(14 އޭޕްރީލް 2022 ގެ ބަޔާ ގުޅޭ)
މުނީރާގެ ކައިވެނީގެ ޙަފްލާ ބޭއްވުނު ދުވަހާޖެހިގެން އައިދުވަހު، 3 ހަފުތާގެ ވިޔަފާރި ދަތުރެއްގައި ކަރީމް، ޖަޕާނަށްދާން ފުރިއެވެ. ޢަބްދުﷲ ވެސް، ބައްޕަ ކަރީމާއެކު އެދަތުރުގައި ދިޔައެވެ. އެމެރިކާގައި ޔުނިވަރސިޓީ ތަޢުލީމު ޙާޞިލް ކުރަންޖެހޭ، އުނދަގޫ ދުވަސްތައް، ޢަބްދުﷲ އާ ވަނީ ކުރިމަތިވެފައެވެ. އެކަން ރޭވިފައިއޮތީ، ބައްޕައާއެކު ޖަޕާނުގައި ދުވަސްކޮޅަކު މަޑުކޮށްލުމަށްފަހު، ޖަޕާނުން ކެލިފޯނިއާއަށް ޢަބްދުﷲ ދަތުރުކުރުމަށެވެ. 3 މަސްވަންދެން، އަޅުގަނޑުގެ އެލޯބިދަރިފުޅުގެ މޫނުވެސް ނުފެންނާނެކަން ހަނދާންވާ ކޮންމެ ފަހަރަކު ލޮލުން ކަރުނަ އައުދެއެވެ.
ރިޔާޛުގައި ހުންނަ އަޅުގަނޑުމެންގެ ގަނޑުވަރުގައި، މިތިބެނީ އަޅުގަނޑާ އަދި އަޅުގަނޑުގެ އަންހެން ދެބެންނެވެ. ދެން ތިބޭނީ ޚާދިމުންނެވެ. ދިރާސީ އައުއަހަރަށް ތައްޔާރުވުމަށްޓަކައި، ކުރަންޖެހޭ މަސައްކަތްތަކުގައި އުޅެންޖެހޭތީ، އަންހެން ދެކުދިންގެ ފަރާތުން މަންމަޔަށް މާބޮޑު ތަކްލީފެއް އުފުއްލާކަށް ނުޖެހެއެވެ. ހުހަށްލިބޭ ވަގުތުތައް އެކުދިން ބޭނުންވަނީ އެކުދިންގެ ރައްޓެހިންނާއެކު ހޭދަކުރުމަށެވެ. ޒުވާން ޢުމުރުގައި އެކުދިނއެކުރާ ކަންކަނ އެއީ އަޅުގަނޑުމެންނަށް މާކަކަމުދާނެ ކަންކަމަކަށް ނުވާނެއެވެ. އަޅުގަނޑަކީ މާބޮޑަށް އަރާމުކުރާ މީހެއްނޫނީމެވެ. ވަރަށް ފަސޭހައިން ފޫހިވާނެއެވެ. ތިމާގެ އަމިއްލަ މީހުންދެކެވެސް މެއެވެ. ޢާންމުކޮށް އަޅުގަނޑު އުޅެނީ ގަނޑުވަރުގެ ދެވަނަ ފަންގެފިލާގައެވެ. ދޭތެރެ ދޭތެރެއިން ދަރިންގެ ކޮޓަރީގެ ދޮރުމައްޗަށް ހުއްޓިލެވެއެވެ. އެކުދިން ތަންކޮޅެއް ޅައިރު، އުޅެނީ އަޅުގަނޑުމެންނާއެކު މި ފަންގެފިލާގައި މި ބިތުގައެވެ. އެހެންނަމަވެސް، މަހާގެ ފެޝަންމެގެޒިންތަކާ މިއުޒިކް ޓޭޕްތައް ހަލާކުކުރުމަށް އަމާނީގެންގުޅޭ ވިސްނުމާއި ޖެއްސުންކުރުން ބޮޑުވުމާގުޅިގެން، އަމާނީ އުޅެނީ ގަނޑުވަރުގެ ދެކުނު ބިތުގައެވެ. އަދި މަހާ ކުރިންވެސް އުޅުނުގޮތަށް އެއުޅެނީ އުތުރު ބިތުގައެވެ. ދެބެންގެ ކޯޅުން ހަމަޖެއްސުމަށްޓަކައި، އަޅުގަނޑު އެތައްކަމެއް ކޮށްފީމެވެ.
ޤުރުއާން ކިޔެވުމާއި ނަމާދުކުރުމުގެ މަޑުމައިތިރި ހިތްފަސޭހަކަން ލިބިގެން އަންނާނީ އަމާނީގެ ކޮޓަރިންނެވެ. ހުޅަނގުގެ ޒަމާނީ އަޑުގަދަ، ރޮކް އެންޑް ރޯލް ލަވަތަކާއި، އަޑުހަރުކޮށް ހުނުމުގެ އަޑުފައްގަނޑު އަންނާނީ މަހާގެ ކޮޓަރި ތެރެއިންނެވެ. ރަނގަޅާއި ނުބައިގެ ޙައްދުންނެއްޓިތިބި، ދެކުދިންނަށް ފާރަލައިލައި އަޅުގަނޑު ވަރުބަލިވެއްޖެއެވެ. ދެމީހުންނަކީވެސް ބަލަހައްޓަންޖެހޭ ދެމީހުންނެވެ. އަމާނީއަކީ ދީނީކަންކަމުގައި ޙައްދުން ނައްޓާލައިފައިވާ ކުއްޖެކެވެ. އެއާއިދިކޮޅަށް، މަހާއަކީ، ދީނީކަންކަމާ އިދިކޮޅަށް ވިސްނުންގެންގުޅޭ އަދި އެކަމުގައި ޙައްދުން ނައްޓާލައިފައިވާ ކުއްޖެކެވެ. ބަލައިނުލާ ދޫކޮށްލައިފިނަމަ ގޯޅިއަޅައިގެންދިއުމީ އެކަށީގެންވާ ކަމެކެވެ. އެކަމަކުވެސް ކުދިންނައިގެން އުޅެވޭނީވެސް ވަކި ވަރަކަށެވެ. އަންހެން ދެކުދިންގެ ކަންކަމުގައި ބޯހާސްކޮށް، ވަރުބަލިވުމާގުޅިގެން، އަޅުގަނޑު މިހާރު މިއުޅެނީ އަޅުގަނޑުގެ ގަނޑުވަރުގައި ހަދާފައިވާ އަމިއްލަ ބައިގައެވެ.
މުނީރާއަށް ކުރިމަތިވި ޙާލަތާގުޅިގެން، އަޅުގަނޑުގެ ވިސްނުން ވަކިކަމަކަށް ހުސްކޮށްލައި، އެކަމަކައިގެން އުޅެވޭވަރުގެ ހިތްވަރެއް ނެތެވެ. ޝާހީ ޢާއިލާގެ ހަވީރުގެ ކުދި ކުދި އެއްވުންތަކާއި ސައިފޮދަށްގޮސް، ހިތްހަމަޖެހިލައިގެން ބައިވެރިވެ އުޅުމީ މިވަގުތަށް ކުރެވޭވަރުގެ ކަމެއްނޫނެވެ.
ހާދީ، އޭނާގެ ޒުވާން ހަގުއަނބި، ހަނީމޫނަށް ގެންދިޔައީ މަޣުރިބަށެވެ. އެއްމަސް ދުވަހުގެ މުއްދަތަކަށެވެ. ހާދީގެ ފަރާތުން، މުނީރާއަށް ޖިސްމާނީގޮތުން ލިބިދާނެ ގެއްލުމަކަށް ވެފައިހުރި ކަންބޮޑުވުންވެސް ކުޑައެއްނޫނެވެ. އޭނާ ސަލާމަތުން ހެޔޮޙާލުގައި ހުރިތޯ ބަލައިލަން އަބަދުވެސް ބޭނުންވެއެވެ. އެހެންކަމުން، ތައްމާމާ ގުޅައިލާ އެމީހުންގެ ޚަބަރެއްވިތޯ އަހައިލީމެވެ. އަޅުގަނޑު ހަމަ އަޖައިބުވީމެވެ. ކަންބޮޑުވިޔަކަސް އެއީ ތަންފުކެއް ބޮޑުވަރެކެވެ. ހާދީކުރެން، އެމީހުންތިބޭ ހޮޓަލުގެ ފޯނު ނަންބަރު އަހައިލަންވެސް ތައްމާމުގެ ހިތަކަށް ނޭރިއެވެ. އަޅުގަނޑަށް، ފޯނުގެ އަތްގަނޑު ބޭއްވުނީ ކިހައި ބާރަކަށްކަމެއް ނޭނގުނެވެ. ވީ ފޫހިންނާއި އަރައިގަތް ރުޅިގަނޑުގައި ތައްމާމާދިމާއަށް އެއްޗެކޭ ބުނެވިދާނެތީ، އަވަސް އަވަހަށް ފޯނުގެ އަތްގަނޑު ޖެހުނީއެވެ. މޮބައިލްފޯނެއްނަމަ، އަތުގެ ނެތްތަނަށް ހޫރައިލެވުނީހެވެ.
މަޑުކޮށްލައިގެން ތިބުން ފިޔަވައި ކުރާނެ އެއްވެސް ކަމެއް ނެތެވެ. އެއީ ޙަރާމްކަމެއްކަން އެނގުނުނަމަވެސް، ބާރެއްނެތޭވަރަށް އެއަށްދެވިހިފާފަ އޮތުމާއެކު، ރާފޮދެއް ބޮއެލުމުންނޫނީ ހިތަށް ހަމަޖެހުމެއް ނުލިބެއެވެ. ކުޑައިރުކޮޅެއްފަހުން، ތައްމާމު ފޯނުކުރިއެވެ. އަދި ހާދީ ހޮޓަލުންބޭރަށް ދިޔަގަޑީގައި، މުނީރާ ފޯނުކުރިވާހަކަ ބުންޏެވެ. އަދި އޭނާގެ ފިރިމީހާގެ ނުރައްކާތެރިކަމާމެދު، ކުރިން ހީކުރެވިފައިވާގޮތަށްވުރެ ބޮޑަށް، މުނީރާ ކަންބޮޑުވެފައިހުރި ވާހަކަ ބުންޏެވެ.
ފޯނުގެ އަތްގަނޑު ހިފައިގެންހުރެ، އެނދުހުރަހަށް އަޅުގަނޑު ވެއްޓުނެވެ. ހާދީގެ ޢަމަލުތައް ހުންނާނެގޮތް ހިތަށްއަރާފައި އަޅުގަނޑުވެސް ބިރުވެރިކަމެއްގެ ތެރެޔަށް ދިޔައެވެ. ކުރާނެކަމެއްނެތްތާއެވެ ! އަޅުގަނޑަށްވެސް އަދި އެހެން މީހަކަށްވެސް، އެފަކީރު ސަލާމަތްކުރުމަށްޓަކައި ކުރެވޭނެ ހަމައެއްވެސް ކަމެއްނެތެވެ. މިހާރު މުނީރާއަކީ ޝަރުޢީގޮތުން ހާދީގެ އަތްނބެކެވެ. މާކުރީއްސުރެ ސުޢޫދީގެ ޘަޤާފަތު އައިސްއޮތްގޮތުން، އަންހެނަކާއި ފިރިހެނެއްގެ އަމިއްލަ ކަންތައްތަކުގެ ތެރެޔަށް އެއްވެސްމީހަކަށް ނުވަދެވޭނެކަން އަޅުގަނޑަށް އޮތީ އެނގިފައެވެ. އެއްހާސް އަހަރު އައިސް ފާއިތުވެދިޔަޔަސް، ސުޢޫދީ އަންހެނެއްގެ ހަށިގަނޑު އޮންނާނީ ފިރިހެނުންގެ މިލްކަކަށް ވެފައެވެ. އެޙަޤީޤަތް ބަދަލެއް ނުވާނެއެވެ. އަޅުގަނޑުމެން ސުޢޫދީ އަންހެނުންގެ ނިކަމެތިކަމާމެދު، އަޅުގަނޑު އިންތިހާއަށް ކަންބޮޑުވެއެވެ.
އަޅުގަނޑުގެ ލޮލުން ފައިބަންފެށި ކަރުނަތައް އޮހި ތަންމަތި ތެމުނެވެ. ހިތްތެޅެންފެށިއެވެ. ހިތުގައި އޮތް ބިރުވެރިކަމުން އިތުރަށް ހާސްކަން ގެނެސްދިނެވެ. އެވަގުތު، ކޮންމެވެސް އެހެންކަމަކަށް އަޅުގަނޑުގެ ހިތް އަނބުރައިލުމަށް ވިސްނީމެވެ. އަދި ކޮންމެވެސް ކަމެއްގައި މަސްޣޫލުވުމަށް ނިންމީމެވެ. އަޅުގަނޑުމެންގެ ޢާއިލާގެ ރާ ސްޓޯރގެ ބާކީ ބެލެހެއްޓުމަށް އަޅުގަނޑަށްވަނީ މިދުވަސްކޮޅު އިހުމާލުވެވިފައެވެ. އެހެންކަމުން، އެކައުންޓްތައް ބަލައި ޖަމާ ދިމާވޭތޯ ބަލަން ހިތަށް އެރިއެވެ. ފަހަރެއްގައިވެސް ރާފޮދެއް ބުއިމުގެ ވިސްނުމެއްގައެއްނޫނެވެ. ހިސާބު ދިމާވޭތޯ ބަލައިލުމުގެ ބޭނުމުގައެވެ. އެއްވެސްމީހަކު ސިއްރުން އެއަގުބޮޑު އަދި ސިއްރުން ފޮރުވިފައިވާ ފުޅިތަކުން ފުޅިއެއްނަގާފައިވޭތޯ ބަލައިލުމަށްޓަކައެވެ. ރަލުގެ ބާވަތްތަކަކީ ސުޢޫދީ ޢަރަބިއްޔާއަށް އެތެރެކުރުން މަނާކުރެވިފައިވާ އެއްޗެކެވެ. އެހެންކަމުން ކަޅުބާޒާރުން އެހައިގިނައިން އެތަކެތި ލިބޭކަށްވެސް ނުހުރެއެވެ. އަދި ކަޅުބާޒާރުގައި އެހައި އަގުވެސް ބޮޑުމެއެވެ. ރާފުޅިއެއްގެ އަގު ހުންނަނީ 55 އެމެރިކާ ޑޮލަރާއި 95 ޑޮލަރާ ދެމެދުގައެވެ. ބްރޭންޑް މަތިވާވަރަކަށް އަގުބޮޑުވާނެއެވެ.
ދާދިމިދާކަށްދުވަހު، ޔޫރަޕުން ގެނެސްފައިވާ އަގުބޮޑު ފަރުނީޗަރާއި، ރީތި ސާމާނުތަކުން އާބާތުރަފިލުވާފައިވާ، އަޅުގަނޑުގެ ކޮޓަރިތެރެއިންލާފައި ކޮރިޑޯތެރެޔަށް ނުކުމެ، ހިނގައިގަތީމެވެ. ފިލިޕީންސް ޚާދިމާއެއް، ރާފުޅިތައްލާފައިހުރި ރެކްތައް ފޮޅާ ސާފުކުރަމުން ގެންދެއެވެ. ކޮންމެވެސް އެހެންކަމެއްކޮށްލަން އިހަށް އެތަނުންދާން އޭނާގާތު އަޅުގަނޑު ބުނީމެވެ. ޚާދިމާ އެތަނުން ދިޔަކަން ޔަޤީންކުރުމަށްފަހު، ރާފުޅިތައް ގުނުމުގެ މަސައްކަތް ފެށީމެވެ. ކަރީމް ވަނީ އައުފުޅިތައްގެނެސް، ޖަމާ މުއްސަނދިކޮށްފައިކަން އެނގުމުން ވަރަށް އުފައުވިއެވެ. ރަލާއެއްކުރާ ސްޕިރިޓްގެ ދުއިސައްތަޔަށްވުރެގިނަ ފުޅިހުއްޓެވެ. އަދި އަގުބޮޑު ރަލުގެ ފަސްދޮޅަސްފުޅި ހުއްޓެވެ.
ހިނިތުންވެހުރެ، ރާ ރައްކައުކުރެވިފައިވާ ތަނަވަސް ކޮޓަރީގެ ތެރޭގައި ހިނގައިލީމެވެ. އެތަން ތައްޔާރުކުރެވިފައިވަނީ އޯކް ލަކުޑި ބޭނުންކޮށްގެންނެވެ. އެއީ ތަނުގެ ފިނިހޫނުމިން ހެޔޮވަރެއްގައި ހިފެހެއްޓުމަށްޓަކައެވެ. ދުއިސައްތަފުޅި ގުނުނު ހިސާބުން، އަޅުގަނޑު، ގުނުން ހުއްޓައިލީމެވެ. ފުދޭވަރަކަށް ރާ އެއްކުރެވިފައި އެބަހުއްޓެވެ. އަޅުގަނޑު ހިތާހިތާ ކިޔައިލީމެވެ. އަދި އެކަމާ ވަރަށް ހިތްހަމަޖެހުނެވެ. އަޅުގަނޑުގެ ވިސްނުން މިހިސާބުން އެދިޔައީ އިބިލީހުގެ ވަސްވާހަށެވެ. މިތަނުން އެކިދިމާލުން ފުޅިކޮޅެއް ނެގިޔަސް ކަރީމަކަށް ފާހަގައެއް ނުކުރެވޭނެއެވެ. ފުދޭވަރަކަށް ރާފުޅި ޖަމާކުރެވިފައި ހުރުމާއެކު، އެންމެ އަގުބޮޑު މޮޅު ރާފުޅި އަޅުގަނޑަށްވެސް ފާހަގަ ކުރެވޭނެއެވެ. ސްކޮޗް ވިސްކީގެ ދެފުޅިނަގައި ދޫކޮށްއޮތް ހދުމުގެ ތެރެޔަށްލައި ފޮރުވީމެވެ. އަދި ބޯލާނީ އެންމެ ތަށްޓެއްކަމުގައި ނިންމައި، މާބްލް ޖަހައިފައިވާ ސިޑިންލާފައި، އަޅުގަނޑުމެންގެ އަމިއްލަ ސިއްރު ކޮޓަރިއަށް ދާން ހިނގައިގަތީމެވެ.
ކޮޓަރިތެރެޔަށް ވަނުމަށްފަހު، ރަނގަޅަށް ދޮރުތަޅުލީމެވެ. އަދި ހެދުންދަށަށްލައި ފޮރުވާފައިވާ ދެފުޅީގައި ލޯބިން ފިރުމައިލީމެވެ. އެތަނުން ފުޅިއެއް ކަނޑައިލައި ބޯންފަށައިފީމެވެ. މުނީރާއަށް ލިބެމުންދާނެ އަނިޔާތަކުގެ މަތިން ހަނދާން ނައްތައިލައި އެކަން ހިނދުކޮޅަކަށްނަމަވެސް ހިތުންފިލުވައިލުމަށްޓަކައި އަޅުގަނޑަށް އެކަންކުރަން މަޖުބޫރުވެފައިވާކަމުގައި ބެލީމެވެ.
(ނުނިމޭ)
