މަޝްހޫރު ތްރީ ޗޮއިންސް ނުވަތަ ޑޮންޑޮން އުފައްދައި ޢާއްމުންނާހަމަށް ފޯރުކޮށްދިނުގައި އިސްކޮށް އުޅުއްވި ވިޔަފާރިވެރިޔާ ލޯޖެހި އަޙްމަދު މަނިކު އަވަހާރަވެއްޖެއެވެ.
އޭނާ އަވަހާރަވީ މިއަދު އިރު އޮއްސުމާ ދާދި ގާތްވެފައިވަނިކޮށް އިންޑިއާގެ ބެންގަލޫރުގެ މަނިޕާލް ހޮސްޕިޓަލުގައި ފަރުވާދެމުން ދަނިކޮށްކަމަށް މަޢުލޫމާތުލިބެއެވެ.
ލޯޖެހި އަޙްމަދު މަނިކަކީ ތަފާތު ބާވަތް ބާވަތުގެ ފިނި ބުއިންތައް ތައްޔާރުކުރައްވައި، ބާޒާރަށް ނެރުއްވަމުން ގެންދެވި ބޭފުޅެކެވެ. 1982 ން ފެށިގެން މި މަސައްކަތް މުޅިން އަމިއްލަ ކަމެއްގެ ގޮތުގައި ކުރައްވަމުން ވަޑައިގެން، 1989 ގައި ލޯކަލް އިންވެސްޓްމަންޓެއްގެ ގޮތުގައި އެ މަސައްކަތްވަނީ ރަޖިސްޓަރީ ކުރައްވާފައެވެ.
ލޯޖެހި އަޙްމަދުމަނިކަކީ ވިޔަފާރީގެ ދާއިރާގެ އިތުރުން، ގަލޮޅު އަވަށުގެ ވަރަށް އިސް ބޭފުޅެކެވެ. އަވަށު ފެންވަރުގައާއި ޤައުމީ ފެންވަރުގައި ކުރެވޭ ގިނަ މަސައްކަތްތަކުގައި ޢަމަލީގޮތުން ބައިވެރިވެވަޑައިގެން، ހިލޭސާބަހަށް ގިނަގުނަ މަސައްކަތްތަކެއް ކޮށްދެއްވަމުން ގެންދަވާ ބޭފުޅެކެވެ. އަވަށު ފެންވަރުގައާއި، ޤައުމީ ފެންވަރުގައި ކުރެވޭ މަސައްކަތްތަކުގައި "ތްރީ ޗޮއިސް“ގެ ބުއިންތައް އޭނާ ހިލޭ ބައްސަވާފައިވެއެވެ.
ރާއްޖޭގެ ކުޅިވަރުގެ ތާރީޚުގައި އެންމެ ކާމިޔާބު އެއް ކްލަބްކަމަށްވާ ވިކްޓްރީ ސްޕޯޓްސް ކްލަބް ހިންގެވުމުގައިވެސް ލޯޖެހި އަޙްމަދު މަނިކަކީ ވަރަށް އިސް ދައުރެއް އަދާކުރެއްވި އަދި އެކްލަބަށް ބޮޑެތި ޤުރްބާނީތަކެއް ވެވަޑައިގެންފައިވާ ބޭފުޅެކެވެ.
އޭނާއަށް ސަރުކާރުންވަނީ 1997ވަނަ އަހަރު ޢާއްމު ޚިދުމަތުގެ ހިތްވަރުދިނުމުގެ ޢިނާމު ދެއްވާފައެވެ. އަދި 2009ވަނަ އަހަރު ކުދި ވިޔަފާރިއާއި މެދުފަންތީގެ ވިޔަފާރީގެ ދާއުރާއިން އުފެއްދުންތެރިކަން އިތުރުކުރުމުގެ ރޮނގުން ޝަރަފްވެރިކަމުގެ ޤައުމީ އިނާމު ދެއްވާފައެވެ.
