މިފެށޭ ރަމަޟާން މަހުގެ ފުރަތަމަ ދުވަހުން ފެށިގެން ޢުމްރާގެ އަޅުކަން އަދާކުރުމަށާއި، ނަމާދުކުރުމަށް މައްކާގެ ޙަރަމްފުޅަށް (އަލްމަސްޖިދުލް ޙަރާމަށް) ވަަދެވޭނީ އަދި މަދީނާގެ މަސްޖިދުއް ނަބަވީއަށް ވަދެވޭނީ ކޮވިޑް-19 އާ ދެކޮޅަށް ރައްކާތެރިކަން ލިބިފައިވާ މީހުންނަށް ކަމުގައި ސައޫދީ އަރަބިއްޔާގެ މިނިސްޓްރީ އޮފް ހައްޖު އެންޑް އުމްރާއިން ކަނޑައަޅައިފިއެވެ.
އެ މިނިސްޓްރީގެ މަސްދަރަކާ ހަވާލާދީ އިއްޔެ ސައޫދީ ޕްރެސް އެޖެންސީން ބުނެފައިވާ ގޮތުގައި ރައްކާތެރިކަން ލިބިފައިވާ މީހުންކަމަށް ބަލާފައިވަނީ ކޮވިޑް-19 ގެ ދެ ޑޯޒް ފުރިހަމަކޮށްފައިވާ މީހުންނާއި، ފުރަަތަމަ ޑޯޒް ޖެހިފަހުން 14 ދުވަސް ވެފައިވާ މީހުންނާއި، ކޮވިޑް-19 ކުރިން ޖެހިފައިވާ މީހުންނެވެ.
ކޮވިޑް-19 ވެކްސިން ޖަހާފައިވާ ކަމުގެ ލިއުމާއި، ބަލި ޖެހިފައިވާ ކަން އަންގައިދޭ ލިއުން ހުށަހަޅަން ޖެހޭނީ 'އިޢުތަމަރްނާ' އަދި 'ތަަަވައްކަލްނާ' އެޕްލިކޭޝަންތައް ބޭނުންކޮށްގެނެވެ. ޢުމްރާގެ އަަޅުކަން އަދާކުރާ ކޮންމެ މީހަކުވެސް އިޢުތަމަރްނާ އެޕްލިކޭޝަނުގައި ރަޖިސްޓަރީވާން ޖެހެއެވެ. ރަޖިސްޓަރީވުމުން ޢުމްރާގެ އަޅުކަމަށް ޙަރަމްފުޅަށް ވަދެވޭނެ ދުވަހާއި ގަޑި އެ އެޕްލިކޭޝަނުން ދޭނެއެެވެ.
ރަމަޟާން މަހުގެ ފުރަތަމަ ދުވަހުން ފެށިގެން ކޮވިޑް-19 އާ ދެކޮޅަށް ރައްކާތެރިކަން ލިބިފައިވާ މީހުންނަށް އެކަނި ޢުމްރާގެ ހުއްދަދޭން ނިންމި ނިންމުން ރަމަޟާން މަހަށް ފަހު ދަަމައްޓާނެ ކަމެއް އަދި މިއަހަރު ޙައްޖުގެ އަޅުކަމަށް ވެސް އެ ޝަރުޠު ކަނޑައަޅާނެ ކަމެއް ސައޫދީ މަސްއޫލުވެރިން އަދި ހާމަކޮށްފައި ނުވެެއެވެ.
ރަމަޟާން މަހާ ދިމާކޮށް ޙަރަމްފުޅަށް ވަދެވޭ މީހުންގެ އަދަދު އިތުރުކޮށްފައިވާ ކަމަށްވެސް ޙައްޖު މިނިސްޓްރީން ބުނެފައި ވެއެވެ. އެެހެންނަމަވެސް، ވަކި އަދަދެއް ހާމަކޮށްފައި ނުވެއެވެ.
ސައޫދީ އަރަބިއްޔާގައި މިހާތަނަށް 4 ލައްކައެއްހާ މީހުން ކޮވިޑް-19 އަށް ޕޮޒިޓިވް ވެފައި ވާއިރު، 6 ހާސް 700 މީހުން ވަނީ އެބަލީގައި މަރުވެފައެވެ. އަދި އެ ގައުމުން ހާމަކޮށްފައިވާ ގޮތުގައި އެ ގައުމުގެ 34 މިލިއަން މީހުން އާބާދީގެ 5 މިލިއަން މީހުންނަަށް ކޮވިޑް-19 ވެކްސިން ޖަހާފައި ވެއެވެ.
