުން ވިލިނގިއްޔަށް ވެފައިވާ ވައުދުތައް ނުފުއްދައިގެން ކޮންމެ ދުވަހަކު ވެސް ވުޒާރާތަކަށް ވަދެ ކުރާ މަސައްކަތަކީ ފާހަގަ ކޮށްލެވޭ މަސައްތެއް. މެމްބަރު ކިތަންމެ މަސައްކަތެއް ކުރި ނަމަވެސް ސަރުކާރުން އިޖާބަ ނުދޭނަމަ އެއީ ސަރުކާރުން ރައްޔިތުންނާއިމެދު ވެވޭ ބޮޑު ބޭއިންސާފެއް." ނާޒިމް ވިދާޅުވިއެވެ.
މީގެ އިތުރުން ނާޒިމް ވިދާޅުވީ ވިލިމާލޭގައި ކުރެވޭ ތަރައްޤީގެ ކަންކަމުގައިއާއި، އުމްރާނީ، އަދި އިޖުތިމާއި ކަންކަމުގައި ވެސް ޝިޒާއަކީ އިސްނަގާ އަންހެނުންގެ ތެރެއިން ފާހަގަ ކޮށްލެވޭ ކަނބަލެއް ކަމަށެވެ. އަދި އެމްއެންޕީ ވުޖޫދުކުރީ ވެސް ރައްޔިތުންނަށް ޚިދުމަތް ކުރުމަށް ކަމަށެވެ. އެހެންކަމުން ވިލިމާލޭގެ ހުރި މައްސަލަތަކާއި ކުރިމަތިލެވޭނެ ގާބިލްކަން ހުރި ހަމައެކަނި ކެނޑިޑޭޓަކީ ޝީޒާކަމަށް ވެސް ނާޒިމް ވިދާޅުވިއެވެ.
ނާޒިމް ވިދާޅުވީ އަންހެނުންގެ ތަރައްޤީއަށް މަސައްކަތް ކުރާ ކޮމެޓީއަކީ ވެސް ޤާނޫނީ ގޮތުން މަތިކޮށްފައިވާ ޒިންމާތަކެއް އެކުލެވޭ މަޤާމަކަށްވާއިރު، މިމަޤާމަށް އިންތިޚާބު ކުރާ ފަރާތަކީ އެޒިންމާތައް އަދާކުރެވޭނެ ބޭފުޅަކަށް ވާންޖެހޭ ކަމަށެވެ.
