ބިސްމި އަކީ އިސްލާމީ ޘަޤާފަތުގައި ، ވަރަށްމުހިންމު ދައުރެއް އަދާކުރާ ކަލިމައެކެވެ. އިސްލާމުން ، އެއްވެސްކަމެއް ކުރަން ފައްޓާނީ ، ﷲ ގެ އިސްމުފުޅުންނެވެ. އެއީ ﷽ އެވެ. ރަސޫލު ޞައްލަﷲ ޢަލައިހި ވަސައްލަމަގެ ސުންނަތާއި ، އެކަލޭގެފާނުގެ އަހުލުބައިތުން އަދި އަޞްޙާބު ބޭކަލުންގެ ފަރާތްޕުޅުން އައިސްފައިވާ އާދައެކެވެ. ކީރިތި ޤުރުއާނަކީ ، ﷲ ގެ ކަލާމްފުޅެވެ. އެކަލާނގެ ރުހިވޮޑިގެންވާ މަގު ބަޔާން ކޮށްދެއްވައި ، މުޅި އިންސާނިއްޔަތަށް މަގުދައްކައި ދުނިޔެއާއި އާޚިރަތުގެ ބާއްޖަވެރިކަމަށް ބޭނުންވާ އިންސާނާ ޢަމަލުތައް ބަހައްޓަންވީ ގޮތުގެ އިލާހީ ޤާނޫނެވެ. ކީރިތި ޤުރުއާން ފެށެނީ ބިސްމި އިންނެވެ. ސޫރަތުލްބަޤަރާ ، ނުވަތަ އައްތައުބާ ސޫރަތް ފިޔަވައި ، ކީރިތި ޤުރުއާނުގެ ކޮންމެ ސޫރަތެއް ފެށެނީވެސް ބިސްމި އިންނެވެ. އިސްލާމީ ގިނަ ޤައުމުތަކުގެ ރަސްމީ ލިޔެކިޔުން ފެށެނީ ބިސްމި އިންނެވެ. ބިސްމީގެ މާނަޔަކީ ، ރަޙުމާނުވަންތަ ، ރަޙީމުވަންތަ ، ﷲ ގެ އިސްމުފުޅުން ފަށައިގަންނަމެވެ.
މިބިސްމި ނެގިފައިވަނީ ، ރަސޫލު ޞައްލަﷲ ޢަލައިހި ވަސައްލަމަގެ ފަރާތްޕުޅުން ، މިޞްރުގެ އާރޗްބިޝޮޕަށް ފޮނުއްވާފައިވާ ސިޓީފުޅަކުންނެވެ. އެސިޓީފުޅު ލިޔުއްވައިފައިވަނީ ، ހިޖުރީ ސަނަތުން 5 ވަނަ އަހަރުއެވެ. އަދި މީލާދީ ސަނަތުން 627 ވަނަ އަހަރުއެވެ. މިސިޓީފުޅު ރައްކައުކުރެވިފައިވަނީ ، ތުރުކީގެ އިސްތަންބޯލުގެ ޓޮޕްކަޕީ މިއުޒިއަމްގައެވެ. ސިޓީފުޅު ލިޔުއްވީ ކޮންބޭފުޅެއްކަން އެނގޭކަށް ނެތެވެ. އެއީ ، ރަސޫލު ޞައްލަﷲ ޢަލައިހި ވަސައްލަމަގެ އަރިސް އަޞްޙާބު ބޭކަލުންކުރެ ، ވަރަށް ގިނަބޭކަލުން ލައްވައި ، އެކަލޭގެފާނުގެ ފާރާތްޕުޅުން ސިޓީ ލިޔުއްވައި އުޅުއްވިއެވެ. އޭގެ ތެރެއިން އެއްބޭކަލަކީ ، ޒުވާން ޞާޙާބީއެއް ކަމުގައިވާ ޒައިދް ބިން ޘާބިތެވެ. މިކަލޭގެފާނަކީ ، އެކި ސަހަރުތަކުގެ ވެރިންނަށް ، ރަސޫލު ޞައްލަﷲ ޢަލައިހި ވަސައްލަމަގެ ފަރާތްޕުޅުން ފޮނުއްވާ ، ވަރަށް ގިނަ ސިޓީފުޅު ލިޔުއްވައިފައިވާ ބޭކަލެކެވެ.
މިއީ ، ޢުސްމާނީ ޚިލާފަތުގެ ދުވަސްވަރު އެންމެ ފުރަތަމަ ލިޔެވުނު ، ކީރިތި ޤުރުއާނުގެ އަޞްލުތަކުގައި ބިސްމި ލިޔެވިފައި ހުރި ގޮތެވެ. މިބިސްމިވެސް ، ތުރުކީގެ އިސްތަންބޯލުގެ ޓޮޕްކަޕީ މިއުޒިއަމްގައި ބެހެއްޓިފައި ވެއެވެ.
މިބިސްމިއަކީ ، އަމީރުލް މުއުމިނީން ، ޢަލީ ބިން އަބީ ޠާލިބު ، ރަޟިޔަﷲ ޢަންހު ލިޔުއްވައިފައިވާ ބިސްމިއެކެވެ. ބެލެވޭގޮތުގައި ލިޔުއްވައިފައިވަނީ ، ޢަލީ ރަޟިޔަﷲ ޢަންހުގެ އަތްޕުޅުންނެވެ. ބިސްމިއަކީ ، ޒަމާނަށް އައި ބަދަލުތަކުގައި އެކި ލިޔުންތެރިން ، ރީތި އެތައްގޮތަކަށް މިހާރު ލިޔުއްވަމުން އަންނަ ކަލިމައެކެވެ. އެކި ނަންނަމުގައި އުފެދިފައިހުންނަ ފޮންޓްތަކުން ، އެކި ޑިޒައިނަށް ލިޔެވިގެން ބޭނުންކުރެވިގެން ދެއެވެ.
މިއަދު ، އެންމެ ޢާންމުކޮށް ބޭނުންކުރެވޭ ބިސްމިއަކީ މަތީގައި ނަކަލުކުރެވިފައިވާ ބިސްމިއެވެ. އެއީ ، ނަސްތަލީޤު ފޮންޓުން ލިޔެވިފައިވާ ބިސްމި އެކެވެ. މިއީ އިންޑިއާއާއި ޕާކިސްތާން ގައި އުރުދޫން އަދި އިރާން ގައި ފާރިސީން ބިސްމި ލިޔުމުގައި ބޭނުންކޮށް އުޅޭ ގޮތެވެ. ޕާކިސްތާނުގައި ، މީގެ 10 ވަރަކަށް އަހަރުކުރިން ، ނޫސްލިޔާއިރު އަތުން ބިސްމި ލިޔަމުން ގެންގޮސްފައިވަނީވެސް މިފޮންޓުންނެވެ. އެހެންނަމަވެސް ، މިޒަމާނުގައި ކޮމްޕިއުޓަރު ބޭނުންކޮށްގެން ތަފާތު ފޮންޓުން ، އެކިގޮތަށް ބިސްމި ބޭނުންކުރަމުން އެބަ ގެންދެއެވެ.
