އިންޑިޔާގައި ކޮވިޑް-19 ޖެހިގެން މަރުވެފައިވާ މީހުންގެ އަދަދުކަމަށް ރަސްމީ ގޮތުން ހާމަކޮށްފައިވާ އަދަދަށްވުރެ ދިހަ ގުނަ އިތުރުވާނެކަމަށް، ދިރާސާކުރުމުގެ ތިން ވަސީލަތެއް ބޭނުންކޮށްގެން އެ ދުވަސްވަރު އިންޑިޔާގައި އިތުރަށް މަރުވެފައިވާ މީހުންނާ ބެހޭގޮތުން ކުރި ދިރާސާއެއްގެ މައްޗަށް ތައްޔާރުކޮށްފައިވާ ރިޕޯޓެއްގައި ބުނެފިއެވެ.
އިތުރަށް މަރުވެފައިވާ މީހުންނާ ބެހޭ ދިރާސާއަކީ ފާއިތުވި އަހަރުތަކުގައި އެވްރެޖްކޮށް މަރުވެފައިވާ މީހުންނާ އަޅާބަލާއިރު، ވަކި ބަލިމަޑުކަމެއްގެ ތެރޭގައި މަރުވެފައިވާ މީހުންގެ އަދަދު ދެނެގަތުމަށް ކުރެވޭ ދިރާސާއެވެ. އިތުރަށް މަރުވެެފައިވާ މީހުންގެ ތެރޭން ކޮވިޑް-19 ޖެހިގެން މަރުވެފައި ވަނީ ކިތައް މީހުންކަން މިފަދަ ދިރާސާއަކުން ކަނޑައެޅިގެން ބުނަން ނޭނގުނަސް ބަލިމަޑުކަމުން މަރުވާ މީހުން އިތުރުވެފައިވާ މިންވަރު އަންދާޒާ ކުރެވޭނެއެވެ.
މި ރިޕޯޓުގެ ކުރިންވެސް ތަޖުރިބާކާރުން ބުނަމުން އައިސްފައިވަނީ ކޮވިޑް-19 ގައި އިންޑިޔާއިން މަރުވީ 4 ލައްކަ މީހުން ކަމަށް ރަސްމީ އަދަދުން ދެއްކި ނަމަވެސް، އެއީ ވަރަށް ބޮޑުތަން ދަށް އަދަދެއް ކަމުގައެވެ.
އިންޑިޔާ ސަރުކާރުގެ ޗީޕް އިކޮނޮމިކް އެޑްވައިޒާގެ ގޮތުގައި ކުރިން މަސައްކަތްކުރެއްވި އަރްވިންދް ސުބްރަމާނިއަންއާއި ސެންޓާ ފޯ ގްލޯބަލް ޑިވެލޮޕްމަންޓްގެ ޖަސްޓިން ސޭންޑަފާއާއި ހާވާޑް ޔުނިވަސިޓީގެ އަބިޝެކް އާނަންދްގެ ދިރާސާގެ މައްޗަށް ތައްޔާރުކޮށް މިއަދު ނެރުނު ރިޕޯޓުގައި ވާގޮތުން ޖަނަވަރީ 2020 އާއި ޖޫން 2021 އާ ދެމެދު އެވްރެޖް ގޮތެއްގައި މަރުވާނެ ކަމަށް ލަފާކުރެވޭ މީހުންގެ އަދަަދާއި، އެ މުއްދަތުގައި މަރުވި ކަމަށް ރިކޯޑުތަކުން ދައްކާ މީހުންގެ އަދަދާ ދެމުގައި 3.4 މިލިއަނާ 4.7 މިލިއަނާ ދެމެދުގެ ފަރަގެއް އެބަހުއްޓެވެ. އެހެންކަމުން، މި ރިޕޯޓުތަކުން ދައްކާ ގޮތުގައި ކޮވިޑް-19 ގައި އިންޑިޔާއިން މަރުވި މީހުންގެ އަދަދު ރަސްމީ އަދަަދަށްވުރެ ގާތްގަނޑަކަށް 10 ގުނަ އިތުރުވާނެއެވެ.
"(ކޮވިޑް-19 ގައި) މަރުވި މީހުންގެ އަދަދަ ވާން ޖެހޭނީ މިލިއަނުން ގުނާލެވޭ އަދަދަކަށް. ލައްކަައަކުން ނޫން. އެހެންކަމުން، މި ކާރިސާ ވެގެންދާނީ އިންޑިޔާ ބައްރު ދެބައިވެ މިނިވަން އިންޑިޔާ އުފެދުނު ފަހުން އިންޑިޔާއަށް ކުރިމަތިވި އެންމެ ހިތާމަވެރި ކާރިސާ ކަމުގައި." ރިޕޯޓުގައި ވެއެވެ.
އިނގިރޭސިން ވެރިކަން ކުރަމުން އައި އިންޑިއަން ސަބްކޮންޓިނެންޓް ދެބައިވެ 1947 ވަނަ އަހަރު އިންޑިޔާއާއި ޕާކިސްތާނު ދެބައިވިއިރު، ހިންދޫންނާއި މުސްލިމުންގެ ގޭންގްތަކުން ނުކުމެ އެއްބަޔަކު އަނެއް ބަޔަކާ ދެކޮޅަށް ހިންގި ގަތުލު އާއްމުގައި 1 މިލިއަނަށްވުރެ ގިނަ މީހުން މަރުވެފައި ވެއެވެ.
ދިރާސާކުރެއްވި ތިން ބޭފުޅުންގެ ދިރާސާ ބިނާކުރައްވާފައި ވަނީ އިންޑިޔާގެ އެންމެ އާބާދީ ބޮޑު 7 ސްޓޭޓުގައި ވިހާ ކުދިންނާއި، މަރުވާ މީހުންގެ ރަޖިސްޓަރީއާއި، ދުނިޔޭގައި ކޮވިޑް-19 ޖެހިގެން މަރުވާ މީހުންގެ ނިސްބަތާއި އިންޑިޔާގައި ވައިރަސް ޖެހިފައިވާ ކަމަށް ދައްކާ ލޭގެ ޓެސްޓްތަކުގެ ނިސްބަތް އަޅާކިއުމާއި، އަހަރަކު ތިން ފަހަރު ހަދާ 9 ލައްކަ މީހުންގެ އިގުތިސާދީ ސާވޭގެ މައްޗަށެވެ.
