އައްޑޫ ސިޓީ ހިތަދޫ ބަނދަރު ތަރައްޤީކުރުމުގެ ޢަމަލީ މަސައްކަތް މިއަދު ފަށައިފިއެވެ.
މިމަޝްރޫޢުގެ މަސައްކަތް ކުރުމަށް ޙަވާލުކޮށްފައިވަނީ އެމްޓީސީސީއާއެވެ. މިމަޝްރޫޢުގެ މަސައްކަތުގެ ތެރޭގައި ހިތަދޫގައި މިހާރު ބޭނުންކުރަމުން އަންނަ ޒަމާންވީ ބަނދަރު މުޅިން އަލުން މަރާމާރުކޮށް ހަދަންޖެހެއެވެ. އެއާއެކު ބަނދަރުގެ 284މީޓަރުގެ ސަރަޙައްދެއް ޒަމާނީ ފެންވަރަށް އަލުން ތަރައްޤީކުރުމަށް ހަމަޖެހިފައިވެއެވެ.
މިމަޝްރޫޢުގެ މަސައްކަތް ރަސްމީކޮށް ފެށީ މިއަދު ހިތަދޫގައި ބޭއްވި ޚާއްސަ ރަސްމިއްޔާތެއްގައެވެ. މިރަސްމިއްޔާތުގައި އެމްޓީސީސީގެ ސީއީއޯ އާދަމް އާޒިމާއި އައްޑޫ ސިޓީގެ މޭޔަރ ޢަބްދުﷲ ޞާދިޤާއި ރައްޔިތުންގެ މަޖިލީހުގެ ބައެއްމެމްބަރުން ބައިވެރިވެވަޑައިގަތެވެ.
ހިތަދޫ ބަނދަރުގެ މިހާރުގެ ޙާލަތާއި ބަނދަރު އަލުން ތަރައްޤީކުރުމުން ލިބިގެންދާނެ ފަސޭހަކަމުގެ މައްޗަށް އައްޑޫ ސިޓީގެ މޭޔަރު ޢަބްދުﷲ ޞާދިޤު ވަނީ ވާހަކަފުޅުދައްކަވާފައެވެ. އެގޮތުން މއުޅަނދުފަހަރު ލަފާފުރުމާއި ބަނދަރުގައި އެޅާފައި ބޭއްވުމުގައި ވަރަށް ގިނަ ދަތިތަކެއް ކުރިމަތިވާކަން ފާހަގަކުރެއްވިއެވެ. ހިތަދޫ ބަނދަރަކީ މިހާރު އޮންނަގޮތުން ބޭރު ތޮއްޓެއް ނެތް ބަނދަރަކަށްވާތީ ވައިގަދަ މޫސުމުގައި ބަނދަރު ބޭނުންކުރުން ވެފައިވަނީ އުނދަގޫ ނުރައްކާބޮޑު ކަމަކަށްކަން މޭޔަރު ފާހަގަކުރެއްވިއެވެ.
މިއަދުގެ ރަސްމިއްޔާތުގައި އެމްޓީސީސީގެ ސީއީއޯ އާދަމް އާޒިމް ވިދާޅުވީ ހިތަދޫ ބަނދަރުގެ މަސައްކަތް ކަނޑައަޅާފައިވާ މުއްދަތުގެ ކުރިން ނިންމުމަށް އެމްޓީސީސީން މަސައްކަތް ކުރައްވާނެކަމަށެވެ. އެގޮތުން ކުރިއަށްއޮތް 3 ހަފްތާ ތެރޭ ބަނދަރުގެ ކީ ވޯލްގެ މަސައްކަތް ފަށާނެކަމަށާ، ބަނދަރު ނިމޭއިރު އޮންނާނީ ރިވެޓްމަންޓްޖަހައި ބަނދަރު ދިއްލާލާފައިކަމަށް އޭނާ ވިދާޅުވިއެވެ. އަދި މިއީ ރާއްޖޭގައި ހަދާ އެންމެބޮޑު ބަނދަރުތަކުގެ ތެރެއިން ބަނދަރަކަށްވާނެކަމަށްވެސް އާދަމް އާޒިމް ވިދާޅުވިއެވެ.
ހިތަދޫ ބަނދަރު ތަރައްޤިކުރުމުގެ މަސައްކަތުގެ އެއްބަސްވުމުގައި ސޮއިކުރީ އިއްޔެއެވެ. މިމަޝްރޫއުގެ ދަށުން ހިތަދޫ ބަނދަރު ފުންކޮށް 800 މީޓަރުގެ ސަރަޙައްދުގައި ބޭރު ތޮށި ލައި 1420އަކަމީޓަރުގެ ސަރަޙައްދެއްގައި ޕޭވްމަންޓު ހަދާނެއެވެ. މިއީ 52.43މިލިއަން ރުފިޔާގެ މަޝްރޫޢުއެކެވެ. މަޝްރޫޢު ނިންމަންޖެހޭ މުއްދަތަކީ އެއް އަހަރު ދުވަހެވެ.
