އަވަށްޓެރި އިންޑިއާގައި އާދަޔާ ޚިލާފު ބާރުމިނެއްގައި ކޮވިޑް-19 ފެތުރި އިންސާނީ މުޞީބާތެއް ކުރިމަތިވެ ޙާލަތު ގޯސްވެފައިވާތީ ރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ހިތާމަ ފާޅުކުރައްވައިފިއެވެ.
އެމަނިކުފާނު މިކަން ހާމަކުރައްވާފައިވަނީ މިއަދު ކުރެއްވި ޓްވީޓެއްގައެވެ.އެޓުވީޓެއްގައި ވަނީ އިންޑިއާއަށް މިއަދު ކުރިމަތިވެފައިވާ ހިތާމަވެރި ބިރުވެރި ޙާލަތާމެދު ކަންބޮޑު ހިތާމަކުރައްވާކަމަށެވެ.
ދިވެހިން ވަނީ އިންޑިއާއާ އެކުގައިކަމަށާ މި ނުރައްކާތެރި ޙާލަތުން އަރައިގަތުމަށް ބޮޑުވަޒީރު ނަރެންދްރަ މޯދީއާއި ސަރުކާރުން ކުރައްވާ މަސައްކަތްތަކަށް ކާމިޔާބަށް އެދިވަޑައިގަންނަވާކަމަށްވެސް ރައީސް ޞާލިޙް ވިދާޅުވެފައިވެއެވެ.
1.3 ބިލިއަން މީހުންގެ އާބާދީއެއް އޮތް އިންޑިޔާ މިހާރުވެފައި މިވަނީ، މިހާތަނަށް ދުނިޔޭގެ ކަންކޮޅުތަކުގައި ތިން މިލިއަނަށްވުރެ ގިނަ މީހުން މަރުވުމަށް މެދުވެރިވި ކޮވިޑް-19 އެންމެ ބާރަށް ފެތުރޭ ގައުމަށް ވެފައެވެ.
ޑަބްލިޔުއެޗްއޯގެ އިތުރުން އިނގިރޭސިވިލާތާއި، އެމެރިކާއާއި، އޮސްޓްރޭލިޔާއާއި، ސައޫދީ އަރަބިއްޔާ ފަދަ ގައުމުތަކުން ދަނީ އިންޑިޔާއަށް މިތަންވަޅު ބޭނުންވާ އަވަސް އެހީ ފޮނުވަމުންނެވެ.
