އަންނަ ބުދަ ދުވަހުގެ ރޭ އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)އާއި ޕީޕަލްސް ނެޝަނަލް ކޮންގްރެސް (ޕީއެންސީ)އިން ބޮޑު އިހުތިޖާޖެއް ފަށާނެކަން ހާމަކޮށްފިއެވެ.
މިއަދު ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މި ޙަރަކާތާ ގުޅޭގޮތުން ވާހަކަފުޅުދައްކަވަމުން ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވިދާޅުވީ މި އިހުތިޖާޖަކީ ޤާނޫނީ އިމުގެ ތެރެއިން ކުރިއަށްގެންދާ ޙަރަކާތެއްކަމަށާ، މަޤްސަދަކީ ޖަލުގައި ހުންނެވި އެޕާޓީގެ ރައީސް އަދި ކުރީގެ ރައީސް އަބްދުﷲ ޔާމީން ޖަލުން މިނިވަންކުރުމަށް ގޮވާލުންކަމަށެވެ.
ރައީސް ޔާމީނަށް ނުޙައްޤުން ޖަލުގައި އަނިޔާ ދެމުންދާކަމަށް ޕީޕީއެމްއިން ތުހުމަތުކުރެއެވެ. ދަށުކޯޓުތަކުން އެމަނިކުފާނުގެ މައްޗަށް އިއްވާފައިވާ ޙުކުމަކީ ސަރުކާރުގެ ނުފޫޒުން އިއްވާފައިވާ ނުޙައްޤު ޙުކުމެއްކަމަށްވެސް އެޕާޓީން އަންނަނީ ތުހުމަތުކުރަމުންނެވެ.
މިއަދުގެ ނޫސްވެރިންގެ ބައްދަލުވުމުގައި ޕީޕީއެމްއިން ބުނީ ޑިމޮކްރަސީގެ ރީތި އުސޫލުތަކުގެ ތެރެއިން ރައީސް ޔާމީނަށް ލުޔެއް ދޭތޯވެސް އެތައް މަސައްކަތްތަކެއް ކުރެވިއްޖެކަމަށެވެ. އެގޮތުން ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހުގެ އަރިހަށް ޕީޕީއެމްއިން ގޮސް ރައީސް ޔާމީނަށް ލުޔެއް ލިބޭތޯ މަސައްކަތް ކުރެއްވި ކަމަށާ ނަމަވެސް މިއިންކަމަކަށް ސަރުކާރުން އެދެވޭ އިޖާބައެއް ނުދެއްވިކަމަށެވެ. އެހެންކަމުން އިންސާފު ހޯދުމަށް އަނެއްކާވެސް މަގުމައްޗަށް ނިކުންނަން ޕީޕީއެމްއާއި ޕީއެންސީން ނިންމީކަމަށްވެސް އެދެޕާޓީގެ ފަރާތުން ބުނެޏެވެ.
މީގެކުރިންވެސް ޕީޕީއެމްއާއި ޕީއެންސީން ސިލްސިލާކޮށް އިހުތިޖާޖުކުރަމުން އައެވެ. އެއިހުތިޖާޖުތައް ރޯދައަށް މަޑުޖައްސައިލިއެވެ. އަނެއްކާވެސް ބުދަ ދުވަހުގެ ރޭ ބޮޑު އިހުތިޖާޖެއް ފަށާނެކަން އެފަރާތުން މިވަނީ ހާމަކޮށްފައެވެ. އިހުތިޖާޖު ފަށަން ހަމަޖެހިގައި ވަނީ ބުދަ ދުވަހުގެ ރޭ 9:45 ގައި ޕީޕީއެމް އޮފީސް ކުރިމަތިންނެވެ.
