އެސްޓީއޯއިން ވިއްކަމުންދާ ތެލުގެ ބާވަތްތަކުގެ އަގު ބޮޑުކޮށްފިއެވެ.
އެކުންފުނިން ހާމަކުރައްވާފައިވަގޮތުގައި ތެލުގެ އަގު ބޮޑުކުރަންޖެހުނީ ދުނިޔޭގެ ބާޒާރުގައި ތެލުގެ އަގު އުފުލެމުންދާތާ ދުވަސްތަކެއްވުމާ ގުޅިގެން، ރާއްޖެއަށް އެތެރެކުރާ ތެލުގެ އަގުވެސް އުފުލިފައިވާތީއެވެ. އެހެންކަމުން، ރާއްޖޭގައި އެކުންފުނިން ވިއްކާ ތެލުގެ ބާވަތްތަކުގެ ތެރެއިން ޕެޓްރޯލް ލީޓަރެއް މިހާރު ވިއްކުމަށް ހަމަޖެހިފައިވަނީ 8 ރުފިޔާ 85 ލާރިއަށެވެ. އަދި ޑީސެލް ލީޓަރެއް ވިއްކުމަށް ހަމަޖެހިފައިވަނީ 9 ރުފިޔާ 79 ލާރިއަށެވެ.
އެސްޓީއޯއިން ބުނީ މީގެ 4 މަސްކުރިން ދުނިޔޭގެ ބާޒާރުގައި ޔެތޮ ފީފާއެއްގެ އަގު ހުރި މިންވަރާ އަޅާ ބަލާއިރު، މިހާރު ތެޔޮ ފީފާއެއްގެ އަގުވަނީ 2 ގުނައަށް ބޮޑުވެފައިކަމަށެވެ. ދުނިޔޭގެ ބާޒާރުގައި ތެލުގެ އަގަށް މިއައި ބޮޑު ބަދަލާއެކު އެކުންފުނިން ވިއްކާ ތެލުގެ އަގަށް ބަދަލު ގެންނަންޖެހުނީ، ތެލުގެ ޚިދުމަތް ދެމެހެއްޓެނިވި ގޮތެއްގައި ދިނުމަށް އަޅަންޖެހޭ ފިޔަވަޅެއްގެ ގޮތުގައިކަމަށް އެސްޓީއޯއިން ބުނެއެވެ. އެހެންކަމުން 16 މާޗް އިން ފެށިގެން އެސްޓީއޯގެ ފިއުލް ސަޕްލައި މޯލްޑިވްސްގެ ޝެޑްތަކުން ތެޔޮ ގަންނަން ލިބޭނީ ފަހުން ބަދަލުކުރި އަގަށްކަމަށް އެސްޓީއޯއިން ބުނެއެވެ.
މިހާތަނަށް އެސްޓީއޯއިން ޕެޓްރޯލް ލީޓަރެއް ވިއްކަމުންދިޔައީ 8 ރުފިޔާ 44 ލާރިއަށެވެ. އަދި ޑީސެލް ލީޓަރެއް ވިއްކަމުން ދިޔައީ 9 ރުފިޔާ 19 ލާރިއަށެވެ.
އެނެމްފަހުން އެކުންފުނިން ތެލުގެ އަގަށް ބަދަލެއް ގެނައީ މިދިޔަ މަހުގެ 21ވަނަ ދުވަހުއެވެ.
