2018 ވަނަ އަހަރުގެ އޭޕްރީލް މަހުގެ 7 ވަނަ ދުވަހުގެ ރޭ އޭރުގެ އިދިކޮޅުން ޖަލްސާއެއް ބޭއްވިއެވެ.
ޖަލްސާގައި ރައީސް އޮފީހުގެ މިހާރުގެ ޗީފް އޮފް ސްޓާފް ވާހަކަފުޅު ދެއްކެވިއެވެ.
އޭނާ ވިދާޅުވިއެވެ.
އަނިޔާވެރިކަން މިހާރު ވަރަށް ބޮޑަށް ފުޅާ ވެއްޖެއެވެ.
މި އަނިޔާވެރިކަމުގައި ވަރަށް ގިނަ މީހުން ބައިވެރިވެއެވެ.
އޭގެ ތެރޭގައި ފުލުހުންނާއި ސިފައިންވެސް އޭނާ ހިމެނުއްވިއެވެ.
ޕޮލިސް ކޮމިޝަނަރުކަން ކުރެއްވި ބޭފުޅުން ކޮބައިތޯ އެއްސެވިއެވެ.
އެބޭފުޅުންނަކީ އަނިޔާވެރިކަމަށް އެއްބަރުލުން ދެއްވާ ބޭފުޅުން ކަމަށް ވިދާޅުވިއެވެ.
އަނިޔާވެރިކަމަށް ތާއީދުކުރާ ބޭފުޅުންގެ ލަދު ކޮބައިތޯ ވަރަށް ބާރަށް ސުވާލު ކުރެއްވިއެވެ.
މާތް ﷲ ގަންދީ ހުވާ ކުރައްވައިގެން ތިއްބެވި ޕްރޮސެކިއުޓަރ ޖެނެރަލާއި ބައެއް ފަނޑިޔާރުންވެސް އަނިޔާވެރިކަމުގައި ބައިވެރިވެވަޑައިގަންނަވާ ކަމަށް ހަރުއަޑުފުޅުން ވިދާޅުވިއެވެ.
އަދި ވިދާޅުވިއެވެ.
އަޅުގަނޑުމެން މިދަނީ އަނިޔާ ލިބިފައިވާ މީހުންގެ ދިފާއުގައި މަސައްކަތް ކުރަމުންނެވެ.
އެމީހުން އަނިޔާވެރިކަމުން ސަލާމަތްކޮށް ދޭން މަސައްކަތް ކުރަމުންނެވެ.
މި ވާހަކަފުޅުގެ ޖަވާބުގައި އޭރުގެ ސަރުކާރުން ބުންޏެވެ.
އިދިކޮޅުން މަސައްކަތް ކުރަނީ ގައުމުގައި ފިތުނަ އުފައްދާށެވެ.
ފަނޑިޔާރުންނާއި ދައުލަތުގެ އިސް މަގާމުތަކުގައި ތިއްބެވި ބޭފުޅުންގެ އަގު ވައްޓައިލާށެވެ.
* * *
މިއަދުގެ އަޑު ހުރީ ޢަލީ ޒާހިރު 7 އޭޕްރީލް 2018 ގައި ދެއްކެވި ވާހަކަފުޅާ ދާދި އެއްގޮތަކަށެވެ.
ތަފާތަކާ އެކުގައެވެ.
މިއަދު އެ ވާހަކަތައް އަމާޒު ވަނީ އެ ދުވަހު އޮތް އިދިކޮޅަށެވެ.
ވާހަކަ ދައްކަނީ އެ ދުވަހު އޮތް ސަރުކާރުގެ ބޭފުޅުންނެވެ.
މިއަދު އޮތް ނޫސްވެރިންގެ ބައްދަލުވުމުގައި ޢަލީ ޒާހިރު ވިދާޅުވިއެވެ.
ފަނޑިޔާރުންނާއި ދައުލަތުގެ އިސް ބޭފުޅުންނާ ބެހޭ ގޮތުން އިދިކޮޅުން ދައްކަނީ ފިތުނަވެރި ވާހަކައެވެ.
ބޭނުމަކީ ރައީސް ޔާމީންގެ ޝަރީއަތަށް ނުފޫޒު ފޯރުވުމެވެ.
* * *
އަހަރެންގެ ހިތަށް އެރިއެވެ.
އަނެއްކާވެސް ކޮޅު ބަދަލުވެ އެކޮޅުގެ ލަވަ މިކޮޅަށް މިކޮޅުގެ ލަވަ އެކޮޅަށް ބަދަލުވާ ދުވަސް ފެންނާނީ ކިހައި އަވަހަކަށް ބާވައެވެ؟
