ތ.އަތޮޅު ގާދިއްފުއްޓާއި ލ.އަތޮޅު މާވަށުގައި ނިމިދިޔަ ލޯކަލް ކައުންސިލް އިންތިޚާބުގެ ވޯޓުލުން އަލުން ކުރިއަށްގެންދަން އިލެކްޝަންސް ކޮމިޝަނުން ނިންމައިފިއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި އިލެކްޝަންސް ކޮމިޝަނުގެ ރައީސް އަޙްމަދު ޝަރީފް ވިދާޅުވީ އެ ދެ ރަށުގައި އަލުން ވޯޓުލާން އެކޮމިޝަނުން ނިންމެވީ އެދެ ރަށަށް ނިސްބަތް ނުވާ ބައެއް މީހުން އިންތިޚާބުގައި ބައެއް ފޮށިތަކަށް ވޯޓުލާފައިވާކަން ސާބިތުވެފައި ވާތީކަމަށެވެ.
އެގޮތުން ގާދިއްފުށީ ކައުންސިލަށް ކުރިމަތިލެއްވި އެމްޑީޕީގެ ކެންޑިޑޭޓް މަރްޔަމް ހަސަނާއި ޕީޕީއެމްގެ ކެންޑިޑޭޓް ހައްވާ އަބްދުލްހާދީއާ ދެބޭފުޅުންގެ މެދުގައި އަލުން ވޯޓުލުން ކުރިއަށްގެންދަންވަނީ ނިންމަވާފައެވެ. އަދި މާވަށު ކައުންސިލްގެ ރައީސް ކަމުގެ މަޤާމަށް ވާދަކުރެއްވި ކެންޑިޑޭޓުންގެ ވޯޓު އެކަންޏެވެ.
އެހެންނަމަވެސް މި 2 ރަށުގައި ވޯޓުލުން ބާއްވާނެ ތާރީޚެއް ފަހުން ޢިއުލާންކުރައްވާނެކަމަށް މިރޭ އިލެކްޝަންސް ކޮމިޝަނުން ވަނީ ވިދާޅުވެފައެވެ. އަދި މިދެ ރަށުގައިވެސް ވޯޓުލެވޭނީ މިހާރު ރަޖިސްޓްރީވެފައިވާ ފަރާތްތަކަށް އެކަނިކަމަށްވެސް އެކޮމިޝަނުން ވިދާޅުވެއެވެ.
