(5 މެއި 2021 ގައި ޝާއިއުކުރި ބަޔާ ގުޅޭ)
(18) ކަނޑުގެ ސިފައިންގެ ބާޖެއްގައި ، އެޗް.އެމް.އެސް. ސިލޯނުން ، މާލެއަށް ފޭބުމަށް އަޅުގަނޑު ނައްޓާލީ ހެނދުނު 9.50 ގައެވެ. އަޅުގަނޑު ފޭބީ ، ޔުނިފޯމުގައި ޒީނަތްތެރިވެގެންނެވެ. ލެފްޓިނަންޓް ކޮމާންޑަރ ޗީތަމް އަޅުގަނޑާއެކު ގެންދިޔައިމެވެ. އަޅުގަނޑު ފޭބި ބާޖުގައި ނަގާފައިހުރީ ، އަޅުގަނޑުގެ އަމިއްލަ ދިދައެވެ. އަޅުގަނޑުމެން ކަނޑިންމައިން ވަތްއިރު ، އެކިކަންކަން އިންތިޒާމުކޮށް ، ތަރުތީބުކުރެއްވުމުގައި ، މރ. އަމީންދީދީ ، ވަރަށް އަވަދިނެތި އުޅުއްވާތަން ފެނުނެވެ. އަތިރިމަތި އޮތީ މީހުން އެއްވެ ތޮށްޖެހިފައެވެ. ފަޅމަސްއޮޑިފަހަރަށްވެސްވަނީ ، މީހުން އަރާ ބަރާވެފައެވެ. މިހުރިހާ ކަމަކަށްވުރެ ބޮޑަށް ، ހިޔާކުރެވިފައިވާ ޚާއްޞަ އިސްޓޭޖެއްކަހަލަ ތަނެއްގައި ، އަޅުގަނޑުގެ އިންތިޒާރުގައި ، މރ. އަމީންދީދީ ހުންނެވިއެވެ. އަޅުގަނޑުގެ އިސްތިޤްބާލުގައި ސަފަކަށް އެތުރިގެން ތިއްބެވި ، ކަމުވޮށިވެގެންވާ ބޭފުޅުން ތަޢާރުފުކޮށްދެއްވީ މރ. އަމީންދީދީއެވެ.
އަޅުގަނޑުމެން ފާލަން ކަޑައްތުކުރިތަނާހެން ، ދިވެހިރާއްޖޭގެ ބޭންޑުން ، " ގޯޑް ސޭވް ދަ ކުއީން " ކުޅެމުންގެންދިޔައެވެ. އަޅުގަނޑު ޤަބޫލުކުރާގޮތުގައި އެހާ ރަނގަޅަކަށްނޫނެވެ. އެހެންނަމަވެސް ، އެމީހުންގެ މަސައްކަތަށް ސާބަސްދޭވަރު ވެއެވެ. އޭގެފަހުން ، މަދު ، އެހެންނަމަވެސް ސާއްބަ ، ދިވެހި ސިފައިންގެ ގާރޑް އޮފް އޮނަރ އެއް އަޅުގަނޑު ބަލައިގަތީމެވެ. އަޅުގަނޑަށް ފާހަގަކުރެވުނުގޮތުގައި އެމީހުން ގެންގުޅުނީ ، ޖަރުމަނުވިލާތުގެ ވަރަށްބާ ބަޑިތަކެކެވެ. އޭގެފަހުން ، ފިރިހެންކުދިންނާއި އަންހެންކުދިންގެ ގާރޑް އޮފް އޮނަރއެއް އަނެއްކާވެސް ، އަޅުގަނޑު ބަލައިގަތީމެވެ. މިކުދިންނަކީ ، އަޅުގަނޑުމެންގެ ބޯއީސްކައުޓާއި ގާރލް ގައިޑުންނާ ، ވަރަށް ރަނގަޅަށް މުޢާމަލާތު ކުރަމުންގެންދާ ކުދިބައެކެވެ.
(19) އެއަށްފަހު ، ރަށުގައި ގެންގުޅޭ މަދު ކާރުތަކުން ، ތިންކާރަކަށް އަޅުގަނޑުމެން އެރުވުނެވެ. އަދި އަތިރިމައްޗާޖެހިގެން ކަހަލަގޮތަކަށް އޮތް ކުޑަ ޕާކެއް ހުރަސްކޮށް ، ރަސްމީ ހިނގާލުމެއްގައި މަގުމަތީގައި ދުއްވާލެވުނެވެ. ހިމުން ދޮންވެލި ލެވިފައިވާ ، ސަރާސަރު ، ތަނަވަސްމަގުތަކުގައި ، ފިރިހެނުންނާއި އަންހެނުން އަދި ކުޑަކުދިންތައް ، ކުލަކުލައިގެ ހެދުން އަޅައިގެން ، ކުޅިބަލަން ނުކުމެ ތިއްބެވެ. ފިރިހެނުންނާއި ފިރިހެންކުދިންތިބީ މަގުގެ އެއްފަރާތުގައެވެ. އަންހެނުންނާއި އަންހެންކުދިންތިބީ މަގުގެ އަނެއްފަރާތުގައެވެ. ހުރިހާ ކުޑަކުދިންހެން ދިދަ ހޫރުވަމުން ގެންދެއެވެ. އިނގިރޭސިވިލާތުގެ ދިދަވެސް ކޮންމެވެސް ވަރަކަށް ފެނެއެވެ. އަޅުގަނޑަށް ފާހަގަކުރެވުނުގޮތުގައި ، ބައެއް މަގުމަގުގައި ފިރިހެންކުދިން ތިބީ ފިޔާތޮށި ކުލައިގެ ތާކިހާ އަޅައިގެންނެވެ. އަދި އަންހެންކުދިންތިބީ ފިޔާތޮށިކުލައިގެ ހެދުންލައިގެންނެވެ. އަނެއްބައި މަގުމަގުގައި ، ފެހި އަދި ބައެއް މަގުގައި ނޫކުލަ އަދި ހުދުކުލައެވެ. އެއީ އެމީހުން ނިސްބަތްވާ އަވަށުގެ ކުލައެވެ. މރ. އަމީންދީދީވަނީ ، ހަތަރު އަވަށަކަށް މާލެ ބައިކުރައްވާ ، އެހަތަރު އަވަށަށް މިކުލަތައް ދެއްވާފައެވެ.
ފިރިހެނުން ގިނައިން ލައިގެންތިބީ ހުދުކުލައިގެ ފޭރާމެވެ. ހުދު ގަންޖުފަރާހާއި ހުދު މުންޑެވެ. މުސްކުޅި އަންހެނުން ގިނައިން ލައިގެންތިބީ ސާޅިއެވެ. ޒުވާން އަންހެންކުދިން ލައިގެންތިބީ ، އާ ޤައުމީ ހެދުމެވެ. އެއީ މރ. އަމީންދީދީ އަމިއްލަފުޅަށް ފަރުމާކުރައްވާފައިވާ ހެދުމެއްކަމުގައި ޔަޤީންކަމާއެކު ، އަޅުގނޑަށް ދެންނެވިދާނެއެވެ. އެއީ ބޮލުފޮތިކޮޅު އަޅާފައި ހުންނަ ، މަޝްހޫރު ފާސްކުރި ހެދުމެވެ. މީހުން ގިނަ ނަމަވެސް ބައިތިއްބާފައިވަނީ ވަރަށް ތަރުތީބު ކޮށެވެ. މައިމަގުތަކުގައި އެމީހުން ތިބީ ، ރޯނުން ދަމާލެވިފައިވާ އިމެއްގެ ތެރޭގައެވެ. އަދި ހަނިމަގުތަކުގައި ގޮށެއްޖަހާ ވަކިކޮށްލެވިފައި ވެއެވެ. ޝައްކެއްނެތި ، މުޅި މިމަންޒަރު ސިފަކުރެވޭގޮތުގައި މިއީ ރަސްމިއްޔާތެއްގެ ސިފަގެނައުމަށް ، ވަރަށް ބޮޑު އިންތިޒާމެއްގެ ދަށުން ރޭވިފައިވާ ކަމެއްކަމަށްވިޔަސް ، ނުރަސްމީ ސިފައެއްގައި ވަރަށް ތަރުތީބުކަމުގައި ފެނެއެވެ. އެއްވެފައިވާ މީހުންގެ ފުރަގަހުން ، އަންހެނުންނާއި ކުޑަކުދިން ، އޭގެފަހަތުގައި ގެތައް އެޅިފައިވާ ، ހުދުކުލައިގެ ފާރުގައި ލެނގިގެން ކުޅިބަލަން ތިއްބެވެ.
ދާދިމިދާކަށްދުވަހާ ޖެހެންދެން ، އަންހެނުންނަކީ ، ފަރުދާއަކާނުލައި މީހުންގެ ތެރެޔަށް ނުކުމެ އުޅޭ ބައެއް ނޫނެވެ. އަޅުގަނޑުމެންނަށް ކިޔުނީ ވަރަށް ހޫނު މަރުޙަބާއެކެވެ. އަދި ފެށުނީއްސުރެ ނިމެންދެން މަރުޙަބާގެ އަތްތިލަބަޑީގެ އަޑު ކެނޑިގެންނެއް ނުދެއެވެ. ( އެމީހުން ހަޅޭއްލަވާ އަޑުގަދަކޮށެއް ނުހަދައެވެ. ) އެތައް މިތާނގައި ދިދަޖަހާފައި ވެއެވެ. ގިނައީ ، ހުދުކުލައިގެ ހަނދުފަޅިއެއް ހުންނަ ، ފެއްސާއި ރަތުގެ ދިވެހި ދިދައެވެ. އެހެންނަމަވެސް ، އިނގިރޭސިވިލާތުގެ ދިދަވެސް ފުދޭވަރަކަށް ހުއްޓެވެ. އެއް އަވަށުން އަނެއް އަވަށަށް އަޅުގަނޑުމެންދާއިރު ، އެއަވަށަކަށް ވަދެވެނީ ، ޚާއްޞަކޮށް މިރަސްމިއްޔާތަށް ތައްޔާރުކުރެވި ، ފަރުމާކުރެވިފައިވާ ގިޑިގެއެއްގެ ތެރެއިންލާފައެވެ. މި ގިޑިގެތަކުގައި އެކިއެކި ލިޔުންތައް ލިޔެވިފައި ހުއްޓެވެ. " ގޯޑް ސޭވް ދަ ކުއީން " ، " ލޯންގް ލިވް ދަ ބްރިޓިޝް ކޮމަންވެލްތު " ، " ވެލްކަމް ޓު އަވަރ ޑިސްޓިންގްއިޝްޑް ގެސްޓްސް " އަދި ހަމައެކަނި " ވެލްކަމް " ފަދަ ލިޔުންތަކެވެ. ވަރަށް މީހުން ގިނައެވެ. މިރަސްމިއްޔާތަށްޓަކައި ، އަތޮޅުތަކުން އައި މީހުން ، މާލޭގެ އާބާދީގެ ދެގުނައަށް އަރާނެކަމުގައި ބުނުމުން ، އަޅުގަނޑު ޙައިރާނެއް ނުވަމުއެވެ.
(20) މި ހިތްގައިމު ދުއްވާލުމަށްފަހު ، އަޅުގަނޑުމެން އައީ ، މރ. އަމީންދީދީގެ ރަސްމީ ގެކޮޅަށެވެ. މރ. އަމީންދީދީގެ ޢާއިލާގެ ބޭފުޅުންނާއި ކަމުވޮށިވެގެންވާ ޢިއްޒަތްތެރިން އެތަނުގައި ތިއްބެވިއެވެ. އެތަނުން ބައެއް ބޭފުޅުންނާ ، އަޅުގަނޑުވެސް ވާހަކަ ދައްކާލީމެވެ. އަޅުގަނޑުމެން ދިވެހިރާއްޖޭގައި ހޭދަކުރި ދުވަސްތަކުގައި ، ދިވެހިދިދައާއެކު ، އިނގިރޭސިވިލާތުގެ ދިދަވެސް ، ސަރުކާރުގެ ޢިމާރާތްތަކުގައި ނަގާފައިހުރިކަން ހާމަކޮށްލުމަކީ ، ބޭނުންތެރި ކަމެއްކަމަށް ފެނެއެވެ. އެގެކޮޅަކީ ވަރަށް ތަންބޮޑު ތަނަވަސް ، އަދި ހުޅަނގާއި އިރުމަތީގެ ދެބިތުގެވެސް ފާޑުވެރިކަން ހުރިތަނެކެވެ. މިސާލަކަށް " ވިކްޓޯރިއަން ހޯމް " ޒީނަތްތެރިކުރުމަށް ބެހެއްޓިފައިހުންނަ ކަހަލަ ، ކަންވާރެއް ، ގެޔަށް ވަންނަތަނުން ، ފެންނަގޮތަށް ބެހެއްޓިފައިހުއްޓެވެ. ފާރުތަކުގައި ، ޝާހީ ޢާއިލާގެ ބޭފުޅުންގެ ފޮޓޯފުޅުތައް ބެހެއްޓިފައިހުއްޓެވެ.
ދިވެހިރާއްޖޭގެ ކުރީގެ ޤައުމީ ޝަޚުޞިއްޔަތުތަކުގެ ފޮޓޯފުޅުތަކާއި މރ. އަމީންދީދީގެ ޢާއިލާގެ ބޭފުޅުންގެ ފޮޓޯފުޅުތައްވެސް ބެހެއްޓިފައި ހުއްޓެވެ. އަދި ކްއީން ވިކްޓޯރިއާގެ ކުރެހުންވެސް ފެންނަން ހުއްޓެވެ. މުޅިތަނަށް ނަޒަރު ހިންގާލުމުން ، އަޖައިބެއްކަހަލަ އިޙުސާސްތަކެއް ލިބިގެންދެއެވެ. އެހެނަސް ، އިނގިރޭސި ޝާހީ ތަޚުތަށް ވަފާތެރިވުމުގެ އަސަރާއި ، ހޫނު މަރުޙަބާއަކީ ، ހުޅަނގުގެ ނަޒަރިއްޔާއިން ބަލާނަމަ ، ބީރައްޓެހިކަމަކަށް ވެދާނެއެވެ. އަޅުގަނޑުގެ އިޙުތިރާމުގެ ރަސްމީ ޒިޔާރަތަށްފަހު ، އެއްކަލަ ޒީނަތްތެރިކުރެވިފައި އޮތް މަގުތަކުން ، އަތްތިލަބަޑީގެ މަރުޙަބާއާއެކު އަނެއްކާވެސް އަޅުގަނޑު ދިޔައީ އަތިރިމަތިންލާފައި ، އެނބުރި ، މަނަވަރަށެވެ.
އެދުވަހުގެ ޕްރޮގްރާމަށް ވިސްނާލުމުން ، އަޅުގަނޑަށް ޤަބޫލުކުރެވުނުގޮތުގައި ، އަޅުގަނޑު ކުރި އިޙުތިރާމުގެ ޒިޔާރަތުގައި ، އަޅުގނޑުގެ އަންހެނުން ބައިވެރިކުރާނެކަމަށް ، މރ. އަމީންދީދީ ވާނީ އުއްމީދު ކުރައްވާފައެވެ. މަނަވަރަށް ދިއުމަށްޓަކައި އަޅުގަނޑުމެން ފާލަންދޮށަށް ދިއުމުން ، ޅަވަރެއްގެ އަންހެންކުއްޖަކު ، މާބޮނޑިއެއް ހިފައިގެން އަޅުގަނޑާދިމާލަށް އައިތަން ފެނުނެވެ. އެވަގުތު އަޅުގނޑުދިޔައީ ގާރޑް އޮފް އޮނަރއެއް ބަލައިގަންނަމުންކަމަށްވުމާއެކު ، ހަދާނެގޮތަކާމެދު ކަންބޮޑުވެފައި ހުއްޓާ ، ކޮންމެވެސް މީހަކު ، އެކުއްޖާ ހުއްޓުވުމުގެ ސަބަބުން ، ހިތަށް ހަމަޖެހުން ލިބުނެވެ.
ސިލޯނު ތަމްސީލުކުރުން
(21) މިރަސްމިއްޔާތުގައި ސިލޯނު ތަމްސީލުކުރާ މަންދޫބުން ، އެދުވަހުގެ މެންދުރުގެ ފަރީއްކޮޅަށް ، މާލެ ވަޑައިގަތެވެ. އެބޭފުޅުން މާލެ ވަޑައިގަތީ ، އެޗް. އެމް. އެސް. ސީ. އެސް ވިޖަޔާ ގައެވެ. ސިލޯނުގެ ކަނޑުގެ ސިފައިންގެ އަތުގައި ހަމައެކަނި އޮންނަ މަނަވަރަކީ އެއީއެވެ. މާލެއައި މަގުމަތީ ، މިމަނަވަރުގެ އިންޖީނު ލަސްއަލައެއް ޖެހިގެން ހުއްޓި، އިންޑިއާކަނޑުގެ ގަދަ އޮޔާއިރާޅުގެ ތެރޭގައި ، ފަސްގަޑިއެއްހާއިރުވިއެވެ. މިކަމުގެ ސަބަބުން މަނަވަރުން ވަޑައިގަތް ބޭފުޅުންނަށް ވަރަށް އުނދަގޫފުޅުވިކަމަށް ވެއެވެ. އެކަމާހުރެ ، ސިލޯނުން ވަޑައިގެންނެވި ބައެއް މެންބަރުން ، މިރަސްމިއްޔާތު ނިމުނުހާ އަވަހަކަށް ، އެނބުރި ސިލޯނަށް ވަޑައިގަތުމާމެދު ފިކުރު ކުރައްވަމުންގެންދެވިއެވެ.
ސިލޯނުން އައި މަނަވަރު ، ވިޖަޔާ ވެސް ފޯރޓު ހުރަސްކުރުމާއެކު ، ބަޑީގެ ސަލާމެއް ބަދަލު ކުރެވުނެވެ. އެމަނަވަރުގެ ތިލަކަމާއެކު ، ބަނދަރާއި އެޗް.އެމް.އެސް. ސިލޯނާ ދެމެދު ބަނދަރުކުރުމުގެ ޖާގަ ލިބުނެވެ. މިރަސްމިއްޔާތުގައި ސިލޯނު ތަމްސީލު ކުރެއްވީ ، ޖޫނިއަރ މިނިސްޓަރ ، ޕާލަމެންޓަރީ އަންޑަރ ސެކްރެޓަރީ ފޯރ ޑިފެންސް އެންޑް އެކްސްޓާރނަލް އެފެއާރޒް ، މޭޖަރ މޮންޓެގޫ ޖަޔެވިކްރަމަ އާއި ، އޭނާގެ އަނބިކަނބަލުން ، އަދި އެކްސްޓާރނަލް އެފެއާރޒް ޑިޕާރޓްމަންޓްގެ މރ. ވީ.ޖޭ.އެޗް ގުނަސޭކަރަ އާއި ، ޗީފް އޮފް ސްޓާފް، ރޯޔަލް ސިލޯން ނޭވީ ، ކޮމާންޑަރ ރޮއިސް ޑިމެލް ( އޯ.ބީ.އީ، އާރ.ސީ.އެން ) އެވެ. ދެން އިތުރަށް ވަޑައިގަތީ ، ސަރ އައިވަރ ޖެނިންގްސް އާއި ، ކޮލޮމްބޯ ޕޯރޓް ކަމިޝަންގެ ޗެއަރމަން ޕީ.އޭ.ޖޭ. ހެރްނު އެވެ.
31 ޑިސެމްބަރ 1952 ބުދަދުވަސް - މެންދުރުފަސް
(22) ދިވެހިރާއްޖޭގެ ހުރިހާ އަތޮޅުތަކުން ބައިވެރިވި ، އަތުމަސައްކަތާއި އަތްތެރިމަސައްކަތުގެ މަޢުރަޒެއް ދައްކާލުމަށްޓަކައި ، އަޅުގަނޑުމެން ދެމަފިރިން ގެނދެވުނެވެ. އެޗް. އެމް. އެސް. ސިލޯނުގެ ކެޕްޓަނާއި އަޅުގަނޑުގެ އެއިޑް ޑި ކޭމްޕް އަދި ސިލޯނުން ވަޑައިގެންނެވި ބޭފުޅުންވެސް ، އަޅުގަނޑުމެންނާ ބައިވެރިވެވަޑައިގަތެވެ. އެއީ އާދައިގެ އަތުމަސައްކަތުގެ ތަކެތީގެ މަޢުރަޒެކެވެ. އެތާނގައި ހުރީ ، ލިޔެލާޖެހި ތަކެއްޗާއި ގެތުމާ އަދި ކުނާވިޔުމާއި ، ކުދި ދޯނިފަހަރު ، އަދި ރަންރިހީގެ އަތްކަންކުރުމުގެ އާދައިގެ ތަކެއްޗާއި ، މަޢުދަނު ބޭނުންކޮށްގެން ހަދާފައިވާ ކަނބުރުވެރިކަމާއި ތިލޭރުކަމުގެ ބައެއް ތަކެއްޗެވެ. މިތަކެއްޗަކީ ، ދިވެހިރާއްޖޭގެ ރަށްތައް ބައިކުރެވިފައިވާ 17 އަތޮޅުން ، އެކިރަށްރަށުގެ މީހުން ހަދާފައިވާ ތަކެއްޗެވެ.
ވަރަށް އާދައިގެ ، އެހެންނަމަވެސް ، އެމީހުންގެ މަސައްކަތުގެ ވަށްޓަފާޅިއާއި ފެންވަރު ، ވަރަށް ރަނގަޅަށް ދައްކައިދީފައި ހުއްޓެވެ. ލިޔެލާޖެހި ތަކެއްޗާއި ގެތުމާ އަދި ކުނަލާއި ބޮލީގެ ބައެއްތަކެތި އަޅުގަނޑުމެން ދެމަފިރިންނަށް ހަދިޔާއަށް ދިނުމަށް ، ދިވެހިން ވަރަށް ގަދަހެދިވާހަކަ ދަންނަވާލަން ޖެހެއެވެ. އެތަކެތި ޤަބޫލުނުކޮށްފިނަމަ ، އެއީ އެމީހުންނަށް ކުރެވޭ ވަރަށް ބޮޑު ބޭއިންސާފެކެވެ. އަދބާ ޚިލާފު ކަމެކެވެ. އަދި އަޅުގަނޑަށް ޤަބޫލުކުރެވުނު ގޮތުގައި އެތަކެތި ބަލައިގަތުން އެއީ ، އަޅުގަނޑުމެންނަށް މަޢާފު ނުލިބޭވަރުގެ ކަމެއް ނޫނެވެ.
31 ޑިސެމްބަރ 1952 ބުދަދުވަސް - ހަވީރު
(23) މރ. އަމީންދީދީގެ ރަސްމީ ގެކޮޅުގައި ، އެރޭ އިރާކޮޅު ، ހުރިހާ މެހެމާނުންނަށް ، ނުރަސްމީ ފަރީއްކޮޅެއް ދެއްވިއެވެ. އާދައިގެ މަތިން ، މި ފަރީއްކޮޅު ދެއްވުމުގައި އިސްކޮށް އުޅުއްވީ ހަމައެކަނި މރ. އަމީންދީދީއެއް ނޫނެވެ. އެމަނިއްޕުޅުގެ އަމިއްލަފުޅު ޕްރައިވެޓް ސެކްރެޓަރީއާއި އެއިޑް ޑި ކޭމްޕް ވެސް މެއެވެ. މރ. އަމީންދީދީ އިރުއިރުކޮޅުން ގެއްލެއެވެ. މޭޒުތައް ރާއްވަވައި ތަރުތީބުކުރެއްވުމުގައި ، ކޮންމެ ބޭފުޅަކަށްވެސް އެބޭފުޅަކު އިށީނދެ ވަޑައިގަންނަވަންވީ ތަން ސާފުވަންދެން ކޮޅުކޮޅުމައްޗަށް ދުވެވަޑައިގެން އަވަދިނެތި އުޅުއްވައެވެ. ޝައްކެއްނެތެވެ. އެ ފަރީއްކޮޅަކީ ، ދިވެހިކެއުމުގެ ބާވަތްތަކުގެ ތަފާތު ވައްތަރުތަކުން ތައްޔާރުކުރެވިފައިވާ ފަރީއްކޮޅެއްނަމަވެސް ، އެހާބޮޑަށް ކުޅިއެއްނޫނެވެ. އެއްވެސް ޙާލެއްގައި ، މުނިފޫހި ފިލުވުމުގައި ދިވެހިންގެ އާދައިގެ މަތިން ، ރަލުގެ އެއްވެސް ބާވަތެއް ނެތެވެ.
(24) ރޭގަނޑުގެ ފަރީއްކޮޅަށްފަހު އަޅުގަނޑުމެން އެންމެންދިޔައީ ، ގޯތިތެރޭގައިއޮތް ، ކުޑަ ބަގީޗާއަކަށެވެ. އެތާނގައިވަނީ ، ޚާއްޞަގޮތަކަށް ، ކުޑަ ތިއޭޓަރެއް ތައްޔާރު ކުރެވިފައެވެ. ގިނަޢަދަދެއްގެ އަންހެންކުދިން ، މިއުޒިކާއި ލަވަޔަށް ނަށަމުން ގެންދިޔައެވެ. އެތާނގައި ޖަހަމުންގެންދިޔަ މިއުޒިކާއި ލަވަޔަކީ ، ދިވެހިރާއްޖޭގެ ޤައުމީ ސަލާމާ އެއްކަހަލަ ، އިހާއިފަހުގެ ، އާ އަހަރުގެ މުނާސަބަތާވެސް ނުގުޅޭ އަދި ހުޅަނގުގެ ކަންފަތްތަކަށް އަޑުއަހާލަން ފަސޭހަ އެއަޗަކަށް ނުވިއެވެ.
ފުރަތަމަ އައިޓަމް ، " ދިވެހި ޖުމްހޫރިއްޔާއަށް މަރުޙަބާ ! " މިލަވަޔަކީ ، އިރުމަތީގެ މިއުޒިކާއި ރާގާ ގުޅުންހުރި އެއްޗެކެވެ. ދެވަނަ އައިޓަމް " ވެލްކަމް ޓު ސަރ ސެސިލް އެންޑް ލޭޑީ ސަޔަރސް " މިލަވަޔަކީވެސް އިރުމަތީގެ ރާގެއްނަމަވެސް ، އެމެރިކާގެ ނެށުމުގެ މަޝްހޫރު ، އަވަސް ރާގަކަށް ، އިސާހިތަކު މިލަވަ ބަދަލުވެގެންދިޔައެވެ. މިލަވަޔަކީ ، ޒުވާން 8 އަންހެންކުދިންގެ މާފަތި ނެށުމުގެ ލަވަޔެކެވެ. ލަވަކިޔަމުން ، ނަށަމުން ، ބަނޑިލައްވަމުންގެންދިޔައީ ، ވަރަށް ހިތްގައިމު ގޮތަކަށެވެ. އެކުދިންގެ ނެށުން ބިނާވެފައިއޮތީ ، ހުޅަނގުގެ ބަށްޓަމަށެވެ. އިރުމަތީގެ ގޮތްތަކަކަށް ނޫނެވެ. ވަރަށް އަޖައިބުވާންޖެހުނު އެއްކަމަކީ ، ހުޅަނގާ އެހާދުރުގައި އޮތްތަނެއްގައި ، ތަފާތު ކުލައަލި ބޭނުންކޮށްގެން އިސްޓޭޖްމަތި ދިއްލައި ، އަލިކޮށްފައި އޮތުމެވެ. އަދި އެއް އައިޓަމުން އަނެއް އައިޓަމަށް ބަދަލުވާއިރު ، އެއައިޓަމުގެ ތަޢާރުފަކާއެކު ،ކޮންމެވެސް މީހަކު އެއަލިތައްވެސް އެކިގޮތަށް ބަދަލު ކުރަމުން ގެންދިއުމެވެ. ނިވިދިއްލޭ ނިއޯންލައިޓެއްވެސް ބެހެއްޓިފައި ހުއްޓެވެ.
އަޅުގަނޑު އެކަމަކާ އަޖައިބެއް ނުވަމެވެ. އެއީ ، އެއަލިތައް ބަދަލުކުރައްވަމުން އެގެންދަވަނީ ، މރ. އަމީންދީދީކަމާމެދަކު ޝައްކެއްނެތެވެ. އަޅުގަނޑަށް ކޮށްލެވުނު ހެއްވާ ސުއާލަކަށް ޖަވާބުދެއްވުމުގައި ، އޭގެތެރެއިން ގިނަލަވަތައް ހަދައި މިއުޒިކާ އެއްކޮށްދެއްވީ ، ޚުދު އެމަނިއްޕުޅުކަމުގައި ، އަޅުގަނޑުގާތު ، މރ. އަމީންދީދީއަށްވަނީ ވިދާޅުވެވިފައެވެ. އެއީހަމަ ، ޝައްކެއްނެތްގޮތުގައި ، އަޖައިބެއްކަހަލަ ޝަޚުޞިއްޔަތެކެވެ. އެމަނިއްޕުޅުވަނީ ، އާއަހަރު ފެށުމުގެ އުފާވެރިކަމުގެ އާދަޔާޚިލާފު ޢީދެއް ، އަޅުގަނޑުމެންނަށް ގެނެސްދެއްވާފައެވެ.
(ނުނިމޭ)
