ކޮވިޑް-19އާ މުޅި ދުނިޔެ ހަނގުރާމަ ކުރާ މި ބިރުވެރި ދުވަސްވަރު ފޮތް ކިޔުމާއި، ކިޔައިދިނުމާއި ފޮތްތެރިކަމުގެ މުހިންމުކަން އިހުނަށްވުރެ ބޮޑަށް އިޙުސާސް ކުރެވޭކަމުގައި ފަންނާއި ސަގާފަތާއި ތަރިކައިގެ ވަޒީރު
ޔުމްނާ މައުމޫނު ވިދާޅުވެއްޖެއެވެ.
އެކަމަނާ މިހެން ވިދާޅުވީ ދުނިޔޭގެ ފޮތާއި ކޮޕީރައިޓްގެ ދުވަހުގެ މުނާސަބަތުގައި ދެއްވި މެސެޖުގައެވެ. މިމެސެޖުގައި އަކަމަނާ ވިދާޅުވެފައިވަނީ ކޮވިޑް-19ގެ އާލަމީ ވަބާއިން ރައްކާތެރިވުމުގެ ގޮތުން މީހުން އެއްވެއުޅޭ އާންމު ތަންތަނަށް ނިކުމެ ނޫޅުމުގެ ސަބަބުން އަޅުގަނޑުމެންނަށް ފޮތް ކިޔުމަށް ވަގުތު ލިބިގެންދާކަން ފާހަގަކުރެއްވޭކަމަށެވެ. އަދި ފޮތް ކިޔުމަށާއި ފޮތުން މަޢުލޫމާތު އުނގެނުމަށް ލިބިފައިވާ މިފުރުޞަތުގެ ބޭނުން ރަނގަޅަށް ހޯދުމަށް ވަޒީރުވަނީ އިލްތިމާސްކުރައްވާފައެވެ.
"މިދުވަސް މި އަހަރު އަޅުގަނޑުމެންނާއި މި ބައްދަލުކުރީ ބަރަކާތްތެރި ރަމަޟާންމަހުގައެވެ. ރަމްޟާން މަހަކީ މާތްﷲ ކީރިތ ރަސޫލާ ﷺ މެދުވެރިކުރައްވައި އަޅުގަނޑުމެންނަށް ބާއްވައިލެއްވި ކީރިތި ޤުރުއާނުގެ މައްސަރެވެ. މި މައްސަރުގައި އެފޮތް ގިނަގިނައިން ކިޔަވައި އެ ފޮތުގައިވާ އާޔަތްތަކުގެ މާނައާއި މެދު ވިސްނާ ފިކުރުކުރުމަކީ ނުހަނު ބޭނުންތެރިކަމެވެ." ވަޒީރު ޔުމްނާ ވިދާޅުވިއެވެ.
ފޮތްކިޔުމަކީ އިންސާނާގެ ސިކުނޑި ހުޅުވައިދޭ ކަމެއްކަން ފާހަގަކުރައްވައި ވަޒީރު ވިދާޅުވީ ފޮތްކިއުމަކީ އައު ކަންކަމަށް އިންސާނާ ވިސްނާ ފިކުރުކުރަން ދަސްކޮށްދޭ މަސްދަރެއްކަމަށެވެ. ފޮތެއް ހުޅުވާލުމަކީ އެހެން ދުނިޔެއަކަށް، އެހެން ތަޖުރިބާތަކަކަށް، އެހެން މާޙައުލަކަށް ހުޅުވާލެވޭ ދޮރެއްކަމަށާ، ކުދިންގެ ތަޢުލީމީ ބިންގާ ހަރުދަނާކުރުމަށްޓަކައި އެކުދިންނަކީ ފޮތް ކިޔާހިތްވާ، ފޮތްތެރިކަމަށް ލޯބިކުރާ ބައެއްގެ ގޮތުގައި ތަރުބިއްޔަތު ކުރައްވާށެވެ. މިފަދަ ދުވަސްވަރެއްގައި ފޮތް ކިޔުން އިތުރުކޮށް މިކަމުން އަރައިގަތުމަށް ހިތްވަރު ހޯދުމަށްވެސް ވަޒީރު ޔުމްނާވަނީ އިލްތިމާސްކުރައްވާފައެވެ.
ކޮންމެ އަހަރެއްގެވެސް އޭޕްރީލް މަހުގެ 23ވަނަ ދުވަހަކީ، ދުނިޔޭގައި ފާހަގަކުރާ ދުނިޔޭގެ ފޮތާއި ކޮޕީރައިޓްގެ ދުވަހެވެ. މި އަހަރުގެ ދުނިޔޭގެ ފޮތާއި ކޮޕީރައިޓްގެ ދުވަހުގެ ޝިޢާރަކީ "ވާހަކައެއް ޙިއްޞާކޮށްލަމާ" ނުވަތަ "ޝެއާރ އަ ސްޓޯރީ" މިއެވެ.
