ނިމިދިޔަ ލޯކަލް ކައުންސިލް އިންތިޚާބުގެ ބައެއް ދާއިރާތަކުގެ ވޯޓުފޮށިތައް އަލުން ގުނަން އުޅޭކަމަށްބުނެ މިއަދު އިންތިޚާބާބެހޭ މައި މަރުކަޒު ސަރަޙައްދުގައި ހަމަނުޖެހުން އުފެއްދި ނަމަވެސް އެއްވެސް ފޮށްޓެއް މިއަދު އަލުން ނުގުނާކަމަށް އިލެކްޝަންސް ކޮމިޝަނުން ބުނެފިއެވެ.
އިންތިޚާބުގެ 18 ވޯޓު ފޮށްޓެއްގެ ހުޅުވައި އަލުން ގުނަން އުޅޭކަމަށް މިއަދު އަޑުފެތުރުނެވެ. އެހެންނަމަވެސް މިއަދު އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމުގައި އެކޮމިޝަނުގެ ރައީސް އަޙްމަދު ޝަރީފް ވިދާޅުވީ މިއަދު ހެނދުނުން ފެށިޮގެން އިންތިޚާބީ މަރުކަޒުދޮށުގައި އިދިކޮޅު ޕީޕީއެމްގެ ސަޕޯޓަރުން ތިބި ކަމަށެވެ. އެމީހުން އެތަނަށް ދިޔަކަމަށް ވަނީ ވޯޓުފޮށިތައް އަލުން ގުނަން އުޅޭކަމަށް ބުނެއެވެ. އެހެންނަމަވެސް އެމީހުން އިންތިޚާބާބެހޭ މަރުކަޒުގެ އެތެރެއަށް ވަދެފައި ނުވާކަމަށާ، އިލެކްޝަންސް ކޮމިޝަނުންވާނީ އެމީހުންނާ ވާހަކަދައްކައިގެން އެމީހުންގެ ނުތަނަވަސްކަން ޙައްލުކުރުމަށް މަސައްކަތް ކޮށްފައިަކަމަށެވެ.
އެހެންނަމަވެސް އޭގެފަހުން އެމްޑީޕީގެ ރައީސް މުޙައްމަދު ނަޝީދާއި އެމްޑީޕީގެ ބައެއް ބޭފުޅުން އެސަރަޙައްދަށް ވަޑައިގަތުމާއެކު ހަމަނުޖެހުން އުފެދުނުކަމަށް އިލެކްޝަންސް ކޮމިޝަނުން ވިދާޅުވިއެވެ.
މިހާތަނަށް ބަލާއިރު، އިންތިޚާބުގެ ނަތީޖާއާއަށް އަސަރުކުރާވަރުގެ މައްސަލައެއް ހުށަހަޅާފައި ނެތްނަމަވެސް އިންތިޚާބުގެ ދާއިމީ ނަތީޖާ އިއުލާން ކުރުމުގެ ކުރިން ސިޔާސީ ޕާޓީތަކުން ހުށަހަޅާފައިވާ 89 ޝަކުވާ ބަލާނެކަމަށް އިލެކްޝަންސް ކޮމިޝަނުން ވިދާޅުވެއެވެ.
