އީރާނުގެ ނަތަންޒް ނިއުކުލިޔާ މަރުކަޒުގެ ބިމުއަޑީގައި ހުންނަ ޔުރޭނިއަމް ފައްކާކުރާ މަރުކަޒުގައި، ޔުރޭނިމް ފައްކާކުރުން އިތުރަށް ތަރައްގީކޮށް އެކަމަށް ބޭނުންކުރާ ސެންޓްރިފިއުޖް ގެ މަސައްކަތް ފެށިތާ އެއްދުވަސް ވެސް ނުވަނީސް އިއްޔެ އެ މަރުކަޒުން ވަނީ ކަރަންޓު ކެނޑިފައެވެ.
އީރާނުން ބުނި ގޮތުގައި މިއީ ބޭރު ގަައުމަކުން ހިންގި "ނިއުކުލިޔާ ޓެރަރިޒަމް"ގެ އަމަލެކެވެ.
"ގޮތް ހުސްވެފައި ތިބި ބަޔަކު ހިންގި މި އަމަލު ކުށްވެރިކުރާ ހިނދު، މި ނިއުކުލިޔާ ޓެރަރިޒަމާ ބައިނަލް އަގުވާމީ އިދާރާތަކުންނާއި އިންޓަނޭޝަަލް އެޓޮމިކް އެނާޖީ އެޖެންސީން ކުރިމަތިލުމުގެ މުހިއްމުކަން އިސްލާމިކް ރިޕަބްލިކް އެޮފް އީރާނުން ފާހަގަކުރޭ." އިއްޔެ ހިނގައިދިޔަ ހާދިސާއާ ގުޅޭގޮތުން އެޓޮމިކް އެނާޖީ އޮގަނައިޒޭޝަން އޮފް އީރާން (އޭއީއޯއައި) ގެ ވެރިޔާ ޢަލީ އަކްބަރް ޞާލިޙީ ވިދާޅުވިއެވެ.
އީރާނުން ވަކި ގައުމަކަށް އިޝާރާތްކޮށްފައި ނުވި ނަމަވެސް ބައެއް ޚަބަރުތައް ބުނާ ގޮތުގައި ނަތަންޒްގައި އިއްޔެ ހިނގި ހާދިސާގެ ފަހަތުގައި ވަނީ އިސްރާއީލެވެ.
ޖާސޫސީ މަސްދަރަކާ ހަވާލާދީ އިސްރާއީލުގެ ކާން ޕަބްލިކް ރޭޑިޔޯއިން ބުނި ގޮތުގައި ނަތަންޒްގެ ނިއުުކުލިޔާ މަރުކަޒަށް ސައިބާ ހަމަލާއެއް ދީފައި ވަނީ އިސްރާއީލުގެ ޖާސޫސީ އިދާރާ މޯސާދުންނެެވެ.
އޭއީއޯއައިގެ ތަރުޖަމާނު ބެހްރޫޒް ކަމާލްވަންދީ ވިދާޅުވި ގޮތުގައި އިއްޔެގެ ހާދިސާ ހިނގާފައި ވަނީ ނިއުކުލިޔާ މަރުކަޒުގެ ކަރަންޓު ޑިސްޓްރިބިއުޝަނަށް ދިމާވި މައްސަލައަކުންނެވެ. އެހެންނަމަވެސް، އެހާދިސާގެ ސަބަބުން އެއްވެސް މީހަކަށް ގެއްލުންވެ، ރޭޑިއޭޝަން ލީކުވުން ކަހަލަ ކަމެއް ހިނގާފައި ނުވެއެވެ.
އީރާނުގެ މެދުތެރޭ ޕްރޮވިންސެއް ކަމަށްވާ އިސްފަހާންގެ ހަނަފަސް ސަަހަރާއެއްގައި ހުންނަ ނަތަންޒް ނިއުކުލިޔާ މަރުކަޒަކީ އީރާނުގެ ނިއުކުލިޔާ ޕްރޮގްރާމުގެ މައި ތަނބެވެ. އަދި އެ މަރުކަޒަކީ އދ. ނިއުކުލިޔާ ހަކަތައާ ބެހޭ އިދާރާ، އިންޓަނޭޝަނަލް އެޓޮމިކް އޭނާޖީ އެޖެންސީ (އައިއޭއީއޭ) މޮނިޓާކުރަމުންދާ ތަނެކެވެ.
އީރާނުން ނިއުކުލިޔާ ހަތިޔާރު އުފައްދައި އެގައުމާ ދެކޮޅަށް ބޭނުންކޮށްފާނެ ކަމަށް ބުނަމުންދާ އިސްރާއީލުން އިއްޔެގެ ހާދިސާއާ ބެހޭގޮތުން އެއްވެސް އެއްޗެއް ބުނެފައި ނުވެއެވެ.
"އަހަރުމެންނަށްވެސް އެ ހާދިސާގެ ރިޕޯޓު ލިބިފައިވަނީ ޚަބަރުފަތުރާ ވަސީލަތްތަކުން. މިވަގުތު އަހަރުމެން ބުނާނެ އިތުރު އެއްޗެއް ނެތް." އިއްޔެ ހާދިސާއާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން އައިއޭއީއޭގެ ތަރުޖަމާނު ވިދާޅުވިއެވެ.
ޖާސޫސީ މަސްދަރަކާ ހަވާލީ ކާން ރޭޑިޔޯއިން ބުނިގޮތުގައި، ނިއުކުލިޔާ މަރުކަޒަށް ލިބުނު ގެއްލުން ހާމަކޮށްފައި ނުވިޔަސް، އިއްޔެގެ ހާދިސާގައި އެ މަރުކަޒަށް ވަނީ ގެއްލުންތަކެއް ލިިބިފައެވެ.
އިސްރާއީލުގައި އޮތް ރަސްމިއްޔާތެއްގައި ވާހަކަދައްކަމުން، ނަތަންޒްް މަރުކަޒުގެ ހާދިސާއަށް އިޝާރާތް ނުކުރިނަމަވެސް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ އީރާނުގެ ނިއުކުލިޔާ ޕްރޮގްރާމަށް އިޝާރާތްކޮށްފައެވެ.
"އީރާނުގެ ނިއުކުލިޔާ މަސައްކަތާ ދެކޮޅަށް ހަނގުރާމަކުރުމަކީ ވަރަށް ބޮޑު މަސައްކަތެއް." ނަތަންޔާހޫ ބުންޏެވެ.
