އިރާގުގެ ވެރިރަށް ބަޣުދާދުގައި ކޮވިޑް-19 ގެ ބަލިމީހުންނަށްް ފަރުވާދޭ ހޮސްޕިޓަލެއްގައި އަލިފާން ރޯވުމުގެ ސަބަބުން 82 މީހުން މަރުވެ 100 މީހުން ޒަޚަމްވެއްޖެއެވެ. އިރާގު ސިއްހީ މަސްދަރުތަކާ ހަވާލާދީ ބައެއް ނޫސްތަކުން ބުނެފައިވާ ގޮތުގައި ބަޣުދާދުގެ ދެކުނުގައި ހުންނަ އިބްނުލްޚަޠީބް ހޮސްޕިޓަލުގެ އިންޓެންސިވް ކެޔާ ޔުނިިޓް (އައިސީޔޫ) ގައި އަލިފާން ރޯވެފައި ވަނީ އޮކްސިޖަން ސިލިންޑަރެއް ގޮވުުމުގެ ސަބަބުންނެވެ.
މީސް މީޑިޔާގައި އާއްމުވެފައިވާ ވީޑިޔޯ ކްލިޕްތަކުން ފެންނަ ގޮތުގައި އަލިފާން ނިވާ މީހުން އަލިފާންގަނޑު ކޮންޓުރޯލުކުރުމަށް މަސައްކަތްކުރަމުން ދިޔައިރު، މީހުން ދިޔައީ އަލިފާންގަނޑާ ދުރަށް ދުވަމުންނެވެ.
އިރާގުގެ ބޮޑުވަޒީރު މުސްޠަފާ އަލްކާޡިމީ މި ޙާދިސާ ސިފަކުރައްވާފައި ވަނީ "ގައުމީ ސަލާމަތަށް ގުޅިފައިވާ ބޮޑު ހިތާމައެއް"ގެ ގޮތުގައެވެ. އޭނާ ވަނީ ތިން ދުވަހުގެ ގައުމީ ހިތާމަ އިއުލާންކުރައްވައި، ތަހުގީގެއް ހިންގައި ޒިންމާވާ މީހުންނަށް އަދަބު ދިނުމަށް ގޮަވައިލައްވާފައެވެ.
އިރާގުގެ ހިއުމަން ރައިޓްސް ކޮމިޝަނުން ނެރުނު ބަޔާނެއްްގައިވަނީ ހެލްތު މިނިސްޓަރު ޙަސަން އައްތަމީމީ ވަގުތުން މަގާމުން ދުރުކުރުމަށް ބޮޑުވަޒީރު އަލްކާޡިމީއަށް ގޮވައިލާފައެވެ. އެ ބަޔާނުގައި ބުނެފައިވާ ގޮތުގައި އިބްނުލްޚަޠީބު ހޮސްޕިޓަލުގައި އަލިފާން ރޯވުން ސިފަކުރެވޭނީ ހޮސްޕިޓަލުން ފަރުވާހޯދަން ދިޔަ ބަލިމީހުންނާ ދެކޮޅަށް ހިންގި ޖަރީމާއެއްގެ ގޮތުގައެވެ.
"އެމީހުން އެތަނަށް ދިޔައީ ބަލި ބޮޑުވުމުން ފަރުވާހޯދަން. އެކަމަކު ނަތީޖާއަކަށްވީ ޝިފާލިބުމުގެ ބަދަލުގައި އަނދައިގެން ދިއުން." އެ ބަޔާނުގައި ވެއެވެ.
ސިއްހީ ދާއިރާގެ އޮފިޝަލުންނާ ހަވާލާދީ އޭއެފްޕީން ބުނެފައިވާ ގޮތުގައި އޮކްސިޖަން ސިލިންޑަރެއް ގޮވައި އަލިފާން ރޯވާން ދިމާވީ އޮކްސިޖަން ގެންގުޅުމުގައި އަޅަންޖެހޭ ސަލާމަތީ ފިޔަވަޅުތައް އަޅާފައި ނުވާތީއެވެ.
އިރާގު ސިވިލް ޑިފެންސްގެ ޑިރެކްޓަރު ކާޡިމް ބޫހާން ވިދާޅުވި ގޮތުގައި އަލިފާނުގެ ހާދިސާ ހިނގިއިރު 120 ބަަލިމީހުން ތިބި އެ ހޮސްޕިޓަލުގައި އަލިފާންނިވާ ނިޒާމެއް ގާއިމުކޮށްފައި ނުވެއެވެ. އަދި ބާވެފައިވާ އެ އިމާރާތުގައި ހުރީ އަލިފާން ނިވަން ބޭނުންކުރާ ވަރަށް އާދައިގެ ވަސީލަތްތަކެވެ. އެއީ އެކަމަށް ފުދޭ ވަސީލަތްތަކެއް ނޫނެވެ.
ބޮޑުވަޒީރު އަލްކާޡިމީ ވަނީ މި ހާދިސާގެ ތަހުގީގު ނިމެންދެން ހެލްތު މިނިސްޓްރީގެ ބައެއް އޮފިޝަލުންނާއި އިބްނުލްޚަޠީބް ހޮސްޕިޓަލުގެ ޑިރެކްޓަރު ވަގުތީގޮތުން މަގާމުގެ މަސްއޫލިއްޔަތުން ދުރުކުރައްވާފައެވެ.
ހާދިސާގައި ޒަޚަމްވި މީހުންނާއި އެއްވެސް ގެއްލުމެއް ނުވާ މީހުން ވަނި އެމްބިއުލެންސްތަކުގައި އެހެން ހޮސްޕިޓަލްތަކަށް ބަދަލުކޮށްފައެވެ.
ފެބްރުވަރީ 2020 ގައި އިރާގުން ކޮވިޑް-19 އަށް މީހަކު ފުރަތަމައަށް ޕޮޒިޓިވްވި ފަހުން އެ ގައުމުގައި 1 މިލިއަން 25 ހާސް މީހުން ވަނީ އެ ބައްޔަށް ޕޮޒިޓިވްވެފައެވެ. މިއީ، އަރަބި ގައުމެއްގައި ޕޮޒިޓިވްވި އެންމެ މަތީ އަދަދެވެ. އިރާގުގައި މިބަލީގައި 15 ހާހަށްވުރެ ގިނަ މީހުން ވަނީ މަރުވެފައެވެ.
