އައްޑޫ ސިޓީގެ ސަރަޙައްދީ ބަނދަރު ތަރައްޤީ ކުރުމަށް އެމްޓީސީސީއާ ޙަވާލުކޮށްފިއެވެ. ޖުމުލަ 211 މިލިއަން ރުފިޔާގެ މިމަޝްރޫޢު އެމްޓީސީސީއާ ޙަވާލުކޮށް އެކަމުގެ އެއްބަސްވުމުގައި މިއަދުވަނީ ސޮއިކޮށްފައެވެ.
ސަރަހައްދީ ބަނދަރުގައި ބޭއްވި ރަސްމީއްޔާތެއްގައި މިމަޝްރޫއުގެ އެއްބަސްވުމުގައި އެމްޓީސީސީގެ ފަރާތުން ސޮއިކުރެއްވީ އެކުންފުނީގެ ސީއީއޯ އާދަމް އާޒިމެވެ. އެމްޕީއެލްގެ ފަރާތުން ސޮއިކުރެއްވީ އެކުންފުނީގެ ސީއީއޯ ޝާހިދު ޢަލީއެވެ.
މިއަދުގެ ރަސްމިއްޔާތުގައި ވާހަކަދައްކަވަމުން ޝާހިދު ޢަލީވަނީ ސަރަޙައްދީ ބަނދަރަށް މިހާރު ކުރިމަތިވެފައިވާ ދަތިތައް ފާހަގަކުރައްވާފައެވެ. އެގޮތުން މޫސުމަށް އަންނަ ބަދަލުތަކާއެކު ބައެއްފަހަރު ބަނދަރުގެ މަގަތު ފާލަމަށް ބޯޓުފަހަރަށް ކައިރި ނުކުރެވިގެން ކުރިމަތިވާ ދަތިތަކާއި މުދާ ބޭލުމުގައި އުފުލަންޖެހޭ ތަކުލީފުތައް އޭނާ ފާހަގަކުރެއްވިއެވެ. މިމަޝްރޫޢާއެކު މިމައްސަލަތައް ޙައްލުވެ އިޤްތިޞާދީގޮތުންވެސް ކުރިއެރުންތަކެއް ލިބޭނެކަން އޭނާ ފާހަގަކުރެއްވިއެވެ.
އެމްޓީސީސީގެ ސީއީއޯ އާދަމް އާޒިމް ވިދާޅުވީ އެކުންފުނީގެ އަމާޒަކީ ވީހާވެސް އަވަސްމުއްދަތެއްގެތެރޭގައި މިމަސައްކަތް ނިމުންކަމަށެވެ. މިމަސައްކަތް އެމްޓީސީސީއާ ޙަވާލު ކޮށްފައިވަނީ ދޮޅު އަހަރު ދުވަހުގެ ތެރޭގައި ނިންމާގޮތަށެވެ. އެގޮތުން މިމަޝްރޫޢާއެކު އައްޑޫ ސަރަޙައްދީ ބަނދަރު ފުން ކުރުމާއި، 8 ހެކްޓަރުގެ ސަރަހައްދެއްގެ ބިން ހިއްކުމާއި، 2360 މީޓަރުގެ ސަރަހައްދެއްގެ ބޭރު ތޮށި ލުން ހިމެނެއެވެ.
